Преподобный Максим Грек - творения

Максим Грек. Слово, списано иноком Максимом Греком Cвятогорским, противу льстиваго списаниа Николая немчина, егоже списал о совокуплении православным християном и латыном 1

Память: 21 января / 3 февраля, 21 июня / 4 июля (Обретение мощей)

Преподобный Максим Грек (1470 - 1556) - высокообразованный греческий инок-переводчик и апологет за прямоту и правду попал в опалу в России: претерпел несправедливый суд, отлучение от Причастия, тюрьму, ссылку. Гонения не сломили его смиренный дух: он продолжал трудиться во благо гнавшей его Русской Церкви до самой смерти. Оставил после себя многочисленные богословские, апологетические, духовно-нравственные; сохранились также послания и письма к частным лицам.

Преподобный Максим Грек. Икона, XVIII век. Церковно-археологический кабинет Московской духовной академии

***

Господь и Бог и Спас нашь Исус Христос, к прочим многым спасительным завещаниом и велениом своим, имиже и в нихже наставляет нас, верующих в Него, на путь всякого твердаго и неблазненаго богоразумиа, приложил и сие, рек: "внемлите от лживых пророков, иже приходят к вам в кожах овчиих, внутрь же суть волцы хищнии" (Мф. 7, 15). Таже, учя нас человеколюбивый, и како их познаим и соблюдаимся невредимии от них, приглаголет: "от плодов их познаете их" (Мф. 7, 20), лживых пророков именуя, лживых учителей, еже есть еретиков, глаголющих от чрева своего, а не по евангельскому законоположению и богословию, иже преухыщренным суесловием прельщают сердца простых.

Плоды же их неточию дела и словеса их, но и та сама сокровенная под чернилом во глубине развратная учения их. Согласно же Спасу вещает и божественный апостол Павел глаголя о тех же, во втором послании, еже к Коринфяном: "сицевии же суть лживи апостоли, делателие льстиви преобразуеми в апостолех Христовых" , и прочая (2Кор.11:13). Такова познаваю и льстивого Николая немчина, иже споживе лета доволна с благочестивым языком русским, и всяким образом подщася прельстити их от православныя веры, отцы преданныя им, иже к прочим своим лукавством и слово счинил бытто [2] о соединении русаком и латыном, едине быти тщася показати вере обоим, и сие утвержает тем, еже обоим глаголати Христа Сына Божия и Бога истинна, и еже тем же крещением во трех погружениих совершатися, и яко во имя Отца и Сына и Святаго Духа, и яко в воде, а не во иной вещи, и яко едино исповедание веры и обои проповедуют.

Таже и лишшее тщася утвердити сие, яко латынская Церковь во всех праве проповедует таинство благочестия, глаголет, якоже имже образом прият от самих святых апостол и богодохновенных отец, темже образом и соблюдает непретворна богословна учительства, сиречь, догматы православныя веры, и ничтоже отнюдь не пременила. И аще по истине сице латынская Церкви мудрствоваше и управляшеся, якоже Николай прелестник софист утвержает, лепо бы убо было всяко и нужно нам соединятися им братски, всяко прение и свар отложившим, и мир и единомыслие возлюбити.

Понеже убо во многих является лжущ Николай, и наипаче в нихже глаголет латынскую Церковь соблюдающу вся непретворна преданыя ей от святых апостол и богодохновенных отец, богословны догматы и таинства, ихже той члены наречет, прииди ныне, с Богом помощником, рассмотрим и уразумеим с прилежанием Николаева софистика оправданиа и изобличенна евангельскою истинною, лжива суща. Не приимаим их отнюдь в мыслех нашых, но отвергше я, аки блазняща нас от правыя и неблазненыя, отцы преданныя, веры нашея, да пребываем не отступни, в нихьже научихомся от самех святых апостол и преподобных и богоносных отец наших.

Но время уже начати мне стязаний, яже к нему. Начну же отънюдуже и он начинает. Добро, о Николае! И зело добро и спасительно есть, еже промежу вам и нам соединение и единомыслие; сего бо кроме не можем имети Спаса Христа посреди нас. Сам бо глаголет: "идеже бо аще будут два или три собрани во имя Мое, тамо есмь посреди их" (Мф. 18, 20). Но ниже исповедати Всесвятую Троицу можем, аще не имамы друг ко другу чисту и совершенну любовь, якоже иерей возглашает нам от божественнаго олтаря, во время священной литургии, иже глаголет: "Возлюбим друг друга, да единомыслием исповемы Отца и Сына и Святаго Духа, Троицу единосущную и неразделимую". Но, о премудреиший Николае! Аще весьма хощете нам поистинне соединитися с вами, преже соединитеся сами вы с богоглаголивыми апостолы и собравшимися во Святем Дусе седмыми Вселенскыми Соборы, иже изрядну апостольскую догму, глаголю же о присносущнем происхождении Божественнаго Утешителя, преступисте и приложисте во священном символе православныя веры, глаголюще: "иже от Отца и Сына исходит, супротивно всем вкупе восточным богодохновенным богословцом и самим святым апостолом".

Сие мудрствующе и учаще, и не трепещете страшных онех проклинаний священных соборов, в нихже и сами блаженейшии архиереи римстии, вкупе с прочими четырьми патриархи, утвержаху во Святем Дусе православную веру. Како убо глаголеши ты, яко латынская Церковь соблюдает прилежно православную веру, якоже и прият ю из начала от самех апостол и святых отец? Кый апостол или евангелист сие предает? Или которые святии отцы, вкупе собравшеся, сие приложиша во священом символе? Никакоже сие покажеши; сопротивно же паче обрящеш сие отречено суще, и мудрствующих сие подлагаемых анафеме.

Наипаче третий Собор, емуже начальник бе священный Кирилл, Патриарх Александрийский, иже исполнил богословие, еже о Святем Дусе, и запечатле è с святым Собором, иже не точию мне и тебе не велит приложити что отнюдь к еже что от него запечатленному священному Символу, ниже пременити, ниже уложити ни едино речение, но ниже себе велит дерзнути сицево что в священном символе, иже и глаголет с святым Собором: "Аще же кто после нас дерзнет, рече, таково что, да будет анафема, сиречь проклят".

Что противу сих глаголеши, о Николае? Или не вериши сим, аки как бы недобре уставленым святым Собором? И аще не имеши веры сим, ниже приемлеши я, что ино речем о тебе, разве, яко беснуешися? Вериши ли, о Николае, яко Духом Святым собрашяся богоноснии они светильникы и Божественным Духом учими богословиша и уставиша добре и запечатлеша священный Символ непорочныя нашея православныя веры? Аще убо веру имаши, отступися прочее латыньскаго сего преслушания и непокорства, инъже недугует с тобою вкупе латынская Церковь, и исповедуй со всеми древними соборы, яко от Отца единого происходит существенне Всесвятый Дух, якоже сам собезначалный и соприсносущный Отцу Сын и Слово научил есть сие святым евангелием, еже от Иоанна, рек своим учеником: "егда же приидет Утешитель, егоже Аз послю... от Отца, Дух истинный, иже от Отца происходит" , и проч. (Ин.15, 26).

Приими сие тайно богословие, произшедше от самех неложных уст Христа Бога нашего и вашего; приими сие учительство со всякою верою и благоговеинством, царствие Божие иносказательне именуемо, зане в самый живот вводит нас; приими сие тайноучение, акы детищ беззлобив приимает, яже учителя своего, учениа, да сподобишися внити в не. "Аще бо, – рече, – не приимете царствие Божие, якоже дети , не имате внити в не" (Мф. 18, 3).

Вышша себе не взыскуим, братие, да удовлимся откровенными нам от Духа Святаго самим Спасом и Вселенскими Соборы. "Несть, – рече, – ученик выше учителя своего, ни раб выше своего владыкы; довольно, – рече, – ученику, да будет якоже учитель его" (Мф. 10, 24–25), и проч. Мы от сея Владычния поклоняемыя притчи просвещаеми, и блаженнаго апостола Павла послушающе, заповедующаго нам не мудрствовати паче, еже подобает мудъствовати, сиречь паче писанных откровенных Святым Духом, но мудрствовати, яко целомудрствовати, сиречь познавающим худость наших помысл пребывати внутрь устав смиреномудрия, да пребываим убо тверди и непоступни внутрь устав изложеныя благочестивыя веры от святых апостол и священных собор, и далее сих ниже возводимся, ниже возносимся.

Вы же, латына, претворяюще и разстлевающе неточию изложенное от них неблазненно исповедание православныя веры, но и многа священная их предания церковная, достойни есте нарицатися неточию раскольникы, но отчасти еретикы, акы преступникы апостольских и отеческих правил же и преданий. Глаголют бо благочестивых царей закон и устав церковный: еретик есть и казнем, яже на еретикы, подлежит, иже аще и малейше что предвигает от православныя веры. Вы же, большую тайну Живоначалныя и Пресвятыя Троицы предвигающе, и два начала проповедующе непостижимаго исхожения Всесвятаго Духа, кроме всех восточных богодохновенных учителей, к сим же и многыя уставы церковныя и апостольская преданиа преступающе, ихже и перво и величайше прегрешение есть, еже опресноки приносити в святую службу, согласна мудрствующе проклятому Аполлинарию, отгнавшу просфоры и квас и соль, акы овому убо образующу душу, овем же сказующым ум, ихже лишаше треклятый Господа нашего Исуса Христа, глаголя его оболкшася в плоть едину бездушну и безумну. Сея же хулы что может быти хулнее? Еяже и вы причастники есте, приносящеи вы, подобне оному проклятому, опресноки, и тойже оному анафеме подлежите и вы, акы тоже ему и не хотяще и вы проповедующе опресночным приношением вашим.

Оставлю считати прочая ваша преступлениа многа и странны уставы, еликы сами собою замыслили, кроме всякого и закона церковнаго и апостольскаго предания: еда не темже еретическим епитимиам себе повинных сотворили? Толика убо и толь велиа беззаконнующим вам, како мы сообщимся с вами, дóндеже со рвением пребываете в них неотступно? Несть праведно ни на пользю душевну нам сицевое друг ко другу сообщение. И не глаголи нам многокозненным хытрословием, яко тоже крещение, таже вера русаком и латыном.

Слыши же внятно и разумей прямо: еретики, иже от Навата пресвитера бывша римскаго, наватиане нарицаеми, ниже о крещении, ниже о таинстве православныя веры, ниже о ином коем законе церковнем, но зане точию дарованное от человеколюбия Спаса Христа грешником покаяние отрицаху и не приимаху на покаяние обращающихся, иже в гонении Христа отвергошяся, за то едино отриновени бышя от всего Собора православных и прокляти были.

Павел же божественый апостол, к Галатом пишà, вопиет не обинуяся: "аще... кто благовествует вам паче, еже приасте от нас, аще и ангел есть с небесе благовествуя вам, да будет проклят" (Гал. 1, 8). Тойже тем же объявительне свидетелствует, глаголя: аще обрезаетеся, Христос ничимъже пользует вас. Аще и вся праве действовахуся у них и крещение и исповедание християнскыя веры и весь церковный устав и чин, но понеже приаша, еже по Моисеову преданию обрезание и некых иных обычаев иудейскых, отринул их апостол, рек: "упразднистеся от Христа , елицы в законе оправдаетеся, благодати отпадосте" (Гал. 5, 4).

Разумееши ли, о Николае, коль ест сильно еже богопроповедника о правей вере прилежание? Своя ученикы отринул, елма слышал их малым чим уклонившихъся от евангельскыя истины и свободы, рек: "упразднистеся от Христа , елицы в законе оправдаетеся" . Сие же: "упразднистеся" , что ино сказует, точию отпадосте благодати Христовы и сыновления. Ты же неточию священный символ православныя веры разтлив, но еще и иных многих апостольских и церковных преданий преступая, влечеши нас к соединению с вами многокознеными хитрословии и различными пестрословии. Тому же божественому апостолу Павлу завещавающу нам крепце отлучатися неточию от чужая учащих, но от всякаго брата именуемаго, по апостольскому же учению и преданию не ходящаго, с таковым, рече, ни ясти.

Или не Павел сиа пишет Коринфяном глаголя: "ныне же писал вам не смешатися; аще некый брат именуем будет блудник, или лихоимец, или идолослужитель, ...или пианица, или хыщник, с таковым ниже ясти" ; и пакы: "измете лукаваго от среды вас" (1Кор.5:11, 13). Сему светильнику мы грекы и руси, иверяне и болгары, и сербове, и волохи и инии язы́цы, немало покаряющеся, и якоже дети беззлобиви послушающе, отлучаемся от вас латынех, по божественой ревности и желанию вечныя жизни, а не по гордости фарисейстей и кичению суетному, якоже ты, оклеветая нас, являешися сим многоплетенным и многокозненным списанием своим, в немъже и некия обдержатся нелепотныя учителския твоя повести, непросвещенныя мысли изобретения.

Како бо нелепотно и отринуто и мерзко благочестивому слуху, еже глаголати сатаниньскым действом ослепленных бывших Луку и Клеопу божественых апостол, идущих во Еммаус? Откуду имаши сие прием? или кое богодохновенно толкование отеческое научило тя есть сему, яко сатаниньскым действом, а не Божественным строением, провосходящим всякого ума человечя, очеса их удержашеся, да не познают Iсуса, якоже и очи блаженныя Марии Магдалины видевша Его предстояща, и не познавши глаголаше к Нему, акы к вертоградарю: Господи, аще ты еси взял Его, рцы ми, где еси положил Его. Еда мудръствуеши, Николае, яко и очеса ея сатана поразил слепотою? Оле твоего не наказаннаго ума, паче же хульнаго! Божественным смотрением, неведомым нам, удержашася очеса учеников, о Николае, а не по сатанинскому действу. Идеже бо Божие пришествие и беседа Владычня, о Николае, оттуду избеже и исчезе всяко действо сатанинско и кознь.

Подобно сему твоему нелепотному толкованию и ино нечто повествуеши чюже и неведомо соборней и апостольстей святей Церкви. Глаголеши бо, яко божественнии апостоли собравшеся изложишя устав и исповедание православныя веры, единому комуждо их чясть некую изрекшу, в котором же граде или стране, и когда ея изложишя, или кая богодохновенная книга сие предала вам, не изъяснил еси нам, убоявся всяко якоже мнитмися обличения, еже от благочестивых, нигдеже бо обретается писаное у нас правоверных таково.

Сие же и зело ведомо есть всем везде сущим правоверным, яко первый, иже во Святем Дусе собравшийся в Никеи священный Собор 318 богоносных отец на злочестиваго Ария, создана Бога Слова глаголющаго, изложиша устав православныя веры богословивше краткими словесы велию тайну Всесвятыя и поклоняемыя Троицы и смотрение вочеловечения Бога Слова. О Святем же Дусе толико точию рекше: "веруем и во Святый Дух". И понеже по летех неких явися духоборный Македоний, хуля на Святый Дух, создан; мудрствуя, по нужи собрася вторый вселенскый Собор. 150 богоносных отец в Константине граде, при великом царе Феодосии, приложил во священном символе еже о Святем Дусе богословие.

Третий же святый Собор, иже во Ефесе, емуже бе начальник священный Кирилл Патриарх Александрийский, запечатле клятвами страшнейшими предизложенную веру бывшими преже его двоими вселенскими Соборы, дабы никтоже к тому дерзнул претворити ни единое речение, ниже приложити что в предизложенный символ, ниже уложити у него [3]. Сице мы прочитаем в деяниих священных Собор, и сице держим и веруем и проповедуем, желающе наследницы быти со святыми седьмыми Соборы вечных благ и благословения, а не с вами, преступникы, вечныя клятвы и осужения. А еже от тебе повествуемо, о Николае, ниже видехом написано отнюд в книзе которей православней, ниже слышахом сие от иного коего даже и до сего.

Буди же тако якоже ты утвержаеши, яко святии апостоли преже святаго Собора никейскаго изложишя устав православныя веры, чесо ради ты, Николае, преступаеши безъума священное их о Святемь Дусе богословие, и не якоже они богословиша держиши è? Они решя по твоей повести Варфоломеем апостолом: веруем и во Святый Дух, и далее сего не проидошя. Такоже после их священный никейскый Собор подобне им изложишя, ничтоже приложше; таже третий Собор святых отец приложишя во священном символе совершенное богословие, еже о Святем Дусе, прирекше: и в Святыи Дух Господень животворящ, от Отца исходящ, якоже сам единородный Сын Божий Исус Христос, богословил гласом святаго Иоанна евангелиста. Ты же, акы и самех святых апостол, и священных триех собор, и самого Единороднаго вышше вознесеся крылы таинственнаго богословия, дерзнул еси собою приложити к неблазненному их богословию глаголя: "и в Духа Святаго от Отца и Сына исходящаго", и сице являешися лжущ сугубым лганием. Единым убо глаголя, яко имъже образом прият латынская Церковь от самех святых апостол, сице и соблюдает непретворен священный символ православныя веры, и се изобличен еси лжущ, приложила бо от себе еже и от Сына, преступивши апостольскых и отеческых завещаний и клятв, и бысть подвинна соборней анафеме.

Другым лжеши объявленне, два начала проповедуя присносущнаго и непостижимаго исхожения Святаго Духа, еже есть хульно. Аще бо два испущателя Духу Святому Отец и Сын, то убо и два начала Божеству Святаго Параклита, еже есть ложно и сопротивно евангельскым и отеческым таинственным богословием. Един бо источник Божеству и Сына и Духа Святаго, Отец есть по изящному богодохновенному богословцу Ареопагитскому Дионисию и по всем вкупе святых отец. В сих убо изобличен лжущ, престани прочее досаждая православным людем рускым, глаголя не по разумию истины отлучити себе сообщения латынскаго, не по разумию, Николае, ниже по суетному рвению, но по послушанию глаголющаго богодохновеннаго богословца Иоанна, завещавающаго нам крепце и глаголющаго: всяк преступаяй и не пребываяй во учении Христове, "Бога не имать, пребываяй во учении Христове сей и Отца и Сына имать" (2Ин. 1, 9).

Таже приводит глаголя: "аще кто грядет к вам и учения сего не приносит, не приимайте его в дом, и радоватися ему не глаголите, глаголяй бо ему радоватися, сообещник есть делом его лукавым" (2Ин. 1:9–10). Разумей, о Николае, силу евангельскыя сея речи, и сложи всяко прение суетно и упрямство; неточию бо просто еретика глаголет преступающаго и не пребывающаго во учении Христове, но и безбожника его яве именует. Вы же глаголеми латыня, преступающе Христово, еже о происхождении Святаго Духа, учение, и прилагающе от себе во священном символе веры еже и от Сына, како наречетеся прочее христиане православнии, елма богословие Спаса Христа преступисте и без боязни глаголете: и в Духа Святаго от Отца и Сына исходящаго. Сие Единородному не прирекшу, но точию Отца испущателя объявил, а не и себе. Аще убо по истине, а не по лицемерию желаете еже с нами соединения, изрините от среды нас и вас разлучающее средостение оплоты, глаголю же лишнее сие хульное приложение.

Мечите [4] приносимыя опреснокы в таинственную жертву по ереснику Аполлинарию, отступите от губительныя оригенския ереси, яже огнем чистительным во обхожении многых лет очищает душя всякыми грехы насыпаны, и тако оттуду препосылает я; в жизнь вечную. Сие бо учение неточию ленивых творит многых на исправление согрешений своих тем, еже чаяти себе очищение по смерти в чистительном огни, но еще и слово, еже есть о праведнем суде, развращает. Аще бо вси, иже во християнстей вере согрешиша лютыя грехы, во огни очистившеся, в безконечную жизнь преходят, по Оригену и по вас, котории ошую праведнаго Судии стояще, услышят горкый он ответ: "идите от Мене проклятии во огнь кромешный уготованный дияволу и аггелом его" , и проч. (Мф. 25, 41).

Не бо нечестивии аки суровии и безчеловечнии и немилостивии от праведнаго Судии отринутся: "они бо акы беззаконно согрешиша, беззаконно и погыбнут" (Рим.2:12), свидетельствует святый Павел апостол. Явлено же пакы сие и от глаголющих в день судный, акы оправдающих себе стояще ошую страшнаго Судии: "Господи, не о имени ли Твоем бесы изгнахом, и о имени Твоем пророчествовахом, и о имени Твоем силы многы сътворихом?" иже и противу услышят от праведнаго Судии: "отступите от Мене делателие беззаконию ; аминь глаголю вам: николиже познах вас" (Мф.7:22–23).

Зрите, како явьственне от сих евангельскых речей обличается, яко лжина есть, иже по Оригене и по вас латынех, чистительный огнь. Аще бо вси християне грешникы очищахуся от своих грех во огни чистительном по смерти, никакоже бышя были неведоми от праведнаго Судии створшеи о имени Его силы многы, сиречь чюдеса предивна, ни делателие беззаконию именовахуся от Него.

Хотел бы и прочаа вашя нова преступлениа изобличити, елика вы от себе умыслисте во святых таиньствех и во священническый чин и в прочий церковный устав, и елико вы мудръствуете и творите кроме апостольскых правил и уставлений и Вселенскых седми Собор; но волею сих преминую их, акы ведомых сущих всем православным християном, от нихъже инии стари списателие изобличишя их и писанию предали. Елма же убо и ин некий указ предлагаеши преухыщрен показателен подобающаго быти соединения всем верным, и глаголеши, яко сего ради Спас всех в хлебе и вине предал таинственную свою жертву, зане хлеб от многых зерен состоится, такожде и вино от многых зерен гроздиих сътворяется.

Противу сего преухыщреннаго мудрословиа твоего отвещаем: иже по нас приносимый хлеб, сиречь еже по Бозе есть соединение греков, русаков, иверянов, болгаров, сербов, волохов и иных многых язык – от пшеничьных единых зерен сотворяем, сиречь от правых апостольскых учений и отеческых правил и преданий, – чистейший делавшему его небесному Хлеботворцу благоприатен есть и зело сладчайш испечен невещественым огнем божественаго Параклита. А иже по вас латынех хлеб, сиречь еже по вас соединение, не от единыя пшеницы зерен, но от различных семен состоится, глаголю же от ячмени, проса, ржы и овся. Разумеваяй да разумеет слово крыто. Не прельщай убо нас преиспестренными многыми хитрословии. Оно же буди ведый Николае, яко елицех речений евангельскых и апостольскых приводиши в своем писании на похвалу убо и хваление ваше, а нам понос и осуждение, в сих вас наипаче праведный Судия осудит, поелико супротивно носитеся апостольскых правил и отеческых преданий, и зане, еже добре и богоугодне составлено тело Христово, глаголю же соборную Церковь, разколисте и разтерзаете всяческыми странными и нелепотными новыми вашими учении.

Но и о сем убо толика довлеют главизна нашых ответов противу списаннаго тобою на нас со многым коварством поучения, бытто соединительнаго, паче же развращения. Слыши Николае и весь, иже о папе вашем священническый причет и многое множество сущих у вас учителей и философов, яко мы повинующеся Господу Богу нашему, повелевающу: "аще не обратитеся и будете якоже дети, не имате внити в Царствие Божие" (Мф.18, 3), и пакы: аще кто не приимет царствие Божие, якоже детищ, не может внити в не, – сим двоим заповедем повинующеся, мы держим вся благочестиа тайны и богословная догмата апостольскых и отеческых церковных преданий, царствие Божие приточне глаголема вся вкупе приемлем и соблюдаем непременна, якоже дети малы приимают учения от своих учителей без сумнения, и вышше нашея немощи не пытуим таинственную силу их, послушающе завещавающаго: вышшая себе не ищи.

Яко убо един Бог есть безначален и безконечен присносущен Святая Троиця, вемы и веруем, и исповедуем и сердцем и усты, и яко от Бога и Отца Сын раждается и Дух Святый исходит, и вемы и веруем. Образ же рождению и исхождению ниже ищем достигнути но ни можем. Сия бо отнюдь неизреченна и непостижима суть всякому созданному естеству. Благоизволите убо и вы возвратитися в немъже иместе изначала с нами правое исповедание веры и соединение богоугодное, от негоже зле отпадосте, побеждени бысте лукавым духом славолюбия и самоугодия.

Аще же не хощете приимати братскы приносимый вам от нас по любви духовный сей совет спасительный, – мы отступити от преданныя нам от святых апостол и Вселенскых Собор православныя веры, и соглашати с вами, во всех безпутиих заблужшими, никако терпим. Вемы бо глаголющаго: "изыдете от среды их, и отлучитеся... и нечистоте не коснитеся" (2Кор.6:17). Ельма лучши есть похвально распряжение соединения, отлучающаго от Бога. Тому слава в векы, аминь.

Максим Грек, преподобный

Цитировано по:

Сочинения преподобнаго Максима Грека в русском переводе / предисл.: послушник Моисей. - Сергиев Посад: Св.-Троицкая Сергиева лавра, собственная тип., 1910-1911. - 3 т. / Т. 2. 1910.

– С. 332. / Против лживого ссочинения Николая немчина, о соединении православных християн с латинянами. – С. 121-134.

Азбука веры

Примечание

1. Пред этим словом Максима Грека в рукописях помещается следующее "Сказание о Николае немчине". Сей Николай Булев бысть в богоспасеном граде Москве долго время, в летех осмыя тысящи, во дни благочестиваго государя, великого князя Василиа Ивановичя всея Росии, и от государя превелию честь получил, врачевскыя ради хытрости. И коварственным замыслом своим счинил сам слово и всякаго лукавства наполнил, о соединении веры греческой и римской. Веру убо нашу християнскую хвалит ухыщрением словес своих, ересей же латынскых в нихъже разлучаемся от них, утаил лукавый, и ничтоже от них писал. Максим же инок, уведев его прелестное списание, и вооружися против козней его благодатию Святаго Духа, и написа слово сие.

2. будто

3. отложить от него

4. отбросьте

***

Молитва преподобному Максиму Греку:

• Молитва преподобному Максиму Греку. Этот высокообразованный греческий инок-переводчик и апологет за прямоту и правду попал в опалу в России: претерпел несправедливый суд, отлучение от Причастия, тюрьму, ссылку. Гонения не сломили его смиренный дух: он продолжал трудиться во благо гнавшей его Русской Церкви до самой смерти. Преподобный Максим Грек - небесный покровитель ученых, богословов, переводчиков, студентов и семинаристов. Молитвенный ходатай за миссионеров, катехизаторов и апологетов. Ему молятся для утверждения в вере, крепости духа и веры, разумения вероучения и Писания, обращения к Православию иноверцев и сектантов, просят помощи и поддержки при гонениях за веру и несправедливом притеснении власти. Преподобный Максим Грек облает даром исцеления при различных заболеваниях, особенно от депрессии и уныния

Акафист преподобному Максиму Греку:

• Акафист преподобному Максиму Греку

Житийная и научно-историческая литература о преподобном Максиме Греке:

• Преподобный Максим Грек - Православие.Ru
• Преподобный Максим Грек - Владислав Петрушко
• Новые данные о российском периоде жизни преподобного Максима Грека - Нина Синицына
• Преподобный Максим Грек - Николай Костомаров

Труды преподобного Максима Грека:

• "Ответы христиан против агарян, хулящих нашу православную христианскую веру"
• "Слово обличительное против агарянскаго заблуждения и против измыслившего его Магомета"
• "Слово 2-е, о том же к благочестивым против богоборца Магомета; здесь же отчасти и сказание о кончине века сего"
• "Нравственные поучения"
• "О том, какой грех в естестве человеческом есть первый"
• "Объяснение о рукописании греховном"
• "Исповедание Православной веры Максима инока из Святой Горы"
• "Слово о Рождестве Господа и Бога и Спаса нашего Иисуса Христа, в том же и на иудея"
• "Совет собору православному против еврея Исаака, волхва и обманщика"
• "Возражение против глав Самуила евреянина"
• "Слово обличительно на еллинскую прелесть"
• "Слово против армянского зловерия"
• "Слово похвальное к святым апостолам Петру и Павлу, в томже обличения и на латыньскыя три большия ереси"
• "Слово, списано иноком Максимом Греком Cвятогорским, противу льстиваго списаниа Николая немчина, егоже списал о совокуплении православным християном и латыном"
• "Против латинян, о том, что не следует ничего ни прибавлять, ни убавлять в Божественном исповедании непорочной христианской веры"
• "Против Николая латинянина – слово об исхождении Святого Духа"
• "Послание ко многоучительному Николаю немчину"
• "Послание к господину Феодору Ивановичу Карпову"
• "О том, что Промыслом Божиим, а не звездами и кругом счастья устраивается человеческая судьба"
• "Против тех, которые усиливаются посредством рассматривания звезд предсказывать будущее, и о свободной воле человека"
• "Поучительное послание к некоторому князю о лживости звездочетства и утешительное для живущих в скорбях"
• "Послание к некоторому иноку, саном игумену, о немецкой прелести именуемой Фортуною, и о колесе ее"
• "Против Николая немчина обманщика и звездочетца"
• "Слово обличительное, отчасти, против латинского зловерия; здесь же и против "Альманаха", который возвелеречил, что будет всемирный потоп более гибельный, чем упоминаемый когда-либо"
• "Против хулителей Пречистой Божией Матери"
• Ответ Николаю латинянину
• Разные сочинения

Читайте другие публикации раздела "Творения православных Святых Отцов"