Преподобный Максим Грек - творения

Максим Грек. Слово обличительно на еллинскую прелесть 1

Память: 21 января / 3 февраля, 21 июня / 4 июля (Обретение мощей)

Преподобный Максим Грек (1470 - 1556) - высокообразованный греческий инок-переводчик и апологет за прямоту и правду попал в опалу в России: претерпел несправедливый суд, отлучение от Причастия, тюрьму, ссылку. Гонения не сломили его смиренный дух: он продолжал трудиться во благо гнавшей его Русской Церкви до самой смерти. Оставил после себя многочисленные богословские, апологетические, духовно-нравственные; сохранились также послания и письма к частным лицам.

Преподобный Максим Грек. Икона, XVIII век. Церковно-археологический кабинет Московской духовной академии

***

Понеже убо Божественною помощию обличихом уже, еже на Спаса Христа, иудейское бесование, прииди прочее, о душе, обратим себе противу еллинскому зломудрию и дерзноглаголанию; не меньше бо иудеев стреляют хулении велию нашу християнскую веру. Ихъже аще кто вопросит: чесо ради, о мужие, толь зело ненавидите всечестную веру християнскую и поругаетеся ей выну поругании, оплевании, досадою, яже по ланите, крестом и безчестною смертию, поругающеся нам, поношают, аки являющим множайшу немощь Бога нашего. Окаяннии воистину и несмысленнии, ниже бо разумеют, яко имиже тщатся угасити славу Его Божественную и всеми царствующую державу, сими паче и, не хотяще, являют Его всех Царя единого и всесильна и премудра Бога.

Аще сицевыя: страсти и безчестную смерть претерпев, якоже они глаголют, велеславных богов гордость и дерзость и еже по всей земли служение и волховные храмы их возможе скоро отвсюду до конца истребити не множество(м) воев, ниже храборники, оружники, ниже с небесе молнеными стрелами; по кроткими словесы и гладкими поучении всех от мрачные прелести истуканных преложи на непрелесный свет своего благоверия, не славу на земли, ни пища наслаждение, ниже ино что от красных жития сего обещавая им, наипаче же супротивна обрящеши Его предвозвещающим скорбь и всяческих лютых множество, почесть же оных и воздарование Вышняго Божественное царство, егоже ради безчисленна множества всяческих человеков во всей земли ища и обрящеши всех вкупе, ихъже стяжаху отрекшимся, либо в пустынях скончавшим жития сего течение предобре, или огнем и мечем и многими мучении мучившихся оставити свет солнечный.

Кто же от века Бог вашь, или силен царь, ли ритор и премудр законоположник таково коли возможе содеяти хоти во своих единоплемянных и увещевати их нерадити всех вкупе красных мира сего и на самую смерть дерзати и веселитися в скорбех яже о благоверии? Ни единого, много трудився, обрящеши; отнюдь невозможна сицевая человечестей силе и премудрости. А распеньшемуся скоро и премудрейшие малыми и ненаучеными мужи совершишася сия по всей земли и, еже есть велию удивлению достойно, яко мучители и суровейшими гонители всюду гонима люте, такожде и безчисленными треволнении ересей обуреваема и наветуема, вера наша пребывает неколеблема, равне высочайшу камени и недвижимей горе, гонившим враждебнейше, богомерским злейше истребившимся от жития сего.

Аще убо истинною рачитель еси священной премудрости и упремудрился еси твердым и трезвенным умом, аще ни единая кая иная богодохновенная речь увещевает тя отступити, имъже недугуеши, злочестивого прения поне [2] от побеждения и всеконечныя погибели глаголетиых тобою великих лжебожных богов и от напрасного [3] преложения язык от кумир на еже по Христе святое благоверие, познавай силу непобедимую распеньшегося и сложи всяко безумное прение, целомудренный же ум восприим, не вменяй Христу понос [4] и стыд безчестной оны страсти, но всепремудро умышление всеблагого Бога, превосходяще всякого ума и глагол человечь.

Оно же смышляяй благоразумно, яко аще смертию и толь безчестными страстьми, их же волею изволил, толь велия и предивна боголепна дела скорейше во всей земли содела; явлен бысть, яко возмогл бы убо, яко Бог, и единым мановением содеяти сия скоро по всей земли. Аще бо на кресте стража, [5] всю землю поколеба и солнечный свет в среди дни во тьму глубоку преложи и камение расщеплял и древле погребенного мертвеца воздвигнул; множае паче возмогл бы, яко Бог, всесильным божественным мановением своим, преложити во свет богосветлого благоверия мрачную мглу безбожия бесовских кумир, и душа человеческая, горьким ядом злоначального и душетлительного змия умерщвены, Духом Святым своим оживотворити, аки от гроба воставив я от зловерия идольского, от нихъже убо по всей земли скоро зело и боголепне малыми и ненаучеными мужи содела, познавши Его всесильного Бога, не молнии жигательными, ни силою вооруженною, ниже льстительными мечтании и устрашении ужасительными, человеки ужасающа или нудяща, но священными кротостию и тихостию призывающе всех к свету благоверия своего.

Благопокорно и беззлобиво приимите спасительные страсти Его, имъже образом и боляй цельбы врачебные иже аще и худа покажутся, не испытует я многопытно, ниже паки отреет я, хотяй здравия получити. Покажите убо и сами к Богу толико послушание, еликоже и он к земному врачу, и тогда уразумеете, елика есть крестовная [6] польза, яко зело веселит и освещает вкупе души верующих и Вышняго показует другы небошественны и насыщающася присно пребывающих благ. Сила божественна и благодать вложися свыше в нем: овою убо да веселит и святит вкупе благоверных душя, овоюже да смелыя творит к непрестанней брани невидимых враг; им же вооружившеся соборы пустынелюбцов преподобных и пребесчисленные полки мученические овы убо плоти взыграний вкупе и злокозненных ловлений губительных бесов удобь отбегоша и ныне на небесных дворех водворяются вкупе со святыми духи, ихъже и житие изволишя на земли, овы же, по благоверию гонимому поборающе, и огнем и мечем и всяческими мучении изнуряеми плотьми своими, не убояшася, но оплюнули всякия ярости неверных, кровию своею извещающе всем распеньшегося и изволивша тридневную смерть, присносущна тогоже и вышняго Бога быти и человека совершенна.

Темъже убо не безсилия знамение; но явление всемогущия Божия силы крест есть, якоже, и еже лечити лютыя болезни худыми былиями, показание есть выше естественные премудрости врачя. Аще же не препираешися сими, пребываеши же еще, от безумия безмерного, ругаяся честным нашим тайнам, ничтоже странно: не приемлет бо, премудрое учение слыша, ненаученый, глаголет еже по вас еллинское наказание, ниже научится коли рак прямо ходити, ниже мурин убелится, коли умываемь: сице убо ни мысль идодопоклонника, и беззаконными делы и гнусными похотьми веселящегося, неудобь николиже сложится благоверным и преправедным законом и учением священного благочестия. Христианскую веру темъже познайте, о мужие, и яже о вышнем всесвятая учительства целомудренною честною мыслию тщитесь востязовати, всякого ругательства от сердца своего изринувше; ничтоже бо отнюдь в них хульно, ниже нечисто, ниже поруганию и ненависти достойно обрящете.

Не Зевс бесяся похотию блудною и прелаганием на лебедь и на высокопарный орел и на многоценное злато, яко да утаив ся, растлит чужия жены; или да восхитит любимого юношу виночерпца; ниже раждая от главы своея Палладу, отроковицу доброочитую, обоюду острою секирою ударен бысть по главе; ниже с молниями сходя и Семелию [7] сожег и в стегне своем скры я младенца; ниже Фив [8] волосат, с отроком играя и любовника своего убив неволею диском; ниже богини сварящася яблока деля златого; ниже Афродиты блудящи с Ареем; [9] ниже боги между собою бои составляюща и копия друг на друга мечуще; ниже ино что сицево богомерзко обрящеши отнюдь во всех святых учительствех християнских; но един убо Бог во трех ипостасех поется в них, ни начала ни конца николиже имый, Вседержитель Господь содержай вся, и промысленник всем своим созданием, видимым же и невидимым; всепремудр, преблаг, прещедр, всепречист, свет, желание, живот, и ненасыщаемое рачение, ненавидя зело нечестивых, неправедных лихоимцов, скверно живущих, гнусодеев и всех гордых, ихъже и преисподним огнем без конца мучащим, и червьми присно изнуряющими осужает.

Хвалит же благоверных и всякия добродетели рачителей, и наипаче прикланяющихся слезам убогих, ихъже за добродетели их воздаруя, по смерти являет их своя небесные гражданы, светом божественным присно освещаемых велелепно и веизреченных Его благ их насыщаемых, яже ни око виде коли, ниже ухо слыша, ни на сердце человече не взыдоша, идеже божественная радость и веселие и живот нестареющ и познание ненасыщаемыя премудрости. Такова же не мы токмо, о мужие, глаголем и мудрствуем, но и сами тии первии начальницы вашея премудрости, и о Самом всех Господе и о праведнем и страшнем суде Его и адских мучений и мудрствуют зело и в книги сочиниша, аще и не совершенно о тех угадали; ни Бог бо будет лишаем равносильных Слова и Духа же и Себе единосущных, якоже ни солнце теплоты и лучи кроме, и словесна душа ума и слова лишена. Якоже бо Единого подобает верити Его по существу, такожде и трегуба паки по ипостасех исповедати Его нужно есть, ипостасьми убо разделяема нераздельне, существом же паки соединяема не смесне, разделению и соединению обоим же превосходящим всякого ума и слова человеча.

Такоже и уповаемое по смерти блаженьство: ненагими душами прияти я лепо есть мудрствовати, ниже под землею на лузе цветущем, якоже баснословна Каллиопия [10] глашает, но якоже Сам всех Владыка повеле в самех небесных дворех и в желаемем едеме, душам паки преславне совокупляемым своими телесы, возставляемыми светлыми, нетленными, повелением Божиим, егда с небесе сошед судити (имать) всем вкупе человеком.

К сим же крепко верити сердцем подобает, а устнама проповедати дерзностно, яко всех Владыка всемилостивый Господь, Иже всяческая единою Своею благостию от небытия в бытие приведе, ущедрив бедный род человечь, погыбающь зле кумирским прельщением и всяким злочестием и бесчисленными беззаконии гиблющь по подобию стаду безсловесных скот, Единородного Сына Своего Бога Слова, равна Себе божественным существом и неизсчетною силою посла на помощь бедного рода человеча, да яко оставит [11] их всякого богомерского злочестия, безбожных идол, наставит на истинный разум и свет благоверия. Зело бо подобаше неизсчетней Божией благостыни не презрети образа своего, но помогати ему, бедне погибающу всякими льщении губительных бесов. Все бо, еже ни буди в сущих, драгое и многоценно и пригодно в снедь в сладости, в украшении и в лековании болезней на земли, в мори, в езерах, в реках, и солнце и луну и звезды, доброе растворение аеров и дождя в земное умастение вся Своего почитая образа, преблагий человеколюбне сотвори, всеми теми возводя его на свою любовь и разум.

Явлено убо отселе, яко зело честное у Него стяжание, сложенный от персти и души. [12] Сего ради и завистию губительного и злокозненна беса прельщенна бывша и безчисленными лестьми его в конечное злочестие поползнувша, не стерпе отнюдь, зря сего, сице бедне погибаема, утробами же своими неизреченных щедрот и милости своея прекланяем отечески, оле Божия любви! устремися Сам на взыскание создания своего, зрак наш совершенно восприим, в немъже непорочно и святолепно поживе и на злоначального и губительного врага, яко человек, в пустыни победу благокозненно взем, трищи искушен быв от него, треми первыми родители губительных страстей, сиречь лакомством чревным, славы же и златолюблением, имиже наипаче человецы вси удобь уловляеми бываем.

И своим учеником предав таинства нелестнаго благочестия и богословия и боголепне законоположив законы совершеннейшего жития, в нихъже вооружившеся, без труда низложат ратующего всегда их злокозненного змия. Вкусив же волею смерть, яко человек, и затворенныя благоверныя в аде вкупе с Собою божественною силою от мертвых возставив; тех же убо в желаем введе едем. Сам же на небо с своею плотию возшед, победитель смерти и пленитель аду, седе одесную Отца на престоле славы своея, отнюдуже чаем есть судия приити. Таково убо о мужии, якоже вкратце рещи, яже по нас, христианех, большая извествейша учительства же и мудрования, списана убо не книжными и обычными речении, но истиною и силою светлейша и солнца; источник бо сый милости и благости всех Господ и хотя всем вкупе и премудрым и грубым равне и нелестне прияти пользу на уме, сице плохо [13] написана сия быша мановением Божиим.

Не уничижите убо плохое их, аки не списано красоглаголанием афинеяним, твердое же их нелестное честное же и божественное, неложное же и премудрое, и праведное их благоразумно познавше, прославите устрояющего Господа вся человеколюбне на пользу всякому человеку. Не еже бо изобиловати красными и преухищренными глаголании и пущати от языка своего сладкое вещание или наизусть вещати безчисленная речения преславных древних муж; се ли есть премудрому совершенство? ни; сия бо вкупе со житием сим исчезают внезапу, равне прочим скороувядаемым красным, но еже богатети вкупе сими и нелестную веру до скончания своего и честен нрав имети и житие доброхвально, сиречь целомудрием и благозаконением украшаемо, кротостию же священною и смиреномудрием, се есть блаженство и совершенство треблаженное; се весть совокупити нас самому крайнейшему желанию; [14] егоже несть возможно инако получити, но точию горящего выну любовию священного благоверия и притяжанием честного жития и всякия добродетели на вере чисте тверде водруженных.

Сию подтщитеся стяжати, о мужие, отвергше всякия гордости, прибывшия в мыслех ваших от еллинского учения, емуже конец смерть некончаема и преисподняя. Аще бо и видится доброхитренно уставляюще о всякой добродетели и доброчинии нравом, но студодеянии паки в своих богов увещевает всякия злобы любити и навыкати и о отроцех и о чужиих подружиих, якоже предрекох, являет их бесящихся, и о бранех и о боех, мужеубийствех же и лестех и винопитии и пьнствех зело веселящихся. Али не сицевых студных повестей исполнении суть, о мужие, яже по вас, книги преславные их же, аще кто красное ухищренное глаголание выскрб, далече их вержеть, тина гнусна покажутся предивны книги первых ваших премудрых мужей. Такия же образы всякия злобы имея, кто како изволит когда житие целомудренно и преподобно; истязующего бо его, о нихъже злочестивне поживе, никакоже чает; таяждо бо велии бози его содеявши воспеваются от всех, иже у вас премудрых мужей, гордость точию излишнюю, яже по вас премудрость, весть ражати в душах слышателей своих и еже от человек тщия [15] славы увещевает мнети сему быти блаженному концу, и еже наслаждатися всяким образом искати. Хрисипп да вопиет и твой Епикур и вси по ряду, иже у вас велехвальнии мужии, красноглаголанием единым священные добродетели воспевше, являются своими писании, в вихъже всяческо студодеяния содержится.

Ового убо сами бывше беснующе и рачители, яко и снеденным бывшим неким ищущим то от сыроядцев псов; ового же и тщавшеся прекрасными списании ведома сотворити последним родом. Окаяни воистину и несмыслении; зане же силу пресловутыя мудрости своея оставиша последним родом всякия злобы образ. Лучше бы убо им было, аще без учения отошли бы жития сего, нежели, многим научившися, наставником быти ко всякой злобе всем слушателем своим; своими бо выну писании вкупе с собою поревают бесчисленных в преисподнюю пропасть погибели. Добро, зело добро, о мужие, еже умудритися всяким разумом и ведением и священною премудростию; но подобает к сим обогатети и правою верою и украшатися честнолепными нравы не ко угождению человеком, ниже хвалы ради и тщия славы и желания стяжаний, якова ухищряют неции злонравнии и худомысленнии, раби суще чреву своему и суетной славы, но за ту самую присноживу славу и ненасыщаемое веселие неизреченной Божественной доброты.

Сие воистину совершенство рачителю священной премудрости, еже съединитися самому крайнейшему желаемых, а не разумением басней блядивых и гнилых и акадимейским хитрословным высокоумием, но прилежным хранением Богодохновенных заповедей и смиренным и беззлобивым души мудрованием, целомудрием же священным и долготерпеливою кротостию и нелицемерною ко всем человеком любовию, имиже созданный рукою Божиею по образу Его, скоро паки взыти может к первей славе своей, ихъже воздарование не якоже от человек маловремянная, но яже от вышняго, безконечная хвала и конец самей Божественней доброте выну наслаждатися и в самех священныхь преподобных дворех. Да не сладостию убо суетного доброглаголания кекропидьского без ума прелщающеся, останемся во мгле злочестия, но скрываемую в ней безбожную прелесть всею душею возненавидевше. Да взыщем евангельскую нелестную истину, еюже познавше Единого, безначального присносущного и всеми царствующего, преблагого Бога, к земли колена преклоньше, помолимся, Ему вопиюще: пощади Царю раб своих!

Максим Грек, преподобный

Цитировано по:

Сочинения преподобнаго Максима Грека в русском переводе / [предисл.: послушник Моисей]. - [Сергиев Посад] : Св.-Троицкая Сергиева лавра, собственная тип., 1910-1911. - 3 т. / Т. 2. 1910.

– С. 332. / Слово обличительно на еллинскую прелесть. – С. 28-37.

Азбука веры

Примечание

1. Слово это и следующие за ним три слова против могаметан написаны прежде 1525г.

2. по крайней мере

3. внезапного

4. в поношение

5. страдая

6. крестная

7. Семелу

8. Феб

9. Марсом

10. Каллиопа – муза эпическая

11. отставит? т. е. удалит, спасет

12. т. е. человек

13. просто

14. т. е. Богу

15. тщетные

***

Молитва преподобному Максиму Греку:

• Молитва преподобному Максиму Греку. Этот высокообразованный греческий инок-переводчик и апологет за прямоту и правду попал в опалу в России: претерпел несправедливый суд, отлучение от Причастия, тюрьму, ссылку. Гонения не сломили его смиренный дух: он продолжал трудиться во благо гнавшей его Русской Церкви до самой смерти. Преподобный Максим Грек - небесный покровитель ученых, богословов, переводчиков, студентов и семинаристов. Молитвенный ходатай за миссионеров, катехизаторов и апологетов. Ему молятся для утверждения в вере, крепости духа и веры, разумения вероучения и Писания, обращения к Православию иноверцев и сектантов, просят помощи и поддержки при гонениях за веру и несправедливом притеснении власти. Преподобный Максим Грек облает даром исцеления при различных заболеваниях, особенно от депрессии и уныния

Акафист преподобному Максиму Греку:

• Акафист преподобному Максиму Греку

Житийная и научно-историческая литература о преподобном Максиме Греке:

• Преподобный Максим Грек - Православие.Ru
• Преподобный Максим Грек - Владислав Петрушко
• Новые данные о российском периоде жизни преподобного Максима Грека - Нина Синицына
• Преподобный Максим Грек - Николай Костомаров

Труды преподобного Максима Грека:

• "Ответы христиан против агарян, хулящих нашу православную христианскую веру"
• "Слово обличительное против агарянскаго заблуждения и против измыслившего его Магомета"
• "Слово 2-е, о том же к благочестивым против богоборца Магомета; здесь же отчасти и сказание о кончине века сего"
• "Нравственные поучения"
• "О том, какой грех в естестве человеческом есть первый"
• "Объяснение о рукописании греховном"
• "Исповедание Православной веры Максима инока из Святой Горы"
• "Слово о Рождестве Господа и Бога и Спаса нашего Иисуса Христа, в том же и на иудея"
• "Совет собору православному против еврея Исаака, волхва и обманщика"
• "Возражение против глав Самуила евреянина"
• "Слово обличительно на еллинскую прелесть"
• "Слово против армянского зловерия"
• "Слово похвальное к святым апостолам Петру и Павлу, в томже обличения и на латыньскыя три большия ереси"
• "Слово, списано иноком Максимом Греком Cвятогорским, противу льстиваго списаниа Николая немчина, егоже списал о совокуплении православным християном и латыном"
• "Против латинян, о том, что не следует ничего ни прибавлять, ни убавлять в Божественном исповедании непорочной христианской веры"
• "Против Николая латинянина – слово об исхождении Святого Духа"
• "Послание ко многоучительному Николаю немчину"
• "Послание к господину Феодору Ивановичу Карпову"
• "О том, что Промыслом Божиим, а не звездами и кругом счастья устраивается человеческая судьба"
• "Против тех, которые усиливаются посредством рассматривания звезд предсказывать будущее, и о свободной воле человека"
• "Поучительное послание к некоторому князю о лживости звездочетства и утешительное для живущих в скорбях"
• "Послание к некоторому иноку, саном игумену, о немецкой прелести именуемой Фортуною, и о колесе ее"
• "Против Николая немчина обманщика и звездочетца"
• "Слово обличительное, отчасти, против латинского зловерия; здесь же и против "Альманаха", который возвелеречил, что будет всемирный потоп более гибельный, чем упоминаемый когда-либо"
• "Против хулителей Пречистой Божией Матери"
• Ответ Николаю латинянину
• Разные сочинения

Читайте другие публикации раздела "Творения православных Святых Отцов"