Преподобный Максим Грек - творения

Максим Грек. Исповедание Православной веры Максима инока из Святой Горы

Память: 21 января / 3 февраля, 21 июня / 4 июля (Обретение мощей)

Преподобный Максим Грек (1470 - 1556) - высокообразованный греческий инок-переводчик и апологет за прямоту и правду попал в опалу в России: претерпел несправедливый суд, отлучение от Причастия, тюрьму, ссылку. Гонения не сломили его смиренный дух: он продолжал трудиться во благо гнавшей его Русской Церкви до самой смерти. Оставил после себя многочисленные богословские, апологетические, духовно-нравственные; сохранились также послания и письма к частным лицам.

Преподобный Максим Грек. Икона, XVIII век. Церковно-археологический кабинет Московской духовной академии

***

Не предкновени бывайте и еллином и июдеем и церкви Божией, [1] глаголеть божественное и поклоняемое слово апостольское. Сие же како может инако исправитись нами, аще не правоверною и православною верою, и житием честным и богоугодным и прилежным хранением божественных заповедей Господа и Спаса нашего Исуса Христа; по божественному бо Иякову, брату Божию, вера кроме дел благых мертва ест [2] такожде и дела кроме правыя веры не полезна обоя. Подобает бо человеку Божию совершенну быти в обоих по великому Василию. Но сия убо сице. Понеже убо нецыи, не вем что ся им случися, еретика мене неповинна человека называти не страшатся, и врага и изменника богохранимыя державы русския, яви ми ся нужно и праведно малыми о себе отвещати, и яже о себе научити оклеветающых мене неправедным сицевым оклеветанием, яко благодатию истиннаго Бога нашего Исуса Христа и правоверен християнин есмь по всему и богохранимыа державы русскыа доброхотен и прилежнейший богомолець. Молю убо всякаго благочестиваго и православнаго священника же и князя разслушати ответа моего с приличным християном благоразумием и христоподобною кротостию, отринувши всяк гнев неправеден и ярость; понеже гнев мужу в правду Божию не соделовает [3] якоже глаголеть божественный Иаков, аделфофеу [4]. Идеже бо гнев и ярость обладают, ту и всякое души нестроение и безобразие и безчиние словесныя части душевныя, уму ослепленну уже бывшу и омрачившуся бурею гневною. Обычною убо православною тишиною священныя любве и кротости разумы ваша осветивше, подщитесь, аще чим где уклоняются от православныя веры ли неразумием, ли забвением, или ненаучением ума своего и разума, исправите мене духом кротости [5] по божественному апостолу. Не стыжю бо ся исправлениемь, ниже отреваю è, но и вельми желаю его, и любезне восприиму è, аки тверде наставляюще мене к уповаемому благоверным небесному царствию.

Верую убо и исповедую всею душею и языком единаго Бога вышняго, содетеля всех, безначальна, присносущна, безконечна, в триех ипостасех, сиречь во Отци и Сыне и святем Дусе, нераздельне разделяема, источника и начало безначальное Сына и Духа Свята; Сыну убо роженне и безначальне и присносущне от Него рожаемому и в своей ипостаси покланяемому и славословляемому, и святому Духу от того же Отца исходительне происходящу и в своем ипостаси веруемому и исповедуемому, единаго Бога в трех; Тому едино существо, едино божество, едино царьство, едино господьство, не раздельне разделяемо ипостаси, и соединяемо не смесне пресущественным божественным существом. Сице убо имам и мудрствую, якоже вкратце рещи о святей и единосущней и нераздельней Троице. Такожде верую и исповедую ражаемаго безначальне и присносущне Сына и Бога Слова от безначальнаго Бога и Отца, благоволением Отчимь и осенением святаго Духа зачята бывша в пречистых ложеснах пресвятыя и приснодевы Марии Божии Матери, происшедша из нея с приятою от пречистых кровей ея плотию святою своею, человека совершенна и Бога совершенна Того же, в едином ипостаси и в двою естеству и действех и волях и суща и веруема, ниже божеству Его в человечество преложившуся, ниже человечеству в божество пременившуся. Такожде верую и исповедую Того же нашего ради спасения и крест и страсть и смерть и тридневное погребение волею претерпевша и изволивша плотию своею, божественвому Его естеству кроме страсти всякия пребывшу: божественное бо естество высше отнюд всякыя тли и страсти есть, воскресша же из мертвых в третий день силою воздвигшаго Его Бога и Отца, и возшедша на небеса с приятою своею святою плотию, нетленней уже бывши и безстрастней, и седяща телесне одесную Бога и Отца своего, и пакы грядуща с славою судити живым и мертвым, иже и воздаст комуждо по делом его. Такожде верую и исповедую всесвятаго Духа, Бога истинна в своем ипостаси и суща и покланяема исходяща от Отца единаго, якоже божественный глас и тайное учительство предал есть нам святым евангелием божественного Иоанна. Больши того священнаго тайноучительства, еже о святом Дусе, ниже мудрствую, ниже учу отнюд ни единаго человека, но вседушевно пребываю во всех богословных догматех и мудрованиих, ихъже предашя нам самовидци и слугы Бога Слова и яже по них вси вселенстии собори богодухновенных отець, ниже прилагая что к ним отнюд, ниже улагая [6] или пременяя ни едину иоту, ли черту, но всю православную веру и богословие их соблюдаю в сердци моемь целу и непременну. Такожде и церковная их предания, елика уставишя о поклонении сиречь честных икон, постехже и о иноческом благочинии же и устроении, и елика о божественных пениих и списания и предания святей и апостольстей и соборней церкви, и приимаю и исповедую и облобызаю всемь сердцемь моимь. Еще к сим исповедую и проповедую себе же и всякому благоверному преблагословенную Владычицу мою Богородицу, предстательницу и заступницу всем православным християном, по всему быти святую и пречистую и пренепорочную и Приснодеву, сиречь и преже божественнаго и безсеменнаго рожества воплощшагося из нея и в ней единороднаго Сына Божия, и в самом рожестве и по рожестве, такожде пребывшу Деву пречисту, ниже прежде безсемяннаго зачатия Еммануиля искушение мужеское приемшу, ниже по еже из нея рожестве Его. Никакоже не буди когда християнину которому сицево что хульно мудрствовати отнюд о всесвятей оной и пренепорочней приснодевей девици, честнейши херувим и славнейши безприкладно серафим. Толико убо о сем, и да не многословием стужаю благоверным ушесем вашым.

Таково убо вкратце рещи, еже в сердци и на языце моем имамь и мудрствую о святей и непорочней християнстей вере право и неблазнено мудрование. Почему убо иному еретика мене называти нецыи не ужасаются, да глаголют, да доведут, исправления да сподобят мене въяве да обличят; не отреваю исправление, не стыжуся обличений, дóндеже от отеческыя любве с миром и кротостию происходят. Аз благодатию Христовою всеми моими списании и самем бывшим переводом и исправлением божественных книг ваших учю всякаго человека прямо мудрствовати о воплощшемся Бозе Слове, сиречь не глаголати Его единаго точию человека по ваших чясословець, но Бога совершенна и человека совершенна в едином ипостаси, единого Богочеловека. Такожде исповедую всею душею Того же Богочеловека, воскресша из мертвых в третий день, а не безконечною смертию умерша, якоже проповедают Его везде, яже у вас толкованная евангелия; аз учу не создаена по Божеству Того же верити и проповедати, а не убо созданна и сотворенна, якоже злочестивый Арий хуляше и вашя триоди проповедуют Его везде, и правити их не брежете. Аз Того же единаго мудрствую и исповедую от Отца без матери прежде всех век рожденна, по божественному апостолу и всех богодухновенных богословцев, а не и Отца; Он бо [7] безматерен святыми писании нигдеже глаголется, ниже бо ражается, или бысть от иного коего старейшаго себе существа; да исчезнет от православных сицева хула. Безначален бо Отець и не рожен и безконечен, ниже сам себе приведе в божественное свое существо и ипостась, якоже нецыи безумникы нечестиве мудрствуют; аще бо дадим сие, последует от нужи глаголати, яко не бе прежде, еже привести сам себе в бытие, и сице возмнитца создан, и сам себе вина и начало, и под время и под начало и конец [8] Иже единый не создан, безначален, присносущен, предвечен и безконечен вкупе с происходящими от Него Сыном и Святым Духом. А яже по вас [9] часословцы собезматерьня сыну проповедуют Его втай, и вы таковую хулу презираете и не исправляете. Аз моими списании всякую латынскую ересь и хулу июдейскую и языческую обличаю, разоряю и развращаю [10] якоже и самая моя писания свидетельствуют. Аз теми же моими списании себе же и всякому благоверному иноку думаю жительствовати, и свое житие устроити во святых Божиих заповедех и преданиих и уставех, апостольскых же и отеческых , и да отступают от всякаго лихоимственнаго резоимания и неправды и хищения чюжих имений и трудов, яко сицевая творящии не в царство Божие приемлются, а в безконечныя муки отсылаются страшным Судиею по святых евангелиих [11] и всех святых писаний. Аще сих ради тяжек являюся вам и наричюся еретик? Разсудите, аще праведно есть сицева страдати мне от вас и слышати, не повинну сущу, сиречь елико о православной вере. А по житию моему и беззаконием никтоже ин грешнейши мене. Послух мне Господь нашь Исус Христос истинный Бог, яко кроме множества моих беззаконий ничтоже ино не свем себе ни хульно что о святей и непорочней християнстей вере; ниже лукавое что умыслих и наветное на котораго верна, аще и озлобив мене бысть, или озлобляя видится; заповедь бо вем Спасову, глаголющую: любите врагы вашя, благотворите ненавидящим вас, молитесь о напастьствующих вам и гонящих вам, да яко сынове Вышняго будете [12]. Яве убо, яко супротивная святыя сея заповеди и творящии и мудрствующии не Вышняго сынове, но богоборца и человеконенавидца, беса чяда и угодницы суть. Елма же [13] нецыи, враждою ко мне носими, предлагают на оклеветание мое речь некую, емше ю из негоже аз сотворих превода треоднаго и ею тщатся еретика мене показати; потребно судих малыми отвещевати о себе, да не инии в том же им гресе увязнут неправедно со осуждающими человека неповинна. Начну же сице. В стихерах страшнаго с плотию на небеса вознесения Господа и Бога и Спаса нашего Исуса Христа обретошя клеветникы мои речь некую неподобну, якоже им ся мнит: седел еси, и другую: седев, и глаголют: се Максим яве отлучает еже одесную седалища Бога и Отца сопрестольна и соприсносущна Сына Его; сие бо: седел еси и седев, помимошедшаго времяни есть, глаголють сказательна, а не настоящаго и всегдашняго; явлен убо Максим есть отселе мудрствуя отгнана бывша Единороднаго еже одесную Бога и Отца седалища. Сия убо суть, яже на мене являют клеветникы мои умышления и вины. Аз же пред свидетелемь Богомь самем, единем сердцевидцемь, пред нимъже несть ни едина тварь утаена, отвещеваю сице вам боголюбивейшим со всею истиною, аще отнюд мудрствовах когда сицева хульна, или ныне мудрствую, или впредь мудрствовати хощу на Господа нашего Исуса Христа, якоже клеветникы мои неправедно мене клевещут, да не даст Господь сподобитимися будущаго благоверных сообщения и стояния еже одесную страшнаго Судии, егда приидет судити живым и мертвым, но отлучен да буду ликостояния их и вечныя славы и веселия, и с злочестивым Арием осужден да буду в огнь кромешный. Аз с Павлом божествевным апостолом опасно проповедаю и глаголю всею душею и языком: Иже сый сияние славы Отча и образ присносуществу Его и нося всяческая глаголом силы своея, собою очищение сотвор согрешений нашых, седе одесную престола величествия в вышних [14] и прочая; такожде по вся дни и нощы пою и глаголю со всеми вами благоверными: и восшедша на небеса и седяща одесную Отца, и яже по сих; такожде и во вседневном славословии пою, благословляю, славословлю и глаголю: Господи Боже, Агнець Божий, Сыне Отечь вземляй грехи мира, помилуй нас, вземляй грехы мира, приими молитвы нашя, седяй одесную Отца, помилуй нас, и проч. К сим же ведомо да есть вам, боголюбивейшим епископом и пресветлым князем и боляром, яко егда бываше мною грешным исправление триодное, латынскою беседою [15] сказах è толмачем вашым Мите да Власу, занеже не у совершенне изучившу ми ся вашей беседе [16]; аще убо хульно нечто мнится вам в речениих тех: седел еси, седев, им праведно есть вменити сицевое нелепотное презрение, а не мне; понеже аз тогда не ведах различие сицевых речений. Аще бы ведал бы, никакоже бы замолчал, но всяко исправил бых такову нелепотную опись. Которая бо польза мне от сих черных рубищь и молитв и иноческаго жительства и многолетных сих скорбий моих, аще обрящуся хуля на Господа и Бога и Спаса моего Исуса Христа, наньже уповах от младых ногтей?

Молю убо ваше благоверие: не внимайте сицевым клеветам неправедным, и якоже благовернии подражатели милосердаго и человеколюбца Христа, разсудите прю мою, и покажите милость свою ко мне бедному и нищему богомольцу вашему. Аз бо благодатию Господа нашего Исуса Христа просвещаем и наставляем, безпрестани всею душею молюся всех Владыце и Содетелю о милости, животе, здравии и спасении и временех мирных, и пребыти в соблюдении богохранимыя державы благовернаго великаго князя русскаго Иоанна Васильевича, и о брате его, князе Георгии, десятижды по вся дни прекланяя немолчныя колена моя о них пред царствующим на набесех Господем нашимь и Богом Исус Христом, иже и свидетель ми есть, яко истину глаголю. Како убо нецыи без правды оклеветающе мене изменника и врага богохранимей державе его называют? да не поставит им Господь Бог сицевое прегрешение! Не добро ни прилично есть священником сущим священствующаго в вышних Господа Исуса Христа Сына Божия яростию и гневом и памятозлобием побеждатися и неправедне невавидети и гонити враждебне неповинныя, и наипаче молящихся не престанно о вас и Божиею ревностию отвечающих и подвизающихся о истине евангельстей и благочинии жития иноческаго. Аще же неугодна вам есть яже о истине по Бозе ревность нашя и дерзновение, имъже дерзаем о Бозе уповающе на вашу и нашу православную веру и любовь, почто и держите силою зде нас? паче же кто вас силою нудит в чем? Но сами произволяете; нам же нужа належит заповедию Божиею проповедати всеми усты вопрошающым нас, яже о евангельстей и апостольстей истине и отцепреданном известном иноческом житии и узаконении. Речено бо есть небесным царем Исус Христом: вы, еже во тьме слышасте, рцыте во свете, и, еже в ухо речеся вамь, проповедите на кровех: и пакы: иже аще постыдится словес моих в роде сем [17] и прочая разумна суть господам моим. На чтоже и призываете мене зде из святыя горы? паче же почто и держите зде силою, понеже сущаго во мне отчасти искуства святых Писаний не требуете? Но молю вы: не смущайтеся о немже глаголах, силою ми быти удержану от вас; к благоверным бо и православным судиям и князем творю сий ответ мой. Весте бо и сами добре устав великаго перваго собора никейскаго, яко крепко заповедует вездесущим преосвещенным святителем не судити отнюдь кроме своих предел и области, но всякому ведати своея области. Аще убо или добр аз и прав есмь о православной вере, или развратен, судилищу и разсзуду вселенскаго патриарха повинен есмь, а не святителю благоверныя русскыя земли; грек бо аз и в гречестей земли и родився и воспитан и постригся в иноки. Сего ради и греческыя замли святителем повинен есмь по Божественным правилом и уставом святых собор. Лепо убо есть вам правоверным сущим послушати и повинутися по всему Божественным правилом и уставом святых собор, да во всех являетеся пред Богом прави, а пред людьми благохвальнии и пречестнии. Аще ли же зде явихся есмь в чем ни буди обидев кого, или зла умыслих на благовернаго и преславнаго великаго князя русскаго, и доведут того клеветницы мои, не отрицаюся всякия смертныя казни, в сладость воистинну претерплю всякия привременныя казни, да сподоблюся избыти вечных мук. Но уповаю на неизреченных щедрот Божиих, яко во всех солгашя на мя, тогда оклеветавше мене; которыи же ни были, Бог да простит их. Но и о сем толик ответ довлеет. Аз же, аще и не велик есмь в разуме и искустве божественных Писаний, обаче послан есмь зде от всесвятыя горы по вопросу и по грамоте благовернаго и приснопамятнаго великаго князя Василия Ивановича, всея Русии, у негоже и преобильныя чести получих лет 9, егоже повелением повинуяся не точию толкование псалтырное, дело нарочито и всякия духовныя пользы и сладости исполнено, преведох от греческаго языка на русский, но и ины богодухновенныя книги, различно разстленны от преписующих я, благодатию Христовою и содетельством святаго Параклита, предобрейши исправих, яко и вам чаю господам моим ведомо есть. Аще же негде что или по забвению, или по иному которому обстоянию, презрено бысть мне [18] и не добро преведено бывше видится вам, многа бо суть случающаяся на всяк чась несовершенному сущу уму человеческому, ибо и забытие омрачает его и скорбь смущает, есть же егда и ярость и гнев и пьянство отемневает его; толикыми убо треволнении обуреваемому немощному уму человеческому, аще что негде презрено бысть ему, не подобает дивитися, ниже смущатися, ниже ересию осужати его, но паче ущедрити праведно есть и яже христоподобныя любве показати к нему, и яже от него презренная ли по забвению или по некоторому иному обстоянию, правити вкупе с ним; понеже никтоже в человецех совершенство когда получил есть, вси бо забвению и неведению подлежим, овы убо больше, овы же меньше, вси же друг от друга требуем и совета и помощи. Сим убо сице ся имущим, праведно и преподобно есть вам подражати пастыря онаго преблагаго, иже, оставль 99, на горе, изыде на взыскание заблудшаго, егоже и обрет и взем на раму, возвращься, радуяся множае паче о нем, нежели о 99, незаблудших; оного убо милосердие и кротость подражавше и вы, якоже честнии священницы его и тайноучители словесных его овец, сложивше [19] всякое нелепотное движение словесныя чясти душевныя [20], молю ваше преподобие, разорите еже на мя беднаго многолетное отвращение [21], да не глаголю враждование, и покажите ко мне окаянному яже любве и кротости Бога и Спаса всех Исуса Христа, да и вы явитеся во всех подражатели Его и споспешницы Ему во спасение заблужающихся, и прилежни и тверди хранителие священныя заповеди Его, сиречь святыя и богоподражательныя и боготворныя любве, яже есть исполнение всего закона по божественному Апостолу, еюже единою можно получити безконечнаго царствия небеснаго Владыки, Иже прииде на землю, да спасет, а не погубит душя человеческыя: Тому слава в векы веком, аминь.

Максим Грек, преподобный

Цитировано по:

Сочинения преподобнаго Максима Грека в русском

переводе / предисл.: послушник Моисей. - Сергиев

Посад: Св.-Троицкая Сергиева лавра,

собственная тип., 1910-1911. - 3 т. / Т. 2. 1910. - С. 332. /

Исповедание Православной веры. – С. 3-13.

Азбука веры

Примечание

1. 1Кор.10:32.

2. Иак. 2:20.

3. Иак. 1:20.

4. Брат Божий – αδελφός Θεοῦ .

5. Гал. 6:1.

6. отлагая.

7. Бог-Отец.

8. Т. е. подчинится.

9. У вас.

10. Отвергаю.

11. По учению св. евангелий.

12. Матф. 5:44.

13. Так-как...

14. Евр.1:3.

15. на латинском языке.

16. вашему языку.

17. Матф. 10:27.

18. мною не досмотрено.

19. укротивши.

20. т. е. ума.

21. прекратите нерасположение ко мне.

* Написано пр. Максимом в заточении в тверском Отрочь-монастыре после 1534 г.

***

Молитва преподобному Максиму Греку:

• Молитва преподобному Максиму Греку. Этот высокообразованный греческий инок-переводчик и апологет за прямоту и правду попал в опалу в России: претерпел несправедливый суд, отлучение от Причастия, тюрьму, ссылку. Гонения не сломили его смиренный дух: он продолжал трудиться во благо гнавшей его Русской Церкви до самой смерти. Преподобный Максим Грек - небесный покровитель ученых, богословов, переводчиков, студентов и семинаристов. Молитвенный ходатай за миссионеров, катехизаторов и апологетов. Ему молятся для утверждения в вере, крепости духа и веры, разумения вероучения и Писания, обращения к Православию иноверцев и сектантов, просят помощи и поддержки при гонениях за веру и несправедливом притеснении власти. Преподобный Максим Грек облает даром исцеления при различных заболеваниях, особенно от депрессии и уныния

Акафист преподобному Максиму Греку:

• Акафист преподобному Максиму Греку

Житийная и научно-историческая литература о преподобном Максиме Греке:

• Преподобный Максим Грек - Православие.Ru
• Преподобный Максим Грек - Владислав Петрушко
• Новые данные о российском периоде жизни преподобного Максима Грека - Нина Синицына
• Преподобный Максим Грек - Николай Костомаров

Труды преподобного Максима Грека:

• "Ответы христиан против агарян, хулящих нашу православную христианскую веру"
• "Слово обличительное против агарянскаго заблуждения и против измыслившего его Магомета"
• "Слово 2-е, о том же к благочестивым против богоборца Магомета; здесь же отчасти и сказание о кончине века сего"
• "Нравственные поучения"
• "О том, какой грех в естестве человеческом есть первый"
• "Объяснение о рукописании греховном"
• "Исповедание Православной веры Максима инока из Святой Горы"
• "Слово о Рождестве Господа и Бога и Спаса нашего Иисуса Христа, в том же и на иудея"
• "Совет собору православному против еврея Исаака, волхва и обманщика"
• "Возражение против глав Самуила евреянина"
• "Слово обличительно на еллинскую прелесть"
• "Слово против армянского зловерия"
• "Слово похвальное к святым апостолам Петру и Павлу, в томже обличения и на латыньскыя три большия ереси"
• "Слово, списано иноком Максимом Греком Cвятогорским, противу льстиваго списаниа Николая немчина, егоже списал о совокуплении православным християном и латыном"
• "Против латинян, о том, что не следует ничего ни прибавлять, ни убавлять в Божественном исповедании непорочной христианской веры"
• "Против Николая латинянина – слово об исхождении Святого Духа"
• "Послание ко многоучительному Николаю немчину"
• "Послание к господину Феодору Ивановичу Карпову"
• "О том, что Промыслом Божиим, а не звездами и кругом счастья устраивается человеческая судьба"
• "Против тех, которые усиливаются посредством рассматривания звезд предсказывать будущее, и о свободной воле человека"
• "Поучительное послание к некоторому князю о лживости звездочетства и утешительное для живущих в скорбях"
• "Послание к некоторому иноку, саном игумену, о немецкой прелести именуемой Фортуною, и о колесе ее"
• "Против Николая немчина обманщика и звездочетца"
• "Слово обличительное, отчасти, против латинского зловерия; здесь же и против "Альманаха", который возвелеречил, что будет всемирный потоп более гибельный, чем упоминаемый когда-либо"
• "Против хулителей Пречистой Божией Матери"
• Ответ Николаю латинянину
• Разные сочинения

Читайте другие публикации раздела "Творения православных Святых Отцов"