Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыНовоеСоцсетиПоиск


Православные каноны / Канон мученице Татиане Римской


Православные каноны

Канон мученице Татиане Томской (Гримблит)

Память: 10 / 23 июня (Собор Сибирских святых), 10 / 23 сентября

Мученица Татиана Томская - святая покровительница социальных работников, людей, занимающихся служением в тюрьмах, благотворительностью. К неё обращаются за утешением и помощью в нуждах и скорбях, в заключении, для ободрения веры во время испытаний.

Мученица Татиана Томская (Гримблит). Икона

Мученица Татиана Томская (Гримблит). Икона

Песнь 1

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святая мученице Татиано, моли Бога о нас.

Дне́сь па́мять му́ченицы пресла́вныя Татиа́ны на́с созва́, да восхва́лим, ве́рнии, доброде́тели и труды́ ея́ и, торжество́м духо́вне напита́вшеся, просла́вим Изба́вителя и Бо́га на́шего.

Благочести́ваго ко́рене о́трасль всечестна́я су́щи, му́ченице сла́вная, вся́цей доброде́тели от ю́ности навы́кла еси́ и, зако́на Бо́жия николи́же оставля́ющи, я́ко дре́во плодоно́сное при исхо́дищах во́д яви́лася еси́.

Слава Отцу, и Сыну, и Святому Духу.

Глаго́л Христо́в, я́ко блаже́ни ми́лостивии, от младе́нства в се́рдце твое́м восприе́мши, до́брою стезе́ю ше́ствовала еси́, всечестна́я Татиа́но, заключе́нных за и́мя Христо́во утеша́ющи и от гла́да избавля́ющи.

И ныне и присно, и во веки веков. Аминь.

Богородичен: Тя́, благослове́нную в жена́х, арха́нгельским гла́сом велича́ем: ра́дуйся, Благода́тная, Госпо́дь с Тобо́ю.

Песнь 3

Ирмос: Небе́снаго кру́га Верхотво́рче Го́споди и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святая мученице Татиано, моли Бога о нас.

Ста́рца Саро́вскаго почита́ющи, во оби́тель Диве́евскую всели́тися возжела́ла еси́, свята́я, оба́че, во́лю Госпо́дню о себе́ позна́вши, к сме́рти и страда́нию угото́вилася еси́, пою́щи: утверди́ мене́ в любви́ Твое́й, еди́не Человеколю́бче.

Преподо́бнаго Гаврии́ла, доброде́тельми укра́шена, наста́вника ко спасе́нию обрела́ еси́, блаже́нная Татиа́но, и́же поуча́ше тя́ в по́двизе духо́внем пребыва́ти и в любви́ Госпо́дней утвержда́тися.

Слава Отцу, и Сыну, и Святому Духу.

Святе́й Анастаси́и Узореши́тельнице в милосе́рдии подража́ющи, во у́зах и заточе́нии су́щим усе́рдно послужи́ла еси́, богозва́нная неве́сто Татиа́но, пою́щи: утверди́ мене́ в любви́ Твое́й, еди́не Человеколю́бче.

И ныне и присно, и во веки веков. Аминь.

Богородичен: Рождество́м Твои́м, Де́во Пречи́стая, ро́д челове́ческий изба́вила еси́ служе́ния вра́жия и же́нское естество́ Тобо́ю почте́но бы́сть.

Седа́лен, гла́с 8:

Ка́я темни́ца не име́ тя́ ю́зницу, ки́й гра́д не и́мать тя́ засту́пницу, не то́кмо земля́ Моско́вская о тебе́ хва́лится, но и Зыря́нская с на́ми ликовству́ет, и Казахста́нская о тебе́ ра́дуется, и мно́зи ини́и гра́ды и ве́си свеселя́тся с на́ми в торжестве́ твое́м, помина́юще изгна́ния и прославля́юще страда́ния твоя́, Татиа́но, му́ченице христоимени́тая.

Богородичен: Боголюби́вая Влады́чице, А́нгелов украше́ние и му́чеников сла́во, с ни́ми моли́ся обрести́ на́м ми́лость и разреше́ние от беззако́ний на́ших, помози́ тече́ние жи́зни на́шея до́бре соверши́ти и Ца́рствия Небе́снаго насле́дники яви́тися.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Припев: Святая мученице Татиано, моли Бога о нас.

Нра́в бла́г пра́ведных же́н Ма́рфы и Мари́и стяжа́вши, еди́ное на потре́бу обрела́ еси́ и ве́ру благи́ми де́лы украси́ла еси́, а́лчущих пита́ющи, стра́нных утеша́ющи и больны́х посеща́ющи, му́ченице сла́вная.

Доброде́телем безсре́бренников и чудотво́рцев подража́ющи, на служе́ние стра́ждущим устреми́лася еси́, Татиа́но терпеливоду́шная. Те́мже и на́ша теле́сныя и душе́вныя неду́ги исцели́ благоприя́тными твои́ми моли́твами.

Слава Отцу, и Сыну, и Святому Духу.

Милосе́рдие твори́ти в житии́ твое́м возлюби́вши, вся́ име́ния твоя́ в ру́це ни́щих влага́ла еси́ и та́ко Бо́гу угоди́ла еси́. Те́мже мо́лим тя́: ча́сти челове́ка бога́та, оба́че немилосе́рда, изба́ви на́с и со все́ми святы́ми в не́дрех Авраа́мовых всели́тися Го́спода умоли́.

И ныне и присно, и во веки веков. Аминь.

Богородичен: Родила́ еси́ Сы́на Бо́жия пло́тию, де́вство сохра́ньши, те́мже притека́ют к Тебе́, Пречи́стая Влады́чице, отрокови́цы, де́вство возлюби́вшия, и я́ве побежда́ют неви́димыя враги́.

Канон мученице Татиане Томской (Гримблит)

Песнь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Святая мученице Татиано, моли Бога о нас.

Де́вственных ли́к о тебе́, неве́сто Христо́ва, ны́не ра́дуется, собо́р му́чеников весели́тся и мно́жества благочести́вых в хра́ме взыва́ют: Тво́й ми́р пода́ждь на́м, Человеколю́бче.

От тесноты́ темни́чныя и смра́днаго заточе́ния, му́ченице честна́я, к простра́нней широте́ рая́ сла́дости прешла́ еси́ и святы́х све́тлость узре́ла еси́. Ны́не приле́жно с ни́ми моли́ся, дарова́ти на́м ми́р и ве́ры утвержде́ние.

Слава Отцу, и Сыну, и Святому Духу.

О му́ченице добропобе́дная, ла́стовице кра́сная, голуби́це кро́ткая, го́рлице миролюби́вая! Ду́шу мою́ плодоно́сну покажи́ и нра́в жестокосе́рдый премени́, и ми́р душе́вный низпосли́ моли́твами твои́ми.

И ныне и присно, и во веки веков. Аминь.

Богородичен: Ны́не ро́д челове́ческий возра́довася, печа́ль преста́ и ра́дость процвете́, я́ко Бо́г всели́ся во утро́бу Твою́, Пречи́стая, и ви́ден бы́сть Тобо́ю.

Песнь 6

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Припев: Святая мученице Татиано, моли Бога о нас.

И́стинною любо́вию, милосе́рдием и кро́тостию, терпе́нием и целому́дрием украси́вшися, оби́тель Ду́ха Свята́го себе́ соде́лала еси́, свята́я, на́с же, греха́ми отягче́нных, посети́ и наде́ждою на ми́лость Бо́жию обо́дри, моли́твами твои́ми.

Страда́ния и гоне́ния от безбо́жных претерпе́вши и си́лою Креста́ Христо́ва диа́вола победи́вши, Небе́снаго приста́нища дости́гла еси́, избра́ннице Христо́ва, иде́же неотъе́млемый ми́р обрела́ еси́.

Слава Отцу, и Сыну, и Святому Духу.

Испове́дников Христо́вых в темни́цах утеша́ющи, нището́ю во́льною себе́ украси́ла еси́, свята́я Татиа́но, и, страда́ния ни во что́же вмени́вши, от сме́рти к Жи́зни прешла́ еси́.

И ныне и присно, и во веки веков. Аминь.

Богородичен: Тя́, Де́во, я́ко Ма́терь Бо́жию, ли́цы му́ченичестии велегла́сно прославля́ют, те́мже и свята́я Татиа́на, Сы́ну Твоему́ после́довавши, ку́пно с ни́ми ублажа́ет Тя́, Пречи́стая.

Конда́к, гла́с 2:

Сло́во Бо́жие се́рдцем твои́м восприе́мши, ми́ру распя́лася еси́, свята́я му́ченице Татиа́но, и, в служе́нии стра́ждущим Бо́гу угоди́вши, пло́д доброде́телей оби́лен пожа́ла еси́. Сего́ ра́ди бу́ди на́м хода́таица и умоли́ Созда́теля все́х, безпло́дие серде́ц на́ших исцели́ти, да принесе́м Ему́ плоды́ покая́ния, любо́вь, милосе́рдие и смире́ние.

И́кос:

Прииди́те, ве́рнии, духо́вне возвесели́мся в па́мяти святы́я му́ченицы Татиа́ны, и, прославля́юще по́двиги ея́, воспои́м та́ко: ра́дуйся, гра́да То́мска благо́е прозябе́ние; ра́дуйся, всея́ земли́ Ру́сския украше́ние. Ра́дуйся, Це́ркве Бо́жия пло́д благоприя́тный; ра́дуйся, ли́ка новому́чеников на́ших цве́т благоуха́нный. Ра́дуйся, жена́м мироно́сицам в ре́вности подража́вшая; ра́дуйся, мно́гия доброде́тели стяжа́вшая. Ра́дуйся, Татиа́но, му́ченице пресла́вная, о́браз милосе́рдия на́м показа́вшая.

Песнь 7

Ирмос: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святая мученице Татиано, моли Бога о нас.

Ка́я темни́ца не име́ тя́ ю́зницу, страда́лице терпеливоду́шная? Ты́ бо, лю́тое неи́стовство мучи́телей безбо́жных му́жественне претерпева́ющи, смире́нием Христо́вым си́х победи́ла еси́. Ны́не же в ра́дости пое́ши: отце́в Бо́же, благослове́н еси́.

Ева́нгельскими глаго́лы святы́х ю́зников утеша́ла еси́, достохва́льная Татиа́но, и́мже боже́ственне поревнова́вши, вседу́шно пострада́ти за Христа́ возжеле́ла еси́. Ны́не же с ли́ки му́чеников в ра́дости пое́ши: отце́в Бо́же, благослове́н еси́.

Слава Отцу, и Сыну, и Святому Духу.

Мироно́сицы взе́мши чи́н, всечестна́я страда́лице, Христу́, на́с ра́ди во́лею обнища́вшему, усе́рдно послужи́ла еси́, егда́ вме́сто ми́ра, еле́ем милосе́рдия стра́ждущих и неду́жных ума́стила еси́. Ны́не же, Го́спода зря́щи, пое́ши: Бо́же, благослове́н еси́.

И ныне и присно, и во веки веков. Аминь.

Богородичен: Вся́ жены́ богому́дрыя с весе́лием прославля́ют Де́ву Пречи́стую, и́стинную Ма́терь Бо́жию, и, благогове́йно предстоя́ща, Христа́ восхваля́ют во ве́ки.

Песнь 8

Ирмос: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Припев: Святая мученице Татиано, моли Бога о нас.

Сластьми́ ми́ра сего́ не прельсти́вшися, я́ко цве́т кра́сный, в де́встве процвела́ еси́ и му́ченическаго венца́ сподо́билася еси́, Татиа́но богому́драя, и та́ко, сугу́бый по́двиг на земли́ соверши́вши, ны́не с ли́ки А́нгельскими Христа́ прославля́еши.

Христа́ все́м се́рдцем возлюби́вши, Тому́ усе́рдно после́довала еси́, честна́я, и, скве́рны грехо́вныя избе́гши, я́ко голуби́ца, крило́ма доброде́телей в Небе́сный черто́г возлете́ла еси́, иде́же, веселя́щися, Песнь побе́дную воспева́еши.

Слава Отцу, и Сыну, и Святому Духу.

Доброде́тельми и по́двиги твои́ми Бо́гу угоди́ла еси́, Татиа́но достохва́льная, сего́ ра́ди То́й в ли́це му́чениц просла́ви тя́ и дерзнове́ние ве́лие дарова́ моли́тися при́сно о ве́рою и любо́вию чту́щих тя́.

И ныне и присно, и во веки веков. Аминь.

Богородичен: Ты́ Бо́га еди́на родила́ еси́, Де́во, пресла́вно; Ты́ естество́ обнови́ла еси́ Рождество́м Твои́м, Богороди́тельнице Чи́стая.

Песнь 9

Ирмос: Вои́стину Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святая мученице Татиано, моли Бога о нас.

Свети́льник доброде́тели во мра́це беззако́ния возже́гши, му́дрым де́вам сопричи́слилася еси́, всечестна́я, и, в черто́г бра́чный возше́дши, Небе́сному Жениху́ Христу́ обручи́лася еси́. Его́же моли́ спасти́ся душа́м на́шим.

От земны́х к небе́сным у́м впери́вши, сете́й вра́жиих избе́гла еси́, му́ченице Татиа́но, и крила́ми чистоты́ Ца́рствия Бо́жия дости́гла еси́, иде́же с безпло́тными си́лами Христа́ велича́еши.

Слава Отцу, и Сыну, и Святому Духу.

Приими́, Триипоста́сный Бо́же, ма́лую Песнь сию́, в па́мять святы́я Татиа́ны, добропобе́дныя му́ченицы Твоея́, сложе́нную. Ея́же моли́твами умягчи́ на́ша окамене́нная сердца́ и научи́ любви́ и милосе́рдию.

И ныне и присно, и во веки веков. Аминь.

Богородичен: Приими́, о Богома́ти, я́ко ми́ро, от любве́ приноси́мую Песнь сию́, и принеси́ Сы́ну Твоему́, я́ко да́р, во оставле́ние грехо́в на́ших.

Свети́лен:

Я́ко му́драя де́ва, свети́льник души́ твоея́ еле́ем украси́вши, во сле́д Христа́ устреми́лася еси́, Татиа́но достоблаже́нная, и, Черто́га Небе́снаго дости́гши, Све́т Невече́рний лицезре́ти сподо́билася еси́. Укрепи́ и на́с, ма́ти всехва́льная, во све́те за́поведей Госпо́дних ходи́ти и де́лы свои́ми Бо́га прославля́ти.

***

Молитва мученице Татиане Томской:

  • Молитва мученице Татиане Гримблит. Мученица Татиана Томская - святая покровительница социальных работников, людей, занимающихся служением в тюрьмах, благотворительностью. К неё обращаются за утешением и помощью в нуждах и скорбях, в заключении, для ободрения веры во время испытаний.

Акафист мученице Татиане Томской:

  • Акафист мученице Татиане Томской

Канон мученице Татиане Томской:

Житийная и научно-историческая литература о мученице Татиане Томской:

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2021

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru