Православные каноны
Канон второй сорока мученикам Севастийским
Тридцать девять христиан воинов и их
страж Аглаий, замученные на озере рядом с армянским
городом Севастий - образец мужественности, крепкой веры
и стойкости духа. Сорок мучеников Севастийских -
небесные покровители воинов, им молятся о духовной
помощи в гонениях и заточение, о дарование крепкой веры,
о мужественности для перенесения испытаний
Память: 9 / 22 марта, 9 / 22 августа
Сорок мучеников Севастийских. Мозаика, XIV век.
Константинополь
Глас 2
Песнь 1
Ирмос: Грядите, людие, поим песнь Христу
Богу, раздельшему море и наставльшему люди, яже изведе
из работы египетския, яко прославися.
Припев: Святии четыредесяте мученицы
Севастийстии, молитеся Богу о нас.
Бога нам, мученицы четыредесяте, ныне
благопременна сотворите молитвами вашими, чистою сердца
любовию призывающим вас.
На Небесех трисолнечнаго сияния зарями
просвещаеми, четыредесяте, на земли измерзшия зимою
напастей, покрыйте ны, поющия вы.
Слава Отцу, и Сыну, и Святому Духу.
Неразорима благочестия и непоколебимая
Церкве забрала, четыредесяте, христоименитое звание люте
смущаемаго ныне умирите.
И ныне и присно, и во веки веков. Аминь.
Богородичен: Преестественно над всеми
сущаго родила еси Зиждителя и Господа, плоть бывша нас
ради, человек, Дево Богородице Мати Неискусомужная.
Песнь 3
Ирмос: Утверди нас в Тебе, Господи,
Древом умерщвлей грех, и страх Твой всади в сердца нас,
поющих Тя.
Припев: Святии четыредесяте мученицы
Севастийстии, молитеся Богу о нас.
Воинство мученическое и спряженный личе
мученик венценосец, Владыце предстояще, восхваляющия вы
присно спасайте.
Езером страстей обуреваемии и волною
напастей лютых, к вам, четыредесятем Христовым воином,
прибегаем.
Слава Отцу, и Сыну, и Святому Духу.
В недрех Авраамовых согреваемии и
славною одеждею украшаемии, зимою обстояния связанных
разрешити помолитеся.
И ныне и присно, и во веки веков. Аминь.
Богородичен: Утверждение буди, и
прибежище, и покров, Дево Богоневесто, верою к Тебе
прибегающим и Божию Тя Матерь исповедающим.
Господи, помилуй, трижды.
Седален, глас 8
Христу ввоинившеся мученически, врага
низложивше страдальчески, делы исполнисте пророка
глаголы: сквозе бо огнь и воду мужески проидосте, покой
обретше, жизнь нетленную. Темже Небесными украшшеся
венцы, с лики веселитеся безплотных, блаженнии
страстотерпцы прехвальнии, молите Христа Бога грехов
оставление даровати чтущим любовию святую память вашу.
Песнь 4
Ирмос: Услышах, Господи, слух Твоего
смотрения и прославих Тя, Едине Человеколюбче.
Припев: Святии четыредесяте мученицы
Севастийстии, молитеся Богу о нас.
Просвещение нам, мученицы, от Бога бысте,
в сияние бо облекостеся неприсенное. Богоизбранный, молися, соборе мученик
венценосный, избавити бед воспевающия тя.
Свет неприступный, святии, Христов
видети сподобльшеся, сущия во тьме сияти удостойте.
Слава Отцу, и Сыну, и Святому Духу.
Облистающе, славнии, мысленным Христа
светонаставлением, к зари Божественней руководствуйте.
И ныне и присно, и во веки веков. Аминь.
Богородичен: Песнословяще, Чистая, из
утробы Твоея воплощшагося, Тя славословим, яко Божию
Матерь.
Песнь 5
Ирмос: Света Подателю и веков Творче,
Господи, во свете Твоих повелений настави нас: разве бо
Тебе, инаго бога не знаем.
Припев: Святии четыредесяте мученицы
Севастийстии, молитеся Богу о нас.
Неистовства еретическаго, четыредесяте,
и ныне избавите Христову честную Церковь, в нейже
рождшеся, в толико достоинство и славу преминусте.
Явльшеся нам, четыредесяте Христовы
мученицы Богозарнии, огневиднии светильницы, просвещают
верным благочестия путь спасительный.
Слава Отцу, и Сыну, и Святому Духу.
От земли преставистеся к Небесней сени,
мученицы, идеже Христу Подвигоположнику предстояще,
Божественныя мя радости улучити сподобите.
И ныне и присно, и во веки веков. Аминь.
Богородичен: Яко непостижимое и
неудобозримое всякому, Владычице, еже паче ума таинство,
Отроковице, Божественнаго Твоего рождества, сущаго бо
воистину Бога нам родила еси.
Песнь 6
Ирмос: В бездне греховней валялся,
неизследную милосердия Твоего призываю бездну: от тли,
Боже, мя возведи.
Припев: Святии четыредесяте мученицы
Севастийстии, молитеся Богу о нас.
Бодрствующии и трезвеннии хранителие
рода человеческаго явистеся, державнии, и молитвенницы
молений, помощницы же печальных поставистеся.
Неприступными сияюще добротами в Церкви
Христове, всехвальнии, искушений избавите с любовию вас
почитающих.
Слава Отцу, и Сыну, и Святому Духу.
Бесящихся мучителей всеизряднии древле
потребителие прелести бысте и нам ныне помощь скорая и
стена будите.
И ныне и присно, и во веки веков. Аминь.
Богородичен: На Тя упование возложих,
Мати Приснодево, спасения моего и Тя Предстательницу
положих жизни, тверду же и непоколебиму.
Господи, помилуй, трижды. Слава, и ныне:
Кондак, глас 6
Все воинство мира оставльше, на Небесех
Владыце прилепистеся, страстотерпцы Господни
четыредесять, сквозе огнь бо и воду прошедше, блаженнии,
достойно восприясте славу с Небес и венцев множество.
Икос
На престоле неприступнем седящему,
простершему Небо, яко кожу, и землю утвердившему, и
собравшему воды в сонмы их, вся от не сущих сотворшему
быти и всем подающу дыхание и живот, приемлющему от
Архангел пение, и от Ангел покланяемому, и от всех
славимому, Христу Вседержителю, Зиждителю и Богу нашему,
припадаю, недостойный, принося мое моление, слова
благодати прошу: да возмогу благочестно воспети и аз
святыя, яже Сам показав победители, даровав им славу с
Небес и венцев множество.
Песнь 7
Ирмос: Образу златому, на поле Деире
служиму, трие Твои отроцы небрегоша безбожнаго веления,
посреде же огня ввержени, орошаеми, пояху: благословен
еси, Боже отец наших.
Припев: Святии четыредесяте мученицы
Севастийстии, молитеся Богу о нас.
Наста светло летняя ваша память,
всебогатии, просвещающи далече сияющая поста светлостию.
Сию празднующе верою, с вами воспеваем: благословен еси,
Боже отец наших.
Решителие страстей и светильницы,
издалеча сияющии, мира очищение, прелести разрушение,
велегласнии истины проповедницы, лжи прогонителие всем
явистеся, поюще: благословен еси, Боже отец наших.
Светила мысленная, сияюще нам, явистеся,
мученицы, обуреваемыя спасаете и наставляете плавающия,
жития волнующияся бурею, Христу воспевающе: благословен
еси, Боже отец наших.
Слава Отцу, и Сыну, и Святому Духу.
Красно Богу и Ангелом возжеленно,
четыредесяте Богособранное, и Богодухновенное, и
пресветлое ополчение, Божественное и страшное всеоружие
вопиюще и глаголюще: благословен еси, Боже отец наших.
И ныне и присно, и во веки веков. Аминь.
Богородичен: Светильник Света, и облак
светел, и священия место показася, Неискусобрачная, ибо
святых Святаго Слова прият несказанно. Егоже поюще,
взываем: благословен еси, Боже отец наших.
Песнь 8
Ирмос: В пещь огненную ко отроком
еврейским снизшедшаго и пламень в росу преложшаго Бога,
пойте, дела, яко Господа, и превозносите во вся веки.
Припев: Святии четыредесяте мученицы
Севастийстии, молитеся Богу о нас.
Претворшеся к жизни истинней, еже о
Христе ныне сокровенней, к зимней и болезненней кончине,
доблии, крепко вдастеся, спасения и оставления просяще
нам.
От земли к Небесным прешедше, страдальцы
венценосцы, Церкви мученик победоносных личе, бед,
страстей, обстояний избавления просите нам и спасения.
Расторг смерти узы Спас, страдальцем
победы подаде на смерть, четыредесять бо, мразом
согреваеми, пояху и спасения всем верным просяще.
Слава Отцу, и Сыну, и Святому Духу.
Напастей прилоги, нападение страстей,
демонов искушения Божественный страстоносец лик молитвою
изымает яве от поющих Христа во веки.
И ныне и присно, и во веки веков. Аминь.
Богородичен: Умерщвленыя и к персти
смертней и тлению сведеныя воскресила еси, Едина,
Начальника жизни рождши, Христа Бога нашего, Владычице
Дево, Чистая Богородительнице.
Песнь 9
Ирмос: От Бога Бога Слова, неизреченною
мудростию пришедшаго обновити Адама, ядию в тление
падшаго люте, от святыя Девы неизреченно воплотившагося
нас ради, вернии, единомудренно песньми величаем.
Припев: Святии четыредесяте мученицы
Севастийстии, молитеся Богу о нас.
Преестественныя зари, и радости
несказанныя, и славы сподобистеся улучити, ныне же
любовию чтущия вас напастей, и бед, и лукавствия
избавите вражия, Христовы воини, мученицы четыредесяте.
Силу, пребогатии, Божественную с Небесе
приемше и крепость, соузницы Христовы, льсти
прогонителие бысте, отгоняще всяку идольскую мглу
непостоянную и просвещающе мир, мученицы четыредесяте.
Украшшеся добротою честнаго мучения и
Божественнаго причастницы бывше естества, воистину
радуетеся, Свету срастворившеся светлейшему и чистому,
Христовы воини, мученицы четыредесяте.
Слава Отцу, и Сыну, и Святому Духу.
Ныне Христу предстояще благочестивым
дерзновением и отонуду Божества светом облистаеми,
славнии, восхваляющия вы зарею осветитися трисиянною
прилежно молите, мученицы четыредесяте.
И ныне и присно, и во веки веков. Аминь.
Богородичен: Явльшийся, Дево, души моея
примрак света Твоего невещественными блистаньми озари,
двере Божественнаго Света, и огня вечнаго избавитися
сподоби, Чистая, верою и любовию песньми Тя величающаго.
Светилен
Десятицу четверочисленную, победоносный
полк, воинство святых мученик воспоим достойно, огнем бо,
и студению, и водою посрамиша враждебных полки и от
Христа Спаса венцы прияша славы.
***
Молитва сорока мученикам Севастийским:
- Молитва
Севастийским сорока мученикам. Тридцать
девять христиан воинов и их страж Аглаий, замученные
на озере рядом с армянским городом Севастий
- образец мужественности, крепкой веры и стойкости
духа. Сорок мучеников Севастийских - небесные
покровители воинов, им молятся о духовной
помощи в гонениях и заточение, о дарование крепкой
веры, о мужественности для перенесения испытаний
Акафист сорока мученикам Севастийским:
Канон сорока мученикам Севастийским:
Житийная и научно-историческая литература о сорока
Севастийских мучениках:
Житийная и научно-историческая литература о сорока Севастийских мучениках:
|
