Православные акафисты
Акафист священномученикам Павлу Аношкину
и Григорию Смирнову (Мокинским)
Память: 7 / 20 июня, 16 / 29 декабря, Собор новомучеников и исповедников Церкви Русской (переходящая дата), Собор святых Пермской митрополии (переходящая дата)
Священник Павел Аношкин и диакон Григорий Смирнов были зверски исколоты штыками и расстреляны красноармейцами 29 декабря 1918 года в селе Мокино Пермской губернии.
Священномученик иерей Павел Аношкин
Священномученик диакон Григорий Смирнов
***
Кондак 1
Возбранных воинов Христовых терпение
и мужество и добродетелей их соцветие победное
воспоим днесь любовию, мучениколюбцы, исцелений
душам и телесем просяще, [пред мощми угодников
Божиих] с верою взывающе: Радуйтеся,
священномученицы Павле и Григорие, Пермския земли
благодатнии заступницы.
Икос 1
Ангелов и небесных человеков собору
приобщившихся ныне восхвалим, священника Павла и
диакона Григория мучеников, земли Пермския
доброту, и житие их венцем правды увенчанное
воспоминающе, возопиим сице:
Радуйтеся, в православней России
рожденнии;
Радуйся, в Христовой Церкви
воспитаннии.
Радуйтеся, издетска приметавшиися
храму Божию;
Радуйся, от юности прилежавшии
премудрости Господней.
Радуйтеся, Павле, в псалмопении
усердствовавый, и Григорие, в гимнах церковных
поучавыйся;
Радуйся, великим таинствам
внимавшии и к небесем благодатными глаголы
восперявшиися.
Радуйтеся, проходившии многая
богоугодная поприща;
Радуйся, поспешавшии к коемуждо
требующему помощи.
Радуйтеся, Пастыря добраго
избранницы;
Радуйся, Сеятеля истины
наследницы.
Радуйтеся, Лозы небесныя рождие
плодоносное;
Радуйся, Источника безсмертнаго
общницы достойнии.
Радуйтеся, священномученицы Павле и
Григорие, Пермския земли благодатнии заступницы.
Кондак 2
Видяще святии на жатве Христове
делатели усердно труждающияся, возревноваша сим
последовати и Господу поработати на ниве Его,
слово учения Евангельскаго сеюще, и хваляще Бога:
Аллилуиа.
Икос 2
Разум незаблудный в подвизе
молитвенном стяжавше, многим бысте ко Христу
путеводители и во благочестии наставницы, учаще
Таинства Церкве крепце любити и слову Божию
внимати, егоже изъясняли есте людем, благодарящим
вас сице:
Радуйтеся, Евангелием умы
умудрившии;
Радуйся, молитвами души озарившии.
Радуйтеся, учители людей своих
благодатнии;
Радуйся, ревнители преданий
отеческих духоноснии.
Радуйтеся, Павле, Кунгура
воспитание, и Григорие, Вятския земли порождение;
Радуйся, недуг душевных врачевание
и пастве Христовых овец утешение.
Радуйтеся, сомолитвенницы светлии,
прихожан храма Никольскаго воспитатели;
Радуйся, служители вернии, пути
отцев святых последователи.
Радуйтеся, священнодействителей
честная похвало;
Радуйся, миряном благое поможение.
Радуйтеся, якоже бо сами заповеди
твористе, такожде и люди научали есте;
Радуйся, яко сего ради Царствия
Небеснаго достигли есте.
Радуйтеся, священномученицы Павле и
Григорие, Пермския земли благодатнии заступницы.
Кондак 3
Сила Вышняго осени вас, восходящих
на степени священства, темже дар служения у
престола Божия достойно приимше, священными усты и
очищенным сердцем воспевасте: Аллилуиа.
Икос 3
Имуще благоприятное время делания,
Богу усердно послужисте, паству свою от волков
мысленных охраняюще, наипаче же юныя к добродетелем
наставляюще, от всех благодарно восхваляемии сице:
Радуйтеся, светильницы благодати
Христовы;
Радуйся, сосуди благоутробия
Божия.
Радуйтеся, яко бысте мужественнии
духом;
Радуйся, яко бысте бодрствующии
сердцем.
Радуйтеся, Павле, иереев красото, и
Григорие, диаконов светлосте;
Радуйся, святолепныя службы
рачителие и святых почитателие.
Радуйтеся, служением у престола
Божия просветившиися, яко Ангели;
Радуйся, подвигом во броня веры
оболкшиися, яко апостоли.
Радуйтеся, дружества законом
связуемии;
Радуйся, братолюбия союзом
почтеннии.
Радуйтеся, Таин Святых Христовых
смиреннии служителие;
Радуйся, таинств седми церковных
истовии сопричастницы.
Радуйтеся, священномученицы Павле и
Григорие, Пермския земли благодатнии заступницы.
Кондак 4
Бурю внутрь имуще помышлений лютых,
мнози людие российстии мятежу соединишася противу
Церкве и Царя православнаго. Вы же, святии Павле и
Григорие, возведение в сию годину тяжкую тишайшаго
святителя Тихона на престол Патриарший уведше, с
надеждею воззвасте Богу: Аллилуиа.
Икос 4
Слышавше словеса огненная
архипастыря Андроника, суду Божию гонителей веры
предающаго, призвасте, отцы наши Павле и Григорие,
люди мокинския на защищение Церкве и земли
Русския, на молитву усердную, на крестохождение
небоязненное в защиту святынь православных, и не по
мнозех днех за печальником земли Пермския на муки и
смерть последовасте, темже воспеваем вас сице:
Радуйтеся, в годину лютую от слуха
зла не убоявшиися;
Радуйся, чада Божия на подвиг
веры уготовившии.
Радуйтеся, в борьбе со грехом
явившиися мужие совершеннии;
Радуйся, на брань с диаволом
изшедшии воини духовнии.
Радуйтеся, пламенныя веры Андроника,
святителя Пермскаго, наследницы;
Радуйся, огненныя ревности того о
славе Божии подражателие.
Радуйтеся, люди веси Мокинския во
благочестии утверждавшии;
Радуйся, прихожан церкве
Никольския пред страдании укрепившии.
Радуйтеся, яко храмы Духа Святаго
себе соделасте;
Радуйся, яко сострадальцы Страстем
Христовым быти возжеласте.
Радуйтеся, поругание и мучение
России разделившии;
Радуйся, воскресение Христа
Распятаго благовестившии.
Радуйтеся, священномученицы Павле и
Григорие, Пермския земли благодатнии заступницы.
Кондак 5
Боготечную звезду всем верным Своим
посла Господь в годину страданий Крест Свой, и той
яко светильник путь им озарил есть на гору высоку
мученичества. Вы же, святии Павле и Григорие, тамо
восходяще, воспевасте: Аллилуиа.
Икос 5
Видевше отроцы Вавилонстии пещь
огненную мучения, за законы отеческия в ню
ввергошася, Ангелом прохлаждаеми; вы же, святии
Павле и Григорие, во огнь страдания входяще,
слышасте от Ангел сицевая:
Радуйтеся, на муки лютыя подвигом
души уготовившии;
Радуйся, на Голгофу Пермскую
десницею Божиею возведеннии.
Радуйтеся, святыни храма прежде мук
облобызавшии;
Радуйся, молитвы веры посреде
страданий вознесшии.
Радуйтеся, мраз лютый претерпевшии,
яко четыредесять мученик Севастийских;
Радуйся, коньми влачение приимшии,
яко Феодор, страдалец Пергийский.
Радуйтеся, железным остном
прободеннии, яко Прокл, рождение Калиптское;
Радуйся, многими ранами
уязвленнии, яко Севастиан, похвала Медиоланская.
Радуйтеся, уничижений и поношений за
Христа сподобльшиися, яко Трифон, в Никеи
убиенный;
Радуйся, мечному усечению во главу
подвергшиися, яко Пантелеимон, целебник всемирный.
Радуйтеся, огнем ненависти
мучительския сожегшиися, яко Феодор Тирон, хлеб
сладкий, Троице принесенный;
Радуйся, росу благодати
мученическия радостно приявшии, якоже отроцы в
пещи Вавилонской.
Радуйтеся, священномученицы Павле и
Григорие, Пермския земли благодатнии заступницы.
Кондак 6
Проповедницы богоноснии мученицы
явишася, кровь за веру излиявше, с нимиже и вы, о
Павле и Григорие, небеса наследовасте, многия муки
претерпевше. Темже дерзновение ко Христу стяжасте
всем верным помогати, поющим Богу: Аллилуиа.
Икос 6
Возсиявше на тверди небесней, яко
звезды, отгоняете безбожия мрак, и, к сонму
новомученик причтеннии, ходатайствуете о умножении
веры в земли нашей; темже и мы, ко святым мощем
вашим притекающии, вопием сицевая:
Радуйтеся, Пермския страны
утверждение;
Радуйся, новых мучеников
украшение.
Радуйтеся, терпеливцы божественнии;
Радуйся, страстотерпцы Христовы.
Радуйтеся, всехвальнии мученицы;
Радуйся, честнии
священнострадальцы.
Радуйтеся, Павле, немощных
покровителю, и Григорие, обидимых утешение;
Радуйся, столпи подвизающихся во
истине и наставницы ищущих просвещения.
Радуйтеся, яко в роды родов
пребывает ваша память;
Радуйся, яко во веки веков
прославляет вас Церковь.
Радуйтеся, дерзновеннии молитвенницы
ко Отцу Небесному;
Радуйся, непостыднии ходатаи за
землю Русскую.
Радуйтеся, священномученицы Павле и
Григорие, Пермския земли благодатнии заступницы.
Кондак 7
Хотящия погребсти у олтаря храма
Никольскаго честная телеса ваша Мати Божия
омофором Своим от убийц и кощунник сохрани, темже
пение надгробное невозбранно сотворше, со слезами
воспеша: Аллилуиа.
Икос 7
Новое показа чудо в Троице славимый
Господь, сохранив святыя мощи ваша в веси
Мокинской долголетно в земли невреждени, аще и храм
честный поруганию предадеся, и в разрушение прииде;
темже вернии, на место упокоения вашего
притекающе, взываху сице:
Радуйтеся, в подвизе вашем путь
спасения людем указавшии;
Радуйся, в погребении вашем на
подвиг крестный паству вдохновившии.
Радуйтеся, яко в лихолетии
сподобистеся надгробнаго пения;
Радуйся, яко ныне Богу приносите
наше моление.
Радуйтеся, Павле, царствуяй со
апостолы, и Григорие, веселяйся со мученики;
Радуйся, воспитавшии истины
поборники и добродетелей небесных венечники.
Радуйтеся, верных скорбь о убиении
вашем в радость претворившии;
Радуйся, добрую весть о подвизе
своем Церкви явившии.
Радуйтеся, веры ради смерть
мученическую приимшии;
Радуйся, мученичества ради жизнь
вечную обретшии.
Радуйтеся, светом воскресения души
своя украсившии;
Радуйся, елеем радования
светильники своя исполнившии.
Радуйтеся, священномученицы Павле и
Григорие, Пермския земли благодатнии заступницы.
Кондак 8
Странное чудо видевше, устранимся
суеты мирския, и удивимся, уведевше мученик память
живу во обретении мощей их, ихже место погребения
жители веси Мокинския оградиша, и всякому
приходящу кланятися повелеваху, в сердце воспевая:
Аллилуиа.
Икос 8
Вси во огни любве Божественныя суще,
иерею Павле с единомудренным собратом диаконом
Григорием, на небеси престолу Божию предстали есте
во единем лице с новомученики славными, сего ради
поем вам сице:
Радуйтеся, яко память ваша на земли
с похвалами;
Радуйся, яко радость ваша на
небесех со святыми.
Радуйтеся, престолу Божию во свете
предстоящии;
Радуйся, Матерь Божию во очию
видящии.
Радуйтеся, Павле, молитвенниче
крепкий, и Григорие, помощниче скорый;
Радуйся, дерзновение стяжавшии
мученическое и молитве навыкшии непрестанней.
Радуйтеся, печальницы наши и
ходатаи;
Радуйся, сострадатели наши и
защитницы.
Радуйтеся, самовидцем жития вашего
столпи светоноснии;
Радуйся, новообращенным в веру
православную кормчии добрии.
Радуйтеся, неведущим бо вас внезапу
яко попечители открываетеся;
Радуйся, от возлюбивших вас ныне
яко благодетели ублажаетеся.
Радуйтеся, священномученицы Павле и
Григорие, Пермския земли благодатнии заступницы.
Кондак 9
Всякое естество ангельское
мучениколюбцы воздвизает усердно угодников Божиих
почитати, мощем же тех верно покланятися, да вси,
светом благодати просвещаеми, во единении со
святыми древними и новыми Бога прославляем, поюще:
Аллилуиа.
Икос 9
Ветии духовнии воспевают радостно
честное обретение мощей ваших, не точию бо
Пермстей земли сие милость бысть, но и всякому
граду и стране, идеже чтут новомученик память;
темже и мы, о Павле и Григорие, лик составльше,
согласно взываем:
Радуйтеся, весь Мокинскую телесы
многострадальными облагодатившии;
Радуйся, людем, прошения
возсылающим, чудодействующии.
Радуйтеся, в мире живущих помощию не
оставльшии;
Радуйся, мира страждущаго скорби
утоляющии.
Радуйтеся, о людех православных
попечителие и скорбящим в бедах утешителие;
Радуйся, церковных чад воспитателие
и заблуждающихся к свету путеводителие.
Радуйтеся, помощницы юным во
избрании нивы церковныя;
Радуйся, наставницы верных в
трудех во славу Божию.
Радуйтеся, служителем престола Божия
к совершенству путь показующии;
Радуйся, молитвенником в земли
Пермской к постоянству силу подающии.
Радуйтеся, подвизающимся во храмех
святых поможение доброе;
Радуйся, изнемогающим в печалех
лютых подпора крепкая.
Радуйтеся, священномученицы Павле и
Григорие, Пермския земли благодатнии заступницы.
Кондак 10
Спасти хотя мир, Господь наш и
Владыка Церковь учреди со Святыми Таинствы ея,
святыни же дарова роду человеческому, чудотворя и в
телесех усопших угодников Своих; мы же обретению
мощей священномучеников Павла и Григория радующеся,
вопием: Аллилуиа.
Икос 10
Столпостена есте нам, святии Павле и
Григорие, вы бо, угодницы Христовы, телесы во
гробех лежаще, духи прогоняете, болезни исцеляете;
мы же нетление мощей и риз ваших священных
прославляюще, воспеваем сицевая:
Радуйтеся, сокровище, в земли
сокрытое, нам даровавшии;
Радуйся, благословение, на Небесех
раздаемое, сим источившии.
Радуйтеся, яко о открытии гробов
ваших возвеселися мучениколюбцев сословие;
Радуйся, яко о явлении мощей
ваших возрадовашася Небесная Воинства.
Радуйтеся, веси Мокинския
благовестницы и тоя благоухание;
Радуйся, от Ангелов воспеваемии и
от человек похваляемии.
Радуйтеся, Пермских святых
празднество явлением благодатным своим украсившии;
Радуйся, Спасителя Вознесшагося
храм пренесением святых мощей своих возвеселившии.
Радуйтеся, Троицы поборницы, в Перми
Велицей водворившиися;
Радуйся, Духа жилища, в людех
благоговейных чудодействовавшии.
Радуйтеся, празднество ново людем
своим даровавшии;
Радуйся, святынею новою в краи
нашем возсиявшии.
Радуйтеся, священномученицы Павле и
Григорие, Пермския земли благодатнии заступницы.
Кондак 11
Пение молебное совершается на всяк
день усердно во храме Вознесения Господня, в немже
положени суть цельбоносныя мощи ваша,
священномученицы Павле и Григорие, верным на
утешение, единогласно хвалящим Бога: Аллилуиа.
Икос 11
Светоподательный светильник рака
мощей ваших явися граду Перми и всей земли нашей,
мученик бо своих почтити достойно малии и велицыи
притекают, и утешение с просвещением вкупе
приемлюще, возглашают сице:
Радуйтеся, не под спудом забвения
сокровеннии;
Радуйся, на свещнице славы
благодатию сияющии.
Радуйтеся, душ скорбящих животворное
обновление;
Радуйся, недугов тяжких надежное
исцеление.
Радуйтеся, Павле, святых
согражданине, и Григорие, друже спасенных;
Радуйся, людей Пермских святыня и
всех верных веселие.
Радуйтеся, никтоже бо лишается
милостивнаго вашего посещения;
Радуйся, николиже бо пресецается
милосердия вашего источник.
Радуйтеся, мощми своими безсмертие
проповедающии;
Радуйся, от раки своея чудеса
источающии.
Радуйтеся, питателие наши и
молитвенницы;
Радуйся, благодетелие наши и
защитницы.
Радуйтеся, священномученицы Павле и
Григорие, Пермския земли благодатнии заступницы.
Кондак 12
Благодать прияти восхотевше, людие
Пермстии со тщанием к вам притекают на всяк день,
многих знамений и чудес сподобляющеся, и другов и
ближних своих созывающе пети Богу: Аллилуиа.
Икос 12
Поюще обретение мощей ваших,
восхваляем вас яко Божиих угодников, вами бо
неверующии ко Христу приводятся, болящии приемлют
здравие, грешницы обращаются ко благочестию и вси
благодарственно взывают сице:
Радуйтеся, покаяния спасительнаго
проповедницы;
Радуйся, сострадания Спасителева
провозвестницы.
Радуйтеся, прощения на Кресте грехов
наших возвестителие;
Радуйся, избавления от недуг наших
в Таинствах указателие.
Радуйтеся, Павле, верных поборниче, и
Григорие, вразумление падшим;
Радуйся, края Пермскаго чудотворцы
и светильницы душам нашим.
Радуйтеся, младенцем и отроком
наставницы неленостнии;
Радуйся, отцем и матерем помощницы
благопоспешнии.
Радуйтеся, монахом и священником
покровителие усерднии;
Радуйся, старым и недужным
утешителие истиннии.
Радуйтеся, украшение новых мученик;
Радуйся, радование всех
мучениколюбцев.
Радуйтеся, священномученицы Павле и
Григорие, Пермския земли благодатнии заступницы.
Кондак 13
О святии сродницы наши,
священномученицы Павле и Григорие, за веру Христову
во дни гонений пострадавшии и мощми своими нам
возсиявшии! Моление наше малое приемлюще, всем
полезное подайте еже ко спасению и в Царствие
Небесное восход испросите любовию поющим Богови:
Аллилуиа.
Молитва священномученикам Павлу Аношкину
и Григорию Смирнову
О новомученицы славнии, иерею Павле
и диаконе Григорие! Днесь, верно сошедшеся,
восхваляем честная страдания ваша, яже в годину
тяжкую гонений на Церковь Русскую претерпесте.
Почитаем и братскую любовь вашу, веры бо нравом
связуеми, яко единодушнии сослужителие, согласно и
муки за Христа приясте. Ублажаем любовь вашу,
псалмопевца бо глаголы в час испытания воспомянусте,
яко добро и красно жити братии вкупе, благо же
есть и в Царствии Небеснем вкупе радоватися. Дивимся
долготерпению вашему, ни мраз бо, ни раны, ни коньми
истязание от Бога вас разлучиша. Покланяемся
честным мощем вашим, до времене под спудом земным
сокровенным, напоследок же, яко некий дар
светоносный, всей земли Пермстей возсиявшим. Ныне
молите Великодаровитаго Бога, явлением мощей ваших
нас недостойных почтившаго, да пробавит молитвами
вашими милость Свою ведущим веру православную, да
обратит к ней отпадшия, да укрепит верныя в стоянии
за правду Божию, да сподобит нас от мощей ваших
почерпнути исцелений Божественное действо,
благодать и милость, и да дарует нам единеми усты и
единем сердцем славити и воспевати пречестное и
великолепое имя Отца, и Сына, и Святаго Духа,
ныне и присно, и во веки веков. Аминь.
***
Молитва священномученикам Павлу и Григорию Мокинским:
Акафист священномученикам Павлу Аношкину и Григорию Смирнову Мокинским:
Канон священномученикам Павлу Аношкину и Григорию Смирнову Мокинским:
Житийная и научно-историческая литература о священномучениках Павле Аношкине и Григорие Смирнове (Мокинских):
|
