Православные акафисты / Акафист преподобному Лонгину Коряжемскому

Православные акафисты

Акафист преподобному Лонгину Коряжемскому

Кондак 1

Избранный Господом от юности быти сокровищницею Его благодати, преподобне отче Лонгине, с верою, надеждою и любовию припадаем к раце честных мощей твоих, ты же, яко имеяй велие дерзновение ко Господу, свобождай нас от всякаго зла, да со умилением зовем ти:

Радуйся, Лонгине, заступниче наш и предивный чудотворче.

Икос 1

Ангела нравом, аще и человек бе, зрим тя, преподобне: ты бо, от юности к житию иноческому влекомый, токмо в летех совершенных пришел еси во обитель Павло-Обнорскую и ту поселился еси. Испытанный же во всяцем послушании, удостоен был еси образа ангельска и прилагал еси труды к трудом, подвизая взывати тебе:

Радуйся, измлада единого на потребу искавый.

Радуйся, послушанием безропотным гордость в себе искоренивый.

Радуйся, отречением от благ земных всякаго стремления к любостяжанию избежавый.

Радуйся, исполнением неуклонным устава иноческаго от всех обычаев мирстих ся оградивый.

Радуйся, преподобнаго Павла Обнорскаго в пример себе поставивый.

Радуйся, в преподобном Симоне друга по сердцу твоему избравый.

Радуйся, душеполезными беседами с другом тем яко пищею здравою себе питавый.

Радуйся, пример сицеваго согласия всем иноком показавый.

Радуйся, Лонгине, заступниче наш и предивный чудотворче.

Кондак 2

Видяще, яко многолюдие обители Павло-Обнорския нарушало тишину жития иноческаго и вело к некиим нестроениям, ты, преподобне, от всея души возжелал еси удалитися из обители в пустыню, да в тишине оныя чистым сердцем воспоеши Спасителю Богу: Аллилуиа.

Икос 2

Разумом, в иночестве умудренном, познал еси, преподобне, сладость безмолвия пустыннаго и купно с другом Симоном отшел еси в весь Сольвычегодску, идеже друг той, яко зде рожденный, восхоте показати тебе место, пустынному житию потребное, ты же, яко пустынножитель совершенный, отходя из обители Павловы, приял еси с собою токмо един крест древяный, данный ти в благословение от обители Павловы. Прославляя сицевое твое произволение, взываем ти:

Радуйся, пустыннолюбия ревнителю.

Радуйся, пустынников древних: Антония, Павла, Арсения последователю.

Радуйся, и в пустыню по благословению обители отшедый.

Радуйся, крестоносче непобедимый.

Радуйся, всякое стяжание единым крестом заменивый.

Радуйся, любовь твою ко кресту житием твоим доказавый.

Радуйся, преискренним другом святому Симону явивыйся.

Радуйся, Лонгине, заступниче наш и предивный чудотворче.

Кондак 3

Силою Божиею охраняемый, достиг еси, преподобне, купно с преподобным Симоном, веси Сольвычегодския и ту, отдыха ради, во обители Борисоглебстей поселился еси, благодарне взывая Путеводителю Господу: Аллилуиа.

Икос 3

Имея в душе твоей желание непреоборимое пустыннаго жития, ты, преподобне, не по мнозех днех вкупе с преподобным Симоном остависта обитель Борисоглебскую и текоста в пустыню по шуиему брегу реки Вычегды до устья реки Коряжемки, идеже за пятьнадесять поприщ от града Соли друг твой указа тебе место пустынное, еже узрев, преподобне, воскликнул еси в восторзе духовнем: "Се покой мой, зде вселюся". Посем оба друга начаста рубити лес и расчищати место и построиста исперва келию и часовницу, последи же храм во славу и честь святаго Николая - Мирликийскаго Чудотворца, и очистиста место ради посева зерна, да будева питатися от труда рук своих. Толикое усердие твое к пустыни ведяще, по долгу вопием ти:

Радуйся, горлицо пустыннолюбная, вся красная мира сего ради пустыни оставившая.

Радуйся, душе святая, пустыню яко дар Божий восприявшая.

Радуйся, от трудов рук твоих себе питавый.

Радуйся, в трудех сих велие ограждение от мечтаний душевредных и уныния обретый.

Радуйся, пути стропотны к пустыни твоей в пути гладки обративый.

Радуйся, труды и подвиги твоими путь к царствию небесному тебе самому и последователем твоим свободен сотворивый.

Радуйся, труды твоими пустыню уплодоносивый.

Радуйся, пример трудолюбия иноком и миряном показавый.

Радуйся, Лонгине, заступниче наш и предивный чудотворче.

Кондак 4

Бурь моря житейскаго избежавый и пристанище тихое в пустыни обретый, избави и ны от треволнений житейских и душепагубного уныния, да с верою и любовию воспоем Спасителю всех Богу: Аллилуиа.

Икос 4

Слыша в Священнем Писании, яко аще кто любит отца, или матерь, или братий, сестры паче Бога, несть Его достоин. Ты, преподобне, во отшествии друга твоего преподобного Симона в пустыню Сойгинскую, узрел еси промыслительную волю Божию и отпустил его с миром. Сицевая покорность твоя воле Господней подвизает возглашати тебе:

Радуйся, Единаго Господа твоего всем сердцем и всею душею твоею возлюбивый.

Радуйся, токмо в Бозе Единем спасение твое узревый.

Радуйся, молчание яко лучший путь ко спасению почитавый.

Радуйся, ради того же спасения другом твоим оставленный.

Радуйся, светом подвигов пустыню озаривый.

Радуйся, светом тем мнозих чающих спасения привлекий.

Радуйся, заблуждших в вере чудесы твоими просвещаеши.

Радуйся, благодатию от Бога тебе данною враги наша отгоняеши.

Радуйся, Лонгине, заступниче наш и предивный чудотворче.

Кондак 5

Боготечною звездою в веси Сольвычегодстей явился еси и мнозих подвиги твоими удивил еси и ко Христу привел еси, преподобне, подвизая взывати Ему, яко источнику света и радости вечныя: Аллилуиа.

Икос 5

Видевше вси чаявшии душевнаго спасения людие долготерпение твое и твоя подвиги, преподобне, начаху стекатися в пустыню твою и просити тя прияти их в пустыню и обитель общежительную устроити; ты же, преподобне, аще и стремился еси к молчанию и житию отшельническу, обаче по воле Божией, иже всем человеком хощет спастися и в разум истины приити, ускорил еси общежитие в пустыни твоей устроити и был еси первым игуменом его, сего ради взываем ти:

Радуйся, воли Божией верный исполнителю.

Радуйся, всех чающих спасения мудрый учителю.

Радуйся, себялюбия искоренителю.

Радуйся, общежития спасительнаго мнозим устроителю.

Радуйся, Святителя Николая Мирликийскаго, егоже икона во обители прославися чудесы, усердный слуго.

Радуйся, покрову угодника сего себе и обитель твою вручивый.

Радуйся, плавающим по волнам моря житейскаго пристанище благоотишное.

Радуйся, обители твоея первый игумене.

Радуйся, Лонгине, заступниче наш и предивный чудотворче.

***

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедницы трудолюбия и подвигов твоих, преподобне, являются до сего дня кладезь, рукама твоима ископанный, и власяница жестокая, юже на теле твоем носил еси, и подвизают верных взывати Подвигоположнику Христу Богу: Аллилуиа.

Икос 6

Возсиявый в пустыни зарею пресветлою и согревая любовию христианскою всех, во обитель твою притекающих, достиг еси, преподобне, предела жития твоего и мирно преставился еси к небесным обителем, сохранивый до гроба смирение твое и заповедавый положити тело твое у прага храма, да вси входящии в онь и исходящии из него попирали е ногама своима. Мы же, недостойнии, токмо на милосердие твое уповающии, дерзаем взывати тебе:

Радуйся, любве христианския исполненный.

Радуйся, мирныя христианския кончины удостоенный.

Радуйся, по смирению твоему место погребения твоего у прага храма избравый.

Радуйся, за смирение в небесныя обители введенный.

Радуйся, житием твоим высоту иночества показавый.

Радуйся, яко по преставлении твоем руку помощи мнозим нуждающимся простираеши.

Радуйся, сердца мнозих к Богу привлекаеши.

Радуйся, Лонгине, заступниче наш и предивный чудотворче.

Кондак 7

Хотяй в житии твоем всем вся быти, преподобне, да всяко некия спасеши, основал еси обитель Коряжемскую, яже и по преставлении твоем имея в тебе покровителя и заступника, воспеваем немолчно Господу Человеколюбцу: Аллилуиа.

Икос 7

Новый неисчерпаемый источник благодати Божией открывся в мошех твоих, преподобне, егда Господь наш Иисус Христос восхоте прославити оныя и избавити я от небрежения, и егда некий воевода, устюжский князь Владимир, впаде в разслабление, ты, преподобне, по воле Божией явился еси разслаблену в сонном видении и подал еси ему совет: аще хощет здрав быти, да посетит обитель твою и накажет игумену оныя пренести мощи твоя на подобающее им место, и при сем ты указал еси болящему и место погребения твоего, и место, идеже довлеет положити мощи твоя по пренесении. Егда же воевода той прибыл впервыя во обитель, точно указа место твоего погребения, тогда же обретен бысть гроб с мощами твоими и пренесен бысть на указанное тобою место, болящий же воевода внезапу исцелен бысть, прославляя Господа и тебе, яко великаго чудотворца. Сего ради вопием ти:

Радуйся, за смирение и воздержание нетлением прославленный.

Радуйся, обретением мощей твоих обитель твою обрадовавый.

Радуйся, пренесение мощей сих исцелением воеводы ознаменовавый.

Радуйся, нетлением мощей твоих плоды смирения и подвигов твоих показавый.

Радуйся, трудолюбцы и униженных мира сего возвышающий.

Радуйся, гордыню мудрых сынов века смиряющий.

Радуйся, из гроба зол грешных извлачающий.

Радуйся, обретением мощей твоих и чудесы всякое сумнение в святости твоей отгоняющий.

Радуйся, Лонгине, заступниче наш и предивный чудотворче.

Кондак 8

Странное явление твое иноку Иродиону во время совершения панихиды при гробе твоем, преподобне, ведяще, устранимся мира и ум на небеса возложше, прославим Бога Спасителя нашего, дозволившаго ти явитися, яко живу и сущу и воспевати с сущими на земли Ему, Всемогущему: Аллилуиа.

Икос 8

Весь бе в вышних, но и нижних не оставлял еси и ныне не оставляеши, преподобне, зане мнозих исцелил еси, в них же быша: припадочная раба Божия Агриппина, отравленная за целомудрие раба Божия Анна, и болящий ногама иерей Божий Гавриил, иже вси у гроба твоего исцеления получиша, и ныне мнозих исцеляеши, подвизая чтущии тя взывати:

Радуйся, разслабленных востановителю.

Радуйся, целомудрия охранителю.

Радуйся, веры православныя утвердителю.

Радуйся, прилогов вражиих отгонителю.

Радуйся, яко послушанием и смирением мнозих на путь истинный направляеши.

Радуйся, яко мир и согласие в насельниках обители сохраняеши.

Радуйся, яко исцеленных тобою ко Господу Спасителю нашему приближаеши.

Радуйся, сущих в скорбех нечаянною радостию скоро утешаеши.

Радуйся, Лонгине, заступниче наш и предивный чудотворче.

Кондак 9

Вси, видевшии тя по преставлении твоем, преподобне, аки жива суща, вельми удивляхуся и, разумев тя яко Ангела-хранителя веси Сольвычегодстей, взывах во умилении Богу Всемогущему: Аллилуиа.

Икос 9

Витии многовещанныя недоумеют уяснити, како некоего земледельца Коряжемския вотчины по имени Луппа исперва наказал еси безумием и болезнию за богохульство, последи же ему, раскаявшуся и лежащу на одре болезни, явился еси, преподобне, и начал еси веяти над ним твоею одеждою и повелел еси идти во обитель твою, отправити молебен Спасу и Пречистей Его Матери и поклонитися гробу твоему и, абие, исполнив наказ той, Лупп здрав содеяся, подвизая взывати тебе:

Радуйся, богопочтения ревнителю.

Радуйся, богоотступников наказателю.

Радуйся, грешников кающихся пред Богом ходатаю.

Радуйся, в милосердии твоем Христу верный последователю.

Радуйся, подвластных тебе отец чадолюбивый.

Радуйся, в трудех их усердный пособниче.

Радуйся, добрый пастырю стада Христова.

Радуйся, свирель, утешающая овцы, тобою стерегомыя.

Радуйся, Лонгине, заступниче наш и предивный чудотворче.

Кондак 10

Спасти хотя душу единаго от инок коряжемских, иже впаде во уныние и нача сумлеватися во святости твоей, преподобне, благоволил еси явитися иноку тому, аки живым и на одре лежащим. И егда инок той, страхом одержимый, не смеяше приблизитися ко одру твоему, ты разрешил еси иноку приити к тебе и благословил еси его, и от того часа радостию исполнися сердце инока того, и веруя в святость твою, с веселием взываше Господу Утешителю: Аллилуиа.

Икос 10

Стеною крепкою явишася мощи твоя, преподобне, и привлекоша мнозих боголюбцев, в них же един из первых бысть блаженный Александр, епископ Вятский и Великопермский, постриженник Коряжемский, иже устрои иждивением своим во обители твоей храм каменный во славу и честь Пресвятыя Богородицы честнаго Ея Благовещения с приделом Святителя и Чудотворца Николая, и честныя мощи твоя в храме сем приведошася у полунощной страны онаго. По мнозех же летех епископ Вологодский Онисифор восхоте прославити тя, яко угодника и чудотворца, благослови пети над гробом твоим пение молебное взамен панихиды, преклоняяся пред волею Божиею, восхотевшею прославити тя яко угодника Божия, возглашаем ти:

Радуйся, обители твоея усердный охранителю.

Радуйся, иноков унывающих мудрый утешителю.

Радуйся, яко от чтения жития твоего мнози для души своея пользу почерпают.

Радуйся, яко чудеса от мощей твоих тму неверия разгоняют.

Радуйся, яко чудеса тая и нетление твое воздати должную честь Святителей Божиих подвизают.

Радуйся, яко твое попечение неоскудное упраздненную обитель твою в новей славе возстановляет.

Радуйся, яко весь Сольвычегодская память твою светло торжествует.

Радуйся, яко и вся Церковь Вологодская к лику святых и чудотворцев своих тя причисляет.

Радуйся, Лонгине, заступниче наш и предивный чудотворче.

Кондак 11

Пение всеумиленное приносим Богу Спасителю нашему, даровавшему Церкви Вологодстей в тебе, преподобне, мудраго пособника в нуждах и скорбех, всегласно взывая: Аллилуиа.

Икос 11

Светозарною звездою сияют мощи твоя, преподобне, источая чудеса велия: тако егда падоша две главы и часть свода Благовещенскаго храма и в оном все разрушено бысть, гробница же твоя сокрыся от очию под обломками и камнями и вси мнеша, яко и мощи твоя раздроблени быша, но, о чудо неизреченное! Егда гробница твоя свобождена бысть от обломков и камений, вси со умилением узреша, яко не токмо гробница и лик твой на оной ничим же вредимы быша, но уцелел и кивот скланный, в нем же на гробнице твоей хранися изображение главы святаго Иоанна Предтечи. Сего ради по долгу взываем ти:

Радуйся, Чудотворче изрядный, ему же силы земныя повинуются.

Радуйся, угодниче избранный, его же мощи святый Иоанн Предтеча, яко великий пустыннолюбец, от разрушения охраняет.

Радуйся, яко вси притекающии к мощем тем от видимых зол невидимую защиту приемлют.

Радуйся, яко мощи тыя обитель твою богатно украшают.

Радуйся, яко чудеса твоя неверным сумнительное слышание.

Радуйся, яко тыя верным известная похвало.

Радуйся, постников воздержание.

Радуйся, преподобных радование.

Радуйся, Лонгине, заступниче наш и предивный чудотворче.

Кондак 12

Благодать избавления от всякия скорби и печали даде тебе, преподобне, Господь наш Иисус Христос, да вси благодарне славят Его, яко Благаго Промыслителя, зовуще во умилении: Аллилуиа.

Икос 12

Поюще твое равноангельное житие и прославляя твоя обильныя чудеса, молим тя, преподобне, осени наша благая дела и начинания и укрепи ны на борьбу с врагами видимыми и невидимыми, да со умилением взываем ти:

Радуйся, тяжких искушений вражеских отгонителю.

Радуйся, врагов наших духовных и телесных победителю.

Радуйся, пустынников украшение.

Радуйся, печалей неотметных утоление.

Радуйся, странных путеводителю.

Радуйся, в пленении сущих скорый освободителю.

Радуйся, юных наставниче.

Радуйся, старости поддержателю.

Радуйся, Лонгине, заступниче наш и предивный чудотворче.

Кондак 13

О пречудне и достохвальне преподобне отче Лонгине, веси Сольвычегодския отрада и утешение, с любовию приими от нас грешных малое сие хваление и умоли возлюбльшаго тя Господа даровати обители твоей и всей веси Сольвычегодстей мир, здравие, благоденствие и плодов изобилие; царству Русскому мудрость и силу и на враги победу и одоление, доблестным воинам нашим - мужество и непреодолимую храбрость; всем же нам взаимную любовь и согласие, да избавленнии тобою от страстей и грехов, непрестанно славим Господа Человеколюбца, воспевая Ему победную песнь: Аллилуиа, Аллилуиа, Аллилуиа.

Сей Кондак читается трижды, затем Икос 1 и Кондак 1.

Молитва преподобному Лонгину Коряжемскому

О великий угодниче, преславный чудотворче и обители твоея богодухновенный наставниче, Лонгине преблаженне, душею на небеси Престолу всех Царя предстояй, телом же во святей обители почиваяй и различная чудеса повсюду молитвами твоими совершаяй! Призри милостивно на люди предстоящыя и твоего ко Господу Богу ходатайства во обдержащих нуждах просящия: вси бо мы, по множеству грехов наших, не смеем ниже возвести очес своих на небо. Ты же, яко стяжавый дерзновение, принеси за всех, к честному гробу твоему притекающих, теплыя молитвы ко Господу, еже избавитися нам от глада, потопа, труса, огня, меча и брани, от людей и от диавола бывающия, и от всякия душевныя и телесныя болезни; да сих избежавше, и Господу, Емуже предстоиши, работающе, внидем в нескончаемый покой и прославим тамо с тобою всех благих подателя Бога, всегда, ныне и присно и во веки веков. Аминь.

Тропарь преподобному Лонгину Коряжемскому, глас 1

От мятежа мирскаго удалився, к немерцающему свету притекл еси, преподобне отче Лонгине, и ныне чисте зриши Святую Троицу, юже моли за ны недостойныя, да спасет души наша.

Кондак преподобному Лонгину Коряжемскому, глас 8

По словеси Учителя Христа, крест на рамо твое приял еси, вся житейская отринув и образ животворящаго древа в пустыню принесл еси, идеже доныне исцеления неоскудно источаются с верою приходящим ко гробу твоему.

Величание

Ублажаем тя, преподобне отче Лонгине, и чтим святую память твою, наставниче монахов и собеседниче ангелов.

Читать другие акафисты раздела "Православные акафисты"