Православные каноны
Канон великомученице Варваре Илиопольской
Эта красивая, умная
и мужественная девушка претерпела множество пыток за
Христа. Перед казнью святая Варвара молила Бога,
чтобы все, кто будут, вспоминая ее мученичество,
просить ее помощи, были избавлены от внезапной
смерти без исповеди и причащения Святых Христовых
Таин. Господь принял просьбу мученицы. По молитвам
святой Варваре посылаются обильные врачевания, ей
молятся также об умягчении родительского гнева и
своеволия, о избавлении от уныния и печали
Память: 4 / 17 декабря
Святая
великомученица Варвара Илиопольская. Икона, конец XV
века. Храмовой образ Варваринского монастыря
Волоколамска. С XVII века находится в Покровской церкви
Волоколамска
Глас 8
Песнь 1
Ирмос: Воду прошед, яко сушу, и
египетскаго зла избежав, израильтянин, вопияше:
Избавителю и Богу нашему поим.
Припев: Святая великомученице
Варваро, моли Бога о нас.
Воду нечестия тименну оставивши, к воде
чистительной притекла еси, Варваро, и наша очисти
сердца, чисто пети твоя страдания.
Водою Крещения очистившися,
великомученице, Чистому Жениху, Христу, прилепилася еси,
Емуже и нас чисто присвой молитвами твоими.
Слава Отцу, и Сыну, и Святому Духу.
В воде потопльшему змия лукаваго
подобящися, кровию твоею страдальческою вражию погрузила
еси силу, страстоносице, от негоже и нам избавитися
Спаса умоли.
И ныне и присно, и во веки веков. Аминь.
Богородичен: Воду слез очищающую,
Пречистая, подаждь ми и, очистивши мя от кала
беззаконий, чиста представи, Богородительнице, Сыну
Твоему и Богу.
Песнь 3
Ирмос: Небеснаго круга Верхотворче,
Господи, и Церкве Зиждителю, Ты мене утверди в любви
Твоей, желаний краю, верных утверждение, Едине
Человеколюбче.
Припев: Святая великомученице
Варваро, моли Бога о нас.
Небеснаго круга смотряющи украшение,
мудрая дево Варваро, Верхотворца познала еси, Егоже и
возлюбльши, Тому служити изволила еси. И нас в любви Его
утверди, молимся.
Небеснаго Творца в Троице пресветлое
изобразующи естество, три окна в бане отечестей
изобразити повелела еси, Троическому покланятися учащи
Божеству, Емуже и нас вечно покланятися сподоби.
Слава Отцу, и Сыну, и
Святому Духу.
Небеснаго чертога желающи, Небесному
Жениху чистоту девства твоего соблюла еси, временнаго
презревши. И мене в чистоте Тому служити, мученице,
укрепи.
И ныне и присно, и во веки веков. Аминь.
Богородичен: Небеснаго Творца,
Богородице Всепетая, порождши, Небес пространнейша
явилася еси. Мене от пространнаго пути погибельна
уклонши, на Небесный путь настави, молюся.
Господи, помилуй, трижды.
Песнь 4
Ирмос: Услышах, Господи, смотрения
Твоего таинство, разумех дела Твоя и прославих Твое
Божество.
Припев: Святая великомученице
Варваро, моли Бога о нас.
Услышавши, Варваро, небеса, поведающа
славу Божию, на земли Бога славити возжелала еси, Егоже
славы и нас сподоби.
Услышав отец твой тебе, Вышняго Отца
исповедующую, гоняше на убиение, но не возможе
отторгнути от истиннаго Бога.
Слава Отцу, и Сыну, и
Святому Духу.
Услышавши прещения отеческая и муки от
него терпящи, Варваро, непоколебима пребыла еси и мене
непоколебима в добродетелех управи.
И ныне и присно, и во веки веков. Аминь.
Богородичен: Услыши, Пречистая
Владычице, моление мое, и избави мя от зол, и глас
благословенных, призывающий в Царство, слышати удостой.
Песнь 5
Ирмос: Просвети нас повелении Твоими,
Господи, и мышцею Твоею высокою Твой мир подаждь нам,
Человеколюбче.
Припев: Святая великомученице
Варваро, моли Бога о нас.
Просветивши свещу свою, мученице, верою, свещами опалити тело твое предала еси, в чертог Небесный
светло внити желающи.
Припев: Святая великомученице
Варваро, моли Бога о нас.
Просвещахуся верою неверием омраченнии
людие, видяще тя, жжения, биения, резания терпящую доблественне, мученице.
Слава Отцу, и Сыну, и
Святому Духу.
Просвети мя, о Варваро, омраченнаго
мглою греховною, и Светом Невечерним осияватися, светлая дево, молюся, сотвори.
И ныне и присно, и во веки веков. Аминь.
Богородичен: Просветила еси потемненное
естество, Богородице, Свет истинный рождши. Темже и
мене, светом просветивши, от мрачных враг свободи.
Песнь 6
Ирмос: Молитву пролию ко Господу и Тому
возвещу печали моя, яко зол душа моя исполнися и живот
мой аду приближися, и молюся, яко Иона: от тли, Боже,
возведи мя.
Припев: Святая великомученице
Варваро, моли Бога о нас.
Молитву твою страдальческую услышав,
Христос, Варваро, в темнице затворенную посети,
исцеление от ран подаде и на подвиг укрепи, ты же моя
раны греховныя уврачуй, мученице, молюся.
Молитвою ти, и страдальческим твердым
терпением, и чудным исцелением Иулианию от злочестия
привлекла еси страдати с тобою за Христа, привлецы и
мене к Горнему мудрованию, страстоносице.
Слава Отцу, и Сыну, и
Святому Духу.
Молитву всяк приносяй с верою тебе,
мученице, и к мощам твоим святым притекаяй, душевных
страстей и телесных исцеление скоро приемлет, еже и нам богатно подавай, молимся.
И ныне и присно, и во веки веков. Аминь.
Богородичен: Молитву нашу приими,
Пречистая, и молитвою Ти всемощною избавити нас от враг
видимых и невидимых, от грехов же и всякия муки моли, Егоже родила еси, Человеколюбца Бога.
Господи, помилуй, трижды. Слава, и ныне:
Кондак, глас 4
В Троице благочестно певаемому,
последовавши Богу, страстотерпице, идольская притупила еси чтилища; посреде же подвига страдальчествующи,
Варваро, мучителей прещения не устрашилася еси,
мужемудренная, велегласно поюши присно: Троицу чту,
Едино Божество.
Песнь 7
Ирмос: Отроцы еврейстии в пещи попраша
пламень дерзновенно и на росу огнь преложиша, вопиюще:
благословен еси, Господи Боже, во веки.
Припев: Святая великомученице
Варваро, моли Бога о нас.
Дети еврейския Ангел от огня неопальны
сохранивый и тебе, Варваро, нагу водиму, от студа
защити, одеждою свыше облек, поющую: благословен еси,
Господи Боже, во веки.
Детское игралище вменяющи муки, не
пощадила еси тела твоего, еже быти ему за Христа стружему и остро стираему, великомученице, поющи:
благословен еси, Господи Боже, во веки.
Слава Отцу, и Сыну, и
Святому Духу.
Детей еврейских и аз подражая, Варваро,
хвалю Христа, давшаго тебе крепость, ты же мя, на подвиг
добродетелей укрепльши, одеждою Небесною облещися
сподоби во веки.
И ныне и присно, и во веки веков. Аминь.
Богородичен: Детородию Твоему, Девою и
по рождестве пребывшу, дивлюся, Богородице, удиви убо и
на мне милость Сына Твоего, да, помилован Тобою, пою:
благословен Бог, ублагословивый Тя, Матерь Свою, во
веки.
Песнь 8
Ирмос: Победители мучителя и пламене благодатию Твоею бывше, заповедем Твоим зело прилежаще,
отроцы вопияху: благословите, вся дела Господня,
Господа.
Припев: Святая великомученице
Варваро, моли Бога о нас.
Победителие непобедимыя твоея веры
мучителие тщащеся быти, сосца твоя нещадно отрезоваху,
ты же, твердо терпящи, млеком учения о Бозе напоила еси
предстоящия и благословящия Христа во веки.
Победила еси мужеством твоим, мученице Варваро, вся мучительская ухищрения. Моли убо Владыку
Христа, молим тя, всем верным на враги победу дати,
поющим: благословите, вся дела, Господа и превозносите
Его во веки.
Слава Отцу, и Сыну, и
Святому Духу.
Победительница суроваго отца твоего явилася еси, мученице: он бо Небесным огнем во адский
огнь низведеся, ты же на Небо возшла еси, еже и мне
исходатайствуй, от огня избавляющи мя во веки.
И ныне и присно, и во веки веков. Аминь.
Богородичен: Победи, Пречистая, врагов
видимых и невидимых, низложити нас тщащихся, и страстей
мя всяких избави, да пою торжественне: благословите, вся
дела, Господа и превозносите Его во веки.
Песнь 9
Ирмос: Воистину Богородицу, Тя
исповедуем, спасеннии Тобою, Дево Чистая, с Безплотными
лики Тя величающе.
Припев: Святая великомученице
Варваро, моли Бога о нас.
Воистину Бога исповедающи, мученице,
чертог Небесный наследила еси, егоже и нас сподоби, да с
тобою Христа вечно величаем.
Воистину на тебе, Варваро, исполнися
Христово проречение: предаст отец чадо на смерть, еюже
ты вечный живот обрела еси.
Слава Отцу, и Сыну, и
Святому Духу.
Воистину никтоже, притекаяй к тебе,
страстоносице, тощ благодати твоея отходит, еяже и мене
исполни, молюся.
И ныне и присно, и во веки веков. Аминь.
Богородичен: Воистину истиннаго Бога
плотию, Богородице, родила еси, Егоже милостива нам в
День Суда соделай, да безконечно с Ним Тя величаем.
Светилен
Яко шипок краснейший, из терновнаго
израсла еси корене, дево Варваро, жертвою, мученице,
священнаго страдания обагрившися кровию. И ныне
Божественную твою память совершающия любовию спасай от
бед.
***
Молитва великомученице Варваре Илиопольской:
- Молитва великомученице Варваре. Эта красивая, умная
и мужественная девушка претерпела множество пыток за
Христа. Перед казнью святая Варвара молила Бога,
чтобы все, кто будут, вспоминая ее мученичество,
просить ее помощи, были избавлены от внезапной
смерти без исповеди и причащения Святых Христовых
Таин. Господь принял просьбу мученицы. По молитвам
святой Варваре посылаются обильные врачевания, ей
молятся также об умягчении родительского гнева и
своеволия, о избавлении от уныния и печали
Акафист великомученице Варваре Илиопольской:
Канон великомученице Варваре Илиопольской:
Житийная и научно-историческая литература о великомученице Варваре Илиопольской:
|
