Православные каноны
Канон первый пророку Божию Илие
Память: 20 июля / 2 августа
Один из наиболее почитаемых пророков,
как в ветхозаветном Израиле, так и в христианские
времена. Ревновал о чистоте веры в Единого Бога, боролся
с идолопоклонством среди еврейского народа. По его
молитвам Израиль вначале был оставлен без дождя для
покаяния, а спустя три голодных года, после того, как
иудеи раскаялись, а своем отступлении от истинной веры,
небо вновь произвело тучи и дождь на посевы. За
праведную жизнь много пострадал и был преследуем. Как и
праведный Енох, был взят Господом на небо в теле.
Согласно пророчествам, вместе с Енохом пророк Илия
должен вновь прийти на землю и обличить антихриста.
Пророку Илие молятся о защите христиан последних времен
от обольщения антихриста, о заступлении в гонениях, во
времена голода и повальных болезней, в бедности и других
житейских затруднениях. На Руси почитается как небесный
помощник земледельцев.
Огненное
восхождение пророка Илии. Икона с житием, 1647 год
***
Глас 2
Песнь 1
Ирмос: Поим Господеви, в мори древле
люди наставльшему и в нем фараона со всевоинством
погрузившему, песнь победную, яко прославися.
Припев: Великий пророче отче
Илие, моли Бога о нас.
Видети желающии Илии чудес
огнедохновенную силу, огнезрачнаго и честнаго языка,
духа крепость, по достоянию собрахомся.
Устне, Богоносе, и недоуменнаго языка
тесноту же и худогласие, действом, еже в тебе, Духа
отверзи и уясни к пению чудес твоих.
Слава Отцу, и Сыну, и Святому Духу.
Даеши паче естества повинувшимся, Слове,
честным Твоим повелением и покоряеши дождю двери духом,
утверждаемо слово содевая.
И ныне и присно, и во веки веков. Аминь.
Богородичен: Поем Господеви, от Девы
рожденному, и мир обновльшему, и Тоя ради нам жизнь
Божественную даровавшему, песнь победную, яко прославися.
Песнь 3
Ирмос: На камени мя веры утвердив,
разширил еси уста моя на враги моя, возвесели бо ся дух
мой, внегда пети: несть свят, якоже Бог наш, и несть
праведен, паче Тебе, Господи.
Припев: Великий пророче отче
Илие, моли Бога о нас.
Яко изряден, пророче, Учреждитель, Иже
враном творя тебе гощение, единый, насыщаяй всяко
животно благоволения. Емуже вси зовем: Ты еси Бог наш, и
несть свята, паче Тебе, Господи.
Благодать Благодетелю и Строителю,
вдовицу и пророка напитавшему неизреченным промышлением.
Емуже вси зовем: Ты еси Бог наш, и несть свята, паче
Тебе, Господи.
Слава Отцу, и Сыну, и Святому Духу.
Затворивый тученосныя облаки одождити,
пищи лишаеме Сареффе, останок брашна непрестанно росити
сотвори. Ты же взывал еси: несть свята, паче Тебе,
Господи.
И ныне и присно, и во веки веков. Аминь.
Богородичен: Ты едина паче всех от века
великим сподобилася еси и паче естества: Бога бо,
Невместимаго всею тварию, во чреве прияла еси и
воплотила еси. Темже Богородицу Тя вси почитаем.
Господи, помилуй, трижды.
Седален, глас 8
Источника чудес, пророков удобрение вси
песненно, вернии, восхвалим, Фесвитянина Илию: с плотию
бо еще сый безсмертен, яко мертв уверяет мертвых
востание. Темже дерзновение к Богу имея, подавает
исцеления верою просящим и молится Христу прилежно
согрешений оставление подати празднующим любовию святую
память его.
Песнь 4
Ирмос: Услышах, Господи, слух Твоего
смотрения и прославих Тя, едине Человеколюбче.
Припев: Великий пророче отче
Илие, моли Бога о нас.
Кореносекатель убо явился еси злобы,
мудре пророче, добродетели же насадитель, темже тя
ублажаем. Укоряше тя словесы вдовица, пищею
смерти, пророче, отрока востание уверяющи.
Назнаменова славу Троическую яве
дуновением тричисленным, матери детища жива дарова.
Слава Отцу, и Сыну, и Святому Духу.
Коль разжеглся еси, паля Божественным
огнем и ревностию, о пророче, царя обличая, творяща
беззакония.
И ныне и присно, и во веки веков. Аминь.
Богородичен: Молим Тя, Чистая, Бога без
семене заченшую, присно молитися за рабы Твоя.
Песнь 5
Ирмос: Света Подателю и веков Творче,
Господи, во свете Твоих повелений настави нас: разве бо
Тебе, иного бога не знаем.
Припев: Великий пророче отче
Илие, моли Бога о нас.
Закон отеческий тя яко молитвенника
всеистинна показа, чудодейственника, обращающа естества
стихии, Илие, и преподобну жертву попаляюща водами.
Посрамил еси изрядно, яко истины
служителю, преподобне, сквернаго студа пророки,
всеблаженне Илие, яве начертав Троическую силу.
Слава Отцу, и Сыну, и Святому Духу.
Словом благодати священствуя, Илие,
заклал еси священники студныя неповинными твоими руками,
якоже огнем, ревностию опаляемь.
И ныне и присно, и во веки веков. Аминь.
Богородичен: Тебе, рождшей Христа, всему
Содетеля, взываем: радуйся, Чистая, радуйся, Свет
возсиявшая нам, радуйся, вместившая Бога Невместимаго.
Песнь 6
Ирмос: Бездна согрешений обыде мя
последняя, но, яко пророка Иону, Господи, Господи,
возведи из истления живот мой.
Припев: Великий пророче отче
Илие, моли Бога о нас.
Столп благочестия и жития чистаго,
садитель чистоты был еси, Ангелом же подобник, чудный
Илие Богоносе.
Гнев тя пророкоубийцы жены устрашив,
вязати и решити приимша дождев течение, чудный Илие,
бегати творит.
Слава Отцу, и Сыну, и Святому Духу.
Возвысил еси, колена преклонив, ума
превознесенное око, мольбою изрядною решение творя, и
бразды земныя упоил еси тучами.
И ныне и присно, и во веки веков. Аминь.
Богородичен: Купина Тя в Синаи,
неопально приближився огню, преднаписует Матерь
Приснодеву, Всепетая Богородице Марие.
Господи, помилуй, трижды. Слава, и ныне:
Кондак, глас 2
Пророче и провидче великих дел Бога
нашего, Илие великоимените, вещанием твоим уставивый
водоточныя облаки, моли о нас единаго Человеколюбца.
Икос
Многое человеков беззаконие, Божие же
многое человеколюбие зря, пророк смущашеся Илия, яряся,
и словеса немилостивна к Милостивному подвиже,
прогневайся, возопив, на отмещущияся Тебе, Судие
праведный! Но утробу Благаго никакоже подвиже, еже
мучити Того отметающияся: присно бо покаяния всех ждет
единый Человеколюбец.
Песнь 7
Ирмос: Купина в горе огнеопальная и
росоносная пещь халдейская яве предписа Тя, Богоневесто:
Божественный бо Невещественный в вещественнем чреве Огнь
неопально прияла еси. Тем из Тебе Рождшемуся поем:
благословен еси, Боже отец наших.
Припев: Великий пророче отче
Илие, моли Бога о нас.
Преславно Божественною ты воображеною
силою облеклся, пищею четыредесятодневною, Илие чудный,
долгий шествовал еси путь. Темже в Хориве глаголал еси:
благословен Бог отец наших.
Хлад кроток показа и тонок Господа тебе,
Илие, по Бозе ревнующу Вседержители, не дух бурен, ни
трус, ни огнь стращаяй. Темже Иисусу кроткому пел еси:
благословен еси, Боже отец наших.
Слава Отцу, и Сыну, и Святому Духу.
Богоявления сподобился еси и пророчества,
якоже великий Моисей, пророки помазуя Духом и цари, Илие
чудный. И, славы на Фаворе Христовы зритель быв, пел еси:
благословен еси, Боже отец наших.
И ныне и присно, и во веки веков. Аминь.
Богородичен: Раждаеши без семене
Безначальнаго и Превечнаго Господа, Отча Сына, мудрость
же и силу, напоследок, Пречистая, паче естества плотию,
на обновление земных. Темже из Тебе рождшемуся зовем:
благословен Бог отец наших.
Песнь 8
Ирмос: Устраняйся отроков благочестивых
сообразнаго души несквернаго тела и устранися
воспитанный в безмерном веществе неутружден огнь,
присноживущу же, изувядшу пламеню, вечнующая песнь
воспевашеся: Господа, вся дела, пойте и превозносите во
вся веки.
Припев: Великий пророче отче
Илие, моли Бога о нас.
Изрядно обрете Ахав рода отражение
всегубительное, пророка обличением, сквернаго убийства
мерзское мучение: Фесвитянин же от огнедохновенна ума
Жизнодателю песнь воспеваше: Господа, вся дела, пойте и
превозносите во вся веки.
Дождит тебе огнь с небесе, попаляя, Илие,
одержимых пятьдесят сугубо, яко Божию изрядну служителю:
Держащему бо присноживотную жизнь боголепно песнь взывал
еси: Господа, вся дела, пойте и превозносите во вся веки.
Слава Отцу, и Сыну, и Святому Духу. Таинника тя показа Христос, яко чистоты
садителя и девства Пребожественное прозябение на Фаворе
Божественнаго воплощения, Божества непостижимый свет во
Своей плоти показав тебе, зовущу: Господа, вся дела,
пойте и превозносите во вся веки.
И ныне и присно, и во веки веков. Аминь.
Богородичен: Всебогатна бысть утроба
Божия Матере, яко приимши Слово дебельством плоти, от
Нея смешена земнаго зрака по ипостаси явися град Божий,
в немже Вышний жити благоволи. Емуже поем: Господа, вся
дела, пойте и превозносите во вся веки.
Песнь 9
Ирмос: Яже прежде солнца светильника
Бога возсиявшаго, плотски к нам пришедшаго из боку
Девичу, неизреченно воплотившая, Благословенная,
Всечистая, Тя, Богородице, величаем.
Припев: Великий пророче отче
Илие, моли Бога о нас.
Нетренное человеки шествие на земли
пожив, милотию струю Иорданскую Фесвитянин прешед,
оружник воздушный, неботечное соверши странное шествие
Духом.
Благочестия ревностию Фесвитянин
опаляемь, на огнезрачней колеснице взимается, милоть же
сверже, еюже, утаитися не возможе Елиссей, одеявся,
приемлет Божественную благодать.
Слава Отцу, и Сыну, и Святому Духу.
Откровение Боговидец Фесвитянин с
Моисеем зрит, яже око не виде, и ухо не слыша, и на
сердце человек земнородных не взыде, воплощенна Господа,
на Фаворе Вседержителя.
И ныне и присно, и во веки веков. Аминь.
Богородичен: Напраснаго древняго
отъятельницу осуждения и праматере исправление, Юже рода
к Богу вину присвоение, к Зиждителю мост, Тя, Богородице,
величаем.
Светилен
Свет, на огненней четвероконней
колеснице небошественна тя показавый оружника, Илие, не
пожре вконец: огнь бо языком огненным привлекл еси низу
и изсушил еси тучи.
***
Молитва пророку Божию Илие:
- Молитва пророку
Божию Илие. За праведную жизнь много
пострадал и был преследуем. Как и праведный Енох, был взят
Господом на небо в теле. Согласно пророчествам,
вместе с Енохом пророк Илия должен вновь прийти на
землю и обличить антихриста. Пророку Илие молятся о
защите христиан последних времен от обольщения
антихриста, о заступлении в гонениях, во времена
голода и повальных болезней, в бедности и других
житейских затруднениях. На Руси почитается как
небесный помощник земледельцев
Акафист пророку Божию Илие
Канон пророку Божию Илие:
Житийная и научно-историческая литература о пророке Божием Илие:
|
