Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные каноны  Канон Алексию Карпаторусском


Православные каноны

Канон преподобному исповеднику Алексию Карпаторусском

Память: 19 ноября / 2 декабря

Преподобный Алексий Кабалюк - ревностный миссионер, что в Подкарпатской Руси проповедовал среди униатов в начале XX века и обратил в Православие около 35000 человек. Был обвинен католическими властями Австро-Венгрии "государственной измене" и заключен в концентрационный лагерь. Небесный покровитель миссионеров и катехизатров. Ему молятся о помощи миссии, в обращении в Православие инославных, в заключении и гонениях от властей.

Преподобный исповедник Алексий Карпаторусский (Кабалюк). Икона

Преподобный исповедник Алексий Карпаторусский (Кабалюк)

***

Егоже краестрочие: "Апостола земли Карпатския восхвалим"

Песнь 1

Ирмос: Песнь победную поим вси Богу, сотворшему дивная чудеса мышцею высокою и спасшему Израиля, яко прославися.

Припев: Преподобне отче Алексие, моли Бога о нас.

Апостола новаго и исповедника твердаго ныне торжественно прославим, преподобнаго Алексия, в Карпатстей Руси подвизавшагося и народ свой в Православии утвердившаго.

Подвизаяся во обители святителя Николая, усердно молился еси, отче, подвиги иноческия неся и о Бозе деннонощно памятуя, пред Ним, яко слуга пред Воеводою, со страхом ходил еси.

Слава Отцу, и Сыну, и Святому Духу.

Православную отеческую веру возлюбив, на Святей Горе Афонстей ю прияв, икону Богоматере оттуду в благословение народу нашему принесл еси, во исповедании веры его утверждая.

И ныне и присно, и во веки веков. Аминь.

Богородичен: Царице Небесная, Богу чистотою и смирением угодила еси и Той сподоби Тя быти Материю Сына Своего и, Духом Своим осенив, Кивотом неодушевленным содела.

Песнь 3

Ирмос: Да утвердится сердце мое в воле Твоей, Христе Боже, Иже над водами небо утверждей второе и основавый на водах землю, Всесильне.

Припев: Преподобне отче Алексие, моли Бога о нас.

Твердость веры во исповедании твоем показал еси, и яко крепкий адамант, ради Христа узы и страдания претерпел еси, преподобне, от Негоже венец в Царствии Небеснем прияти сподобился еси.

О народе твоем доброе попечение имел еси, Таинством церковным того приобщая и ко Христу и ко ограде церковней овцы новыя приводя.

Слава Отцу, и Сыну, и Святому Духу.

Любовь, яже есть соуз совершенства, стяжал еси, к Богу оною горя, и ради сего мучения ни во чтоже вменял еси, Его ради вся претерпевая.

И ныне и присно, и во веки веков. Аминь.

Богородичен: Аки жезл Ааронов прозябши, Богородице Дево, родила еси Христа Сына Божия, из чрева Своего Того воплотивши.

Седален глас 5:

Преподобне отче Алексие, столп Православия в земли нашей пребыл еси, утверждая в вере предков наших, в оной же и нас, и детей наших до конца дний пребыти научити, да сподобимся вси Вечери Божественныя во Царствии Небеснем.

Слава, и ныне:

Покровом Твоим огради, Богородице, землю Карпатскую, в ней бо множество иноков и инокинь во имя Твое подвизаются, прославляюще Тя, Матерь Цареву и Покровительницу нашу.

Песнь 4

Ирмос: Духом провидя, пророче Аввакуме, Словесе воплощение, проповедал еси, вопия: внегда приближитися летом – познаешися, внегда приити времени – покажешися. Слава силе Твоей Господи.

Припев: Преподобне отче Алексие, моли Бога о нас.

Земная презрел еси, преподобне отче, во уметы вся оная вменяя, к Горним востекл еси, мирское житие оставив: в иноческия обители устремился еси и Богу в них усердно послужил еси.

Егда, млад сый, размышляя о житии твоем, отче, к старцу Аркадию пришел еси и на иночество благословение от него получил еси.

Слава Отцу, и Сыну, и Святому Духу.

Обитель преподобнаго Онуфрия в земли Холмстей посетил еси, и в ней с братиею усердно трудился еси, тамо же монашество и священный сан прияти сподобился еси, и ко отцем нашим послан быв, во страданиих за веру тех укрепляя.

И ныне и присно, и во веки веков. Аминь.

Богородичен: Ликующе поем Тя в песнех, восхваляем Избранную Богоотроковицу, Тобою бо спасение улучихом, воплощением из Тебе Бога Слова, Всенепорочная.

Песнь 5

Ирмос: Светлый нам возсия Свет Присносущный утренюющим о судьбах заповедей Твоих, Владыко Человеколюбче, Христе, Боже наш.

Припев: Преподобне отче Алексие, моли Бога о нас.

Истиннаго исповедника Христова и твердаго столпа Православия почитаем тя, преподобне отче, светло днесь восхваляюще память твою; моли о нас Преблагаго Бога, да помилует нас в День Судный.

Карпатский апостол явился еси, преподобне отче Алексие, люди заповеди Евангельскими просвещая и оныя ко Христу Богу приводя, да будут наследницы Царствия Его.

Слава Отцу, и Сыну, и Святому Духу.

Ангельский чин приял еси, блаженне, Богу в нем усердно послужил еси, страсти плотския в себе побеждая, подвиги удручая тело свое.

И ныне и присно, и во веки веков. Аминь.

Ради веры пострадал еси, отче, гонения, биения и заушения кротко претерпевая, к Подвигоположнику очи свои возводя, спасительныя Страсти Его воспоминая, Ему страданьми своими подражал еси. Родивши, даруеши мирови мир и спасение душам нашим.

Песнь 6

Ирмос: Пророка Иону подражая вопию: живот мой, Блаже, свободи из тли и спаси мя, Спасе мира, зовуща: слава Тебе.

Припев: Преподобне отче Алексие, моли Бога о нас.

Ангелоподобное житие показал еси, святе, постом, молитвою, бдением, коленопреклонением; оными подвиги страсти твоя увядил еси, смирением и терпением врага рода нашего победив.

В сонном видении явися настоятелю обители, в нейже подвизашеся, отче, из воды мощи твоя подъяти повелевая и оныя на поклонение поставити, да христоименитыя людие, к ним притекающе, исцеление улучат.

Слава Отцу, и Сыну, и Святому Духу.

Славословие Богу приносише непрестанно, сладчайшее имя Христа во устех имея, преподобне, и к Нему очи мысленныя всегда устремляя.

И ныне и присно, и во веки веков. Аминь.

Богородичен: К Матери Царевой усердно припадем, во чреве Своем Бога понесшей, и молимся к Ней: да грехов наших испросит оставление.

Кондак, глас 4.

Звезду Карпатскую почтим, лучезарным светом возсиявшую и апостолом уподобившуюся, богоноснаго отца нашего Алексия, Православие возлюбившаго и народ свой ко истенней вере возратившаго, темже и мы ему благодарно возопиим: радуйся, многомощное светило Руси Карпатския.

Икос

Ирмос: Благодарение Богу нашему возшлем, яко не остави нас в заблуждении латинстем пребывати и воздвиже от народа нашего преподобнаго Алексия. Той бо люди ко истинней вере возврати, и светом Евангелия всех нас просвети, предстоя же ныне у Престола Вседержителя, молит Пресвятую Троицу о почитающих его и взывающих: радуйся, многомощное светило Руси Карпатския.

Песнь 7

Ирмос: Пещь, Спасе, орошашеся, отроцы же, ликующи, пояху: отцев Боже благословен еси.

Припев: Преподобне отче Алексие, моли Бога о нас.

Иго Христово на рамех твоих терпеливодушно носи, Ему во страданиих подражая, и пребысть яко адамант несокрушим, вся раны с благодарением Богу терпя и вопия Тому: отцев Боже, благословен еси.

Яко сокровище драгоценнейшее честныя мощи твоя обретошася и в раку положени быша, да точиши чудеса всем, к тебе припадающим и помощи твоея просящим, покровителю земли Карпатския отче Алексие, Бога усердно моли о воспевающих песнь сию: отцев Боже, благословен еси.

Слава Отцу, и Сыну, и Святому Духу.

Воистину апостол земли нашея явился еси, преподобне, уловил еси в сети Христовы люди твоя, Бога в истинней вере чтити научая и верно Ему вопити: отцев Боже, благословен еси.

И ныне и присно, и во веки веков. Аминь.

Богородичен: О Владычице, покрый честным Твоим омофором люди Твоя, Тя истинно Богородительницу прославляющих, и молися к Сыну Твоему, да спасет нас Своею благостию, ипрославим Его: отцев Боже, благословен еси.

Песнь 8

Ирмос: Егоже ужасаются ангели и вся воинства, яко Творца и Господа, пойте, священницы, прославите, отроцы благословите, людие, и превозносите во вся веки.

Припев: Преподобне отче Алексие, моли Бога о нас.

Смирением и терпением скорбей угодил еси Богу, всеблаженне, и ныне с лики ангельскими прославляеши Троицу Пресвятую, радуяся неизреченно, и вопия: священницы, пойте, отроцы, благословите, людие, превозносите во вся веки. Наша к Православию приведя, и ныне молися о нас, чадех их, да подаст нам Христос Бог оставление грехов, вопиющим: священницы, пойте, отроцы, благословите, людие, превозносите во вся веки.

Слава Отцу, и Сыну, и Святому Духу.

Велика тя угодника прославляем, преблаженне, яко ради Христа вся претерпел еси и чада твоя к вере правей возвратил еси, апостолом подобяся; и ныне с ними купно вопиеши: священницы, пойте, отроцы, благословите, людие, превозносите во вся веки.

И ныне и присно, и во веки веков. Аминь.

Богородичен: Ангелов Радость, Престол Херувимский еси, Всечистая, на Немже Христос почи, Тя Деву Чистейшую Богородительницу соделав; Ты же, Богомати, со всеми святыми взываеши: священницы, пойте, отроцы, благословите, людие, превозносите во вся веки.

Песнь 9

Ирмос: Живоприемный Источник приснотекущий, светоносный Светильник благодати, Храм одущевленный, Сень Пречистую, Небеси и земли пространейшую, Богородицу, вернии величаем.

Припев: Преподобне отче Алексие, моли Бога о нас.

Любовию прославляем тя, богоносне отче, и благодарение Богу приносим, яко велика светильника стяжахом тя, преславне. Молися о нас Творцу Богу нашему: да благодатию Его и мы с тобою прославим Его в Горнем Иерусалиме.

Слава Отцу, и Сыну, и Святому Духу.

Источника чудес преславнаго проповедуем тя, святче Божий, светильника пресветлаго и предстателя пред Господом усерднаго, Того непрестанно моли о нас, чадех твоих.

И ныне и присно, и во веки веков. Аминь.

Богородичен: Молим Тя, Пречистая, избави нас от страстей и грехов наших, и Христу о нас молися с преподобным Алексием, да простит Человеколюбец вся беззакония наша.

Светилен, глас 1

Звезду, возсиявшую в Руси Карпатстей, ныне торжественно воспоим, преподобнаго и богоноснаго отца нашего Алексия, той бо к вере Православней народ наш возврати; темже и мы, молитвами его, в сей вере непрестанно пребудем.

Слава: и ныне: Богородичен

Кивот священный почитаем Тя, Пречистая, Ты бо вместила еси во утробе Твоей Невместимаго, Яже воплотися от чистых кровей Твоих, да спасет нас от наших грехов, яко Милосерд.

***

 Молитва преподобному исповеднику Алексию Карпаторусскому

  • Молитва преподобному исповеднику Алексию Карпаторусскому. Преподобный Алексий Кабалюк - ревностный миссионер, что в Подкарпатской Руси проповедовал среди униатов в начале XX века и обратил в Православие около 35000 человек. Был обвинен католическими властями Австро-Венгрии "государственной измене" и заключен в концентрационный лагерь. Небесный покровитель миссионеров  и катехизатров. Ему молятся о помощи миссии, в обращении в Православие инославных, в заключении и гонениях от властей.

Акафист преподобному исповеднику Алексию Карпаторусскому

Канон преподобному исповеднику Алексию Карпаторусскому

Житийная и научно-историческая литература о преподобном исповеднике Алексии Карпаторусском

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2025

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru