Православные акафисты
Акафист Схимонахине Сепфоре
Кондак 1
Избранную измлада святым Богом,
предивную угодницу Христову блаженную Сепфору
преподобную, похвальными песньми возвеличим. Ты бо еси
всем благое утешение и в скорбях сущим тихое пристанище
моли о нас Владыку, да зовем ти; Радуйся, преподобная мати Сепфора,
певчая птичка луга духовнаго.
Икос 1
Ангельскому житию последовавши,
возложила еси надежду и упование на Премудрый Промысел
Владыки всяческих. Вся преходящая в веке сем принимала
благодарным и умиленным сердцем, во всем предавшися
святей воле возлюбленнаго Жениха-Христа. Мы же, зряще на
дивное смиренномудрие твое и кротость голубиную, яко
птенцы с любовию вопием ти:
Радуйся, сладкопение сонма Ангельскаго,
Радуйся, райскаго сада песне предивная.
Радуйся, Горняя ластовица мысленная.
Радуйся, голубице смиренномудрая.
Радуйся, волю с Божеством соединившая.
радуйся, возлюбившая Иисуса Сладчайшего.
Радуйся, радости Божественней
исполненная,
Радуйся, веселие Ангельское
наследовавшая.
Радуйся, преподобная мати Сепфора,
певчая птичка луга духовнаго.
Кондак 2
Видя любовь твою пламенную, яви Господь
знамение Свое в виде седми вервиц . Тии бо родитель твой
приим от старцев святыя горы Афонския в дар тебе,
боголюбивой отроковице. И тако возрадовася юная душа
твоя и возвеселися дух твой, воспевая Богу: Аллилуйя.
Икос 2
Разум Божественный имуще в благоговейном
сердце своем, узрела еси ты, о, мати преблаженная,
славный.путь спасительный в стяжании любви и кротости. И
вземше благое иго Христово, с радостию достигла еси
чертогов Царских. Сего ради воспеваем преславное житие
твое о Христе Иисусе Господе нашем. Да восхвалят уста
наша дивнаго во святых Своих Всеславнаго Господа:
Радуйся, разума Божественнаго
созерцание.
Радуйся, дивная радуга мира душевнаго.
Радуйся, сокровищнице совета истины.
радуйся, премудрости Божией ларче
духовный.
Радуйся, наставляющая на путь спасения,
Радуйся, возжигающая покаянием сердца.
Радуйся, любовию согревающая.
Радуйся, радостию светозарной
окрыляющая.
Радуйся, преподобная мати Сепфора,
певчая птичка луга духовнаго.
Кондак 3
Силою Духа Всесвятаго стяжала ты еси
непрестанную молитву ко Иисусу Сладчайшему, ею же бо
благодать обрела и любовь умиленную. Тако уподобися
ручью тиху и прохладну смиренная молитва в сердце твоем,
напояяй жаждущих спасения и воспиющих Богу: Аллилуйя.
Икос 3
Имея веру непоколебимую, Крестом
побеждала ты еси полчища врага лукаваго, и не знала еси
страха, кроме страха Божия. Тем же взывала еси во
уповании: «Да воскреснет Бог и расточашася врази Его» от
души твоей, яко воск от огня веры и надежды пламенеющей.
Мы же, Крестом ограждаеми, с любовию воспеваем ти сице:
Радуйся, венче победы над демонами,
Радуйся, врагов сокрушение мысленных,
Радуйся, огнь пожигающий диавола,
радуйся, каменю, побивающий злобу врага.
Радуйся, крест свой на рамена вземшая.
Радуйся, с радостию отверзшаяся себе.
Радуйся, шествовати в любви ко Христу
возжелавшая.
Радуйся, воспарившая но обители Горняя.
Радуйся, преподобная мати Сепфора,
певчая птичка луга духовнаго.
Кондак 4
Буря многотруднаго моря житейскаго, не
могущи внити в сердце твое безмятежное, никако причиниша
вреда пламенеющему любовию ко Господу. Крепость
необоримую от всех навет вражиих обретоша усердною
молитвою в сердце своем, всегда радуяся в скорбех и
благодаря за вся Господа Сил, поюще песнь: Аллилуйя.
Икос 4
Слыша дивное пение Херувимов, возлюбила
еси ты молитву церковную, и яко некогда Пречистая Матерь
Господа вкупе со Иосифом Обручником искаста отрока
Иисуса, и по триех днех обретоста его в храме, такожде и
ты научала еси всегда искати Христа в велелепоте
богослужений церковных:
Радуйся, Херувимская песнь нескончаемая,
Радуйся, Ангельских Лик сопричастнице.
Радуйся, благоухание фимиама кадильнаго.
Радуйся, сладосте пения церковнаго.
Радуйся, хвалу Богу возносившая.
Радуйся, стяжавшая в сердце Христа.
Радуйся, Ему верно послужившая.
Радуйся, смирением возлетевшая на
Небеса.
Радуйся, преподобная мати Сепфора,
певчая птичка луга духовнаго.
Кондак 5
Боготечная звезда явися обитель
Оптинская на пути твоего пресветлаго жития, идеже духом
улучив благословение преподобных Старцев, положила еси
ты основание новой преславной обители Спаса
Нерукотвореннаго. Ныне же яко звезда пресветлая
Небосвода Церковнаго сияеши во обители Горняя, радуяся и
воспевая Богу: Аллилуия.
Икос 5
Видевше море бушующее мира сего
суетнаго, умолила еси ты Премилосерднаго Господа, да
даст ти два крила спасительных - пост и молитву. Сии бо
вознесли тя во Чертог Царя Небеснаго, идеже ныне со
бесплотными Херувимы в радости неизреченной воспеваеши
славу Великаго Бога. Мы же сущи на земли смиренно вопием
ти сицевая:
Радуйся, шестокрыльных Серафим
удивление,
Радуйся, Херувимов радование предивное.
Радуйся, Ангельское небесное ликование,
Радуйся, наследнице подвигов древних.
Радуйся, в молитве воспарившая.
Радуйся, чистым сердцем приявшая Христа.
Радуйся, постом украсившая душу.
Радуйся, крилома богомыслия сокрушившая
сети врага.
Радуйся, преподобная мати Сепфора,
певчая птичка луга духовнаго.
Читайте также:
- Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
- Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.
***
Кондак 6
Проповедницу любви истинней тя имуще,
приносим ти благодарное пение, о, мати наша преподобная.
Яко птенцы под криле собрала еси вся чада твоя, и присно
питаеши словесы Божественныя любве всех с верою
притекающих к тебе, научая в покаянии и благодарении
воспевати Богу: Аллилуия.
Икос 6
Возсия заря Божественная в душе твоей
исполненней Духа Всесвятаго, и возгореся огнь любви ко
Сладчайшему Христу Иисусу в сердце твоем благоговейнем,
Испроси и нам у милостиваго Господа сердце, горети
любовию непрестанно и пламенно, да обрящем мир душам
нашим, веру непоколебимую и надежду неизменную:
Радуйся, столпе любви Божественней.
Радуйся, свеще пред Богом горящая.
Радуйся, звездо присносияющая,
Радуйся, пламя любви ко Христу до
Небесе.
Радуйся, радостию всех озаряющая.
Радуйся, любовию обнимающая сердца.
Радуйся, освещающая души верных,
Радуйся, ко вратам рая возносящая.
Радуйся, преподобная мати Сепфора,
певчая птичка луга духовнаго.
Кондак 7
Хотяще прославите тя Господь, дарова
чудесы и исцеления по молитве твоей усердней: мнози бо
слепии прозирают, и хромии ходят, прокаженнии же
очищаются, и глусии слышат, мертвии же душею воскресают
и вси воспевают Богу благодарственную песнь: Аллилуия.
Икос 7
Новую и дивную сокровищницу сотвори тя
Господь, идеже собра вся благая и чудесная, благодатная
и спасительная. Ты же яко вдовица Евангельская ввергла
еси лепте две - еже есть смирение и терпение. Положиша
вся елика имела еси, - все житие свое Богу:
Радуйся, злато смирения и кротости.
Радуйся, сокровище Царствия Небеснаго.
Радуйся, терпения каменю драгоценнейший.
Радуйся, жено Ангелоподобная.
Радуйся, с миром всех принимающая.
Радуйся, немощным подаеши исцеления.
Радуйся, радость в скорбящих
воскрешающая.
Радуйся, с высоты смирения созерцающая.
Радуйся, преподобная мати Сепфора,
певчая птичка луга духовнаго.
Кондак 8
Странного жительства путь проделала еси
ты на земли, полагая хранение устнам своим и гласом
безмолвия беседуя со Ангелы. Тако и нас научаеши быти
чуждыми века сего преходящего, в сердце же непрестанную
стяжати молитву и любовь ко Единому в Троице Богу,
воспевая Ему: Аллилуия.
Икос 8
Вся предадеся святей воле Божественней,
узрела еси ты Христа во всякой душе, притекающей к тебе:
взалках бо кто - и даси ему ясти; возжадах - и напоила
еси; странен бех - и введоша под кров. Такожде и ныне
сторицею являеши помощь страждущим чрез обитель твою
святую. Мы же нужду имуще во святем заступничестве твоем
вос певаем ти:
Радуйся, милосердия неизсякаемый
источниче.
Радуйся, нежная мати сирых и убогих.
Радуйся, больных предоброе успокоение.
Радуйся, сладосте речей
душеспасительных.
Радуйся, любовию всех напояющая.
Радуйся, питающая духом кротости.
Радуйся, из темницы греховной изводящая.
Радуйся, радостию сердца окрыляющая.
Радуйся, преподобная мати Сепфора,
певчая птичка луга духовнаго.
Кондак 9
Всякое естество Небесных удивися
дарованию, в тебе от Бога процветшему. Яко древо
насажденное при исходищих вод возрастила ты еси плод
Духа Всесвятаго во время жития земнаго. И вкушающии от
плода сего исполняются любви, радости и мира сердечнаго,
воспевая хва-лебную песнь Богу: Аллилуия.
Икос 9
Ветий мудрования и суетнаго учения
плевелы отвергла еси, храня в сердце своем простоту и
незлобие младенческое. Темже убо почил на тебе Дух
Господень, Дух премудрости и разума, Дух совета и
крепости, Дух ведения и благочестия, дабы прозрела еси
ты Промысл Божественный. Той бо приведе нас к любви
Христовой, научая воспевати благодарение и хвалу Богу:
Радуйся, мати благая и возлюбленная.
Радуйся, Матери Божией спутница верная.
Радуйся, чадо Христа Иисуса Сладчайшего,
Радуйся, веры к Нему простото сердечная.
Радуйся, исполненная любомудрия и
кротости.
Радуйся, яко дитя примшая Царствие
Божие.
Радуйся, радостию нас утешающая.
Радуйся, крыльями любви нас обнимающая.
Радуйся, преподобная мати Сепфора,
певчая птичка луга духовнаго.
Кондак 10
Спастися без Бога никтоже возможет. Сего
ради со слезами мнозими взывала еси ты ко Господу о
всякой душе заблудшей, такожде уподобишася
долготерпеливому Христу Богу нашему. Сей бо будучи благ,
дождит на праведныя и неправедныя, и яко солнце свое
сияет на злыя и благия. Ему же воспем умиленную песнь:
Аллилуйя
Икос 10
Стена неприступная - молитва твоя, о,
мати наша преподобная! От всяческих наветов вражиих
охраняеши молитвами твоими всех, с верою притекающих к
тебе. Всегда плача с плачущими, обрела еси ты ныне
вечное веселие во обители Царя Небеснаго, идеже Ангели
ликовствуют в веселии и радовании:
Радуйся, умиленных вод небесное
журчание.
Радуйся, храме предивный Духа
Всесвятаго.
Радуйся, безмолвнаго веселия тишина
преславная,
Радуйся, райскаго пения песне весенняя.
Радуйся, ум в чистоте сохранившая.
Радуйся, в сердце обретшая Христа.
Радуйся, созерцания Божественнаго
достигшая.
Радуйся, неизреченной радостию
окрыляющая.
Радуйся, преподобная мати Сепфора,
певчая птичка луга духовнаго.
Кондак 11
Пения дивнаго сподоби тя слышати
Господь, егда Ангелы во одеждах блистающих взем тя в
видении ночном и постригоша во образ Ангельский, дабы в
преподобии и истине просиял в тебе Свет Отца Небеснаго,
и в сонме святых Сил бесплотных, преподобных и праведных
прославляла еси Бога, поя: Аллилуйя.
Икос 11
Светоприимную свещу постави тя Господь
на свещнице Церкви Российстей, несть бо добро ставити
под спуд, но да светит всем людием любовь твоя ко
всякому творению Божию. Тако да узрят вси чудеса и
многая добродетели твоя и прославят Всемилостиваго Бога,
вопиюще ти сицевая:
Радуйся, сияние Света Божественнаго.
Радуйся, благоухание милосердия Божия.
Радуйся, кротости неизреченная красото.
Радуйся, любви Христовой светильниче
яркий.
Радуйся, всегда Христа благодарившая.
Радуйся, воле Божественней предавшаяся.
Радуйся, веры сокровище стяжавшая.
Радуйся, ладью надежды в тихую пристань
приведшая.
Радуйся, преподобная мати Сепфора,
певчая птичка луга духовнаго.
Кондак 12
Благодать Божию возлюбила ты еси паче
всех мирских благ, благоговейно храня в душе своей слова
Апостольския: Аще же кто Духа Христова не имать, сей
несть Божий. Мнози труды и подвиги пронесла чрез
долгоденственное житие твое, воспевая благодарным
сердцем Богу: Аллилуия.
Икос 12
Поюще Славу Всеблагому Господу, смиренно
воспеваем твое предивное житие, имже угодила еси
человеколюбивому Христу Богу нашему, вся принимая от
пречистых рук Его с благодарением и радостию. Тем же
молим тя, преподобная мати:
Радуйся, ластовице, возвестившая радость
весеннюю.
Радуйся, голубице Ангельския кротости.
Радуйся, горлице смиренномудрия
предивнаго.
Радуйся, птенче, зовый непрестанно Отца.
Радуйся, Духом Истины окрыляющая.
Радуйся, озаряющая духовною радостию.
Радуйся, перышко радости нам посылающая,
Радуйся, в небо покаяния нас возносящая.
Радуйся, преподобная мати Сепфора,
певчая птичка луга духовнаго.
Кондак 13
О, смиренномудренная голубице Христова,
преподобная мати наша Сепфора! Яко имуще криле злате,
вознеслася еси к высоте Небесней. Приими ныне малое сие
моление наше и огради нас кровом крилу благодати
Божественней. Да ограждаеми молитвами твоими
беспрепятственно пройдем мытарства воздушныя, и вселимся
в Чертогах вечнаго радования, воспевая Богу: Аллилуиа.
Молитва Схимонахине Сепфоре
О, преподобная и богомудрая мати наша
Сепфора!
Божия вестница быстрокрилая, нисходящая
до земли. Скорая и дивная помощнице в скорбех и
болезнях, в нуждах и печалех всем с верою и любовию
притекающим к тебе. Умоли всемилостиваго Бога и
Заступницу усердную Пречистую Деву Богородицу, яко да
возгорится в сердцах наших огнь любви Божественней,
неиссякающей и неугасающей. Да смиренным сердцем славим
и благодарим Господа, научающего нас предаватися воле
Его святей. Научи нас всех любить и всем прощать, дабы
улучить и нам прощение грехов и прегрешений наших на
страшном Судище Господа нашего Иисуса Христа, Емуже
честь и поклонение подобает со Отцем и Святым Духом во
веки веков. Аминь.
Величание Схимонахине Сепфоре
Величаем тя, святая праведная мати
Сепфоро, и чтим святую память твою, ты бо молиши о нас
Христа Бога нашего.
|
