|
|
Разделы • Вопросы • На злобу • Библиотека • Поиск |
Православные акафисты / Акафист преподобной Евфросинии Московской |
Православные акафистыАкафист второй преподобной Евфросинии, великой княгине МосковскойПамять: 17 мая / 30 мая; 19 мая / 1 июня, 7 июля / 20 июляВеликая княгиня Евдокия (в монашестве Евфросиния) - супруга Великого князя Димитрия Донского: добрая жена, многодетная мать, сострадательная и добродетельная христианка, храмоздательница и благотворительница. После смерти мужа начала нести строгую аскетическую жизнь, носила власяницу и вериги под княжеской одеждой. При такой жизни претерпела клевету о блуде. В день принятий пострига совершила чудо исцеления 30 человек. Она - воистину покровительница семьи и материнства, к ней молитвенно обращаются за помощью от бед, нашествия врагов и воров, за защитой детей, исцеления болезней, в т.ч. и глаз.
Преподобная Евфросиния Московская (в крещении - Евдокия). Икона, XVIII века Кондак 1Избранней от рода державнаго, преславнаго града Москвы покровительнице и всея Российския страны молитвеннице, похвальное пение приносим ти, угоднице Христова Евфросиние. Ты же, яко имущая дерзновение ко Господу, Того умоли избавится нам бед и скорбей и в будущем веце Царствия Небеснаго наследники быти, да зовем ти: Радуйся, преподобная княгине Евфросиние, жен российских красото и радование. Икос 1Ангелов Творец и Господь, предуведевый благое произволение твое, избра тя, благоверная княгине Евфросиние, во образ милосердия и благочестия женам Российским, да вси оне, зряще твое терпение, любовь и богоугодное житие, во умилении сердец взывают ти тако: Радуйся, родителей благочестивых Димитрия и Анны чадо благословенное. Радуйся, цвете благоуханный, во граде Суздали возращенный. Радуйся, именем Евдокии, сиречь благоволение, в крещении нареченная. Радуйся, от юности твоея благодати преисполненная. Радуйся, отроковице, в вере и благочестии воспитанная. Радуйся, ангельски на земли пожившая. Радуйся, яко злато в огне искушений и скорбей очищенное. Радуйся, образ праведныя благоверныя княгини всем русским людем показавшая. Радуйся, града Москвы хранительнице и заступнице. Радуйся, Церкве Российския преславное украшение. Радуйся, радости Царства Небеснаго сподобившаяся. Радуйся, дерзновенная о нас пред Богом молитвеннице. Радуйся, преподобная княгине Евфросиние, жен российских красото и радование. Кондак 2Видя святитель Московский Алексий непорочную душу твою, ум и красоту, богоизбранная отроковице, яко невесту добру вручи тя Великому князю Димитрию Ивановичу, да будеши материю народу державы его, научающи всяк возраст верных славити и воспевати Богу: Аллилуиа. Икос 2Разум во благочестии утвержден имущи, блаженная мати, не земныя радости в супружестве взыскавши, но паче супругу в добродетелех подражавши и того к делом добрым подвизавши, милосердие и любовь к людем стольнаго града показала еси. И бысть радость велия в народе о браце сем, и вси прославляху Бога, и радовахуся о тебе, и вопияху ти, глаголюще: Радуйся, от юности Бога всем сердцем возлюбившая. Радуйся, евангельских заповедей верная исполнительнице. Радуйся, великих святых земли Русския духовная ученице. Радуйся, преподобным Сергием в житии праведнем наставленная. Радуйся, на брак первосвятителем Российским Алексием напутствованная. Радуйся, послушание своему духовному наставнику явившая. Радуйся, с супругом твоим в любви и благочестии пожившая. Радуйся, в супружестем благочестнем житии крепкая помощнице. Радуйся, чада твоя в вере и страсе Божии воспитавшая. Радуйся, богобоязненному воспитанию и нас научающая. Радуйся, жен благочестивых украшение. Радуйся, любве и кротости Христовы вместилище. Радуйся, преподобная княгине Евфросиние, жен российских красото и радование. Кондак 3Сила Божия укрепляше тя в служении народу твоему и невредиму сохрани, егда смертоносная язва многих людей окрест тебе поражаше, и многажды в нападениих врагов соблюдаше тя от меча их и пленения. Ты же вся сия претерпела еси, благодарственно воспевающи Богу: Аллилуиа. Икос 3Имущи сердце милостивое и к людем страждущим любовию преисполненное, многи слезы проливала еси, блаженная мати, в молитве пред Господем, да сохранит землю Русскую и град царствующий во дни бед и напастей, находящих от нашествия агарян и междоусобных браней князей русских, от смертоносныя язвы, разорения и запаления. Темже поминающе твое теплое к Богу о людех ходатайство и скорую бедствующим помощь, вопием ти из глубины сердечныя: Радуйся, многи скорби претерпевшая. Радуйся, в напастех на единаго Господа упование возлагавшая. Радуйся, гнев Божий молитвами твоими утолявшая. Радуйся, в бедах помощь Божию обретавшая. Радуйся, материнскую любовь к людем страждущим явившая. Радуйся, обидимых и гонимых заступнице. Радуйся, княгине благосердая, любовию своею всех покрывающая. Радуйся, людем московским помощнице богодарованная. Радуйся, к нищим и убогим милосердие неоскудное показавшая. Радуйся, бедствующих благонадежное избавление. Радуйся, людей российских надеждо и упование. Радуйся, милосердия сокровище неисчерпаемое. Радуйся, преподобная княгине Евфросиние, жен российских красото и радование. Кондак 4Егда буря великаго нашествия агарянскаго потрясе землю Русскую, супруг твой Великий князь Димитрий советом преподобнаго Сергия утверждаем, не убояся силы вражия и на подвиг ратный с полки своими устремися. Тогда вси людие русстии вкупе с тобою усердную молитву о избавлении страны своея вознесоша, воспевающе Богу песнь: Аллилуиа. Икос 4Слышавше ближнии и дальнии людие, яко дарова Господь победу православному воинству в брани лютей на поли Куликове, плач свой на радость преложиша. Ты же, угоднице Божия, во вся дни похода полков русских неотступно предстояла еси в молитве и возликовала еси о спасении Отчизны твоея от нашествия иноплеменных. Темже и мы, радость победы сия приемше, о Господе радуемся, тебе же гласом хваления приносим таковая: Радуйся, супруга твоего небоязненно тещи на битву благословившая. Радуйся, о спасении земли Русския Господа умолявшая. Радуйся, града Москвы твердое ограждение. Радуйся, страны Российския верная защитнице. Радуйся, о победе воинства русскаго со слезами молившаяся. Радуйся, милостивая наша предстательнице. Радуйся, великою победою на поли Куликове обрадованная. Радуйся, в честь победы храм во имя Рождества Пресвятыя Богородицы создавшая. Радуйся, христолюбивому воинству необоримая помощнице. Радуйся, отечества твоего светильниче пресветлый. Радуйся, любовь велию ко Отечеству твоему земному явившая. Радуйся, любовь сию и по смерти сохранившая. Радуйся, преподобная княгине Евфросиние, жен российских красото и радование. Кондак 5Боготечней звезде явилася еси подобна, святая мати, в житии твоем, егда супружеских уз свободившися, всецело Господу себе предала еси, постом, бдением и молитвами работающи Ему дни и нощи и непрестанно вопиющи Создателю нашему: Аллилуиа. Икос 5Видящи себе по смерти супруга сиротствующу, преподобная мати, возжелела еси поработати единому Богу, обаче, воспитания ради чад, до времени в княжеских чертозех пребывающи и о делех земных попечение имети понуждаема, умыслила еси в тайне Богу послужити, постом и бдением тело свое изнуряющи, людем же в светлых ризах себе являющи. Сего ради, воспоминающе твое благое изволение, с любовию величаем тя сице: Радуйся, путь супружескаго богоугоднаго жития показавшая. Радуйся, с верою и терпением крест вдовства твоего понесшая. Радуйся, сыну твоему, в агарянском плену бывшему, спострадавшая. Радуйся, молитвою и благодатию Божиею в скорби сей утешенная. Радуйся, сыну твоему в управлении державы Российския мудрая помощнице. Радуйся, во власти княжестей суету мирскаго жития уразумевшая. Радуйся, во славе живущим правило христианскаго жития бывшая. Радуйся, славы токмо на Небесех искавшая. Радуйся, непрестанными молитвами Бога прославлявшая. Радуйся, яко постом и молитвою плоть твою духови покорила еси. Радуйся, в тайне Богу послужившая. Радуйся, сокровенно от людей Тому угодившая. Радуйся, преподобная княгине Евфросиние, жен российских красото и радование. ***Читайте также:
***Кондак 6Проповедница святаго жития, в тайне совершаемаго, явилася еси, блаженная мати. Обаче дух лукавый, не терпя подвигов твоих, клеветами и злоречии возмути души чад твоих. Ты же, преподобная, клеветы и поношения с терпением великим понесла еси, благодарно воспевающи укрепившему тя Христу Богу: Аллилуиа. Икос 6Возсия миру свет добродетелей твоих, преподобная мати, егда, видящи чад твоих злыми о тебе клеветами смущаемых, призва их тайно и часть одежд пред ними откры, да увидят тело твое от поста изсохшее и очернелое и плоть костем прильпнувшу; и тако смущение от сердец их отгнавши, никомуже поведати виденнаго повелела еси. Сего ради, почитающе подвиги и труды твоя, поем тебе сице: Радуйся, во вдовстве твоем чистоту непорочно сохранившая. Радуйся, за ревность твою по Бозе в нечистоте жития оклеветанная. Радуйся, яко в полунощи на молитву вставала еси. Радуйся, во глубине смирения подвиги твоя от всех скрывавшая. Радуйся, клеветы и хулы с благодарением потерпевшая. Радуйся, к обидящим тя любовь сохранившая. Радуйся, поношение безчестия терпением победившая. Радуйся, обиды на людей суду Божию предавшая. Радуйся, худыя помыслы чад твоих во благо исправившая. Радуйся, во избежание славы, уста их молчанием заградившая. Радуйся, смирением козни вражия разорившая. Радуйся, блаженство гонимых за правду унаследившая. Радуйся, преподобная княгине Евфросиние, жен российских красото и радование. Кондак 7Хотя сын твой, Великий князь Василий во дни лютаго нашествия Тамерлана защитити державу Русскую, по совету твоему, княгине милостивая и богомудрая, повеле пренести в Москву Владимирскую икону Богоматере. Тогда Пречистая Матерь Господа, яко всемогущая Царица со множеством воинов явися агарянскому хану и от предел земли Русския отъити повеле. Темже вси вернии, от погибели заступлением Божия Матери спасеннии, в веселии пояху благих Подателю Богу: Аллилуиа. Икос 7Новое знамение милосердия Своего сотвори Пресвятая Владычица, егда странную победу над воинством Тамерлана без брани совершившуюся в день сретения в Москве Владимирския иконы Ея дарова державе нашей. Сего ради и до ныне Церковь Божия прославляет тя, преподобная мати Евфросиние, яко мудрую советницу и молитвенницу ко Господу и величает тя тако: Радуйся, Пресвятыя Богородицы усердная почитательнице. Радуйся, ревностная печальнице пред Нею за вся страждущия русския люди. Радуйся, со слезами Пречистую о заступлении умолявшая. Радуйся, икону Владимирския Богоматере во град Москву пренести благословившая. Радуйся, пришествием иконы сея возвеселившаяся. Радуйся, до земли пред нею поклонившаяся. Радуйся, яко молитва твоя ко Пресвятей Богородице о спасении Руси услышана бысть. Радуйся, заступлением Пречистыя за землю Русскую обрадованная. Радуйся, град Москву от бед и губительств сохраняющая. Радуйся, к Богородице молитвеннице наша неусыпная. Радуйся, о спасении державы Российския богоугодная предстательнице. Радуйся, хранительнице земли нашея. Радуйся, преподобная княгине Евфросиние, жен российских красото и радование. Кондак 8Странное чудо сотвори Господь в явлении тебе Архистратига Божия Михаила, иже осия тя лучами света Небеснаго, душу твою ко исходу уготовляя, и удержа язык твой. Егда же узрела еси, преподобная, третицею написанный образ явльшагося тебе Архистратига, разрешишася узы языка твоего и прославила еси Господа, творящаго дивная чудеса, поющи Ему песнь: Аллилуиа. Икос 8Вся исполнена была еси ревности к Церкви Божией, преподобная мати Евфросиние, обители иноческия и храмы во славу Божию воздвигла еси, к нищим и убогим любовь стяжала еси и многими добродетельми душу твою обогатила еси, имиже житие твое яко цветами благоукрашается и духовно благоухает. Сего ради мы, тобою на путь веры и добродетели наставляемии, восхваляем тя сице: Радуйся, архангельскаго посещения сподобившаяся. Радуйся, явлением ангельским о отшествии твоем из жизни временныя извещенная. Радуйся, сиянием архангельскаго света озаренная. Радуйся, светило милосердия, над градом Москвою возшедшее. Радуйся, благолепие храмов Божиих возлюбившая. Радуйся, многих обителей и храмов в земли нашей устроительнице. Радуйся, обитель во имя Вознесения Господня в Кремле создавшая. Радуйся, тамо покой души твоея обретшая. Радуйся, вдовицам и сиротам защитнице и мати благосердая. Радуйся, милости и сострадания исполненная. Радуйся, за любовь твою к людем велие дерзновение к Богу стяжавшая. Радуйся, Царства Небеснаго и земнаго украшение. Радуйся, преподобная княгине Евфросиние, жен российских красото и радование. Кондак 9Всякое естество ангельское и человеческое возрадовашеся, зряще, како ты, преподобная мати, земную славу оставивши, в пристанище тихое — созданную тобою обитель Вознесения Господня вселилася еси, яко жертву совершенную себе Богу приносящи. Темже в пострижении иночестем ангельский образ восприяла еси с именем Евфросинии, тезоименитой радости, да будеши радость страждущей стране Российстей и верным ея чадом, поющим Богу ангельскую песнь: Аллилуиа. Икос 9Витий многовещанных паче, глас народный немолчно славит тя, преподобная мати Евфросиние, ибо Сам Господь яви в тебе образ назидания не токмо в миру живущим, но и ликом иноческим. Ты же благодать Божию в иночестве восприяла еси, и новыми подвиги украсила еси житие твое. Темже дара исцелений от Бога сподобльшися, слепому подала еси прозрение и многих болящих исцелила еси. Мы же любовию и молитвою твоею ограждаеми и наставляеми, воспеваем тебе сице: Радуйся, иноческое равноангельное житие возлюбившая. Радуйся, ризы княжеския на власяницу иноческую пременившая. Радуйся, ради Господа земнаго царства славу оставившая. Радуйся, яко имя Евфросинии, сиречь радости, во иночестве получила еси. Радуйся, во обитель, тобою созданную, вселившаяся. Радуйся, богоугодно и праведно в ней пожившая. Радуйся, прикосновением ризы твоея прозрение слепцу подавшая. Радуйся, яко тридесяти недужным исцеление даровала еси. Радуйся, в радость Господа твоего вшедшая. Радуйся, вечную радость на Небеси обретшая. Радуйся, радость истинную о Христе нам показавшая. Радуйся, светом радости души наша озаряющая. Радуйся, преподобная княгине Евфросиние, жен российских красото и радование. Кондак 10Спасти хотя душу твою, житие земное равноангельно совершала еси, преподобная мати Евфросиние, в заповедех Божиих безпорочно ходящи, и дом Святаго Духа была еси. Темже по смерти твоей прослави тя Господь в лице святых благоверных княгинь и преподобных жен, с нимиже ныне Богу предстоящи, поеши хвалебную песнь: Аллилуиа. Икос 10Стену необориму и заступление царствующему граду Москве и всей стране Российстей яви Господь тя, преподобная Евфросиние, ибо по отшествии твоем от земнаго бытия увенча тя и дарова благодать молитися с дерзновением о всех людех Российских, ищущих твоея помощи и заступления. Темже и нам, любовию чтущим тя, буди ограждение крепкое, да тобою от всех нападений вражиих избавльшеся, со умилением зовем ти: Радуйся, славу мира иноческим смирением поправшая. Радуйся, о едином на потребу точию помышлявшая. Радуйся, подвигом добрым подвизавшаяся. Радуйся, крест богоугождения до конца понесшая. Радуйся, в храме, тобою созданном, погребенная. Радуйся, православными людьми града Москвы ублажаемая. Радуйся, яко и по успении твоем нас не оставляеши. Радуйся, яко свеща у гробницы твоея чудесно воспламенися. Радуйся, непорочная голубице, от обители земныя в Небесныя обители возлетевшая. Радуйся, венцем неувядаемым украшенная на Небеси. Радуйся, святыми угодники радостно сретенная. Радуйся, с Царицею Небесною у престола Господа предстоящая. Радуйся, преподобная княгине Евфросиние, жен российских красото и радование. Кондак 11Пение молебное во умилении сердец вознесоша вернии в соборе Архистратига Михаила, егда Божиим промышлением мощи твоя святыя, преподобная мати Евфросиние, обретошася в нем, яко сокровище велие Церкве Русския, от нихже приемлем в недузех исцеление, в скорбех утешение, в бедах благодатную помощь. Темже тя, яко заступницу и предстательницу нашу величаем и благодарно Богу и Владыце нашему воспеваем: Аллилуиа. Икос 11Светозарная звезда явилася еси, преподобная Евфросиние, Небо Церковное украшающая и светом чудес твоих благодатно просвещающая не токмо град Москву, но и всю страну Российскую, в нейже ты, яко великая угодница Божия прославляешися всеми верными, исцеление и помощь благодатную дарующи, да вси ко святым мощем твоим с любовию припадающии воспевают тебе тако: Радуйся, свеще, Божественным огнем пламенеющая. Радуйся, благодати Духа Святаго сосуде избранный. Радуйся, тихим светом смирения и любве в земли нашей сияющая. Радуйся, яко светом Небесным жизнь нашу благодатно озаряеши. Радуйся, еще в житии сем дар исцелений от Бога приявшая. Радуйся, и по кончине исцеления неоскудно источающая. Радуйся, многоцелебныя мощи твоя нам открывшая. Радуйся, яко тем многим христианом земли нашея утешение даровала еси. Радуйся, подающая исцеления всем чтушим святыя мощи твоя. Радуйся, яко с верою приходящия к ним благодатию просвещаются. Радуйся, от зол и бед усердная наша хранительнице. Радуйся, всем ищущим путь ко спасению наставнице благодатная. Радуйся, преподобная княгине Евфросиние, жен российских красото и радование. Кондак 12Благодатию, дарованною ти от Бога, преподобная мати Евфросиние, недуги исцеляеши, страну нашу от недругов защищаеши, жизнь нашу умиряеши и душам многих чад Божиих полезная подаеши. Темже яко имущая дерзновение ко Господу, вознеси теплую молитву за державу Российскую и людех ея, да внидут в Царство Небесное, воспевающе Богу песнь: Аллилуиа. Икос 12Поюще равноангельное твое житие, молитвенно празднуем светлую память твою, святая княгине и инокине Евфросиние, славим тя с лики святых жен в земли Российстей просиявших и молим тя: помози всем девам и женам российским собравше елей добрых дел, с мудрыми девами выйти в сретение Жениха Христа и улучити благую часть одесную Его стояния и славящих Его во веки. Мы же, твоею любовию и молитвою ограждаеми, зовем ти: Радуйся, мудрая княгине и инокине всечестная. Радуйся, первая от града Москвы к лику святых жен причтенная. Радуйся, наставнице инокиням и собеседнице ангелом. Радуйся, царственною славою на земли и на Небеси почтенная. Радуйся, терпеливая страннице, Небеснаго Отечества достигшая. Радуйся, с супругом твоим, святым благоверным князем Димитрием крепкая о нас молитвеннице. Радуйся, с лики святых жен ныне пребывающая. Радуйся, в сонме преподобных на Небеси торжествующая. Радуйся, светлый образ жития всем женам христианским. Радуйся, от земных к небесным дух наш возводящая. Радуйся, душ и телес наших благодатная целительнице. Радуйся, в мире живущих ко спасению путеводительнице. Радуйся, преподобная княгине Евфросиние, жен российских красото и радование. Кондак 13О преславная угоднице Христова и чудотворице, преподобная мати Евфросиние, отрадо и утешение верных града Москвы и всея земли Российския, прими от нас недостойных сие малое моление, с любовию тебе приносимое и ходатайством твоим ко Господу огради страну нашу от враг видимых и невидимых, даруй нам покаяние и сокрушение сердечное, даруй мир и надежду, избави нас от бед и вечныя муки, да купно с тобою и со всеми святыми земли нашея благодарственно вопием Богу: Аллилуиа. Этот кондак читается трижды, затем 1-й икос: "Ангелов Творец и Господь..." и 1-й кондак: "Избранней от рода державнаго..." Молитва преподобной Евфросинии, великой княгине МосковскойО преподобная княгине Евфросиние, добрая в женах подвижнице, прехвальная угоднице Христова. Приими моление нас, недостойных, с верою и любовию к тебе припадающих, и теплым к Богу ходатайством испроси граду Москве, градом и весем земли нашея и всем людем от бед и напастей сохранение, споспешествуй, яко чадолюбивая мати, чадом, тобою собранным, понести иго Христово во благодушии и терпении и добре подвизатися ко исправлению жития своего; в мире благочестно живущим испроси у Господа в вере твердость, во благочестии преспеяние и всем, с верою прибегающим к тебе и твоея помощи и заступления просящим, даруй недугов исцеление, в скорбех утешение и во всем житии благопоспешение, наипаче же умоли Господа в мире и покаянии земное житие прейти нам, мытарств горьких и мук вечных избавится и Царство Небесное твоим ходатайством получити, идеже ты со всеми святыми Господу предстоиши, да всегда славим Отца, и Сына, и Святаго Духа, ныне и в безконечныя веки. Аминь. Тропарь преподобной Евфросинии, великой княгине Московской, глас 8По земнем вдовстве Небесному Жениху себе уневестивши и в княжестем чертозе подвижнически поживши, послежде и чертог и чад твоих Бога ради оставила еси, преподобная Евфросиние, и вшедши во обитель, тобою созданную, во иночестем образе многи подвиги показала еси и святое житие по благодати Божией блаженною кончиною увенчала еси. И ныне, предстоящи Христу Богу, моли спастися душам нашим. Ин тропарь преподобной Евфросинии, великой княгине Московской, глас 5От юности предызбранная Богом угоднице, оставльши светлый чертог княжеский, уклонилася еси во обитель, тобою созданную, и, пучину житейскаго моря преплывши, ныне со ангелы песнословиши Христа Бога, Емуже непрестанно молися, преподобная, яко да сохраняет выну обитель, тобою созданную, и дарует нам мир и велию милость. Кондак преподобной Евфросинии, великой княгине Московской, глас 2Вся красная мира сего яко суетная презревши, и тело твое постом и бдением изнуривши, непрестанными молитвы Богу угодила еси, преподобная Евфросиние, и дар исцелений от Него прияти сподобльшися, слепому прозрение и многим недужным исцеление даровала еси. Темже радостно взываем, глаголюще: слава Богу, прославляющему святыя Своя. Тропарь преподобной Евфросинии, великой княгине Московской, глас 2Днесь светло ликует первопрестольный град Москва, имый драгое сокровище — чудотворныя мощи твоя, преподобная мати Евфросиние, имиже яко от неистощимаго источника верным подаеши исцеления. Темже тя с любовию ублажаем: Радуйся, радосте земли нашея. ВеличаниеУблажаем тя, преподобная мати Евфросиние, и чтим святую память твою, ты бо молиши за нас Христа Бога нашего. ***Молитва преподобной Евфросинии Московской:
Акафист преподобной Евфросинии Московской:
Канон преподобной Евфросинии Московской:Житийная и научно-историческая литература о преподобной Евфросинии Московской:
Читать другие акафисты раздела "Православные акафисты" |
Разделы проекта: |
|
© Миссионерско-апологетический проект "К Истине", 2004 - 2024 При использовании наших оригинальных материалов просим указывать ссылку: |
|
|