Православные акафисты
Акафист преподобноисповеднице Анне Срезневской
Память: 10 / 23 июня (Собор Рязанских святых), 10 /
23 декабря, воскресный день 25 января, либо ближайший
воскресный день, предшествующий или последующий 25
января / 7 февраля (Собор новомучеников и исповедников Церкви Русской)
Преподобноисповедница Анна -
пример молитвенности, незлобия, кротости и смирения пред
лицом гонений и несправедливости. Её просят о помощи
гонениях и заключении, о помощи и защите детей, при их
болезнях.
Преподобноисповедница Анна Срезневская. Икона
Кондак 1
Избранная угоднице Христова и земли Рязанския и Срезневския украшение, преподобноисповеднице
Анно, от юности Господу, аки дева мудрая, себе уневестившая и Тому во иночестем чине непорочне
послужившая, наипаче же во изгнании и злострадании Богу
поревновавшая и Царице Небесней достойно пети
сподобльшаяся, похвальная восписуем ти, недостойнии. Ты
же, яко имеющи дерзновение ко Господу, от всяких нас бед
и обстояний свобождай, с радостию и любовию тебе зовущих:
Радуйся, преподобноисповеднице Анно,
теплая о нас молитвеннице.
Икос 1
Ангелов пению поревновавши, иже Господа
в вышних славословят, издетска потщалася еси, мати Анно,
паче в любви к храму Божию. Сего ради дарова ти Господь
сладкогласия талант предивный, отонудуже до кончины
твоея в лице певчестем подвизался еси, Богови присно
воспевающи, ныне же приими от нас приносимое с любовию
тебе песнопения сицевая:
Радуйся, родители твоима во благочестии воспитанная.
Радуйся, Богом на путь иноческий благословенная.
Радуйся, крест Христов паче всего земнаго возлюбившая.
Радуйся, усердие велие в трудех по храму приложившая.
Радуйся, исповедническим подвигом просиявшая.
Радуйся, наставнице благочестивая церковнаго пения.
Радуйся, ныне на небеси со ангелы Бога воспевающая.
Радуйся, всех, тебе поющих, пред Богом поминающая.
Радуйся, преподобноисповеднице Анно, теплая о нас молитвеннице.
Кондак 2
Видевша благочестивая родители твоя,
преподобноисповеднице Анно, велие усердие твое и
ревность по Боге, благословиста тя в Кресто-воздвиженскую
обитель вселитися, ты же иночества узкий путь избравши,
истинно Господеви служила еси, на всяко время любовию поющи Ему: Аллилуия.
Икос 2
Разумом небесным осененная, доброделания
верха достигла еси, блаженная Анно, к Богу и людем любве
неложныя образ чудный показала еси, и стяжала еси
чистоту душевную, смирением и кротостию богатно
украшенную; мы же добротам твоим ревнующе, приносим ти таковая:
Радуйся, Бога паче всего земнаго возлюбившая.
Радуйся, жизнь твою Ему Единому посвятившая.
Радуйся, яко во обитель иноческую притекла еси.
Радуйся, яко во образ ангельский облеклася еси.
Радуйся, уста на славословие Божие отверзавшая.
Радуйся, мысль к богоугождению устремлявшая.
Радуйся, лозо виноградная ко храму Божию привившаяся.
Радуйся, плод духовный сторицею принесшая.
Радуйся, преподобноисповеднице Анно, теплая о нас молитвеннице.
Кондак 3
Сила любве ко Господу укрепляше тя,
мати Анно, егда власти предержащии, дышаще злобою
на Церковь Божию, всех насельниц изгнаша из святыя
обители, в нейже неленостно подвизалася еси; отонудуже,
подвига иноческаго не оставляющи, при храме веси твоея
приселилася еси, к Богу вопиющи: Аллилуия.
Икос 3
Имуще веру твердую и любовь теплую ко
Господу, аки воин Христов, мужественно за веру
Православную стояла еси, блаженная Анно, призывающи люди
верныя на защиту пастыря своего, безбожными неправедно заточеннаго.
Мы же, подвигу твоему дивящеся, восхваляем тя сице:
Радуйся, иго Христово, аки благо, понесшая.
Радуйся, Божией кротости и смирению поучившаяся.
Радуйся, священномученика Филарета последовательнице.
Радуйся, чудотворнаго образа Божия Матере хранительнице.
Радуйся, постом и молитвой на враги невидимыя возстававшая.
Радуйся, веру Христову от безбожных защищавшая.
Радуйся, исповедания образ нам показующая.
Радуйся, крепости духовней нас научающая.
Радуйся, преподобноисповеднице Анно, теплая о нас молитвеннице.
Кондак 4
Бурныя воды безбожия не устрашаше тя,
блаженная Анно, ты бо вкупе с пастырем верным Сергием
молитвы усердныя к Богу возносила еси, его твердому
исповеданию подражающи; с ним же вкупе и на путь
крестный взошла еси, заключение темничное претерпевающи,
Богу за вся благодарне зовущи: Аллилуия.
Икос 4
Слышавши по возвращении твоем, мати
Анно, яко в храме Срезневстем пастырь Сергий паки
настоятель бысть, стопы своя абие к тому направила еси,
и тамо при храме псалмопения делу приобщилася еси. Мы
же, твое усердное служение Богу зряще, поем тебе тако:
Радуйся, верность Богу в годину тяжкую сохранившая.
Радуйся, от веры Православныя не отступившая.
Радуйся, жизни временныя красотами не прельстившаяся.
Радуйся, терпением скорбей жизни вечныя сподобльшаяся.
Радуйся, души целомудрие невредно сохранившая.
Радуйся, крест Христов безропотно несшая.
Радуйся, Господа Бога твоего невесто любомудрая.
Радуйся, в заповедех Его послушнице прилежная.
Радуйся, преподобноисповеднице Анно, теплая о нас молитвеннице.
Рака с мощами преподобноисповедницы Анны Срезневской
Кондак 5
Божия Матере святаго образа, Споручница
грешных именуемаго, хранительница верная была еси,
блаженная Анно, и подвиг иночества в годину тяжкую
смиренно в миру совершающи, верность Богу твердо хранила
еси, выну воспевающи Ему: Аллилуия.
Икос 5
Видевше людие пастыря Божия Сергия, иже
прещений безбожных не устрашився, службы Богу достойне
совершаше, и тебе, мати Анно, верную его помощницу, со
всея земли Рязанския потекоша в Срезнево православнии,
да ко святей иконе Пречистыя припадут и молитвы с вами
Господу вознесут. Мы же взываем ти сице:
Радуйся, хвалении молитвенными Христа прославлявшая.
Радуйся, неустанно за вся Того благодарившая.
Радуйся, нравом твоим голубица незлобивая.
Радуйся, душею твоею агница кроткая.
Радуйся, благотерпения образ нам показавшая.
Радуйся, благоусердие в нуждах людем явившая.
Радуйся, в волю Божию благую себе вдавшая.
Радуйся, надежду на Того Единаго возложившая.
Радуйся, преподобноисповеднице Анно, теплая о нас молитвеннице.
***
Читайте также:
- Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
- Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.
***
Кондак 6
Проповедницы веры Православныя явишася
стране Рязанстей пастырь Сергий и мати Анна, крест
страданий мужественно подъявшая: тот убо кровьми
мученическими Господа прослави, та же, с разбойники
вменившися, на многая лета на страну далече сослана
бысть, зовущи Богу: Аллилуия.
Икос 6
Возсия любы евангельская в сердце твоем,
блаженная Анно, егда сестре твоей духовней, такожде
разбойники гонимей, непокровенную главу покрыла еси:
монахиня бо есть. Мы же, ревности твоей о чине
Ангельском дивящеся, приносим ти таковая:
Радуйся, аки столп непоколебим, в вере пребыла еси.
Радуйся, аки огнь, в любви к Богу пламенела еси.
Радуйся, убивающих тело не устрашившаяся.
Радуйся, душу твою чисту Христу сохранившая.
Радуйся, путем крестным смиренно шедшая.
Радуйся, Христа, аки бисер драгоценный, обретшая.
Радуйся, в печалех сущих ободряющая.
Радуйся, в нуждах помощь скорую подающая.
Радуйся, преподобноисповеднице Анно, теплая о нас молитвеннице.
Кондак 7
Хотящи живот вечный наследити, Бога
Живаго не отверглася еси, блаженная Анно, но подражающи
Того терпению, многия злострадания смиренно сносила еси,
и тако добротою христианския души твоея разбойников
злобу умиряла еси, Господу возносящи хваление сие: Аллилуия.
Икос 7
Новое чудо милости Божия посети тя, мати
Анно, егда в заточении жестоком изнуренная, на одре
болезни смертныя лежащи, иерея Божия предуведение с
верою прияла еси, яко Царице Небесней еще в животе твоем
послужиши. Мы же тебе, верней хранительнице образа
чудотворнаго, глаголем тако:
Радуйся, благодатию Божиею всегда покрываемая.
Радуйся, Пречистою Богородицею присно хранимая.
Радуйся, светом благодати всех освещающая.
Радуйся, злобу неведения кротостию утишающая.
Радуйся, рабо Божия, верная и благая.
Радуйся, на всяк час духом бодрствующая.
Радуйся, терпением велием убеленная.
Радуйся, за Христа страданием украшенная.
Радуйся, преподобноисповеднице Анно, теплая о нас молитвеннице.
Кондак 8
Странно и дивно чудо зрим, мати Анно,
великомученицу Варвару, тебе представшую и возвращение
скорое предвозвестившую. Темже воспоим чрез угодники
Своя деющему Господу: Аллилуия.
Икос 8
Всю себе на служение Богу и ближним
отдала еси, блаженная Анно, о себе же попечение малое
имущи, многия отроки и отроковицы к пению церковному
приобщила еси, прилежанию и благоговению тех научающи;
темже приими от нас таковая:
Радуйся, аки птица небесная, в нестяжании пожившая.
Радуйся, простотою твоею ангелов удивишая.
Радуйся, милосердием сердце твое обогатившая.
Радуйся, с радостию всем благотворившая.
Радуйся, дети малыя во имя Христово приимшая.
Радуйся, благочестию тех чрез святых жития поучившая.
Радуйся, яко иконы многия от осквернения спасла еси.
Радуйся, яко кров твой в приятелище странным вдала еси.
Радуйся, преподобноисповеднице Анно, теплая о нас молитвеннице.
Кондак 9
Всем житием твоим образ благочестия и
трудолюбия явила еси, мати Анно, подвигом любве
христианския благолепно украсившися, была еси людем в
нуждах их помощница благая, в вере же правыя наставница
крепкая, всех призывающи неустанно пети Богу: Аллилуия.
Икос 9
Течения земнаго путь смиренно
совершающи, мудрых дев бдению до конца поревновала еси и
свещу души твоея любве елеем просветила еси, темже в
светозарною добродетели одежду оболченная, великаго
Ангельскаго образа чин достойно прияла еси. Мы же
хвалебно ти воспеваем:
Радуйся, премудрости Божия исполненная.
Радуйся, светом благодати небесныя облистанная.
Радуйся, в трудех житейстих верная помощнице.
Радуйся, в деле спасения прилежная труженице.
Радуйся, дары чудес от Бога приимшая.
Радуйся, от славы суетныя смирением себе оградившая.
Радуйся, девства красоту Богови соблюдшая.
Радуйся, одежду для чертога брачнаго стяжавшая.
Радуйся, преподобноисповеднице Анно, теплая о нас молитвеннице.
Кондак 10
Спасение души твоея скорбьми многими и
страданьми воистинну стяжала еси, блаженная, попечении
духовными в годину беззакония людем многим усердно
послужившая, темже в смерти час очима внутреннима
блаженства вечная, от Господа тебе уготованная, узрела
еси, возносящи Богу: Аллилуия.
Икос 10
Стену от бед ограждающую и помощницу
скорую, чудо являя, Господь тя верным показа,
богоблаженная Анно, егда хор церковный на он пол Оки
реки чудным образом на льдине преплыша на погребение
твое, да достойное тебе воздадут пение. Мы же во
умилении поем тебе таковая:
Радуйся, ближняго, аки себе,возлюбившая.
Радуйся, труды твоими людем в нуждах послужившая.
Радуйся, в бедности живущих благ полезных подательнице.
Радуйся, нерадивых в благочестии строгая наставнице.
Радуйся, подвигом добрым в миру подвизавшаяся.
Радуйся, по честнем успении твоем в рай преселившаяся.
Радуйся, Жениха Христа воистинну узревшая.
Радуйся, на брак к Тому достойно возшедшая.
Радуйся, преподобноисповеднице Анно, теплая о нас молитвеннице.
Кондак 11
Поюще исповедания твоего подвиг,
блаженная Анно, согласно чтим Сергия священномученика,
Христа ради пострадавшаго. Темже и по смерти венцем
победы купно увенчанная, со всеми святыми Богу поете:
Аллилуия.
Икос 11
Света луч и пристанище духовное в годы
гонения была еси, достоблаженная Анно, многия люди в
напастех ободряла еси и подавала им в скорбех утешение,
темже и мы к молитвам твоим с верою прибегающе, величаем
тя словесы таковыми:
Радуйся, яко нищету духовную паче славы возлюбила еси.
Радуйся, яко мудростию Божиею ум твой просветила еси.
Радуйся, в злострадании мир Христов в душе сохранившая.
Радуйся, скорбьми временными радость вечную стяжавшая.
Радуйся, любовию Христовою злонравныя побеждающая.
Радуйся, в тишине и мире благонравныя сохраняющая.
Радуйся, болящия силою благодати Божия исцеляющая.
Радуйся, вся полезная с верою просящим подающая.
Радуйся, преподобноисповеднице Анно, теплая о нас молитвеннице.
Кондак 12
Благодати Божия имя святое в схиме
дадеся ти, преподобная Анно, темже достойное вместилище
Божественныя благодати явилася еси верным. Ныне же мощи
твоя честныя богатно исцеления нам источают. Темже Бога,
Дивнаго во святых Своих, благодарне славим: Аллилуия.
Икос 12
Пением сладкогласным в лице певчестем на
земли Бога восхваляла еси, преподобная Анно, ныне же в
лике святых со ангелы во Царствии Небеснем Богу победно
воспеваеши. Мы же, усты и сердцем Богу пети тобою
подвизаеми, приносим ти таковая:
Радуйся, в земли Срезневстей добродетелию процветшая.
Радуйся, исповедничеством веры страну Рязанскую озарившая.
Радуйся, угоднице Христова дерзновенная.
Радуйся, ходатаице о нас пред Богом неустанная.
Радуйся, земныя Церкве воистинну чадо верное.
Радуйся, Церкве Небесныя украшение нетленное.
Радуйся, исцелений источниче многотекущий.
Радуйся, кладезю, благодати исполненный.
Радуйся, преподобноисповеднице Анно, теплая о нас молитвеннице.
Кондак 13
О преподобная мати Анно, исповеданием
Христовым зело украшенная и велие дерзновение в вышних
стяжавшая, ныне к тебе с верою и любовию в молении
припадающе, просим тя, да дарует Господь молитвами
твоими душам и телесем нашим вся ко благому полезная, во
еже и нам быти причастники славы Его, достойно поюще
Ему: Аллилуия.
Сей кондак глаголи трижды.
Икос 1
Ангелов пению поревновавши, иже Господа
в вышних славословят, издетска потщалася еси, мати Анно,
паче в любви к храму Божию. Сего ради дарова ти Господь
сладкогласия талант предивный, отонудуже до кончины твоея в лице певчестем подвизался еси, Богови присно
воспевающи, ныне же приими от нас приносимое с любовию
тебе песнопения сицевая:
Радуйся, родители твоима во благочестии воспитанная.
Радуйся, Богом на путь иноческий благословенная.
Радуйся, крест Христов паче всего земнаго возлюбившая.
Радуйся, усердие велие в трудех по храму приложившая.
Радуйся, исповедническим подвигом просиявшая.
Радуйся, наставнице благочестивая церковнаго пения.
Радуйся, ныне на небеси со ангелы Бога воспевающая.
Радуйся, всех, тебе поющих, пред Богом поминающая.
Радуйся, преподобноисповеднице Анно, теплая о нас молитвеннице.
Кондак 1
Избранная угоднице Христова и земли Рязанския и Срезневския украшение, преподобноисповеднице
Анно, от юности Господу, аки дева мудрая, себе уневестившая и Тому во иночестем чине непорочне
послужившая, наипаче же во изгнании и злострадании Богу
поревновавшая и Царице Небесней достойно пети
сподобльшаяся, похвальная восписуем ти, недостойнии. Ты
же, яко имеющи дерзновение ко Господу, от всяких нас бед
и обстояний свобождай, с радостию и любовию тебе зовущих:
Радуйся, преподобноисповеднице Анно,
теплая о нас молитвеннице.
***
Молитва преподобноисповеднице Анне Срезневской:
- Молитва преподобноисповеднице Анне Срезневской.
Преподобноисповедница Анна - пример молитвенности, незлобия, кротости и смирения пред
лицом гонений и несправедливости. Её просят о помощи
гонениях и заключении, о помощи и защите детей, при
их болезнях.
Акафист преподобноисповеднице Анне Срезневской:
Житийная и научно-историческая литература о преподобноисповеднице Анне Срезневской:
|
