Молитвы святым
Все молитвы равноапостольным Кириллу и Мефодию, учителям Славянским
Память: 14 / 27 февраля, 6 / 19 апреля, 11 / 24 мая,
27 июля / 9 августа (собор Болгарских просветителей)
Святые Кирилл и Мефодий - первые
просветители славян, создатели славянской письменности,
авторы первых переводов Священного Писания на славянский
язык. Святым равноапостольным Кириллу и Мефодию молятся
о помощи в учении, о сохранении славянских народов в
истинной вере и благочестии, об ограждении от лжеучений
и иноверия.
Тропарь равноапостольным Мефодию и Кириллу, глас 4
Яко апостолом единонравнии и словенских
стран учителие, Кирилле и Мефодие богомудрии, Владыку
всех молите, вся языки словенския утвердити в
Православии и единомыслии, умирити мир и спасти души
наша.
Кондак равноапостольным Мефодию и Кириллу, глас 3
Священную двоицу просветителей наших
почтим, Божественных писаний преложением источник
богопознания нам источивших, из негоже даже доднесь
неоскудно почерпающе, ублажаем вас, Кирилле и Мефодие,
Престолу Вышняго предстоящих и тепле молящихся о душах
наших.
Молитва первая равноапостольным Мефодию и Кириллу
О преславнии язык словенских учителие и
просветителие, святии равноапостольнии Кирилле и Мефодие!
К вам, яко чада ко отцем, светом учений и писмен ваших
просвещеннии и к вере Христове наставленнии, ныне
усердно прибегаем и в сокрушении сердец наших молимся.
Аще бо и завет ваших, яко чада непокоривая, не
соблюдохом, и о угождении Богу, якоже учисте, небрегохом,
и от единомыслия и любве, юже словеном, яко братиям в
вере и по плоти, добре завещаете, отпадохом: обаче,
якоже древле в житии вашем неблагодарных и недостойных
не отвращаете тщи, но благими за злая воздавасте, тако и
ныне грешных и недостойных чад ваших молитвы не
отвратите, но яко велие имущии дерзновение ко Господу,
прилежно Того молите, да наставит и обратит нас на путь
спасения, распри же и раздоры, посреде единоверных
братии возникающия, да умирит, отпадающия паки во
единомыслие приведет, и всех нас единением духа и любве
во единей, святей, соборней и апостольстей Церкви
соединит: вемы бо, вемы, яко много может молитва
праведнича ко благосердию Владыки, аще и о грешных людех
приносима бывает: не оставите убо нас, унылых и
недостойных чад ваших (имена), ихже грех ради паства
ваша, вами собранная, враждою разделяема и соблазны от
иноверных прельщаема, умалися, овцы же ея словенския
разсеяваемы от волков мысленных восхищаются: дадите нам,
молитвами вашими, о православии ревность, да ею
возгреваеми, отеческая предания добре сохраним, уставы и
обычаи церковныя верно соблюдати потщимся, всяких
лжеучений странных отбежим, и тако в житии Богоугоднем
на земли преспевающе, жизни райския на небеси
сподобимся, и тамо с вами вкупе Владыку всех, в Троице
единаго Бога, прославим во веки веков. Аминь.
Молитва вторая равноапостольным Мефодию и Кириллу
О святии равноапостольнии Мефодие и
Кирилле! Ныне к вам усердно прибегаем и в сокрушении
сердец наших молимся: молите Господа, да наставит и
обратит нас, на путь спасения. Не оставите нас,
недостойных чад ваших (имена), дадите нам, молитвами
вашими, о православии ревность, да ею возгреваеми,
отеческая предания добре сохраним, уставы и обычаи
церковныя верно соблюдати потщимся, всяких лжеучений
странных отбежим, и тако в житии богоугоднем на земли
преспевающе, жизни райския на небеси сподобимся, и тамо
с вами вкупе Владыку всех, в Троице Единаго Бога,
прославим во веки веков.
***
Акафист равноапостольным Кириллу и Мефодию, учителям Славянским:
Каноны равноапостольному Кириллу и Мефодию, учителям славянским:
Житийная и научно-историческая литература о равноапостольных Кирилле и Мефодие:
|
