Номоканон при Большом Требнике
Номоканон при Большом Потребнике
(позднее - Требнике), это свод церковных правил
греческого происхождения, является одним из разделов
Большого Потребника, помещен в конце этой книги. Полное
название - "Номоканон, сиречь Законоправильник, имея
Правила, по сокращению, Святых Апостолов, Великого
Василия и Святых Соборов". Номоканон при Большом
Потребнике представляет из себя небольшую часть правил,
выписанных из Канонов Православной церкви, а также
апокрифические правила.
Вероятнее всего этот Номоканон составлен
в первой половине XV века, "Номоканон" на Афоне монахами. Высокий авторитет Святой
Горы в православном мире способствовал широкому и
скорому распространению сборника, хотя на Востоке он
никогда не издавался как официальный, санкционированный
иерархической властью. В Греческих Церквах этот
"Номоканон", существовавший во многих рукописных
редакциях, вышел из практического употребления в начале
XIX века, вскоре после первого издания "Екзомологитария"
св. Никодима Святогорца (Венеция, 1796 г.) общепринятого
в Греческой Церкви руководства для духовников.
***
Содержание
Правило 1 2
3 4 5
6 7 8
9 10 11
12 13 14
15 16 17
18 19 20
21 22 23
24 25 26
27 28 29
30 31 32
33 34 35
36 37 38
39 40 41
42 43 44
45 46 47
48 49 50
51 52 53
54 55 56
57 58 59
60 61 62
63 64 65
66 67 68
69 70 71
72 73 74
75 76 77
78 79 80
81 82 83
84 85 86
87 88 89
90 91 92
93 94 95
96 97 98
99 100
101 102
103 104
105 106
107 108
109 110
111 112
113 114
115 116
117 118
119 120
121 122
123 124
125 126
127 128
129 130
131 132
133 134
135 136
137 138
139 140
141 142
143 144
145 146
147 148
149 150
151 152
153 154
155 156
157 158
159 160
161 162
163 164
165 166
167 168
169 170
171 172
173 174
175 176
177 178
179 180
181 182
183 184
185 186
187 188
189 190
191 192
193 194
195 196
197 198
199 200
201 202
203 204
205 206
207 208
209 210
211 212
213 214
215 216
217 218
219 220
221 222
223 224
225
Преосвященным архиепископом, и
митрополитом. Боголюбезным епископом. преподобнейшим
архимандритом. благоговейным игуменом, и преподобным
священноиноком. Пречестным протопопом и честным иереом,
православным святыя апостольския восточныя церкве сущим
поклонником и чистителем, душ человеческих истинным
пастырем, и тайнам строителем. о всем всегда достоит
хранити. яко же Исаия пророк вопиет к нам глаголя.
Возопи крепостию, и не пощади, яко и трубу вознеси глас
свой, и возвести людем Моим грехи их, и дому Ияковлю
беззакония их [Исаия 58].
Уклонивыи ухо свое, еже не послушати
закона, и сей молитву свою омерзил есть [Притч. 28].
В лепоту убо судихом в книгу Номоканона
сего сотворити предисловие о преосвященнии, и
боголюбезнии, преподобнии, и пречестнии священнаго
духовнаго сословия, им же строение Церкве, и паства
кровию Христовою снабденых овец вручена есть. понеже бо
преумножися всякии грех паче песка морскаго, и
беззакония превзыдоша главу, привниде же и дерзновение
безмерное, а студ и богобоязние далече отбеже, яко
многим противу каноном и совести дерзнути на степень
священьства воскочити. ради корысти и тщеславия. но по
апостолу [на поле: филиписеом, 3], сицевых и слава в
студ их. к сему же и злата и мамоны ради по своей воли и
невеждьстве разрешати грехи не удоб решимыя. еже в
погибель им яко же и Симону волхву. тем же годе есть не
точию словесы от устен, но и писмены грехи и беззакония
обличати и запрещати. да грешницы покаяние воспримут, а
бес посрамится. не явленныи ибо грех множае растет, язву
же и падежь наводит. добре Дух Божии царствующим
пророком глаголет, яко же свыше есть зрети. обличю тя, и
представлю пред лицем твоим грехи твоя. Той же пророком
Исаием трубогласне, грехи и беззакония возвещати
повелевает. отнюду же Исаия наг и бос хождаше по граду и
обличаше грехи, и проповедаше за сия пленение. Той же
Адонай Господь, и усты пророка Езекииля, жителей
Иеросалимских, о всех студных и срамных обличаше, хотя
привести в покаяние блудящих.
Сего ради Номоканон сей во святей
Афонстей горе богодохновенными отцы от множайших правил
кратко собранныи, молением прежде и убеждением от многих
спасения рачителей. в научение иереом, и во исправление
исповедающихся различными грехи обдержимых.
Благословением же и советом православнаго великаго
господина патриарха Иоасафа Московскаго и всея Руси.
прилежнее исправися, и любомудраго художества печатным
делом издася, зде в Велицыи Руси. Содержит же в себе
Номоканон сей воспоминание и учение како приходити в
священьство, како ко исповеди приходящих приимати и
исправляти, како целение подобное коемуждо лицу и
врачевание подати. Три же в нем суть обдержныя вины.
первыи врачь иже есть духовныи отец. вторыи недугующии,
иже суть грешныи кающиися. третии целебное былие, сиречь
наказания и запрещения. есть убо Номоканон сей краткое
собрание канонов и разсуждении святых отец наставников и
учитель духовником. каяющимжеся есть врачебница.
Комуждо же сия книга есть удобь
стяжательна, а яже совершеннее восхощут уразумети и
уведати каноны, да стяжут книги правил всех. сиречь
книгу преподобнаго Иоанна Зонара, иже соборныя и
поместныя и святых отец истолкова каноны. и книгу
блаженнейшаго Феодора Валсамона патриарха Антиохийскаго,
иже совершеннее истолкова вся каноны. при сем и
Номоканон православнаго и блаженнаго Фотия патриарха
Константинопольскаго. такожде книгу преподобнаго во
иеромонасех Матфея, иже по составех правила разумно
собрав и состави. Сия зело книга потребна есть. обаче
блюстися, яко в некия переводы вниде писание, аки от
Константина Великаго сотворенное. несть сия вещь
известна. еще же книгу правил на грани архидияконом
Алексеем составленных. и книгу севаста Константина
Арменополя номофилак[т]а и судии Фесалоницкаго. к сему
же и блаженнаго Никона послания. Прочее да весть всяк,
яко несть леть не точию иереом, но и епископом противу
каноном что дерзати и творити. о сем чти святаго
Игнатия, и святаго Феодора Студита разсуждение; и да не
поставляется епископ, или иерей, паче же духовныи отец,
аще сих книг не стяжет, и от них вразумлен не обретается
[зри иерею]. в лепоту бо речеся ему, врачу исцели себе
сам. мню сицевым по Христову словеси. добрее есть паче
аще облежит камень жерновыи о выи его. и ввержен будет в
море, нежели соблазнит, и прочее. разумейте убо сия
забывающии Бога, да некогда похитит и не будет
избавляяи. молим же убо есть нами да будет Исус Христос,
яко да яже от богодохновенных отец наших свято
узаконенная. сия не в хартиях токмо, но паче во умех
наших всегда пребывати. и яже от человек чернилом
изъобразишася, сия перстом Божиим, архиереом и иереом во
уме, и в памяти, и в сердьцах восписана да будут.
приемлите же убо благодарне Номоканон сей, нам
трудившимся прощение дарующее. и благословите и молите о
нас. да в винограде Церкве Христовы делаем плоды
творяще; подобает же духовным отцем и се ведати, еже от
духовнаго и каноннаго разсуждения, яко да грехи тяжкия и
недоуметельныя исправлению кающагося, к епископом и к
совершеннейшим, и благоразумнейшим препосылати. в неких
же со искуснейшими советовати несрамлятися, иереов же и
протодияконов грехи, яже извержения томление наводят,
епископом суду подлежат, да не дерзает духовник
разрешати их. яко же бо невозможно ему хиротонисати,
сице же ни на священьства степень изпадшаго паки
возвращати. еже бо во гресех извержения сущему
священнодействовати простити и попустити есть аки паки
паче подобающаго возводити на священьство.
Приемляй помышления человеческая, должен
есть в писании наказан быти, воздержник, смирен, и
добродетелен, моляся на всяк час Богу. да подаст ему
слово разума, во еже исправляти притекающих к нему. в
образ же инем, должен есть сам поститися в среду и в
пяток во все лето, яко же божественная правила
повелевают [правило апостол 69]. да от них же сам имать,
и иным повелевает творити. аще ли же сам невежа есть и
невоздержник, како иных добродетели научит. и кто
неразумен, послушает и о них же имать глаголати. зря его
безчинника, и пияницу, и иных учаща неупиватися, или ину
некую добродетель проходити, ея же сам не творит. очи
ушию вернейши. глаголет писание.
Темже внимай себе о духовниче. зане аще
погибнет едина овца нерадения ради твоего, от руку твоею
взыщется.
Внимай еже святыи Иоанн Златоустыи в
Деяниих в 3-м нравоучении глаголет сице. аще един токмо
отъидет таин непричащен, не все ли свое превратил есть
спасение, епископ или иерей. души бо единыя погибель,
толику имать тщету, елико никое же представити может
слово. со опасением же и трудолюбне служение и дело
Божие творити подобает. глаголет убо писание, проклят
всяк, творяи дело Господне с небрежением.
Великии же Василии глаголет, блюди, да
не убоишися человека в падении его [во власти его]. да
не предаси Сына Божия в руце недостойным. да не
усрамишися кого от славных земля, ни самого диадиму
носящаго, да не причастиши.
Божественная бо правила не повелевают
недостойным причащатися, зане же яко язычницы вменяются.
аще ли не обратятся, горе и тем, и причащающим их.
Блюди рече, аз вещи не имам, ты узриши.
сия, и сицева храня, с великим обаче опаством и
разсуждением. прежде всех, церковныя догматы недвижима
соблюдая, спасеши себе и послушающих тя.
Ведомо буди
Аще кто без повеления местнаго епископа,
дерзнет приимати помышления, и исповеди. сицевыи по
правилом казнь примет, яко преступник божественных
правил. ибо не точию себе погуби, но и елицы у него
исповедашася, неисповедани суть. и елицех связа, или
разреши, неисправлени суть. по шестому правилу, иже в
Карфагене собора, и по четыридесят третиему тогожде
собора. а прочее из Номоканона сего указание писано выше
в мирском поновлении.
Да внимает же себе духовник, во время
исповеди, еже не испытовати имени лица прочих сообщников
греха. яко ниже есть леть духовнику, имя лица иному
являти. внегда совета и поучения искати ему о гресе
некоем недоуметельном епитемии ради и исправления. се бо
предательству Июдину подобно. обаче приступльшему к
исповеданию, воспомянути и поучити его, еже не извещати
имени лиц онех с ними же согреши. инако же оклеветание и
осуждение будет. единаго бо точию себе должен есть
исповедаяися судити, и своя явити грехи. якоже и Давыд
творяше глаголя. яко беззаконие мое аз знаю, и грех мой
предо мною есть выну. и рех исповем на мя беззаконие
мое. и яко беззаконие мое. и яко беззаконие мое аз
возвещу, и попекуся о гресе моем. и Исаия глаголет.
глаголи ты прежде беззакония своя да ся оправдиши.
внемли мое, мой, на мя, своя, а не инех, и ни на коего
яко же прародителие, и прочая. но да повелит
исповедающемуся онех лиц с ними же согреши, точию рещи,
сан, чин, звание, лета, и рода близость, вины грехов да
речет, и всяк грех особь. и по виду да исповесть. таже.
Достойно есть. слава, и ныне. и отпуст.
Тогда канон еже епитемию даст ему,
противу согрешению его. аще убо имать многия грехи, даст
ему канон вящьшии. сиречь, иже имети множайшая лета, и
иная с сими разрешаются. и глаголет к нему. чадо, толика
лета повелевают божественнии и священнии закони, да не
причастишися божественных таин, точию да пиеши агиазму
великую. сиречь воду святых Богоявлении. и аще
удержишися от божественнаго причастия, разрешатся греси
твои. аще же приступиши, и приобщишися, вторыи Июда
будеши, и внимай себе. аще же изнеможеши к смерти,
причастися. аще ли востанеши, паки стани во уреченных
летех, и преложи в меру. еже содержати паки и ин канон
за причащение, да навершиши меру.
Внимли и сему
Отнели же оставит человек согрешение,
тогда канон приемлет, и приемлется, по правилу Василия
Великаго. елико же творит грех, аще и непричащается, не
вменяется ему то во исправление. егда же удержится на
время от причащения, и паки ниспадет в грех, паки начало
полагает в канон. аще ли случится ему пасти во ин грех,
прежде совершения каонона, потреба сматряти множайшая
лета, паче недовершеных канона. и се кратких. сиречь,
ново прилучшихся, и кая суть множайшая, тыя да держит.
аще ли паки по ошаянии греха, удержа время от причастия,
или сам о себе, или от иного духовника, запрещаются и
тая лета в канон.
Внемли и сему
Егда обрящется человек благоговейныи, и
произволит творити неколико метании в нощь и в день по
силе своей, отпусти ему едино лето от меры канона
причастия [ослаба епитимии лето 1].
Аще же произволит сотворити милостыню по
мере своей, остави ему и другое лето [2].
Аще ли постится среды, и пяток, по
божественным правилом остави ему еще другое лето [3].
Аще же и понедельник восхощет
воздержатися от мяса, еще паки отпусти ему лето [4].
Аще ли от сыра и яиц, другое [5].
Такожде и ину добродетель аще сотворит.
другое паки отпусти ему лето [6].
Аще ли человек той нижае тридесяти лет
есть, другое лето паки остави ему [7].
Аще же есть и от двадесяти нижае, мнее
да запрещается.
Аще же не изволи написанных, да исполнит
цело нарекованная лета.
Иоанна Постника, сие есть разсуждение
Паче же оно, пятьнадесять лет, глаголю
же прелюбодейства, мужеложьства, и скотоложьства,
нисходит даже до триех лет, по истине да постится вся
целы три лета, сухоядение, в девятыи час, и поклоны
многи, кроме суббот и недель, но камо днесь обращеши
таковаго человека, да исполнит сицевыи канон.
Ельма же не можем за злую похоть нашу, и
нерадение, поне от божественнаго причастия да удержимся,
яко же божественнии отцы уставиша. они бо о воздержании,
и о трудех, или о ином чесом, о сицевех не реша, разве
точию, о божественнем причастии.
Аще ли обрящется подвижник, да держит
оное правило, аще восхощет. Сиречь, Иоанна Постника, по
Матфею.
Ведомо же буди и се
[ослаба епитимии с разума] Яко во многих
летех. сиречь в пятьнадесятих, и двадесятих да сходиши
яко же рехом, в малейших же меньше паки. ибо изыдеши
отнюд вне. согрешение же блуда до четырех лет, да
отпустиши ему с каноны менши. среду же и пяток должни
суть поститися вси. и неимущии канона яко и имушии. ибо
всем благочестивым сие прилично есть. паче же и правило
ко всем глаголет, да постятся в тыя дни. обаче за
благоутробие Божие, и за произволение покаяния,
оставляем едино лето покаятися хотящим, яко благочестие
ныне наченшу.
Внемли и сему
Яко аще по согрешении восхощет кто быти
инок, две части да держит, а третию часть лет остави
ему.
Аще же восхощет отъити во обще житие,
остави ему пол.
Аще ли по приятии образа падется,
уставленная да исполнит цело.
О женах
От жен вопрошати, еда не ношаху ли
отрав, за еже не сотворити отрочати. или аще кая не
напоила ли ложесн, еже не зачати, или яде былие, или
пресытися и изверже отроча самохотне. и егда обрящется,
яко нечто сотвори, и изверже самохотне, убиица есть, и
запрещается, яко убиица.
Аще же неволею по нужде некоей изверже
детищь свой, едино лето да не причастится. а носящая
былие, да оставит е, и да запретится шесть лет, по
шестьдесятому правилу, еже в Трулле.
Такожде и обвития. сиречь, шолки, или
конуры, аще на дети своя, или на животная возлагают, или
проходят чародейства.
Аще же яде былие, или ино что, и отрави
ложесна своя, и к тому дети не раждает, яко убиица
запрещается.
Аще же волшебствова, да весть кое детище
родит, или да познает что от недоведомых, шесть лет да
не причастится, по шестьдесятому правилу, шестаго
собора.
Такожде, и елицы держат хранительная или
волшебствуют бобом, или иным волхованми, или творят
усерязи детем своим в великии четверток, изветом еже
живым быти им.
Вопрошает же и о иных гресех, блуда, и
волшебства, и малакии, и татьбы, яко и мужей, а наипаче
чрез естество со своими мужи не падошалися.
Аще же исходатаила кому блуд, и та яки
блудница запрещается. елико же время не причащаются,
ниже просфиры да месят. точию да призывают иныя чистыя,
яже причащаются, и сия да месят.
Како подобает духовным отцем строити,
исповедающихся им
Правило дванадесятое, иже в Никеи
перваго собора, и Агкирскаго второе, но и пятое. еще же
и шестое. епископом оставляет власть, или умножити или
умалити запрещения теплее яве, нежели леностне покаяние
указующим. да сматряетжеся сих прежде житие, и еже
потом, или целомудренно, или разслабленно живут, и
леностно. и тако человеколюбие да мерится.
Греха отшельствие совершенное исцеление
Великии же Василии в третием своем
правиле, отнюд быти глаголет истиннейшее целение, греха
отшельствие, и еще воздержанием. и злостраданием плоть
поработити, и покорити духови. так обо совершенное нам
каяися подаст исцеления своего указание.
Достоит же строителем душ обое ведети, и
яже испытания, и яже обычая. и иже убо приемлют
испытание исповедающихся, потому и строити их. аще ли
ожесточеваются, последовати обычаю схождения.
В седмьдесят же четвертом своем правиле
сице глаголет.
Вязати и решати власть приемыи, и
противу исповеданию и сокрушению взираяи коегождо.
Аще умалит запрещения лето, не будет
зазору достоин. учит бо, рече, нас писание божественное
глаголющее. яко со множайшим трудом исповедающимся скоро
человеколюбие постизати. еже на Манасии быти сказует, и
на Езекии, и на иных многих.
Такожде и святыи Григории Нисскии, в
третием своем правиле пишет, и подобная сему уставляет.
кая убо от времени цельба будет рече, но на произволение
обращающагося взирати. аще с желанием и усердием есть,
то скоро убо дати ему причастие.
Паки же Великии Василии во осмьдесять
четвертом своем правиле, сице глаголет. вся убо сия
пишем, яко еже плодом покаяния искуситися. не бо
всячески летом судим сицевая, но нраву покаяния внимаем.
Аще же неотступно держатся своих
обычаев, и сластем плотским паче работати восхощут,
нежели Господеви, и евангельскаго жития не приемлют, ни
едино нам обще к ним слово. мы убо в людех непокоривых,
и прекословных научихомся слышати, спасаи спаси свою
душу. зри и в Патерике еже преподобныи Памва о последнем
роде рече ко ученику си. и в Прологе ноемврия в 16. и
генв., в 20, день.
Над всеми же, яже завеща Великии Василии
наводит, яко и лета уставихом покаянию о гресех. но не
летом судим покаяние, яко еже учиненному времени
мимошедшу, о коемждо согрешающих, и всякаго приимати их.
но плоды покаяния да искушаем, или нраву внимаем, или
устроению кающагося. во еже и зде разумети, яко же
седмьдесят четвертое его правило сказует. сиречь,
тщателем умаляти лета. а иже в нерадении пребывающим,
протязати.
Аще ли нецыи рече, неотступно держатся
своих обычаев, и не престают согрешати, к таковым ни
едино нам общение. слышим бо от писания, спасаяи спаси
свою душу. и блюди, да не погубиши себе, не исправленным
приобщаяся.
От Матфея, 40, состава. глава, 7
Во днех святейшаго Луки, воину некоему
убийство вольное соделавшу, епископ некии на кратко
вельми время, написано даде ему разрешение. и потязаем
сыи от собора, правило предлагаше, еже епископом
попущати власть, или ослабевати или растити запрещения
кающимся. но услыша, яко архиереом дадеся убо сие, но не
безистязательно и преизлишно творити схождение, и яко
паучинами не подобает вязати, яже убо трема кодолами
сиречь ужи связовати должни суть. тем же воина убо
правильному запрещению собор предаде, архиерея же
обвини, еже во уреченное время литургии пожданием.
Поучение
От сих убо, и сицевых есть навыкнути,
яко добро и прилично разсуждение святейшаго Иоанна
Постника, правилом составися, по Матфею. и виждь
реченное Постника, еже от Матфея.
Николы патриарха Константиня града
Вопрос. Подобает ли правилы Иоанна
Постника, правити некия.
Ответ. Таковая правила, многое схождение
приемшяя, многих погубиша. но иже в разуме добра суть, и
да правят ими.
От книги Матфеевы
А еже сице скращати нам, рече покаяния
лето, не убо вознепщуется не бытии слово спасаемо.
Се же да будет разумно, яко святыи
Василии, и прочии отцы древнии, не точию грешников
кающихся от святаго причащения отлучаху, но и труды и
подвиги покаяния предаваху. паче же соборныя и обдержныя
посты, бдения и молитвы церковныя на всяк день и нощь
повелеша хранити и исполняти. к сему же и каноны
покаяния налагаху, яко же есть видети в Василиевых
правилех. 56, главе. и 58. и 59. и 75. и 77.
Собора Ангкирскаго в правилех, в 16,
главе.
Григория Чюдотворца, 10. и Григория
Нисскаго, 11. в них же паче, в 56-й. законополагается.
яко да кающиися грешник лета 4 плачется. сиречь, вне
церкве стоя, и входящих прося, да молятся о нем, грех
свой исповедая. лет 5, в послушающих пребывая, сиречь в
притворе церковнем послушая божественных писании. лет 7,
в припадающих, сиречь, стоя в церкви за амбоном, и со
оглашенными исходя. лета 4, с верными, сиречь, стоя и
моляся, обаче кроме причащения пребывая. таже
совершившее лета сия покаяния, Таин святых причастится.
внемли зде, ни ли се есть покаяние и трудове плотьстии;
и зело убо есть.
Вместо поместных на едине довлеют сия
кающемуся, пребывати во вся дни в церкви чрез все
правило. начен от полунощница даже и до вечерня. к сему
среду и пяток поститися от рыб, и пития упивающаго не
касатися. такожде и вся великия соборныя посты цело
хранити, и трезвено всегда. не праздно же пребывати, и
милостыню даяти, нищих призывати. в домех же молитвою и
чтением упражнятися. к грехом же вспять никакоже
возвращатися. от отец же святых.
Святыи Иоанн патриарх глаголемый
Постник, сухоядения и метания с молитвою предает
грешником.
Подобает истинно кающимся, и плоть
жестоким пребыванием изнуряти хотящим, и житие
благоразумное проходити первыя злобы сопротивосильное, и
по мере воздержания возмеряти им, и времени покаяния
умаление. яко се.
Аще кто вина питии во уреченныя дни не
изволит, годище и мы судихом отъяти едино, уставленаго
его падению, от отец запрещению. такожде.
Аще от мяса воздержатися обещавается на
время, другое и мы лето отсещи искусихом.
Аще от сыра, и яиц. рыбы и масла
воздержатися обещает, тогда на всякое воздержание,
единаго сицевых вида, едино лето отъяти.
Но аще и частыми колено преклонении,
Бога умилостивити изволит, подобнее творити.
Наипаче же обильное к милостыни, и силы
не лишаемое произволение показует.
Аще ли же по силе прегрешения в
боголюбезное, иноческое житие приступит. и еще скращенее
облегчити ему оставление, добре быти искусихом, житие
хотящему злостраданием проходити, и пребывати сицевому
покаянию приличное.
Пристяжение
До зде о исправлении кающихся. в нем же
о духовниче да не погрешиши при глубоцем разсуждении,
сия три памятьствуй.
Первое. количество. много кто согреши,
да многая постраждет.
Второе. качество. да противная
противными врачюются. чревонеистовство воздержанием. и
прочее.
Третие, время. долго кто согрешаше, да
долго и казнится. паче же всех, желание и произволение в
кающемся, зрительно есть.
Номоканон. сиречь Законоправильник имеяи
правила по скращению святых апостол, и Великаго Василия,
и святых соборов.
Рукополагаяи вне своего предела, с
рукополагаемым да извержется, по тридесять пятому
правилу святых апостол.
За сребреники рукополагаяи, на кии любо
степень, с рукополагаемым да извержется, и отлучится по
двадесять девятому правилу святых апостол.
Причетник споручаяися, да извержется по
двадесятому правилу святых апостол.
Епископ, или священник, или диякон. аще
биет верна, или неверна, да извержется, по двадесять
седмому правилу святых апостол.
Такожде аще поднес [взем] мечь уязвит
кого.
Причетник аще приведет князя, или
болярина, да умолит митрополита за епископию, или сан,
или епископа. да извержется, и отлучится, по тридесятому
правилу святых апостол.
Причетник аще укорит епископа в лице, да
извержется, по пятьдесят пятом правиле, святых апостол.
Убивыи самовольне человека, двадесять
лет да не причастится. по 56-му правилу, Великаго
Василия.
Аще неволею убиет, десять лет, по
первому надесять правилу, тогожде.
Иже убиет на брани, или в разбойницех.
егда приидут нань с мечи, лета три не причастится, по
третием надесять правиле, тогожде.
Ащеже разбойник с мечи не приидет, разве
да украдет, или возмет нечто от своих ему. и той могии
бежати, и не бежа. но мечь изем, уби разбойника, яко
убиица запрещен будет, по шестой главе, 30-го, стиха.
сиречь, 20 лет.
Священник изверзается, каково любо
убийство сотворив, по шестьдесят 6-му правилу, святых
апостол, и по 55-му, правилу, Великаго Василия.
Христа отвергиися без нужды, при кончине
живота да сподобится причастия, по седмьдесят третиему
правилу, Великаго Василия.
А иже мук ради отвержется Христа, три
лета да не причастится, по осмьдесят первому правилу,
Великаго Василия. ищи о сих исправлениях, во святом
Иоанне Постнице.
Чародей, сиречь, волхв и прорицатель,
восколей, и оловолей, или превязуяи животная, да не
снесть е волк, или мужа и жену, в ничто же смешаяи, или
чародействуяи в бурю, двадесят лет да не причастится. по
65-му, и по седмьдесят второму правилу, Великаго
Василия.
Аще ли священник, во едино от сих
падется. сиречь, аще сицево злохудожество правит,
низлагается, и отлучается, и вне церкве изгонится, по
тридесят шестому правилу, иже в Лаодикии собора.
Чти Валсамона патриарха Антиохийскаго. в
толковании в каноне шестаго собора, 61.
Такожде ищи о сих толкования в Матфеи,
кии суть чародеи, и обаятели, в 40-м, стихе, глава, 1.
Тем же чародеи суть, иже волшебством
бесы привлачат на вся хотения, и звери связуют и гады,
во еже не повредитися скоту, аще негде вне останет.
Такожде у Зонары, 36-му, правилу. собора
Лаодикийскаго, обращеши подобне.
О чаровании
Чаровницы сии суть, иже негли Давыдския
псалмы поюще, мученическая имена, и самыя Пресвятыя
Богородица воспоминающе, и сими, еже от бесов слагают
чарования.
Чарования убо, бесов злотворных имут
призывания, окрест гробов обаваемая яко еже разслабити
уды кому, или житием в зле жити, и не жительно ему быти
житие, сице чарования преименовашася, от еже над гробы
вопля и плача.
Чаровник, и обаятель, едино есть.
Чарование убо есть, еже обаванием, и
призыванием бесов, сотворити некое деяние яково любо, на
вред иным, яко же на разслабление удом, и на продолжение
болезни, или на чрез всежительное возлежание, и на иная
сим подобная.
О отравах
Отрава же есть, еже напоеньми
смертоносными устроити нечто снедно, и отравити
человека, или от разума извести, и желательну сотворити
смерть страждущему, или еже приличными человеку, или
любовных ради, иногда бывамая низумляти, и тако
уготовляти, в лепоту же сии, со убийцами равно
запрещаваются. яко же глаголе Великии Василии.
Иже чарование, или отраву исповесть,
убииц лета покаянием да исполнит.
И идолослужителя быти, глаголет правило,
иже призывания бесом творят, чарования некая, и от тех
ищут помощи.
Чародея же и волшебство творящия,
идолослужителя нарече.
О прорицании
Прорицателие же глаголются, иже бесовом
себе возложиша, и тех наказаньми, чрез некая знамения
покушаются и являются ведети будущая.
О волховании
Волхвы убо суть иже негли благотворныя
бесы призывают, аще и во благая некия вещи составления,
скверноубиицы суть вси, и лестьцы произволением.
Аще кия ходят к волхвом, и волхвуют, или
звездословят, о счастии и о бранех и о корысте
богатьства и о инех многих злодействиих. или чаруют
воски о ратном кровопролитии, или мужа и жену разлучают
да не сходятся. или да навыкнут что ведати или
злодействовати, о них же неведят, яко да воск излиет им
волхв, или олово. шесть лет да не причастятся, по
шестьдесять первому правилу, еже в Трулле, и по
седмьдесять второму Великаго Василия. священник же сие
творяи да извержется [Исаия 47 ст., 12. Деян., 19. ст.
19].
Елицы волхвуют с еретики, и елицы
приводят волхва в дом свой, и чаруют им, идеже болен
есть, или ино что, лет пять да не причастятся, по
двадесят четвертому правилу Агкирскаго собора, и по
шестьдесять первому правилу, шестаго собора иже в
Трулле, сицевых шестолетием запрещает, священныя же
низлагает. и аще хощеши, ищи сказание сему широчайшее, в
Зонаре. глава, 175.
Такожде и ячменем, или бобом волхвующии,
шесть лет, да не причастятся, по первой главе, 40-го,
стиха в Матфеи. томужде запрещению подлежат, иже свеща
или пенязи на воду пущают, оттуду нечто благополучно
гадательствующе.
Такожде и елицы носят, хранительная от
отрав, или что от сицевых, или обвязания на дети свои, и
на животная возлагают, урока ради. шесть лет, по 61-му,
правилу иже в Трулле.
А иже призывают волхвы, да сотворят
чары, на пакость инем человеком. и сей яко же он
запрещается, сиречь, двадесят лет. аки волею убивыи. по
пятьдесят шестому правилу. Великаго Василия. и по
седмьдесят второму.
И есть же ина злая волхования яже зде в
Велицей Росии, ово убо зверски рыкати творят, яко же
медведь и волк, и ин скотски всяко, и птическими гласы и
песньми мучитися. и чревесем разсторгнутися от
привязания к тайным удом. и сии вси человекоубиицы,
томужде правилу подлежат Великаго Василия. такожде и
лопарем веруяи кудесьству во огни туже епитемию да
приимет.
Матфей же в первой главе, 40-го стиха
глаголет, яко иже медведи, и иныя звери на игралища на
вред простейших влекут, или облаки разгонят, или подают
хранительная, или рызик и щастие, и родословию веруют.
яко ов убо в день благ. ов же в зол родися, или
метнословие, или опоясания. сиречь конуры, и шолки, на
главу свою, и на выю возлагают, яко недуги отгонити, и
уроки, буесловят, или змия обносят в недрех, или на очи,
или на уста своя, привлачат сих кожицы, яко за здравие
негде непщующе. или усерязе в великии четверток своим
детем мученическая поминающе, на выю си вешают. или в
воспоминание страстей Христовых, в пяток великии узолцы
себе по числу евангелии вяжут. или характиры, или хартию
сдержащую молитву нежита, или бабы призывают, на
главоболения. или сплины, или на болезни, и недуги,
превязания творят, и ужа, призывающе благотворныя бесы,
в помощь и здравие им. или зверем, и мужу и жене,
превязания изволят. или духа пытлива имущим веруют, иже
от бесов навыцающе, предглаголют будущая. или бобу
верующе, или ино волшебство, возвещают изгибшее. или
чарование, за ину некую немощь, и за бурю чаруют, или
ино что от сицевых притецающе, шестолетием да
запретятся. сиречь, шесть лет. да не причастятся.
освященныя же да извергнутся. и паче в лепоту, сиречь,
по всякой правде. занеже вся сия от бесов действуема
совершаются. глаголет бо святыи Иоанн Златоуст.
Яко аще и Святыя Троица имя глаголется
на сицевых, аще и святых будут призывания. аще и
знамение крестное наводится, бежати подобает сицевых и
отвращатися.
Низлагаютжеся множицею и священницы на
соборе, еже некоему случися, иже хлеб великаго четвертка
даде некиим ясти даже украденная обрящутся, от еже
неудобне сего пожрети.
Ин некии священник с евангелием, ему же
древо связано бысть, и круговидно обращашеся, обвинен,
яко испытания творяше о некоих вещех, с псалмы
Двыдовыми, абие извержен бысть.
Сицевому суду подлежат, иже имена на
хартиях пишут, и ключа в Псалтырь влагают, оттуду ложная
вещающе.
Но и святым иконам приседящия жены, и от
сих крепящияся прорицати будущая, яко же иногда пытливыи
дух имущии, томужде подпадают запрещению. обаче единою
прельстившияся, таже от зла преставшия, менше запрещени
будут.
Томужде запрещению подпадают. и иже
глаголемыя вуркулаки сжигают, и от них курятся, шесть
лет да не причастятся.
Такожде и елицы мещут детища своя на
распутиях, да крестит е обретыи, негли да живо будет,
якоже буесловят. аще же обрящет е турчин. и аще крестит
священник отроча с турчином яко с кумом, да извержется,
по четыридесят шестому правилу святых апостол.
Тожде да постраждет с еретики и
отступником крестивыи.
В третией же главе, 5-го стиха, Матфей
глаголет о верных, последующих еллинским обычаем, и
плясанием на брацех, и на стогнах творящих. или
русалком, или гласовом птичиим верующим. или
новомесячию, или устретением, или истязанием внимающих,
или огня паления на стогнах, яже творяху еллини древле.
а ныне яко же видим християнския дети сия творят, в
навечерия праздничная, по некоему обычаю древнему
[купала]. или звания еже творят нецыи, в день
Вознесения, да от оного щастие свое разсмотрят. или во
одежду женскую мужие облачатся, и жены в мужескую, или
наличники, яко же в странах латинских зле обыкоша
творят, различная лица себе притворяюще, и теми многажды
и самыи чин церковныи поругающе. тем же сия творящих в
разуме, священных убо извержению, людинов же, отлучению
предает.
Такожде и шестьдесят шестое правило,
шестаго собора, возбраняет верным отходити, и видети
ристания конския, на пасху или во ино время.
Великии же Василии. в 72-м своем правиле
отравники, и идолослужителя, и убиицы, на 20, лет,
осуждает. прелюбодея же и мужеложца, и скотоложца, на
15, лет. идолослужителя же глаголет, не исперва
явленныя, нечестивыя, но после крещения волшебства
деющия и чарования. образом некоим идолом служат сии
призывающе бесы в помощь себе. и во устрабление
страдания, и немощи своея. искони бо узаконоположися,
яко да идолослужителие крещаемыя, абие приступят к
причастию. паче же аще слезы покаяния и умиления имети
будут, грех бо их первый, грех бысть неведения. по
крещении же пожершии идолом, сиречь, бесовским чаровании
некиими, чрез всежитие свое имут покаяние. при кончине
же живота своего, причастие да приимут.
От жития святаго Андрея Христа ради
уродиваго
Вопрошен быв бес, от треблаженнаго
Андрея Христа ради уродиваго.
Откуду веси и предглаголеши некая.
отвещав же бес, рече, искусен есть отец наш, и седя во
аде и волхвуя, всех учит нас. понеже естество наше,
отнюд ничто же знает. Блаженныи глагола, о коих
согрешениих наипаче услаждается естество ваше. рече бес,
о идолослужении, и волшебстве, чаровании же, и о отраве.
изряднее же о убийстве, памятозлобии, и о содомстем
делании, и прелюбодеянии. Преподобныи рече, аще кто
отвержется страстей ваших, и приступит покаянием ко
Господу Богу, како видится вам. рече бес, еда ли и ты не
знаеши, яко огорчеваемся нань гневающеся. обаче же
уповаем паки обратится ему, вслед хотении наших. мнози
бо отвергошеся нас, покаяния ради. и возвратишася паки
на начинания наша, и приобретохом их. Сия слышав
преподобныи, дуну нань, и абие неявлен бысть.
И от Отечьника слово 6
Брат борим блудом, иде к старцу и
моляшеся ему, помолитися о нем, да облегчится брань от
него. Поболе же старец и моли Бога о нем днии седмь. во
осмыи же день вопроси брата, глаголя, како брань брате.
глагола ему он, зле веруй отче яко ни малы легчины
нечух, старец же удивися и се убо в нощи явися ему
сатана, глаголя ему, веруй старче, яко от перваго дни.
егда помолися Богу о нем, абие отъидох от него. но
своего беса и свою брань имать, от гортаня своего, аз же
вины не имам о брани его, но сам брань творит, пия и ядя
и спя.
Прелюбодей, пятьнадесять лет да не
причастится. по пятьдесят осмому правилу Великаго
Василия. а иже во Ангкире святыи собор прелюбодея, яко
блудники запрещает.
Мужеложник, пятьнадесять лет да
запретится, по шестьдесят второму правилу Великаго
Василия.
Такожде и скотоложник, по шестьдесят
третиему правилу, тогожде.
Такожде и птицеложник по томужде
правилу.
Блудник седмь лет да не причастится, по
пятьдесят девятому правилу, тогожде.
Священник соблудивыи, или
прелюбодейство, или мужеложьство, или птичеложьство
съдеявыи. или муженеистовавыи на свою жену. или волхвом
себе предавыи, да извержется, по пятьдесят первому
правилу Великаго Василия.
С своею сестрою единоотечнею, и
единоматернею сблудивыи, и осквернивыися, двадесять лет
да не причастится, по шестьдесят седьмому правилу,
Великаго Василия. А священьства и ниже инаго священнаго
степене прияти никако же да дерзнет, погибель бо и мука
вечная есть ему. Матфей же, в Постнице, пятьнадесять
лет. а иже от разных от самого отца, или от самыя матере
есть сестра, дванадесять лет, по правилу Великаго
Василия.
А иже с невестою сыновнею, и с тещею, и
с материю тещиною съблудит, двадесят лет, по седмьдесят
шестому, и седмьдесят девятому правилу, тогожде.
С братнею же невестою, десять лет.
С тещиною сестрою, десять лет.
Со второсестриною, девять лет.
С кумою, сиречь, с материю приемницы
своея, единонадесять лет.
С приемницею же своею, двадесять лет.
С жениною сестрою, единонадесят лет.
С двема сестрами, единонадесять лет.
Такожде и жена, с двема братома, 11 лет.
Иже на мачеху вознеистовися, двадесять
лет, яко же и с сестрою от отца тогожде, по седмьдесять
девятому правилу Великаго Василия.
Деторастление женска пола, сиречь, нижае
двенадесять годищ, Матфей дванадесять лет, по святому
Иоанну Постнику запрещает.
О женах
Такожде запрещаются и жены, егда не имут
мужа, аще ли же имут мужа. прелюбодействова держи
правило. сиречь, множайшая лета всегда держи.
Иже на жену свою мужеско вознеистовися.
сиречь, во еже чрез естество, пять надесять лет да не
причастится, и священник да не будет.
Сицевому и жена, канону подлежит, аще по
воли ея бысть. аще ли по нужде, легчае и мнее, яко же
веси бываемое.
Аще же насильствует зол муж, тогда жена
да известит духовным пастырем, тии же совет благ дадут.
такожде и на чюждую мужеско вознеистовася, пятьнадесят
лет.
Ротитель всяк, и иже клятвопреступник и
крест целуяи, лет десять, по 64 правилу Великаго
Василия.
А иже по нужде, шесть лет, по осмьдесят
второму правилу тогожде. такожде и лжесвидетель.
Священник ротивыися, аще и по нужде, да
извержется, по 25-му правилу, святых апостол.
Тать аще исповестся самохотне, едино
лето да не причастится. аще ли обличен быв две лете, по
61-му правилу Великаго Василия.
Татем приятель, яко тать запрещается,
сиречь, едино лето да не причастится.
Разбойник и разбойников приятель яко
убийца запрещаются, по шестому правилу, святаго Григория
Нисскаго. и по правилу пятьдесят шестому Великаго
Василия.
Гробокопатель, сиречь, иже раскапывает
гробы. да украдет нечто, десять лет да не причастится.
по шестьдесят шестому правилу Великаго Василия. инии же
глаголют едино лето, до девятаго часа сухоядение. и
поклонов двесте на всяк день творити. аще ли не восхощет
исправитися, да держит правило Великаго Василия.
Святотатец, иже священная крадет. 15 лет
да не причастится. по святому Григорию Нисскому.
Двоеженец, едино лето да не причастится,
по четвертому правилу Великаго Василия. инии же
глаголют, две лете. чти Никифора Исповедника патриарха
Цареградскаго, в Арменополи книги 3.
Троеженец, егда имяше нижае четыридесяте
лет, и не имяше детей с первыми женами, лета четыри да
не причастится. егда же есть вышше четыредесяте лет, и
дети имать, непрощено есть троеженство, по правилом
Матфеовым, 3 стиха, 4 главы. и о том, или книги
Единения, не оставиша сему быти.
Правило седмьдесят второе шестаго собора
повелевает, яко не подобает православну мужу,
еретичестей сочетатися жене. аще же и будет, неключиму
вменяет женитву, и законопреступен брак.
Аще ли обещается покаятися лице
еретическое, да не пребудет брак, донеле же обетование
известится, по четыринадесятому правилу, собора
четвертаго.
Такожде и с латини аще православная жена
сочтется, с распустом брака, и запрещению подлежит, по
двадесятой главе, 3, стиха, еже в Матфеи. аще ли кто
преступит уставленная, да отлучится.
Священник аще в ведении благословит,
возбраненныи брак от сродства, или кумовства, или
четвероженьства, или неимущь возраста. сиречь, аще несть
муж пятьнадесят лет, а жена тринадесять лет, да
извержется, и брак да будет не тверд.
Аще кто со обручницею своею смесится
прежде венчания, лето едино да запретится, удержаваяся
от причастия. яко же шестьдесят девятое правило Великаго
Василия, о четцы повелевает. священник сицевыи не
бывает, яко брак окрадыи.
Аще ли же кто прежде брака, падется с
материю обручница своея, или со инем лицем рода ея,
возбраняется таковыи брак. аще ли убо после брака бысть
согрешение, не распущаются. но запрещаются, яко и
кровосмешение сотворшии, по пятьнадесятой главе, 3,
стиха, еже в Матфеи. канон же сицевым есть, 15 лет.
Правило пятьнадесят третие шестаго
собора. Священники иже в разуме на брацех ликуют,
извержению подлагаются. людины же отлучаются. а наипаче
жены, яко многих вреждающия.
Тогожде собора правило двадесят
четвертое. Священником повелевает, ниже видети лики и
глумилища, или конская ристания. но и на брак аще
пойдет, да благословит токмо трапезу, егда же внидут
тамо игралищныя органы, да востанет абие отъидет.
Правило же третие надесять, собора Лаодикийскаго, отнюд
возбраняет, верным имети игрища на браце.
Иже малакию сотвори, да сухо яст
четыридесять дней, по святому Иоанну Постнику, и да
творит на всяк день поклонов сто. аще же не может
сухоясти, да удержится от причастия едино лето. и поклон
пятьдесят на всяк день.
Смешающиися друг с другом, яко сугубу
делающе малакию, сухоясти имут днии осмьдесят, или да не
причастятся две лете, творяще поклонов пятьдесят на всяк
день.
Аще ли кто от причетник, прежде священия
в страсть малакии падется, первее подлежит канону
малакии, таже рукополагается. по рукоположении же в
неведении сие сотворивыи, священства да есть празден
лето едино. в ведении же паки что сотворь, да
извержется.
Инок же простыи малакийствоваи, днии 60
запрещается сухоядением, по Великому Василию.
О женах
И жены елицы валяются с мужи, или сами
малакию творят, запрещение малакии да приимут. ибо и тии
в той же грех падаются яко и мужие.
В течении сущи жена, сиречь обычная си
имущи, не причащается, и в день Пасхи, донележе
очистится. ниже входит в церковь до 7 дний. ниже
смешается с мужем своим, донележе очистится, по святому
Иоанну Постнику. в иное же время друг друга не лишает,
по апостолу, точию во время причастия, и анафоры [доры]
в неделях, и в нарочитыя праздники и то по согласию.
Рождьшая в великую седмицу, яст масло, и
вино пиет. по осмому правилу святаго Тимофея.
Людины во святыи олтарь да не входят, ни
мужь ни жена, разве единаго царя православнаго, егда
дары Господеви принесет, по 68-му правилу, еже в Трулле.
Инокиня же входит в монастыри женском и
пометает, по 15-му правилу святаго Никифора
Цареградскаго. а зде в Велицей Росии, обретохом то
правило, 9. и Никифор не повелевает входити инокиням во
святыи олтарь.
Арменополь же глаголет, яко
Достоит инокиням в монастырех своих
входити во святыи олтарь, вжизати свеща, и кадила, и
украшати храм. аще будет достойна и чиста, но не вносити
в жертовник ино что разве точию священная, по 4-му,
правилу святых апостол, ниже излишныя просфиры, но вне
церкви да полагаются.
Аще инокиня насилуема будет, или девица
от господаря своего или иная жена от кого. явитжеся
первое житие ея чисто, 14, днии запрещается, или едино
лето да не причастится. аще ли исперва бяше житие ея
скверно, еже блуд деющих, запрещение да приимет, по
32-му правилу святаго Никифора Цареградскаго. Великии же
Василии, в 49-м своем правиле, насилованную рабыню от
господина своего си, без епитемии остави. а иже волею,
яко блудница канон да имать. аще кто с попадиею паднет,
или с дияконицею, осмьнадесять лет.
Иже в Халкидоне святых отец
Аще чие отроча нерадения ради умрет не
крещено, три лета сицевыи да не причастится, и на всяк
день да творит поклонов двесте. и да постится.
понедельник, среду и пяток. Аще ли текут к священнику, а
священник небрежет, грех есть священнику, и томужде
канону подлежит.
Жена спящая, и у сосцу младенца своего
умертвивша, лет седмь да не причастится.
Пренебрегшая чревоношение свое, сиречь
рождьшееся на пути детище, и сие умрет, яко убиица
запрещается, по 33-му правилу Великаго Василия.
Аще ли за простыню и недоумение. или
скудости ради нужных. или яко пусто есть место, не
запрещается, по 52-му правилу тогожде.
Аще кая жена снесть былие, или иное что
сотворит, и убиет отроча во чреве своем. убиица есть, по
второму правилу Великаго Василия, 10 лет, запрещение да
приимет.
Такожде сотворшая, и давшая сицевое
былие, по святому Иоанну Постнику.
А иже в Агкире святыи собор в 21-м своем
правиле, блудницами растлевшим и погубляющим младенца
своя, десятолетием запрещает. такожде и давшим им
таковая растлительная.
Томужде запрещению подлежат, по Иоанну
Постнику, яже изверзают детища своя в стогнах, или на
порте [площади] градской, иныи же кто возмет е на
воспитание, и прилежание свое. занеже елико по изволению
их, убиица суть.
Аще жена извержет детище неволею, лето
едино да не причастится.
Иже напаяет детище свое, глаголемыми
антисикотии, едино лето да не причастится.
О иноцех
Инок или инокиня, аще приидут во общение
брака. сиречь, аще оженятся. не судится то брак, но
блуд. сего ради донележе не распустятся, в церковь да не
входят, но да отлучатся, по шестому правилу Великаго
Василия. по распущении же, пятьнадесять лет да не
причастятся.
Аще ли случится им умрети без покаяния.
да не погребают их, ниже да творят им помин. ибо чюжди
суть християн.
А еже в Трулле правило 44, сицевых по
распущении, седмь лет запрещает, аще от своего яве
произволения, на покаяние приидут. аще же не повинуются,
но пребудут в нечистоте, паче же прекословити начнут,
прелюбодеяния правилом да запретятся.
Тожде и блудодееви иноку правило
запрещает, еже и блуднику. а не яко же прелюбодею, и сие
правило держати достоит, кроме великаго образа.
Аще кто дерзнет пострищи инока без
приимца, сиречь без старца, да извержется, по второму
правилу второперваго собора. сиречь, аще несть старец
купно в постризе, иже бы приял и имел его в повиновении.
Недостоит без искуса пострищи инока, или
рясу возложити на него с страстию, но со искусом. искус
же знаемым, и местным да будет, шестомесячия время, или
егда увидит игумен, изволение добродетели их, и
прилежания. аще ли же страннии суть и незнаемии. в трех
летех искус да будет, по божественным правилом. искус же
с мирскими одеждами должен есть быти, а не со
иноческими.
Аще ли кто предвари почернитися, или
рясу облещи внутрь искуса, аще и кроме страстнаго, да не
дерзнет совлещи сего прочее. но и неволею понужден будет
пострищися, от местнаго епископа с запрещением и
отлучением, по третией главе, единонадесятаго титла,
царских правил. Аще ли кто преступит пределы святых
отец, и без искуса и приемника пострижет кого, или в
рясу облечет. правильно казнь да приимет, по пятому
правилу, глаголемаго второперваго собора. аще же немощь
случится сущим во искусе, да постризаются без приятия
даров, ту сущу и приимцу, хотящему их имети в
повиновении. аще когда здрави будут.
О женах
А жены да искушаются, седяще в дому
своем, и за тримесячное время, впрашательни суть, убо ли
в добром сем помысле пребывают. и тако да постризаются и
даются приемницам си. хотящим их имети в повиновении,
сиречь, старицами яко же и мужие, без всякаго дара.
Мирскии поп да не постризает инока, по
завещанию иже в Никее святаго собора. како бо даст
иному, его же сам не имать.
Повелевает десятая глава, девятаго
титла. никто же от родителей да не дерзнет препинати
чадом своим, приходящим ко иноческому житию, или
оттерзати от монастыря, или сего ради отчюждати их
наследия. аще кто постигнет сие сотворити, да будет
отлучен от церкве, дондеже покается.
Иже во иноческии облечеся образ, за
страх брани, или за иное некое коварьство, яко негли
посмеваяся. и сие после нужды и лицемерия поверг, в
четыринадесятницах три дни запрещевается. и тако
приступает ко святому причастию, по двадесять первому
правилу святаго Никифора Цареградскаго.
Калугер сыи презвитер, не венчает
женитву, неключимо бо есть. ниже приимец бывает детищу,
сиречь, да то приимет от крещения.
Инок презвитер млад, аще служит. и
инокине, недостоит причаститися от него по 22 правилу,
святаго Никифора.
Завещание Великаго Василия
Аще презвитер, или инок, не чтет часа
перваго, 3, 6, 9, несть ясти достоин. и аще не правит
всего правила своего, яко мертва вменяет сего Бог, и да
запретится, яко же подобает.
Аще некнижныи есть инок, да творит на
всякии час, поклонов пятьдесят, глаголя, Господи Исусе
Христе Сыне Божии помилуй мя грешнаго. Аще ли не может
творити поклонов, да глаголет пятьсот молитв, на час,
глаголя со вниманием. Господи Исусе Христе Сыне Божии,
Богородица ради помилуй мя грешнаго.
Паки тогожде святаго другое завещание
Да творит безкнижныи инок, за
полунощницу, вервиц десять. за утреню, вервиц десять. за
часы, вервиц десять. за девятыи час, и вечерню, десять.
за павечерню десять. вервица же да имать узлы, сто и
три. на всяком же узле да чтет преднаписаную молитву.
канон же им есть, сущим убо малаго образа, поклонов
триста. схимником же, поклонов, шесть сот. тогожде
святаго.
Аще кии инок самоволне смеется. или
беседует кроме нужда на правиле, запрещение да имать,
поклонов пятьдесят.
Аще кии инок стоя на всем соборе
церковнем, при концы же не обрящется, да сотворит,
поклонов пятьдесят.
Инок презвитер, аще и пременит образ.
сиречь, в большую схиму поступит, да литургисает. никая
же бо сему препона пострижиение есть. Архиерей же, аще
пременит образ, сиречь, аще будет схимник, да не
действует к тому святительское отнюд, ниже
священническое, по двадесят девятому правилу. 5, стиха в
Матфеи.
Инок схимник сблудив, яко прелюбодей
запрещается, пятьнадесять лет. малаго же образа сыи, яко
блудник, сиречь, седмь лет.
Инок аще седит на пиру с мирскими,
послушаяи и помогаяи, паче же благословя им неистовства
их, запрещается отлучением недель шесть, на всяк день
поклонов сто творя, и сухоядение.
Инок аще седит в дому своем, яко
мирянина сего вменяет Бог.
Инок аще оставит ложе свое, и уснет на
дружнем без благословныя вины, имать запрещение,
поклонов пятьдесят.
Инок аще упиется, запрещается недель
пять. и аще сблюет от много пития, запрещается яко же
ниже в Номоканоне сем о священницех.
Инок аще что украдет из монастыря, или
тайно яст, подобно со мнозем испытанием да исправится и
запретится от настоятеля.
Инок аще солжет, вольным хотением, имать
запрещение, сто поклонов великих. аще ли да спасет душу,
или свою, или ближняго, греха не имать.
Инок аще отъидет на брань, имать канон
дний, 30.
Инок аще посмеется, паче усклабления.
имать поклонов, пятьдесят.
Инок аще идет с женою поприще едино, да
отлучится днии седмь.
Инок аще лобжет жену, или отроча, имать
запрещение, днии четыридесять да не причастится. ибо ни
на святое воскресение Господне, достоит иноку лобызати
отроча, или свою матерь.
Презвитер инок врачуяи, или жилу секии,
да есть празден священнодейства днии седмь.
Инок презвитер аще извержен есть,
трапезу точию да благословит.
Инок простыи, бияи кого, прежде да
примирится оному. таже да сотворит поклонов триста.
Инок после павечерницы, ядыи и пияи, да
постится едину седмицу, сухоядение и поклонов двесте.
аще повелит нужда ясти и пити, второе да поет
павечерницу.
Инок аще распояшется на ложи своем, да
сотворит поклонов, пятьдесят.
Инока пострижена, изшедша же самовольне,
недостоит приимати в другии монастырь, по четвертому
правилу, иже в Халкидоне святаго собора.
Аще ли же игумен приимет и, лишается
игуменства. разве аще понужден будет зря его погибнути
хотяща. инако бо от рук его душа его взыщется, яко
нечеловеколюбствова о брате.
Аще ли же епископ приимет сицеваго, и
яко же причетника имать и, да будет епископ, своих людии
точию общением доволен, другим ему сообщающимся, по
осмьдесят третиему правилу, иже в Карфагене собора.
Инок егда избежит отай из монастыря,
идеже пострижеся, и обтичет всюду. причастия отлучению
подпадает. по четвертому правилу четвертаго собора, зане
тем хулится имя Божие. аще ли бысть ему душевныи вред, и
сего ради бежит, должен есть обрести отца искусна, и
прияти от него завет. или яко имать, канон дати ему.
Игумен аще с прилежанием не взыщет,
инока избегшаго, и не даст ему подобающаго лицу его
врачества, и утверждения, да отлучится, по третиему
правилу второ перваго собора.
Аще кто весть брата, хотяща тай изыти из
монастыря, и не возвестит игумену, да отлучится, яко
небрегии о спасении брата.
Никифора Цареградскаго правило, 17
Три главизны изгонят инок из монастыря
их. первое, аще еретик есть игумен. второе, аще путь
есть женам. третие, аще учатся мирстии дети. Некто же от
старец рече, яко древнии отцы нескоро отхождаху от места
своего. разве триех сих вин. Первая, аще кто имать
некоего скорбяща нань. и много творя еже угодити ему, не
можаше преложити и. вторая аще прилучишеся от мнозех
славитися. третия, егда случися во искушение блудное
впасти.
Глаголет Великии Василии, аще кии инок,
в коем любо словеси ко спасению его изглаголанному,
сопротивится игумену своему, или старцу, иди духовному
отцу, яко соперник Божии обретается.
Иже разоряет устав, духовнаго отца
своего самою подстрекаем злобою, при животе и при
смерти, повинен будет.
Такожде и родителей своих, в коей вещи
благочестивой преслушаяи.
Василия Великаго
Аще хощеши оставити обитель. в ней же
еси зван был, и отца, и братию, кроме ереси, но за
укоризну и язву, или яко видел еси на час смутившуюся
обитель. или бдения ради, и низу легания, и неумывания,
или яко мнии еси всех, и яко желаеши мира и яже в мире,
или яко огорчи тя отец твой игумен, или брат твой. и
сего ради хощеши изыти, горе тебе, кому тя уподоблю.
токмо Июде предателю, отлучившуся Христа, и ученик Его.
От святых апостол
Аще кии муж, или жена, отдавше своя.
церкви, или монастырю, или за душу раздавше своя си,
послежде раскаявшеся о отдании, восхощут взяти нечто от
тех. аще убо в неведении суть, да запретятся, ниже во ум
сие приимати. аще ли в разуме, и не повинуются, да
отриновени будут, яко же Анания и Сапфира от апостола
Петра. единою бо преданная церкви, недвижима суть, и
недостоит двизати. зане писано есть и инде. иже отдаст
село, несть господин селу.
От постных словес Великаго Василия
Аще подобает что, в братстве свое имети.
сие сопротивно есть, еже в деяниих о веровавших
свидетельству, в них же писано есть, яко ниже един что
от имении глаголаше свое быти. тем же, и глаголяи быти
что свое во общем житии сам себе чюжда Божия церкви
сотвори, Господня любве, учащаго словом и делом. душу
свою полагати по друзех, а не яже внешняя. тожде шестое
правило. второперваго собора возбраняет.
Втораго собора иже в Никеи, правило, 20.
яко не подобает иноком в женском монастыри быти
Отселе заповедаем не быти сугубу
монастырю, яко соблазн и претыкание быти многим. аще ли
нецыи соближники изволят отврещися. и мнишескому житию
возследоваша. мужем убо подобно в мужескии отъити
монастырь. а женам внити в женскии монастырь. сие убо
угодно бывает Богу. сущии же до ныне сугубии, да
держатся по каноном святаго отца Василия. и по повелению
его тако воображени будут, да не пребывают во едином
монастыри, мниси и черноризица. любодейство бо посреди
пребывает и приемлет. да не имеет мних дерзновения к
черноризицы внити. и черноризица ко мнихом. едина бо
воследования, да не совокупляется мних в женьстем
монастыри. и да яст черноризица едина. и егда нужная
жития от мужеския части кождо им приносится. вне врат
сия да приимет игумения, женьскаго монастыря, старицею
некою черницею. аще ли ключится и ближика коего мниха
видети, то при пришествии игумении, да беседует малыми
краткими словесы к нему. и вскоре от нея да отъидет.
Толкование
Всяко утвержение положиша отцы, да не
приложится порок никии же ко мнишескому житию. и
повелеша черньцем и черницам не жити во едином
монастыри. ни вкупе ясти, ни особно беседовати. но аще
кто и сродницу свою черноризицу хощет видети, то при
игумении да беседует с нею. аще что и от нужных потреб
от мужескаго монастыря принесет мних черноризицам, вне
монастыря стоя да предаст игумении.
Тогожде
Аще кто имать что во общем житии, внутрь
монастыря. или вне монастыря, да пребудет непричащен.
Духовник иного духовника, суд решити и
вязати власти не имать. аще убо ин связа, а другии
разреши, разделение есть. Христос же не разделися. не
достоит, да связавыи и разрешит, по тридесят второму
правилу, святых апостол.
Духовники же глаголем в правду, и по
истине законныя духовники, иже по Бозе, о спасении
человечестем промышляют, а не тщеславныя, неискусныя
невежа, и ложныя, иже купечьством сквернаго ради
прибытка, во образе духовнем, врачевание наводят. тыя бо
суть убиица, яко душа человеческия убивающии, за
нерадение и неискусство свое. обаче архиереови достоит
разсудити.
Седьмаго собора
Духовныи отец, аще кому грех исповесть
исповедавшагося. имать епитемию, три лета да есть
празден, токмо да причащается в месяц единою, и да
творит на всяк день поклонов сто. гражданскии же закон
глаголет. ископати язык сзади сицевому.
Аще епископ или иерей исповесть грех на
сына своего духовнаго, на исповеди от него слышаныи,
никако же подобает верити сицевому свидетельству, по
правилу 133-го, собора Карфагенскаго. Святейшии патриарх
Лука запрещение положи, на игумена обители Гиротрофия,
сущаго архиепископа Ираклийскаго еже не литургисати.
зане свидетельствова на духовное свое чадо. Арменополь
книга, 3. собора, 1-го. глава, 7.
О отлучении безсловеснем
Отречено есть епископом отлучати когождо
от святаго причастия, кроме благословныя вины, отлучаяи
же безсловесне, лето едино от святаго причастия
возбраняется.
Четвертаго собора
Яко недостоит просту человеку, укорити
священника, или запрещати, или поношати, или клеветати,
или обличати в лице, аще негде и истинна суть. аще же
постигнет сие сотворити простолюдин, сиречь простыи
человек, да есть анафема, и да изгнан будет из церкви,
отлучен бо есть от Святыя Троицы, и послан будет во
Июдино место. Писано бо есть, князю людии своих да не
речеши зла. такожде, и настоятеля безчествуяи.
Седьмаго собора
Яко неподобает простым людем, да
повелевают священнику внити во святилище, или в кую любо
вещь, даже и до мала. но своею волею, егда восхощет
изволитися ему литургисати и пети.
Аще кто имать вражду на кого, в церковь
да не входит, ниже приносы его приемлются, дондеже
примирится. ибо молитва его в клятву, и грех вменяется,
да творит же, на всяк день, поклонов пятьдесят.
Аще кто во время причастия печаль имея
на брата, и не даст ему мира, да есть отлучен. аще ли
священник со враждою литургисает, да будет празден,
шестьдесят дней.
Укаряяи и проклинаяи искреняго, прежде
да смирится пред ним, таже ла отлучится три дни сухоядыи
с водою. Писано бо есть глаголяи брату своему ракка, или
уроде, повинен есть геенне огненей.
Аще ли кто укорит священника, да
запретится лето едино. аще даст ему заушение, или древом
ударит, да запретится три лета. аще и священник простит
ему согрешения.
Аще кто имать с некоим вражду, и
преставится едина часть, да запретится другая, о умершем
лето едино, и канон отходя на гроб, скончавшагося днии
четыредесят. и глаголя в себе, прости ми брате, и Бог да
тя простит.
Писано бо есть, аще кто досадит отцу или
матери своей, смертию да умрет. Аще ли покается о том
еже содела, да запретится яко же подобает. аще простит
ему, и досаду приемыи родитель. аще ли двигнет древо, и
ударит их. да отсечена будет рука. аще ли покается, яко
же изволит архиерей, да ему даст канон.
Аще кто своя чада, яко между себе
воспитана любя, и неравно им свое имение разделяяи, яко
чадо ненавистник, не причастится божественых таин,
донележе от церкве отлучится, и исправится.
Аще кто за еже иночествовати сыну
своему, лишит его части и наследия. такожде и той да
отлучится, по 53, главе. 30, титла.
Иже яст мертвечину. или зверохищное,
сиречь, волком снедаемое. или птицею пораженое, сиречь
от крагуя, или от иноя птицы. или кровь, или удавлену,
обретаемая в тенетах, или от тех яко же удавляют латини.
священник убо да извержется. людин же да отлучится, по
63-му правилу святых апостол. сиречь да не причастится
лета два, и канон.
Такожде и ядыи мясо или сыр, в великую
четыредесятницу, или в среду и в пяток, лета два да не
причастится, и поклоны.
Аще кто пойдет на праздник варьварскии,
или еретическии, и снесть в той день с ними от них
жремая за душу их, или спразднует им. лета два да не
причастится, по седмому правилу, иже во Агкире святаго
собора. аще ли священник есть да извержется, по
седмьдесятому правилу святых апостол. Но и от них жремая
не подобает ясти, аще и приносят нам. возбранибося от
тридесят осмаго, 39-го и 40-го правила, иже в Лаодикии
собора.
Правило же 11, шестаго собора, иже в
Трулле повелевает. аще кто в болезни дерзнет призвати
евреина врача. или немчина или от иных вер еретических
или русскаго ведуна или шепотника или баб богомерских
ворожей или кудесниц, тако же и лопарей и самоядь и от
него врачюется, или и со июдеи в бани мыется. аще убо
священник есть, да извержется. людин же да отлучится.
Священник ловец, или птицоятель, да есть
празден три месяца.
Клирик или людин аще из церкви возмет
воск, или елей, да отлучится по 72-му правилу, святых
апостол.
Епископ или священник или диякон лихву
взимая, или да престанет, или да извержется, по
четыредесят четвертому правилу, святых апостол.
Инок же или инокиня лихву взимающе, да
отлучатся. и от причастия, да возбранятся, дондеже
престанут.
Священник упиваяся, или блюя, или куплю
дея. или да престанет, или да извержется, по четыредесят
второму правилу, святых апостол.
Священник аще поищет златицу, или что
ино, причастия ради, да извержется по двадесят третиему
правилу, еже в Трулле.
Священник аще послет чтеца, или иного
кого, да причастит человека. да отлучится, по
четыренадесятому правилу, еже в Лаодикии собора.
Четвертое правило собора Гангрскаго,
сего иже отвращается мирскаго священника, и глаголет,
яко ему литургисающу неподобает от него причаститися,
анафеме предает.
Священник в кой день литургисаше, и аще
изблюет, от многаго пития, шестьдесят днии да будет
празден, по святому Иоанну Постнику. Аще ли без литургии
изблюет, от многопития, пол сих. аще ли ходит в
корчемницу, или да престанет, или да отлучится. людин же
аще изблюет по причащении, четыредесят дний запрещается.
творя на всяк день поклонов сто. и да чтет, псалом, 50.
Помилуй мя Боже.
Аще кто удержит причастие во устех
своих, и повержет е в скоты. или в пчелы своя, четыри
лета да не причастится.
Аще причетницы имуще прю между себе, и
оставльше епископа своего, на мирское судище идут,
канонному запрещению да подлежат, по 9-му правилу, еже в
Халкидоне собора.
Священник аще сотворит клятву с латины,
или собор на епископа, или ино что за мирскую вину, или
камения собрание, да извержется, по осмьдесятому
правилу, иже в Халкидоне святаго собора. и по тридесят
четвертому правилу, еже в Трулле. мирстии же, да
отлучатся.
Священник от своего епископа за леность
некую и прегрешение отлучен быв, и дерзнет литургисати,
прежде даже будет испытано прегрешение его, и простит
ему епископ, да судится яко сам противо себе изнесе
осуждения изречение, по тридесят второму правилу, еже в
Карфагене святаго собора. Правило же сто тридесят третие
и четвертое тогожде собора, запрещению подлагает
епископы, иже отлучают кого без благословныя вины.
Аще кии архиерей приемлет праздна
священника от инаго архиерея, или причетника, и
сообщится ему, и литургисает, да будут извержени, по
второму надесять правилу святых апостол.
Правило тридесят третие, святых апостол
возбраняет приимати странныя священники без писания.
Такожде и седмь надесятое правило, еже в
Трулле, извержению подлагает епископа приемшаго
страннаго священника без книги отпустные, своего ему
епископа.
А по извержении явственных ради грехов
литургисавыи епископ, или священник, или диякон, конечно
да отсечется от церькви, по двадесят осмому правилу
святых апостол.
Аще кии от причетник съслужит ему, и той
да будет извержен, по 11-му правилу святых апостол.
Священник аще приимет жертву
еретическую, или крещает турчину детищ, или приимет
жертву его, или яко приемника детищу возмет и, или друга
жениха на брак, да извержется, по четыредесят шестому
правилу, святых апостол. кая бо часть верному с
неверным, или кое общение свету ко тме, по божественому
апостолу.
Правило шестьдесят четвертое святых
апостол глаголет. иже кто дерзнет внити в сонмище
жидовское, или еретическое капище еже помолитися, аще
убо священник есть, да извержется. аще ли же людянин, да
отлучится.
Святыи же Тимофей Александрийскии, в
девятой главе своих правил содержит. яко еже не приимати
еретика в церковь благочестивых помолитися. аще не
обещается покаятися. яко же бо преподобнии освящают,
тако мерзъцыи оскверняют. Правило же тридесят третие,
иже в Лаодикии собора, возбраняет с ними молитися, или
ясти, или приимати что от благословения их, сиречь
милостыню.
Правило же девятое святых апостол
повелевает, яко моляися со отлученными, аще и не в
церкви. ни в дому, да будет отлучен, и той такожде.
О тайнах пролияных
Священник аще по действу сопротивничу
пролиет святая, шесть месяц да есть празден, по
единонадесятому правилу святаго Иоанна епископа Китру.
аще ли самохотне пролиет я, да извержется. обаче должен
есть собрати святая добре, и стругав землю, идеже
падоша, да изнурит ю огнем, и водою. сиречь первее да
вложит ю в огнь, посем да ввержет в реку, или в море.
Священник аще литургисает, и низпадает
звезда с дискоса, да есть празден днии осм.
Аще случится святым даром просмрадитися,
и не может во снедение приятися, ниже съжещи достоит,
ниже поврещи, но с вином сладце устроити чашу, и
изнурити, сиречь снести.
Священнику искусившуся во сне, недостоит
литургисати в той день, кроме великия нужды. аще и
вельми безстрастен бысть, по тридесятому правилу святаго
Иоанна епископа Китру, и по второму надесять Тимофея
Александрийскаго.
В неделях, и в праздники завещавай не
делати, но приходити в церковь, яко же подобает
християном. аще ли кто делает в тыя дни, да отлучится.
Должен же есть священник в недели и в
праздники слово Божие проповедати, и люди о вере и житии
учити, по правилу 58-му святых апостол, и девятому.
Шестаго вселенскаго собора. не точию бо
молитися должни, но и слова Божия послушати. глаголет
убо в притчах, уклонивыи ухо свое не послушати закона,
сей молитву свою омерзил есть. аще же иерей не
проповедает слова Божия, и люди о вере и житии еже о
Бозе не учит. да извержется, по 58-му правилу святых
апостол.
Маслосвящение не бывает за канон, сиречь
за епитемию разве точию за недужных, по апостольскому
уставу.
Над умершим же маслосвящения, да не
дерзаеши творити отнюд.
Такожде и братотворения, да не твориши,
законопреступна бо суть сия.
Аще умирает человек, аще и яде да
причастится, точию исповесться, по девятому правилу
святаго Никифора Цареградскаго. беснуяися егда
изтрезвится от беса при смерти то да причастится.
Тело мертво да не приемлет причастия, по
осмьдесят четвертому правилу, еже в Трулле.
Аще кто сведе согрешающаго, и могии
возбранити греху а не возбранит, или обличен быв от
епископа, скры. толико время и той запрещен да будет,
елико же и грех сотворивыи, по седмьдесятому правилу
Великаго Василия.
Пристежение сиречь извещение
Сеже разумно да будет, яко иже людини,
или духовныи, иже от сожительства и пребывания вкупе,
сведят или слышат прочиих грехи и беззакония, вреды и
тщету творящих. тогда любовию исправления и спасения
ради ближняго, должни суть предстателем и старейшинам
известити, да препнутся от греха и зла оного, да убо
утаенныя грехи души не погубят, ниже падежа какова
наведут. но творяй грех, исправлен же сыи, да спасется.
Сие же Василии Великии глаголет в главе,
39. Всяко согрешение воспоминати подобает настоящему,
или от самого согрешившаго, или от познавших. лучше же
обличение со дерзновением крыемыя дружбы. ниже убо ин
иному да сокрывает, да не братоубиица вместо братолюбца
будет. А во Арменополи книга, 2. в главе 8. от Валсамона
о монастырех патриаших глаголет. християнин убо человек
должен есть, егда что слышит сбывшееся противное, да
речет сие общему духовному отцу и архиерееви, да
прегрешения душевная не пребудут не обличена и не
исправлена.
Знаменай
Не оклеветание се будет ниже осуждение,
но любовь и поболение, еже брата от греха избавити, и на
путь спасения исправити. точию не пред коим любо, но
пред старейшим емуже власть и начало есть вручено да
извещает, извещаяи же да будет покровен.
Должен же есть и друг друга воспоминати,
рече убо некто от отец, аще увидиши брата согрешающа, и
не речеши, да познает грех свой, от рук твоих взыщется
кровь его. аще же по обличении пребудет, он во гресе
своем умрет.
Василии же Великии в правиле
седмьдесятом. тожде сокрывающим грехи, еже и согрешающим
запрещение подает.
Иоанна Златоустаго от послания Павла
апостола к ефесеом, нравоучение, 18
Услышите молю, вси елицы не хощете туне
ненавидими быти. похищает, и не обличаешили, но боишися
ненависти, обличи брата, приими вражду любве ради юже во
Христа, любве ради яже к нему. возбрани ему в ров
отходящему, еже бо трапезы приобщитися, и глагол благих,
и привета, и приобщения, не зельныя любве есть. Таковыя
другом нашим даруем дары да душу их извлечем от гнева
Божия. в пещи злобы возлежащих их зряще, воставим. но не
исправляется рече. но ты свое сотвори, и дал еси ответ
Богу, не скрый таланта. сего ради слово имаши воздати,
того ради язык и уста, да исправляеши ближняго.
безсловесная бо токмо не печалуют о ближнем, ниже слово
некое имеется о безсловесных. ты же Отца нарицая Бога, и
брата искреняго, зря его безчисленая творяща злая.
благодатию же от онаго пользы ради прелагаеши ли; ни,
молю, ни единаго же есть презирати согрешающих братии.
видел ли еси враждующих, разреши [умири] их. видел ли
еси лихоимствующая, возбрани им. видел ли еси обидимыя,
заступи их. не онем но себе первому угодил еси. сего
ради друзи есмы да друг друга пользуем.
Тогожде от послания. к евреом в
нравоучении 30-м, глаголет сице
Аще увидиши друга блудяща, рцы к нему,
зла есть вещь юже дееши. несрамляншилися, ниже
чермнееши. зло се есть. той ли убо не весть, рече, яко
зло есть, ей весть, но от похоти влеком есть. и недужнии
бо ведят, яко студеное питие, зло есть. но обаче,
требуют возбраняющих.
Аще гневлива увидиши, аще лихоимца,
удержи, свяжи наказанием. се есть дружество. тако брат
от брата помогаем, аки град тверд будет. не бо еже ясти
и пити творит дружество. таковое бо имут и разбойницы. и
мужеубийцы.
Типик когда престают помины
В два надесято дневном. по Рожестве
Христове и во всю, 40-цу. и в светлую неделю, и в
недельныя дни, и в великия праздники, помины не бывают.
прочее же во все годище поминаются православнии
християне.
О вещех даемых в церковь
Сосуды златыя и сребряныя и завесцы
приносимыя от християн в церковь, да не дерзнет никто же
во свое употребление обратити. законопреступно бо есть.
и аще таковыи обрящется да казнится, по седмьдесят
третиему правилу святых апостол.
О еже не пити в церквах
В церкви пирове да не бывают,
законопреступно бо есть и се, и отлучаются сицевая
смеющии по двадесять осмому правилу, иже в Лаодикии
собора. и по 74-му иже в Трулле.
Ниже да стоят мужи со женами вкупе в
женском припрате, сиречь преграждении кроме великия
нужды, по тридесять осмому правилу святаго Никифора.
Мертвых погребати внутрь церкви
освященной не подобает. возбранибося. по девятому
правилу святаго епископа Китру.
О кричащих в пении
Недостоит пети велегласно, и естество на
вопль понуждати, но тихо, и со умилением, по седмьдесять
пятому правилу, иже в Трулле.
Иже приводит боляр, да исходатайствуют
ему от епископа священство, или некии сан, да
извержется, и отлучен будет, со всеми обещниками по
тридесятому правилу святых апостол.
О украшающихся
Правило же шестое надесять, седьмаго
собора, запрещению подлагает епископы, и причетники,
украшающия себе светлыми одеждами.
Матфей же в девятой главе, третияго,
стиха возбраняет верным украшати себе, или власы браде
стрищи, и вапсати [ушаряти] власы. или плести власы
главы своея, неповинующихжеся отлучати повелевает. се же
приводит от правила, девятьдесят шестое, шестаго собора,
иже в Трулле.
Аще убиет сам себе человек, ни поют над
ним, ниже поминают и. разве аще бяше изумлен, сиречь,
вне ума своего. по четвертому надесять ответу святаго
Тимофея Александрийскаго.
Прелюбодей, или явленыи блудник, не
приемлется в церковь, ниже приносы его, аще не оставит
греха. по тридесят девятому правилу Великаго Василия.
И брак законопреступныи, иже от сродства
не приемлется в церковь.
Аще не распустится, по распущении же,
яко кровосмешение сотворь, запрещаются, сиречь,
пятьнадесять лет да не причастится, по седмьдесять
пятому правилу Великаго Василия.
И четвероженец не приемлется в церковь,
аще не распустится четвероженьства. по распущении да не
причастится осмь лет.
Двоеженец не бывает поп, ниже клирик, по
второму надесять правилу Великаго Василия.
Собрание от различных правил, о иже кая
согрешения возбраняют быти священнику. и внимай си со
опасением, о друже. Возбраняет священьства аще
невозможет люди учити о вере и житии, по правилу 58-му
святых апостол.
Аще растлено есть отроча от кого, или
сам сыи отрок растлил иного отрока, или блуд сотвори с
женою, или с мужем, или со скотом, или с птицею, или с
женою си есть чрез естество. или жена его не бяше
девица, или обручен быв иною, или жена его со инем, или
двоеженец есть. или прежде венчания растли обручницу
свою, или прелюбодействова жена его, или сотвори
убийство, или клятся, или коня украде, или вола, или от
сосуд церковных, и от одежди украде что, и есть
святотатец. или разбойничествова, или бысть звездослов,
или волхв, или чародей, или гадатель воск льяи, и олово,
или превязуяи зверей, и скоты польския. или жен и мужей
ускопствуяи, или отвержется когда Христа, или ино нечто
сотвори от отреченных, да не смееши свидетельствовати
ему быти попу, ибо сожжен будеши и ты и он. и внимай
сим, елико по силе своей, да не наследиши вечнаго огня,
и будеши яко Июда. занеже предаеши священьство
недостойным.
Аще священник будет, падется во едино от
сих, да извержется, по пятдесят первому правилу Великаго
Василия.
Аще ли прежде рукоположения согреши,
телесным согрешением, и послежде обличен быв, исповесть
то, да извержется, по двадесятому правилу, иже в
Неокесарии собора. ино бо врачевство сицевии не имут, по
Великому Василию. аще подвигнутся яко и мертвых
воскресити.
Аще кто сыи отроча прият от иного
истицание в бедра, да запретится первее, потом да
освятится, по святому Иоанну Постнику. зане не бысть
совершенное падение, и не вниде педогонон [детородныи
уд] в афедрон. аще ли вниде, да не дерзнет священьство
прияти. не занеже согреши несовершен сыи возрастом, но
яко сосуд проседеся, и осквернение пострада, и бысть
неключим в священьство.
Такожде и он во ино лице истицание
творя, аще и не вниде педогонон его, аще и несовершено
бысть, возбраняется священьства.
Елицы держат епитемию покаяния, и по
разсуждению отца духовнаго не причащаются, тех имей сыны
духовныя, а иже не держат епитемию, отжени их. да не
погибнеши и ты с ними, чюждых сприобщаяся гресех, по
осмьдесят четвертому, и пятому правилу Великаго Василия.
Тако имей грехи исповедающихтися, яко же
бы были твои, и тако имей попечение да отвещаеши Богу.
сего ради убо внемли добре, да не усрамишилися кого и
убоишися. и впадеши в такову велику беду.
Внемли и се о взятии
Да не поищеши что когда, от
исповедающаготися, или словом или манием, да тебе даст
нечто. неключимо бо сие духовным есть отцем, паче же и
законопреступно.
О не хотящих епитимию держати
Оного иже не хощет держати канон свой,
да отженеши сего. аще ли приидет паки, и изволит
держати, приими его паки, и да положит начало, по
пятьдесят второму правилу святых апостол, аще ли не
хощет, остави его, не убойся убо. той сам понесет грех.
обаче должен еси наказовати его по своей силе.
Аще чия жена прелюбодействует, сей в
священьство приити не может. По рукоположении же
прелюбодействовавшую, или да отпустит, или да оставит
священьство, по тринадесятому правилу, иже в Неокесарии
собора.
Хотящаго священьство прияти, должен еси
истязати, и жену его со опасением. Никифора патриарха.
Аще от подложницы, или от двоеженьства, или от блуда
дети рождьшияся обрящутся достойны священьства, да
рукоположатся.
О возрасте лет рукополагаемых, во священство
Повелевает четыринадесятое и 15 правило
иже в Трулле. яко не бывает священник, прежде тридесяти
лет. а диякон, прежде двадесяти пяти лет. а поддиякон,
прежде двадесяти лет.
Аще ли прежде реченных лет кому степень
получити, то извержени да будут.
Аще и вельми достославнии суть. тем же
внимай духовниче, да не свидетельствуеши ему, аще не
будет совершен в летех. да не поставляетжеся неучителен,
по правилу по пятьдесят осмому святых апостол.
О иже кии подлегоша извержению и отлучению
Подобает ведати и се. яко аще падутся в
некия отреченныя страсти священницы, извержению токмо
подлежат, но не отлучению от причастия. ибо довлеет, им
осуждение извержения, по двадесять пятому правилу святых
апостол. кроме триех сих великих законопреступлении,
сиречь по мзде.
Иже на сребреницех рукополагают с
рукополагаемым да извергутся, по 29-му правилу, святых
апостол. и иных многих правил тожде являющих.
Пременяющеися епископы по умыслу, и
митрополиты, от малаго града в высочайшии. по первому и
второму правилу, иже в Сардикии святаго собора.
И хотящии прияти епископию, или сан, или
священьство, ходатайства ради княжеска, или болярска, по
тридесятому правилу святых апостол, в такова
законопреступления падшиися, излагаются и отлучаются,
сиречь изгонятся и от причастия.
Такожде подлежат извержению, и отлучению
чародей, сиречь волхв, и прорицатель, и звездочтец
священник, и хранительная подая, и превязуяи звери, по
тридесят шестому правилу, иже в Лаодикии собора.
Изгонитжеся и священник, иже не
постничества ради, но лицемерством мерзится брака, и
мяса. по пятьдесят первому правилу святых апостол.
Еще же да извержется епископ и иерей аще
не суть учительны, и ниже веры ниже жития людей учат, по
правилу пятьдесят осмому святых апостол.
О горниле, и о кладези
В жертовнице имей место не попираемое,
ключимое отлученное во едином угле, да умываешися по
божественей литургии, и помытие оное внимай, да не падет
вне, и попрано будет.
Такожде паки да имаши, иное место не
попираемое, на излияние великия святыя агиазмы, еже
остается от крещения, егда крещаеши детищь. ибо великая
есть та святая вода.
О еже како подобает крещати иерею
Отроча идеже крещаеши, да имаши тамо
купель покровену и чисту, или ин сосуд отлучен, и егда
влиеши елей в купель, яко же повелевает последование. и
возми масла стопкою треми персты, и помажи отроча по
всех удех. яко же сказует устав, и тогда вземлеши и
наго, и став просто, крещаеши в три погружения, глаголя
сице. Крещается раб Божии, во имя Отца, аминь. И
погружаеши и в купель. и паки станеши просто, возводя
отроча, и погружая вторицею в воде. и омочая подобне, и
глаголя. и Сына, аминь. И паки станеши просто, и
погружаеши третицею, такожде глаголя. и Святаго Духа,
ныне и присно и вовеки веком, аминь. Да и куплеши
конечне.
Таже взем от купели, даеши и приимцу
Посем глаголеши молитву святаго мvра, и
мажеши то по всех удех, яко же глаголет последование.
В купель же да не дерзнет приимец
прострети руку. да крестит отроча, законопреступно бо
есть сие, точию да приимет и от руку священническу. сего
ради и приимец глаголется, яко приемлет е от святаго
крещения, и бывает ему сын, да научит его благочестию и
житию добродетельному.
Глаголет пятьдесятое правило святых
апостол, яко священник не крещаяи в три погружения,
едино Отчее. другое Сыновнее, и другое Святаго Духа, и
сице не творяи в единой тайне, да извержется.
Кии паки второкрещаются.
Елицы не знают яко крестишася, от
пленения негли, или от инаго некоего недоумения и несть
никто же, да известит о них опасно, да крещаются паки,
по седмьдесят второму правилу, иже в Карфагене святаго
собора.
Аще же агарянския дети крещени бывше, от
еретик от кого, паки крещаются и тии послежде, аще от
произволения обратятся по истинне.
Второе крещаются, иже ложне творящеся,
по истине же не суще священницы, крестиша, по третей
главе, втораго стиха, еже в Матфеи.
А сии нужды ради
Обаче не второкрещаются, иже от
причетник, или от простца инока, или християнина некоего
православнаго, и по нужде не сущу священнику, то крещени
суть. но точию аще не рука еретическая бяше первее. Чти
правило, Никифора патриарха Константинопольскаго. и
Арменополь в канонех кратких, сечение, 4-е. титла, 2. и
сечение 5-е. глава, 1. и в книзе, 3-е. собор, 1.
О еретицех, кии второе крещаются, и кии
токмо помазуются божественным мvром. ищи в Матфеи за
множество, глав, 2-го. 1-го, стиха. идеже на концы,
сущих тамо правил. сице написася во оглавленне же рещи,
всех во едино погружение от инославных крестившихся, и
соборней приступающих церкви, паки покрещевати
божественная правила повелевают.
О пияных попех крестящих
Священник аще яде, да не крестит. понеже
и то есть, служба Божия. обаче сущей нужде да крестит.
Такожде и в великую четыредесятницу
крещати не подобает, кроме великия нужды.
Святое крещение прежде литургии должно
быти, даже причастится отроча на литургии. егда сицевое
случится время, сиречь кроме нужды, занеже с литургиею
должно быти. Имя же отрочати на литургии нарицается.
Аще несть ин поп. священник сам да
крещает свой детищ. крещает же и той, со инем приимцем.
Аще ли будет приимец детища своего. разлучается своея
жены, сиречь матере детищу. занеже быша себе кумове.
Такожде и сына своего женитву
благословляет, со инем другом жениховым аще ин несть
поп.
О духовнем сродстве
Аще муж и жена крестят единому человеку
дитя, повелеваем к тому не смеситися друг другу, понеже
кумове вменяются. аще ли совокупятся, имеют запрещение,
лет седмь надесять, и метании по вся дни сто, сухо ядуще
среду, и пяток. прощаяй же сих, да будет проклят.
О друзем сродстве духовнем
Два некая, иже не имеют кого сродника.
аще детца их един кум крестит, сиречь, от купели святаго
крещения приемлет, дети оны да не приходят в брако
причастие, до осмаго степене. понеже братия суть. един
бо отец роди тех духовныи святым крещением.
О возрасте начинающих исповедатися
Феодор Вальсамон патриарх Антиохийский,
в вопросе, 48. к патриарху Марку Александрийскому.
должни суть мужеский пол и женский, по шести летех
исповеданием исправлятися и освящати. в Матфеи състав.
О святой проскомидии, и колико просфир
имети должне еси
На святой проскомидии божественыя
литургии седмь просфир да имаши. первая, за Господьский
хлеб. вторая, Пресвятыя Богородицы. третия, за святых.
четвертая, за патриарха. пятая, за царя и за царицу и за
чад их. а где будет царево пришествие туто вымают по
имяном всем по просфире. шестую же за всех православных
за живых человек, ихже хощеши поминати. а седмую за
усопших, едину прямо со другою особно. кождо чином
своим, яко же в Служебниках указано и изображено имаши.
Обаче же да будет первая просфира цела,
да вымеши Господьскии хлеб, еже како разумееши, дати
довлеет на причащение. иныя же, да будут печати токмо
выняты, аще ли мног есть народ, да довлеет едина
просфира, точию болши народа ради на причащение. и по
причащении, вложи и Пресвятыя Богородицы часть, и иныя
яже суть печати вынятыя.
Аще ли литургисает с тобою диакон, той
части да не взимает. разве точию священник, по
апостольскому изображению, во втором правиле Петра и
Павла.
Достоит знати и сие, яко да не
благословляет рукою священник на святом предложении,
внегда глаголати ему молитву предложения, сиречь Боже
Боже наш, иже небесныи хлеб. по второму надесят правилу
святаго Никифора.
О святой четыридесятницы, и о всякой
среде и пятку, правило шестьдесят девятое святых
апостол.
Аще кто епископ, или презвитер, или
диякон, или чтец, или певец святыя пасхи четыридесятницы
не постится, или среды, или пятка, разве аще недугом
телесным возбранен будет, да извержется. людин же да
отлучится. смотри яко правило сие святую
четыредесятницу, и всякую среду и пяток равно
узаконоположи поститися, кроме немощи и праздников.
непостяижеся, священник убо да извержется, мирскии же да
отлучится, сиречь святаго причастия на время да
возбранится.
Цареградскии же патриарх Никифор, в
пятом своем правиле глаголет, яко от священника не
постящагося среду и пяток, не достоит причаститися. ибо
отчасти благочествовати, а отчасти нечествовати
безместно.
Великии же Афанасии глаголет, разрешаяи
среду и пяток, сей распинает Господа яко же иудее. ибо в
среду предасться, а в пяток распятся. разве точию в
богоявленских, и пентикостии, и в седмицы от церкви
разрешенныя, такожде в праздники разрешаяи неповинен
есть.
Иноцы же, и понедельник. да хранят всего
лета, яко же среду, и пяток, тако бо от отец прияхом.
Кое бо прощение есть иноку, егда не
преизбыточествует пост его, паче мирьских, наипаче же
егда и от мирян благоговейнии, сие хранят. глаголет же
святыи Симеон чюдотворец, во своем житии, да постится
инок на всяк день, и кроме общих постов, не мнее
девятого часа. тожде и вси отцы глаголют. о общих же
постех святыи собор, иже в Гангре, во осмом надесять
своем правиле глаголет. аще кто от подвижных инок кроме
немощи телесныя разгордится, и преданныя посты, хранимыя
церковию разоряет, сущу в нем свершенному разуму,
анафема да есть.
О навечерии Просвещения, и Христова
Рожества
А навечерии Христова Рожества, и
Просвещения, в онь же день случится, постимся, рыбы и
масла не ямы, точию пием вино. аще ли случится
навечерие, в суботу, или в неделю, повечерни ямы масло,
и пием вино.
День Христова Рожества и Прсвещения, аще
случится в среду, или пяток. миряне убо ядят мясо, иноцы
же сыр и яица.
Такожде постимся, и в день Воздвижения
честнаго и животворящаго Креста. в 14 септеврия месяца,
в онь же день случится, или в суботу, или в неделю. ямы
же в той день, бывшаго ради обретения честнаго Креста,
масло и вино пием.
О посте великия 40-цы
Во святую и великую четыредесятницу, ямы
единою на день, сухоядение, точию сочиво без масла. вина
же и масла в суботу, и в неделю вкушаем, такожде и от
черепокожных.
Рыбы же не ямы, точию в день
Благовещения, по божественым правилом, и в неделю
Цветоносия по церковным уставом, и разсуждению
искуснейших старец, и обычаю древнему в монастырех и
соборах християнских. аще же случится Благовещение в
великую седмицу, сиречь страстную не вкушаем рыбы, точию
масло и вино.
О великом четвертку
Но ниже в великии четверток, ямы рыбу по
50-му правилу, иже в Лаодикии собора. ядущии же рыбу, в
день праведнаго Лазаря, или суботы и неделя 40-ца, яко
же видим многих, сие творящих, суд себе имеют, и
запретятся своего им сластолюбия. како бо дерзают
разрешати, в таковыя дни. в ня же не повелевает правило
святаго Никифора, патриарха Цареградскаго.
О посте святых апостол, и Христова
Рожества. и Пресвятыя Богородицы
В пост святых апостол, и Христова
Рожества, и Богородица, сухо ямы, три дни, сиречь,
понедельник, среду, пяток, храним от рыб, и масла, и
вина, кроме немощи. ямы же сочива без масла, яко и в
великую четыридесятницу. хотящии же угодити Богу, в
суботу и в неделю токмо вкушают от рыб и масла.
О еже когда и где, разрешается пост, среды, и пятка
Ведомо же буди и сие. яко разрешается
пост среды и пятка, на рыбы всего лета, точию в
Господьския праздники, и Богородицы. аще ли случится
навечерие сим праздником, в среду, или в пяток, не
разрешается пост в вечер, утрешняго ради праздника, яко
глаголет священнейшии Иоанн епископ Китру, в двадесят
осмом своем правиле, в Матфеи. разрешаютжеся во всей
пятьдесятнице, среды и пятки, на рыбу, и масло и вино.
обаче же сухоядение, сицевых дней разрешается, но в 9
час. буди же на коегождо изволении. в праздники же
святых апостол, и святых мученик, и святителей, не
разрешаем на рыбу. аще случится в среду, и пяток, точию
на масло и вино, больше же ничто же. обаче по
разсуждении настоятеля невозбранно. рыбы же ямы, на
Рожество Предтечево. а в другии же еговы праздники
никакоже, точию масло и вино. такожде и в день верховных
апостол Петра и Павла. разрешаем на рыбу, яко же
глаголет святыи Феодор Студит, во своем уставе. о сем да
большая навыкнеши, паче же по времени месту. и лицем о
пищах разсудное устроение многих старец узриши. чти
слово 57 святаго Никона.
Когда должни суть причаститися право
живущии
Ведомо буди и сие, яко должни суть право
живущии, и среду, и пяток, хранящии всего лета,
причащатися пречистых таин, сиречь в великую пасху, в
день Христова Рожества. в праздники святых апостол, и
Богородицы. аще и сия посты хранят, и елицы достойни
суть, неподлежат канону. аще ли кто не хранит святых
апостол. и Рожества Христова поста, и Богородицы, в
церковь сего да не приемлеши, ниже чад его. аще не
воздержится от мерзскаго. блудник, два лета да плачется.
два послушая божественых писании. два припадая. и едино
стоя с верными без общения. во осмое же лето, прият
будет на общение [Василии Великии правило 59. выш. прав.
28, о тайных гресех]. женскии же пол от церкве не
отлучаем, но от приобщения удерживаем.
Созомен в книзе 7. глава, 16. Пишет яко
в западных церквах, паче же в Римской древле сохраняшеся
обычай сицев. Тамо бо явьственное бяше кающихся место,
стояху же в нем сетующе, таже плачющеи. совершенной же
божественной жертве не сподобльшеся причащения, их же
чистым и богочетцем леть бе причастися с плачем и воплем
себе ниц на землю помещуше. Тогда плача епископ притечет
и такожде на землю с рыданием падает, в конец же и все
церковное множество слезами омывается. По сих епископ
первее востает, и лежащих возводит, и елико довольно
есть, о грешницех покаяние творящих и моляся, тех
отпущает. особь же кииждо от произволения своего, или
пощением, или от умывания и брашен удержанием, или инеми
яко же повелено ему есть себе измождати, времене
ожидает, елико епископ заповеда. минувшу же уставленну
дню, запрещению аки долгу возданну сущу, от грех
разрешается, и народу в церкви присовокупляется. Сия
римстии попове, изначала даже в наша времена сохраняют.
дозде Созомен писа.
Различныя главизны собранныя от иного
Номоканона, о тайнах святых.
Священник аще по небрежению, пролиет
святыя дары, имать запрещение, лета три. творя на всяк
день поклон пятьдесят.
Вопрос. Аще от святаго потиря или от
святаго дискоса, пролиет что на землю, кое тогда
священник исправление подъимет. Ответ. Понеже ина слава
солнцу, а ина слава луне. а иже на землю пролиявшимся
святыням, есть различие. аще убо прежде херувимския
песни, и еже на святей трапезе предложения святаго
потиря. и святаго дискоса, случится некое таковое
прегрешение, лености будет истязание и малым запрещением
вещь исцелеет. ибо прежде жертвы святых молитв, и еже
теми совершения падшееся, тело и кровь Господня не
вменяется. аще ли же по освящении и совершении
божественых таин припадет зло. и святая убо со всякою
честию да соберутся, и место на нем же падоша, огнем и
водою да почтется и изменится. яко же выше написася во
155, главе. Поползнувыижеся, да будет истязан. и аще убо
от небрежения его, припаде зло, зельными запрещеньми, и
лишением литургии, да исцелеет. аще ли бесовскому
искушению, легчае казнь приимет. и невольное бо
согрешение, исцеления требует правильнаго. да не мнится
снискати лукавыи. удобною казнию подкрадуя,
священнодействущаго незазорное.
Вопрос. Аще по нерадению священическу,
агньца снеде пес, или иное ползущее. что должно есть
сотворити. Ответ. Священник да есть празден священьства,
плежущее скрыи под землю доле. Аще ли от зависти
диявольския бысть зло, да есть празден на время, яко же
изволится архиереови. яко же глаголет Нил сиречь Кавасил
Диррахийский епископ.
Вопрос. Аще падет некое ползущее, во
святыи потир, литургисающу ему, что достоит сотворити.
Ответ. Развали оное ползущее, и погреби е на сокровенном
месте. священник же да есть празден на время, яко же
изволится архиерею.
Вопрос. Аще священник пренебрежет
врученная ему святая, и от нечистых снедена будут.
Ответ. Да отлучится лет шесть. Аще ли литургисающу ему,
падет звезда от дискоса. да есть празден дний осмь. Кир
Симеона Солунскаго, о священстве.
Вопрос. Недостойне священнодействущаго,
прията ли есть жертва, и крещение, и от него бываемая
вся, или ни; или духовник быв, прощавает ли согрешения
многажды и не имея книгу или заповедь, убо ли суть
прощена от него. Ответ. Яко же не всех убо избирает Дух
Святыи, всеми же действует. прочее архиерей же и иерей,
и духовник имея служение. и всяк ин причетник, правильно
рукоположеный. Божий есть истинный раб, и спасению
человеческому слуга, и ангел Божий, и святыни
преподатель, и весь есть божественнаго просвещения, и
благодати. и мзду своея службы, тамо приимет многую от
Бога, паче же елико тщатель есть к божественным, и
неленостно к ним имея, ниже нерадивне прилежа, мнимаго
ради благоговения. несть бо говение еже праздну остати.
но аще точию правильне прият служение, да действует.
занеже спасительно есть ему, и всем верным, живым же и
усопшим. аще ли ни, слово о своей праздности даст Богу.
и сие глаголет богоявленныи Василии. Всяк же не[?] по
правилом рукоположеныи святитель. или священник, или
причетник, или духовнаго служения слуга, действует убо
рукоположения благодать, за приходящих спасение. и
когождо по вере приемлет. и ни един есть непричастен.
не[?] рукополагаемии от сих, рукоположени суть, и
разрешении от грех, или связании. разрешении суть, или
связании, и тайны же вся тайны. Не человек бо действует,
но сквозе орудие благодать. Горе же орудию оному, еже
чрез волю действующаго действует. и горе человеку оному,
призрителеви толиких. аще бо в дольних, и человеческих.
недаемая недостойне приемляи в себе, великаго достоин
бывает осуждения, яко тать сыи и разбойник. и дерзнутель
и хищник, и чрез достоиньства его пренебрегатель. кольми
паче осужден будет, иже в божественых и небесных
пренебрегая, и наипаче в самого Бога делех. и аще
причащаяися токмо недостойне, осужден есть. недостойне
же действуяи, кольми паче. и сия убо о приемших
рукоположение. иже аще прежде, и аще послежде согрешиша,
недостойнии суть вси. И аще покаятися, и спастися радят,
да престанут действовати, священьства святейшая дела,
исповеданием и плачем, Бога милостива деюще. несть им
иное что на покаяние, аще не прежде, престанут
священнодействовати.
Аще ли нецыи попущением Божиим в толикое
приидоша дерзнутие, яко еже неверне и злочестивне.
неверие бо есть вещь таковая, еже кроме священьства
прияти хиротонию, священная действовати. несть слово
рещи о осуждении сицевых. сие бо дело горше есть и самых
тех нечестивых бесов во ангела светла, точию
преобразующихся, безбожных же сущих и противных Богу.
таковии не токмо велие и неисчетное томление подъимут,
на божественыя от них, ниже божественая дела. понеже
благодати рукоположения не имут. но и месть приимут
иную, за прельстившихся от них, или негде крещенных, или
рукоположеных. сии бо не хиротонисани, ни крещени суть.
ни что же бо дает не имеяи. и ничто же приемлет что, от
неимущаго, аще и мнится имети. тем же и прельщен бысть,
и веруяи быти священник, или крещен, несть, и погибели
сих крестивыи повинен. не может бо человек имети не
прием от Бога. кроме бо Мене рече не можете творити
ничтоже. О духовнем же служении, подобен есть
согрешению, нерукоположне действующаго, и иже без
повеления и заповеди святительския действует.
И се да уведят и хранят епископи и
священницы, яко должни суть имети духовники, пред ними
же часто да исповедают помышления своя и грехи вся.
кроме же исповеди да не дерзают литургисовати. Аще бо
людином сие узаконоположися. и никтоже тайнам
божественным причастник будет не исповедавыися. колми
паче иерей должен есть сие хранити. Тогожде, аще случися
пролияти святая на входе. или снедена будут от некоего
животнаго, что сотворити подобает. Случаются сицевая, и
проливаются святая, паче же искушением лукаваго, и
невниманием священническим. священник убо ему же
случится пролияти святая, да исповесться прежде
архиереови, и потом довольныи да приимет канон. наипаче
же аще разделением сего, или невниманием случися, и
божественныя службы да возбранится на время. аще ли же
нужда и потреба есть священника на месте, воздержанием и
молитвою, и коленопреклонением, буди канон ему, да не
отнюд преткнется спасительное дело. во время же оное в
не же случися бывшее на святая. аще убо в храме, входу
совершающуся, излияся еже в потиру все, единение паки да
творит, и молитву предложения да глаголет, и тако прочее
от великаго входа, молитвеная да совершает.
Такожде аще случится пренесеный
божественый хлеб, от мышей, или от инаго животнаго
снеден быти. и неведыи священник, по входе же увесть, да
принесет ин хлеб, пресек обычне, глаголя пророческая
словеса, и елика глаголати и творити обычно, и молитву
проскомидии глаголати. таже наводит от великаго входа
молитвы, яже тайнейшии суть паче, яже первее убо речены
быша, очишение и моление имущая, и к священнодейству
устрояющая священника. пролияныя же дары должен есть
собрати в сосуд некии свят, и на месте священнем, и
известнем скрыти, да не будут попираема, или ино что от
неподобных постраждут.
Изрядно же место да будет, идеже по
причащении, священник омывается. еже должен есть
утверждено имети отвсюду, исчинено, и внимати да не
отпадет что отвне места онаго, и от помытия, понеже
свято есть, устне же от причастия освященная, и руце
умыи. и яко священ потирь, оно есть место, и помытие
свято. им же и исцеления яко же познахом бывают,
мажущимся от сего неким недужным, или испивающим. и
подобает сие подаяти просто. но хотяи испити, постен да
будет. такожде и хотяи помазатися должен есть омыватися
послежде, на особнем месте. или тамо идеже священник по
причащении омывается, или на твердейшем месте.
Пролиянная же святая, собрати должен
иерей благоговейно, с сущею тамо землею, и персти
останком. аще мраморие постлано есть, взяти е оттуду, и
на месте священнем, и особнем положити. аще ли велико и
недвижимо, да просек во глубину довольне место, идеже
распрострешася святая, и изнесено тамо положити на
месте, якоже рехом. но и просеченое место да измыет, аще
возможно. аще ли святая не вся излияшася, но часть оста,
да и другую приложь елико в потребу, свершит яже
священнодейства. Аще ли святая на одежду излияшася. аще
убо прежде совершения, честная же суть и многоценная,
особно в сосуде священнем омыеши довольно, яко да
ничтоже останет во одежде. омытие же влиеши в место
священное, и утверженое, яко же речеся. Аще ли по
совершении излияшася, по всякой нужде, да отрежется
часть оноя священныя одежды. и божественныи покров да
будет измовен, и той на особне месте. идеже и священныи
потирь измывати мощно, и губу наполнившуюся гноения, и
молия, и священныи покров. и сия омывати во время свое,
точию в твердем месте благоговейно, а наипаче во еже
добре имущии и твердо, глаголемей умывальницы несть
вред, но паче боголюбезно. в честь и красоту, Божиих
священных сосудов. обретаем бо и в ветсем учинении. яко
великая церковь имеяше некую калпу, сиречь умывальницу,
в ней же священныя омываху чаши теплою водою.
Тем же внимати должен есть священник,
всем святостем, и священному преданию прежде священных,
и соединению животворящия крови, и божественныя плоти.
яко еже на скрижали чисто, и твердо имети, с чистым
утвержено платном и честным. то бо есть божественое
тело, и кровь Владычняя, и поклонятися, и кадити, и
почитати подобает всем прилежанием. и горе к востоком
над божественою трапезою поставлены имети, и призирати,
да не случится некое нерадение, от неподобающих.
Аще не сотворит священник соединения
Аще по забвению священническому
случится, не быти соединению, и покрыет празден потирь.
аще убо в входе увесть, абие на трапезе соединение
сотворити должен есть, и молитву рещи, и тако литургию
кончати. Аще же не внят, и литургию соверши, внегда же
хотети причаститися, сие позна, должен есть соединение
сотворити, и молитву рещи предложения, и изначала паки,
яже от великаго входа молитвы глаголати, и призыванием
Святаго Духа, точию потирь запечатлети, и прочая
скончати, и тогда причаститися.
Тако аз о сем помышляю праведно быти,
сотворити священнику. аще и иным изволится архиереом
Христовым, сие быти ключимо. паче же великому собору,
занеже не будет совершено, не приемшее молитв, и печати
и призывания Святаго Духа, и в божественую кровь не
преложится, и не обрящется тамо тогда. еже бо священно
действоватися. и молитвы от священника и печать прияти
бывает.
О рукоположении правило двадесять девятое святых
апостол
Аще кии епископ за сребреники
достоинства сего приятель бысть, или презвитер, или
диякон, да извержется и той, и рукоположивыи, и да
отсечется общения всячески, яко же Симон волхв, от мене
Петра. правило, 30-е. аще кии епископ, мирския князя
поем, тех ради держатель будет церкви, да извержется, и
отлучится, и сообщающииися ему вси. Толкование, от
Валсамона. Сия два правила, 29, и 30-е, не точию
низлагают, но и общения отсецают, иже сребреник ради,
быша епископы. сиречь отлучают. или презвитеры, или
дияконы. и тех иже ради княжескаго предстательства, быша
епископы. благодать бо Всесвятаго Духа, продаема несть,
рече.
Послание же, иже во святых Тарасия
патриарха Цареградскаго, к Андрияну папе Римскому
глаголет. легчайши паче есть Македония, и от него
духоборец злочестивая ересь, нежели продати дерзающии,
благодать Всесвятаго Духа. тии бо убо тварь, и раба,
Богу и Отцу Святаго Духа буесловят, сии же своего яко же
мнят [разсудити] раба Того творят си. иже бо кто нечто
продает. яко владыка его продает. и купуяи, владыка быти
хотяи купующаго, сребром сего стяжав ценою. прилагает
же, яко сих согрешение равно есть Июде предателю, тако
смышляющих. аще бо единосущен Сыну Дух есть, и
единочестен, осуждается Июда, Сына продаяи на сребре.
нужда есть негли и Дух Всесвятыи продающим, не менши
оного казни подъяти.
Окружное же послание Генадия патриарха
Цареградскаго со инеми и сие содержит. буди убо, и суть
отлучени. и всякаго священническаго достоиньства чюжди,
и проклятию анафеме подлежат, и даяи и приемляи, не
продаемую благодать Всесвятаго Духа. и иже стяжати
священьство за сребро мнит, и сие подаяти на сребре
обещаваяи. аще причетник, аще людин есть. любо
обличается, любо не обличается сие сотворь.
Вопросив же некто яко тридесятое
правило, точию воспомяну епископа. такожде и двадесят
девятое, поддияконы же не воспомяну, или четца. Вопрос.
Аще презвитер кто будет, или диякон. или поддиякон, или
чтец, предстательства ради князьска, или поддиякон и
чтец, даянием сребра, что должно быти. Толкование. И сии
извергутся, и отлучатся, от конца настоящаго правила,
глаголющаго. не токмо первовиновников злу низлагати, и
отлучати, но и приобщающихся им. И послание Генадиево.
не точию священыя, но и людины, иже таковое злое
сотвориша, проклятию подлагает.
Правило 2-е. иже в Халкидоне, собора 4-го
Аще кто епископ, сребра ради
рукоположение сотворит. и непродаваемую благодать, в
продание низведет, и рукоположит на сребре. епископа.
или презвитера, или диякона или иного кого, в причте
счисляемых. или произведет на сребре, иконома, или
екдика, или панрамоанария. или кого любозаконных
причетников ради сквернаго прибытка. сие начен, и
обличен быв, да приимет беду о своем степени. и
рукоположенныи, ничтоже от купленаго да пользуется
рукоположения, или произведения. не[?]буди чюждь
достоиньства, или правления, еже на сребре получи. Аще
же кто и ходатай явится, сице скверным и нелепым
взятием. и сей убо аще причетник есть, своего да отпадет
степене. аще ли людянин, или инок, да будет проклят.
Правило 22. шестаго собора
На сребре рукополагаемых, или епископов.
или коих любо причетников, а не по искусу, и жития
изволению, изврещи повелеваем. и рукоположивших сицевыя.
Правило пятое, седьмаго собора. и тех иже злата ради
честь некую улучивше добродетельми чести сподобльшихся
уничижают, томужде суду подлагает. Великии же Василии, к
сущим под собою епископом пишет, яко еже не хиротонисати
на сребреницех, со инеми и сие глаголет. Непщуют нецыи
не согрешати. занеже не абие взимати, но по
рукоположении. взяти же есть, еже что любо взяти. молю
убо сия приходы, паче же приведения в геенну, отложити.
и да некако руку осквернивше, сицевыми прияти, себе
недостойных сотворити, еже совершати святыя тайны. В
книзе же деянии написано. видев же Симон, яко
возложением рук апостольских, дается Дух Святыи, принесе
им сребро, глаголя, дадите и мне власть сию. да на него
же аще возложу руце, приимет Дух Святыи. Петр же рече к
нему, сребро твое с тобою да будет в погибель, яко дар
Божии непщевал еси сребром стяжати и прочая. Аще кто
даянием злата, епископ или причетник будет, или
странноприимец, или больничарник, или правитель
светлому, некоему дому, или иному некоему церковному,
промыслитель служению, и давыи и приемыи,
исходатайствовавыи священьства, или причта, и ввереннаго
правления, да обнажится. зде добре бы было перси биюще.
болезнено возопити. аще беззакония назриши Господи,
Господи кто постоит. кто бо есть, иже правление светлому
дому, или службу некую церковную прият, или причетник
бысть, или монастырь объят без некоего даяния. аще бо
всеми сими, дающими же, и приемлющими беззаконно, в
последних священная правила почитаются, паче же
уничижаются, кая нам спасения надежда, не отступающим
всех сих общения.
Святаго Никона от послания к Енклистию
Веждь убо отче мой, яко божественая
писания, с божествеными канонами определяют, яко
неправедно налагаемая запрещения, у Бога не связуют, аще
я и архиерей положит. кольми паче аще меншии. яко же
глаголет святыи Дионисии. Иже убо неразсудным
изречением, и невоздержным сердцем от верных кого
отлучи, сего не токмо не коснуся, но и на главу его
возвращается, яко же и святии соборы провещавают, не сия
запрещения связуют, яже по божественым правилом и
законом наложишася, а не по своей воли. безсловесне бо
казнь налагаяи, сам отлучается, и сам сию казнь должен
есть соблюдати, яко же божественнии и святии правила
усмотряют.
Такожде Великии Петр к Клименту. ты убо
свяжеши яже достоит связати, и разрешиши яже достоит
разрешити.
Глаголет бо и святыи патриарх Николай
Богом произведеныи. Имут бо архиерее власть запрещати и
решити, яко же и святыи собор определи, яко закон вязати
и решити от Бога приемшии. Аще убо архиерей чрез волю
Божию кому запретит, Бог ему не последует, и се
обретается запрещение его неправедное, и сего ради
некрепкое.
И о священьстве рече Господь Петру. яже
свяжеши на земли, будут связана на небесех. виждь силу
глагола. Не рече яже свяжеши на земли, будут связана на
земли, но на небесех, да отлучаяи, или налагаяи, или
возбраняяи, вещь быти страшную мнит, аки Бога, ко общему
с собою изречению призываяи. сиречь, под свидетельством
сущаго на небесех сие творя. и низлагаемыи боится, аки
вне царства небеснаго изгоняется. Виждь рече, еже
твориши о иерею яже доле связуеши. сия мни яко горе
написуются. Несть от издания словесе свободен соуз, аще
неправедно свяжеши, на суде ангелом указати имаши. аще
не гневом, или смущеным сердцем соуз нанесл еси, аще не
себе отмщая. Бог бо неправедно связаннаго возбраняет и
отмщает.
Отлучая же кого от церкве, прежде нежели
вина явится по правилом, разрешается от большаго
архиерея, сам же отлучится. да еже неправедно сотвори,
праведно претерпит.
Симеона Солунскаго
Всяк отлученыи, или безсловесне яко же
сему мнится или законне, да не пренебрежет отнюд. ниже
судия сам себе да будет, ниже инако сам да прельщается,
яко не касается ему. но усердно к запретившему да
преступит, с душевным смирением и сокрушением. Аще ли не
приемлет запретивыи. по еже приходити многажды, со инеми
благоговейными к большему архиерею да идет, и тогда ищет
прощения. не на запретившаго же ходя, но смиренне и
благоговейне ища прощения. да будет и разрешение по
словеси, и не оскорблен запрещеныи отпустится. да
некогда в правду оскорбится. ин бо рече, суд человечь, а
ин Божии. А яко же не подобает, аще кто и неправедно
страждет, самого себе отмщати. собору же не возвещати,
научает всех, повесть сия. яже есть во Арменополи.
книга, 3-я, соборная.
Егда господин Николай Музалон реченныи
Амиклийский епископ, по нужде от местников пострижен
бысть, и много моляшеся. да по нужде на нем бывшее
изнесется. и да паки действует епископская. Святейшии
оныи патриарх Лука. видя сего оболчена в епископская и
на собор пришедша, не прият и, глаголя, яко аще бы
соборнаго изречения и исправления ждал епископ. обрел бы
убо правильную помощь. а понеже по нужде возложенная
нань иноческая одеяния безчинно отложи, и самомстителен
бысть, не улучит помощи.
Но святейшему патриарху сему
преставльшуся ко Господу, иже по нем святейшии патриарх
Михаил, по нужде убо бывшее стрижение. яко же небывшее
вмененое упраздни, епископа же яко пренебрегша, и самого
себе оправдивша, временнаго нелитургисания запрещению
подложи.
Такожде и сам себе отлучивыи, или
прокляв наглостию и яростию, или отвержение на Бога
изрек, должен есть со слезами и сокрушением. ко архиерею
изряднее приступити. или сему несущу к духовному некоему
отцу искусну, известити и прослезитися, и прощения
просити, и молитву и дела покаяния творити. и не просто
к таковым належати, ибо многое есть осуждение. иначе яже
от слова, а иначе яже от дел согрешения судятся.
Тем же рекии от ярости словом единем
нечествовати, священник сыи, и не сотворив, осуждается
убо, и священства возбраняется на многое время, и не
подлежит извержению, за еже не соверши дела. занеже о
иночестем образе написаша отцы.
Яко аще некто поучится поврещи образ, и
не поверг предварит умрети, со иноки будет. яко же и
людин с людины будет, аще поучився точию инок быти, и не
постиже. В нем же бо кто постиже быти, и есть и судится.
обаче канона требует тяжчайшаго, и праздности велия.
О священницех
Священник, и диякон, или кой любо клирик
действуяи, да хранится от бесед женских, да сокровище
душа своея некрадомо по четыредесят первому правилу
святаго собора, иже в Карфагене соблюдет, да
похвалитжеся о девьстве своем, и не возносится, и не
уничижает посягших. да не погубит еже имать, по рекшему.
Иже имать возмется от него. и сего ради
да не будет проклят, по девятому и десятому правилу
собора иже в Гангрех.
Священик позван быв на праздник от кого,
и не имея подобнаго времене отъити и благословити, да
благословит, или диякон, или чтец.
Ибо Господь наш Исус Христос, многим
апостолом священьства не имущим, повеле крестити.
Священник ловец, да отлучится от
литургии, месяц шесть, и да творит на всяк день поклонов
двесте.
Священник за причащение святых даров,
приемляи злато, или сребро, или яица, или иное что, да
извержется. яко лютейшии суд подъимет нежели Июда, иже
на худей цене Господа продаде.
Священник, млеко или мед, или сыр, или
животная, или сочива во олтарь принося. разве точию
гроздие. масло, свещу, и фимиян, да извержется, по
третиему правилу святых апостол, и по осмьдесять
девятому, иже в Трулле.
Аще кии священник литургисав, и от
чревообъядения изблюет в той день, да не служит, дней
сто, творя на всяк день поклонов тысящу. аще ли от
соумереннейшаго случится быти сие, пол сих да имать.
Аще ли священник изблюет алчен, или
истечет кровь из ноздрей его, или от зубов, не может
литургисати в той день.
Вопрос о священствиих
Аще кто единою соблудив, восхощет быти
священник, прежде престав сицеваго греха, может ли
рукоположитися, или ни. Ответ. Аще и мертвых воскресит.
рече Великии Василии, священник не будет, ибо священное
неблазнено есть.
Осквернившиися литоргисающии священницы,
аще и не страждут зде в наказании. но тамо ожидает их
вечная мука, аще не престанут литургии, и грехов не
покаются достойне.
Недостоит священнику одежду краткую
носити, но даже до кости долняя, и со страхом и
прилежанием хранити вся, священная церкви литургии, ниже
паки неизмовенное одеяние носити, во святом олтари.
такожде завещает правило, 27. собора шестаго иже в
Трулле.
Вопрос. Аще священник измыется, может ли
в той день священьствовати. и людянин по отшествии в
баню, отлучитлися в той день божественых причащении. и
сопротивне. священно таиньствовавыи иерей, или людянин
божественых святынь. сподоблься измытися, или жилу сещи
может ли или ни. Ответ. Иже в врачех, всеучительныи
Галин. баня рече, и солнце, и обучение, на движение
устремляют, яже прежде безмолствующая избытки. тем же
ничтоже будет, о них же вопросил еси. и сечения бо жилам
обличают, яже сих злобы и свойства, по Иппократским
книгам. иногда убо раждают разседение, иногда же паки
твердыню. вскую же чаемое негли зло, спасительному таин
причастию да совокупим, и разленением, свет нашего
спасения покрыем. идеже священно действующих, праведное
понуждает слово, и прежде священства и после, со всяким
умилением и говением, колена прекланяти к Богу, и
благодарити за Господняго тела и крови причащение, а не
дрочитися разленением, и кроплением теплых вод. аще ли
посечением жил понуждает смертныи недуг, за спасение
больнаго да будет.
Вопрос. Аще кто изблюет по божественом
причащении, по коему исправится преданию. Ответ. Храняи
рече, преподобне преподобная, и преподобен будет, и
освятится. предаяи же благодать, сквернен будет. аще убо
от невоздержания поползеся в блевотину, божественых
святынь причастивыися, зельными запрещенми исправится.
аще ли же за припадшаго негде недуга озлобление. по
епископскому разсуждению, легчае запрещение приимет. и
сие бо есть дело оставления.
Вопрос. Без антимиса за скудость, мощно
ли священно действовати. Ответ. Отнюд несвященно
действовати, ниже стриморфом. ибо вина сатанинска есть.
еже не взимати икону в пусто место.
Вопрос. Елико аще крещают несвященнии,
мужие же и жены. или иноцы, что достоит творити. Ответ.
Аще умрет крестивыися, прежде нежели постигнути
священнику, божественая благодать совершает и. аще ли же
жив будет, да паки поставит и священник в купель, и
молитвы и мvро по обычаю творит. то же и Никифор
патриарх Цареградскии глаголет.
Вопрос. Аще разболевся священник,
причастится от инаго священника, возбраняет ли ся
священно действовати. Ответ. Не возбраняется Никифора
правило, первое надесять, не грешно едину проскомисати
просфиру о трех человецех, или едино вжизати кадило.
Вопрос. Может ли священник едину токмо
имея просфиру. и во ином простом хлебе сотворити кресты.
и изображения. и от тех приносити. Ответ. Сие ниже
правильно есть, ниже написан обычай церковныи. тем же и
сотворивыи то священник, возбраняется священства, во
унареченное время.
Вопрос. От укруха хлеба, может ли кто
литургисати. Ответ. Тожде речеся, и о творящих агньца со
укрухом хлеба, си речь взимающих печать с малостию хлеба
за скудость человек, еже снести. не укрух бо хлеба прием
Христос, рече. приимите и ядите, сие есть тело Мое. но
совершенныи хлеб, яко же бо совершен есть Бог, и
совершен человек, и совершена плоть Его, ибо и древнии
обычай, и закон есть. сего ради и хощет, совершенаго
всецелаго и чистаго хлеба. аще ли же есть скудость
человеку, сотвори малую печать, или просфиру, и довлеет.
Вопрос. Может ли священник литургисати
хлебы благословеными на велицей вечерни. Ответ. Ниже сие
есть церковныи обычай, ниже обретеся кто когда сотворь
сие, сего ради и вы да не творите.
Вопрос. Аще достоит приносимая в
церковь, сиречь, просфиру и вино, неразсмотрительне ясти
священнику, и яже хощет. и яко же хлеб общии, должен ли
есть снести. Ответ. Еже убо воздвиженыя укрухи, никако
же. но в церкви точию ясти есть, аще вся иждивут. а яже
излишняя онех, не с млеком и сыром, ни с яицы и рыбами,
но опроче и особне, благочинно потребляти.
Воньми же в настоящем ответе содержимым,
и плачися како пренебрегомо есть от всех то кольми
священник, иждивение невозносимых просфир. мнози бо и с
мясом ядят я. и ино образно обще творят.
Чрез всю великую четыредесятницу, в
постныя стихари и фелони да облачаются священницы, и
диякони. кроме Благовещения, и Цветоносия, и Великия
суботы, тогда бо в белыя облачатся.
Правило иереом, иже не облачаются во
освященныя ризы. или неразумием, или гордостию, или
леностию
Стихарь есть правда, а фелонь истинна. и
прииде правда с небесе, и облечеся во истинну, Слово
Божие облечеся в плоть, и неразлучно пребывает. ты же
брате изволил сан иерейскии, не разлучай стихаря с
фелоном, аки Христа во двою естеству. слыши Господа
рекша учеником, шедше научите вся языки, крестяще их во
имя Отца и Сына и Святаго Духа. учаще я блюсти вся елика
заповедах вам. и паки рече, тако нам есть лепо исполнити
всяку правду. виждь како ти рече блюсти все и исполнити.
Павел рече, облечетеся во вся оружия Божия, яко
избраннии Божии. и Давыд рече, иереи Твои облекутся в
правду, и во отец твоих место быша сынове твои. и
поставиша я князя по всей земли. во Авраамовы чада
место, апостолы постави. во апостол место святыя отца,
архиепископы и иерея.
Правило святаго Иоанна Милостиваго, поучение попом
И се паки некто иерей от церкви Иоанна
Милостиваго. начат служити вечерню без стихаря. видев же
Иоанн Милостивыи, повеле изгнати и. и иному иерею повеле
служити вечерню. и неколико дней пребысть не служа, и
призва архиепископ рече ему. чадо ведением ли се
сотвори, или неведением, или леностию или величаяся. и
рече поп, владыко неведением се сотворих. и рече ему
Иоанн, аще бы ведая се сотворил или величаяся или
леностию. то отнюд бы тя извергл из поповства, но да
простит тя Бог. и служи яко иерей Христов, в стихаре и в
фелоне. на вечернях и заутренях, и кресты нося. како
соблазнился еси отлагаеши начало иерейству. поставлен
еси прежде в дияконы в стихарь, и потом ти фелонь
возложен. како главы не храниши, а поконцыся держиши.
начало иерейству отверг дияконство, и всего причта
священническаго яже о Христе. и раздираеши ризу от ризы,
яко он первыи злодей ризу раздра. жидовьстии же воини
разделиша стихарь Господень. слыши Господа глаголюща, Аз
есмь начало и конец. и паки рече испытайте писания, яко
в тех имате обрести живот вечныи, и та суть о Мне
послушествующа. и рече поп, владыко, большия видех попы.
тако творяща. и рече Иоанн, и аз веде же. яко вы творите
богатыя и величавыя попы большими, тии же у Бога хуждьши
суть. а хуждьшии же в веце сем, и работающеи Господеви
со страхом, в будущем веце вышши будут. слыши Господа
глаголюща, не приидох да ми послужат, но да послужу. и
кто в вас хотяи быти болии в царствии небеснем. буди
всех меньши и всем слуга. и то рек, отпусти его с миром.
О иеромонасех, еже о священноиноцех
Аще кии священноинок падется в блуд, да
престанет литургисати, каяся три лета, и поклоны яже
обычно творят иноцы, да усугубит. и тако да будет прият
к причастию, но не священнодействует.
Вопрос. Аще подобает по вине извержену
бывшу священнику, или волею священьство оставльшу.
зазревшу же себе, предглаголати. благословен Бог наш. и
Боже ущедри ны. и Христос истинныи Бог наш. или кадити
кадильницею. или причащатися внутрь олтаря. Ответ.
Никако, ибо в простолюдин место учинен будет. аще кии
священноинок во истицание падется, да не литургисает в
той день. аще и великая нужда есть. Аще священноинок со
инокинею падется, да запретится лет девять, поклонов
пятьсот на всяк день, и сухоядение, кроме субот и
недель. аще ли сей великаго образа будет, да запретится
лет дванадесять, и поклонов тысяща, на всяк день. и
прочая вышьше написана. Священноинок опився и изблевав,
да не литургисает лето едино, и поклонов триста на день
творит. аще ли литургисав, от объядения изблюет. лета
два да не причастится. Инок в баню отходя, и помазуяся
помазанием. или на всяк день мыяся, разве точию за
немощь. аще убо священник есть, да не литургисает лето
едино, поклонов пятьсот. аще ли послушник есть, пол сих.
Вопрос. Имать ли власть духовник
священноинок держати мирских прихожан. Ответ. Сие дело
безчиния есть, яко же глаголют священная правила. ибо
духовник должен есть сидети в своей келии, и правити си
правило.
Аще ли обязуется сицевыми самовольно,
кроме нужды учительства, и спасения ближняго. и паче же
аще не повеленно ему на се от архиерея. сей несть
духовник, но телесныи купец, корчемствуя благодать
Святаго Духа.
Вопрос. Подобает ли священнику
благословити женитву. или отроча крестити, или дати
роженице молитву. Ответ. Священноиноку убо, аще и
духовник есть, но не подобает благословити женитву.
крестити же человека, яко иерей имать власть,
невозбранибося в нужду, даже до сего токмо.
Вопрос. Коликих лет должен есть имети
дети, хотяи быти духовник. Ответ. И сие святии отцы
уставиша, аще есть добродетельныи, и тщателныи в
духовных чинех, должен быти повышше четыридесяти лет. а
ниже сих лет, аще видиши кого духовника, не имей его
духовника. ниже дерзай ему что исповедати, ибо диявол в
нем ликует. и уязвляется на всяк день, и не познавает,
сокровищуя себе вечныи огнь. аще и скопец есть, но
сердцем на всяк день блудит.
Вопрос. Аще достоит быти духовнику
мирскому сущу священнику благоговейну старцу, имуще
подружие. Ответ. Сие несть возбранено. аще токмо есть
благоговейныи, и добродетельныи вельми. обаче зде со
отлучением, возбрани сие. всесвятейшии наш владыка
вселенскии патриарх, не менше быти, от прежде реченных
лет.
Вопрос. Аще суть иноцы священницы
неискусни слову, во еже приимати помышления. друзии же
несуще священницы, знают сей искус, достоит ли сицевым
помышления приимати неких, или ни. Ответ. Иже помышления
приемлют, врачев искусных чин содержат, знающих на
недужных подобная наводити былия. Аще убо кто есть
священник, неискусен же. а другии несвященник, искус же
имея духовнаго деяния. сему паче священника, праведно
есть помышления приимати. и правильно исправляти. обаче
иже не суть священницы иноцы, паче же неискуснии.
приемлющии же неких помышления, и связующии и решающии.
да знают, ибо не по правилом сие творят. и ни во что же
есть. яко святии отцы ниже священником изволяют без
повеления архиерейска примирити кающихся. яко же шестое,
и четыредесять третие правило, иже в Карфагене собора
изъясняет.
Вопрос. Достоит ли несвященному иноку,
или освященному исповедания человеческая приимати
самовольне, или ни. Ответ. Ко богопроповедником рече
Господь апостолом, вы есте соль земли. и елика свяжете,
и елика разрешите на земли. разрешена суть на небеси.
тем же от божественых отец наших узаконися, даже
исповедающимся примирителе бывают епископы, приемшии
апостольское место от Бога. освященныи же инок. множае
паче несвященныи, чрез волю епископскую Богови примирити
не может исповедающагося. елицы убо суть освященнии, по
повелению епископа исповедания человеческая да приемлют.
несвященному же иноку, наказание его искусства, дает
власть примирения. аще убо себе самого безбедно
соблюдает, и исповедающихся, Богови да примиряет.
Зерцало духовнику, из Номоканона есть от правил Иванна
Постника. Подобает же убо приемлющему исповедания,
смотряти и юность и силы старости, и места различие, и
нрава им же лукавое содеяся. и аще с советом и
предумышленне, или случаем бысть. и аще от вина, или от
сытости, или инако, но или страхом или нуждею, или
нищетою, и прочая сим подобная. послушаяи исповедания.
должен есть испытовати и час и место и житие, и
мудрость. такожде и сокрушение, и срам и печаль, и
страх. и веры благопостояние, или непостояние, и
милосердие. такожде и наказанна и невежу, богатаго и
нищаго, раба и свободнаго, благороднаго и безродна, и
воина. и иже священное восприят одеяние. и иже в сих
объумирает. такожде и презирателя. и безстуднаго
могущаго смиритися. сия вся истязовати должен есть
послушаяи исповедания. и сице казни, сиречь епитемии
налагати.
О иноцех от собора второперваго. правило второе
Понеже нецыи иноческим житием облещися
образуются, да не Богови чисто работают. но да
честностию образа одеявшеся, славу наследствуют, да
самовольне своих отсюду сластей обрящут восприятие.
власом бо точию отложение сотворше во своих домех
приседят, ни едино же иноческое исполняюще последование
или устроение. повеле святыи собор, никому же во
иноческии образ достойну быти одеятися, кроме старца в
послушание его приемлющаго, и спасти его могущаго. за
еже яко во игралище, в такии святыи и ангельскии образ
облечется. сицевии убо да будут правилы мучимы,
запрещеньми довольными аки хульницы имени Божия.
Во святыи убо и ангельскии образ
одеявшиися, и в монастырех живущии, под руку Божию
первее, таже игуменску, ни словом имут именовати, твое
или сего, или оного. аще бо и пятьтысящь суще мужие
мирстии, яко же написано есть в Деянии святых апостол. и
никто же от имении своих глаголаше что свое быти. но
бяху им вся обща. кольми паче во общине живущии. не суть
должни имети своя вещи, и особная попечения неполезная и
вредная. ниже да будет посреде их, мое и твое, или сего,
или оного, идеже бо суть от плевелосеятеля диявола, во
обще житиих возрастаемыи пекул, несть лепо нарицатися
общая жития, но разбойническая сонмища, святотатству, и
всякой злобе, и лукавству делателища. сего бо ради
нарицаются общая жития, да вся обща имут. и да по
повелению, по Бозе наставляющаго их повинуются, единем
мудрованием покаряющеся тому, и послушающе во благое, и
тако достойно живуще, обрящут упокоение и спасение
вечное.
Ведомо же буди, яко от игумена яко же
иная вся благая. сице и обще житие начинатися имать. той
бо прежде и имение свое и волю свою отложити должен, да
братию в тожде повинен. аще бо будет свет тма, то тма
кольми.
Аще кии инок без повеления игумена
своего, сотворит что от нуждных, не к пользе, но к своей
его страсти, должен есть игумен испалити то, и тако
благословити брата, да начнет другое дело. сие же
сотворит, аще тем пользовати брата. аще же ни,
жестосердие разсуждением да мерится. Аще кии инок без
вины благословныя и разсудныя прекословит игумену
своему, да отлучится от обители, аще и вельми есть
разумен, отгоним есть отнюд. яко же красту имущая во
скотех, едина, от сих отгонима есть, да не окраставеет
все стадо. аще бо старейшии суть прекословцы,
преслушателие, како послушанию, и смирению, и терпению,
научат новоначальных.
Аще кии инок вземся на игумена своего, и
досадит ему. да запретится лето едино, и поклонов тысящу
на всяк день да творит.
Аще кии инок в руку свою взем древо, и
уязвит игумена своего, да отсечется рука его, понеже
отцеубиица бысть.
Аще кии инок в коем любо словеси ко
спасению его изглаголанном прекословит игумену своему, и
противится ему, яко соперник Божии обретается. и да
уцеломудрится от общаго совета запрещенми.
Аще кто от инок идет в некии путь без
повеления игумена своего, да отлучится братства, седмицу
едину, творя поклонов тысящу.
Аще кто от инок тайно яст, кроме
братства, да отлучится две седмицы, творя поклонов 1000
и пятьсот.
Инок ядыи от плода новаго без
благословения игуменска, да отлучится днии осмь.
Аще кто от инок оглаголует и клевещет
старейшаго, несть далече гнева Божия, сицевыи да
отлучится месяц шесть, творя поклонов две тысящи.
Аще кто от инок обличает, и потязает
игумена своего пред миряны. аще и истинна суть
глаголемая от него. и той и верующии ему, с ним погибль
наследят. покаявжеся, да запретится лето едино. и
поклонов тысяща, и осмь сот творит. пред собором бо
братии, аще нань что имать должен есть глаголати.
Аще игумен имать советы с женами, или с
детьми, да престанет начальства.
Сие святителем и игуменом должно есть
исполняти ко всем еже учити братию по правилу Великаго
Василия. глава. 50
Аще игумен не прилежно учит люди своя,
сиречь, уверенную ему паству, и не творит со опасением
по правилу. но предания неполезная и суетная. и
самохотение дарует прежде бывшим. и овех убо любит, овех
же ненавидит, инех же ни любит, ни ненавидит. а других
паче любит. да весть яко за сие на[?] равенство, далече
есть любве Божия. сицевыи да оставит власть, и последних
достоинство да имать.
Инок аще ударив с яростию якова любо
животное, или разбиет, да отлучится, три месяца, и
поклонов триста [и пса не бити с яростию. аще животное
не бити кольми паче человека].
Аще ли в руку взем древо, окровавит и,
шесть месецев, да запретится, и поклонов тысяща на день.
Аще кии инок потязует иного инока, в
коей любо главизне, или клевету нань изречет, и
посмеяние, имать запрещение, пятьдесят дний, и поклонов
сто на день.
Имеяй ненависть на кого, в дом молитвы
да не входит, донеле же примирение сотворит, да сотворят
же оба, и поклонов пятьдесят.
Аще кии инок спутьшествует жене, поприще
едино, да отлучится едину седмицу, на всяк день творя
поклонов сто.
Инок соблудив, без причастия да будет,
лет 7, творя всегда, поклонов триста, окроме епитемии.
Аще кии инок пляшет, или корчемная поет,
или бесовьская творит вся, яже юнии творят, да отлучится
три лета, на всяк день поклонов тысяща.
Инок играяи в гусли, и с миряны часто
сообщаяся, а не с подобными себе, да отлучится два
месяца, творя поклонов, сто и пятьдесят.
Инок сокровищуяи и в росты дая сия, или
престанет, или да отлучится покаявжеся, да запретится
лето едино, поклонов сто и пятьдесят.
Аще кто от инок куплю деет, или да
престанет, или да лишится образа.
Аще кии послушник особь имать вещь,
кроме воли игумена своего, да отлучится лето едино, и
поклонов две тысящи.
Инок аще сокровенно что имать во общем
житии, да отлучится дондеже покается. такожде игумен,
имеяи что особное, да запретится.
Аще кии инок имея сребреники, и не
исповесть я при смерти своей, должен есть игумен
расточити их над ним. глаголя сице, сребро твое с тобою
в погибель да будет, и тако без пения погребут и. да
молитжеся о нем игумен с братиями дний 40, творяще на
всяк день поклонов 40. и минувшим четыредесятним днем,
начнут пети над ним уставленыя помины, и погребения. а
яже утаеная от него вся, требующим и нищим да
разделяется.
Аще кии инок лишится собора святыя
литургия, да сотворит поклонов, 200. исповедаяся греха
сего. зане смертен есть. паче же, аще в неделю и святыя
дни, лишится кто небрежением литургии.
Лишивыися вечерни, и павечерницы, да
сотворит поклонов, 150. Лишивыися полунощницы, да
сотворит поклонов, 100. Лишивыися утрени, да сотворит
поклонов двесте.
Аще кии брат укоризну приим от брата, и
молен быв от дружины си, и не простит согрешившему, да
отлучится седмицу едину.
Инок аще имать вещи, и любит я, да
отвержет от себе, ибо пакостит души его.
Аще кии брат буесловит, и безчествует
братию, и миряны рогалюет. поклонов 100. еще же должен
есть пред ими же оболга и оклевета, славу и честь благую
воздати, глаголя, яко он сицу оклеветах и ложь рекох, но
он честен, праведен и свят есть, по святому Златоустому
и Отечьнику.
Аще кии инок речет, яко имам род, да
отлучится днии осмь, поклонов всегда, 40. отнелиже бо
пострижеся, и обещася Богу, рода не имать.
Инок на блуде ят быв, или на брако
общению, супружества видом си, блудодеющих запрещению
подлежит, сиречь, лет, седмь.
Аще инок будет мужеложник, имать лет
шестьнадесять, творя, всегда поклонов шесть сот.
Инок имея великии образ, аще соблудит да
запретится лет, пять надесять, сухоядыи всегда хлеб с
водою, плачася и рыдая, творя поклонов сто шестьдесят,
кроме канона своего.
Инок великаго образа. аще биет кого
верна, или неверна, да сотворит поклонов триста.
Аще кии инок пиет вино чрез силу, болие
ему мясо ясти, а не упиватися вином, в нем же есть блуд.
Инок аще упиется или оклеветает. или без
страха смеется, или от чревообъядения изблюет, да
запретится яко же выше.
Крадыи, иже вверенныя ему службы,
конечнее да возвратит, и отдаст под анафемою, а зане
украде запрещается лето едино и поклоны. аще же
церковное украде или присвоив или даде кому, вящьшему
запрещению подлежит. чти канон, 10, первовтораго собора,
и апостол, 25. священныи же да извержется.
Инок аще лобжет якову любо жену, или
отроча спящее, да сотворит поклонов пятьсот. негли рещи,
яко ниже в светлую неделю достоит иноку, ниже матерь
свою лобзати. а сотворивыи сие имать поклонов триста.
Аще кии инок сотворит без причастия
божественных таин быти днии четыридесять, кроме вины, да
запретится лето едино.
Аще кии инок уснет без молитвы
игуменовы, да сотворит поклонов пятьсот.
Иноку не достоит да власы его прост
мирянин стрижет, но освящен кто или инок.
Аще кто презвитер, или диякон, или инок,
ведыи писания, а пренебрежет си утреню, или часы и
вечерню, аще и в пути сыи, но пекиися о житейских, свое
правило презирает, да имать запрещения лета два. простыи
же да сотворит поклонов осмь сот.
Иже не извещает деяния, и помыслы своя
духовному си отцу на всяку седмицу, да запретится днии
пятьнадесят. иерей же прежде литургии неисповедаяся тому
же подобне да запретится.
О устроении трапезы прежде причаститися
коей любо святыни да потом ясти.
Не приноси брашна во уста своя, о иноче
прежде даже не пожреши. ниже беседуй, сущу брашну во
устех твоих. ибо ядыи в трапезе, и глаголяи что, кроме
Исусовы молитвы, юже заповедахом глаголати, подобен есть
псом ядущим. и свиниям, и коткам.
Но сие есть устроению иноческому лепо,
еже благодарити прежде ястия и послежде. такожде
беседовати нимало что, но спасительная и полезная. и да
не возрадуется враг о безчинии нашем. паче же да
возрадуется, иже обретающеися с нами ангели. о них же и
повесть сия прилично зде прилагается [Патерик, слово
16].
Глаголаше убо некии старец, яко седящим
единою с старцем, и глаголющим о пользе. бе некто мних
прозорливыи, и видяше ангелы помогающия им и хвалящя я.
егда же прихождаше иная беседа, отхождаху ангели, и
каляхуся свиния посреде их полныя смрада, и оскверняху
я. егда же паки глаголаху о пользе, прихождаху ангели и
прославляху я.
О святей и великой, 40-це. и о всякой среде, и пятке выш.
прав. 98. святых апостол прав. 69
Аще кто епископ, или священник, или
диякон, или поддиякон, или чтец, или певец, не постится
великую 40-ницу и дни страстей, и всяку среду, и пяток,
да извержется. аще ли мирянин да отлучится, но точию за
немощь телесную да пощадится.
От Зонарева толкования
Всяцем образом сие правило ищет. да
вернии святую 40-ницу, и дни страстей. среды и пятки. во
всех седмицах, во всем годище, кроме светлыя недели, и
всех всеедных недель, в посте пребывают. разве кто за
телесную немошь поститися не может. ибо за смирение
плоти, пост умышлен бысть. аще же недугом, или немощию.
соодолевается плоть, еже от поста смирение оное несть
нуждно. а правила сего не хранящих, освященных убо
изврещи повелевает. простых же отлучает, сиречь, от
причастия на время.
Ведомо же буди, яко в равном чину
полагает правило, святую 40-ницу, и всяку среду и пяток.
Разрешаяи же среды, или пятка пост, кроме немощи
телесныя, и праздников, приимет месть, иже апостольское
шестьдесят девятое истязует правило. но иже немощи ради
понуждени. оливою и рыбами тело успокоити возмогут. мяса
же и сыра и масла кравияго, ниже коснутися есть прощено,
в великую 40-цу, аще и конечне умрети хощет.
Такожде ниже в среду, или в пяток. ибо
егда разрешаем за еже несмешатися со инославными,
единомудрствовати, вкушающе мяса и сыра, зазор отражаем.
и наипаче аще с таковыми случится жительствовати, да не
убо изветом сим чреву угаждаем.
В постных днех, о девятом часе по
обычных молитвах, точию хлебом и водою, и зелием, и
смокви, и финики, потребу исполняем телесную. аще кая
сему не стужит немощь.
Толкование
Смотри зде опасно, что святых апостол
правило глаголет, аще бо не за немощь телесную
возбранится кто, поститися должен: но понеже нецыи
немощи разум, зле приемлюще, и равносущею и несущею
немощию, разсуждающе вину, за уповаемую немощь, от
самолюбия бо водими, не хощут покоритися апостольскому
правилу, непомышляюще вины о гресех.
Приведем же мало что, и мы по вместному
о сем, и изъясним на пользу чтущих.
Немощь веждь сие божественое правило
глаголати, яже тело преклонитися устрояет, и все
совершеное недвижение, тому подает, а не за уповаемую
немощь ему заповеда.
Ложен сии извет есть и вина. стомах
болит ми. Слезень студенеет. нозе не стоят просто. Руце
недобре суть, уши звенят. Глава горит с болезнию. и
недуг мя лют сих ради ожидает. и о сих попечение
противное. Владычнему повелению не пещибося о утреней
повелени быхом, но насущнаго хлеба дневнаго просити.
здравия дар свышьше есть, и живота соблюдение и даяние,
и смотри наведение. Аще ли же сопротив речет кто. како
Тимофееви Павел, вина мало пити повеле, стомаха ради его
и частых недуг да знает сицевыи, яко неведения есть полн
сыи. буди первее ты яко же Тимофей, и тако пии и ты вино
яко же и он, изсушися от частых, постися прежде крепце,
и воду пии леты многими, и прочая труды Тимофеевы
покажи. умертви си тело, и тогда пии вино в меру. но и
то убо не в постныя дни. несть бо явлено. аще Тимофей в
тех вино пияше. но в прочая за укрепление плоти, да
может многочеловечныя грады учити, и приводити к Богу
живу и истинну.
Великаго Афанасия
Среды и пятка час
поста учинен есть, даже до девятаго часа, излишнее же
аще сотвориши, сие на твоем изволении. аще ли и
приложение возможеши сотворити, и в том доблествене
обучися. Такожде от счинения. Не приступай поста
Господня, сиречь среды и пятка. аще не некиим недугом
отягчен еси, кроме самыя Пятьдесятницы, и Богоявления
четыридесятницу же и святую седмицу страстей Христовых
сохранено соблюди.
Разрешай посты, егда брат к тебе
приидет. посты же соборныя, сиречь, среды и пятки, и
великия 40-ца, не разрешай. но иже от своего
произволения, сиречь понедельник, вторник. и четверток.
Никифора патриарха
Аще навечерие коего любо Владычняго
праздника, в среду или в пяток случится, не достоит
разрешати поста в вечер, ради утрешняго праздника.
Вопрос. Не достоит ли разрешити среду и
пяток, ради памяти святаго великаго, или апостола.
Ответ. Отвеща собор, никакоже. небо сию и сию рекоша
апостоли, но просто всякую среду и пяток.
Обаче настоятеля в том разсуждение да
держится. праведнику бо закон не лежит.
Ельма же в памяти святых, и Господьских
праздник. паче же в няже бдения бывают, достоит нам
разрешати пост среды и пятка. Глаголет Великии Григории.
еллинския быти со пресыщением, и вино питием праздники.
А отец наш Иоанн Лествичник показует не творити извета
чревообъядению, праздники.
Глаголет и Лаодикийскаго собора правило,
не достоит иноку разрешати поста во все лето, кроме
субот и недель. в тыя бо достоит и варение ясти, и
порано разрешати, и не ожидати девятаго часа, и просто
вси отцы повелевают согласно, яко подобает иноку все
лето поститися, до часа 9-го кроме субот и недель.
Аще кто Бога ради, произволит
воздержатися от вина, или сыра, или иного чесого,
невозбраняется от отец, токмо особночиние, яко мнению
подательно. А со советом воздержаяися, и сокрушением
сердца, и многим смирением, не точию да не возбраняется,
но и да поработитится на овощие. или ин вид обилующ.
Глаголет бо Великии Антонии, послушание с воздержанием,
покаряет и зверя. Изряднее же всяк спастися хотяи, всяку
среду и пяток всего лета, по 69-му правилу святых
апостол, сухоядением, и водопитием, должен есть
совершати. аще ли кто не может, за немощь телесную, да
разрешает на вино точию, и то с сокрушением сердца,
удаляяся всячески рыбы и масла. храняижеся и вина, яко
заповеди исполнитель, мзду обрящет.
О Господьских праздницех, в среду, или в пятки
Аще Господьскии праздник случится в
среду, или в пяток разреши на рыбы, и оливу сиречь квас.
Аще ли праздник святых апостол, единаго от дванадесяти,
на вино и оливу разреши. в прочия же памяти празднуемых
святых на вино точию разреши. тако бо изобразиша
божественнии отцы. разсуждению же искуснаго настоятеля
не прекословь.
О понедельнике
В понедельник же, миряне от мяса, иноцы
же от сыра, и яиц и рыб, да воздерржатся. аще ли и
больше может кто, оста на еговем произволении.
О великой четыридесятницы
В великую же 40-ницу, должен есть всяк
християнин понуждатися, и опаство велие имети, яко
десятину Богу всего лета приносяи, и очищение грехов
исполняяи.
О первой седмицы, 40-ницы
В первую седмицу, обычно есть всем
тщащимся о своем спасении, ясти в среду и пяток, тонкую
пищу. аще ли кто за недуг не может, да вкушает на всяк
вечер первыя седмицы хлеба мало и воды, негде и суровое
зелие, или моченое сочиво. обаче воздержательне. со
страхом и сокрушением сердца. аще ли и юху без оливы, во
вторник и в четверток, сотворит за немощь, и сие
беспорочно есть. В суботу же и в неделю всея
четыридесятницы, разрешаем на оливу и вино. на рыбы же,
точию в праздник Благовещения, и в неделю Цветоносия,
яко же речеся выше. правило, 221. по первой же седмицы,
ямы на всяк день сухоядение.
О великой седмицы
Великую седмицу, яко Господня
спасительныя страсти обносящую, достоит хранити паче
иных. в великии же четверток, труда ради божественныя
литургии, разрешаем на масло и вино. в великии же пяток,
по силе да понуждаются вси боголюбцы и постнии пребывати
даже до совершения божественныя литургии в великую
суботу. аще ли кто не возможет за немощь, или за
старость, в вечер великаго пятка, да снесть мало хлеба с
водою. и сице убо о велицей четыридесятницы.
О посте Христова Рожества
Прежде же Рожества Христова святыи пост,
в суботу и в неделю точию разрешаем на рыбу. а во
вторник и четверток, на масло и вино. в понедельник, в
среду и в пяток, пост до 9-го часа. аще ли не может кто
воду пити в понедельник, да разрешает на масло и вино.
среда же и пяток хранити по силе, кроме великаго и
тяжкаго недуга.
О посте святых апостол. и Пресвятыя Богородицы
О посте святых апостол, и Богородицы,
той же устав да есть; аще ли же многажды знойнаго ради
времене не может кто довершити девятаго часа в среду и
пятки, поне да хранится еже не многоразличная да яст, но
худую да представляет трапезу.
О чаровницех
Иже чародействуют, в дванадесятодневном
времени с приемлющими сих чарования, и со глаголющими
яко истинна суть, анафема да будет. сия бо вся
идолослужение есть. аще ли покается, да запретится два
лета.
Вопрос. Аще ли суть жены глаголемыя
гилуди сиречь ведьмы, и ссысающе кровь из детей, и
умерщвляют их. Ответ. Сия есть диявольская прелесть, и
отнюд не приемлите сего. Бог бо мертвит и живит. а
бесове ниже в свиниях неймут власти. яко же убо
прельщает в мертвецех, их же глаголют преисподники, сице
и зде, воздвиже неких злая помышляя непщевати о
человецех. тем же по силе возбраняй глаголющим что
таково. занеже и Великии Никифор, Исповедник патриарх
Цареградскии, вельми запрети верующим в сия, причетники
убо низлагает. людяны же отлучает.
А иже како видят нецыи мечты на пути,
сие бывает от бесов, попущением Божиим. ибо человецы
вместо благих, и добрых словес сквозе язык произносят
диявола, и понеже того присно призывают, приходит к ним
усердно отступившу Богу [Бог того отступает кто бесом
или дияволом человека называет].
Вопрос. Аще обрящется мертвец,
глаголемыи у нас преисподник, что годе быти. Ответ.
Несть сие несть. диявол бо хотя прельстити неких, еже
сотворити нечто нелепо, и во искушение и гнев Божии,
творит сицевая ложная знамения.
Множицею бо и в нощи привидится некиим,
аки идет некто, его же видяху прежде, и беседует с ними.
есть же тогда, и прорицает нечто.
Иногда мнится виден быти на пути, или
стоя, или ходя, иже умерл прежде времени. подвизает же
живых, да прокопывают гроб, и видят мощи. и понеже
совершенныя неймут веры к Богу, преобразуется диявол, и
облачится в мертвое тело, и многовременен мнится быти
мертвыи, и плоть имети, и кровь и нокти, отсюду
окаяннии, на огнь устремляют. и собравше древеса,
сожигают мощи, и потребляют я огнем. себе же соблюдают
во огнь вечныи, да сожжени будут, яко же и тии сожгоша
онаго мощи.
И мощи убо единою сожжени и истреблени
ныне, востанут паки в день воскресения, и сопротив
отвещают сим, пред страшным Судиею. они же послани будут
в огнь вечныи, безконечно мучащеся. аще не покаются
присно, о них же согрешиша. Сего ради и божественнии
отцы, шестолетному запрещению предаша, сицевое
беззаконие творящих мирян, священники же отнюд повелеша
изврещи.
Обычай есть нечестому бесу, многия мечты
творити во еже прельстити человеки. и сицевыи бес
подобен есть пчеле. Яко же пчела обретши улии тощь без
прилежания, многажды вселяется тамо. сице и бес, тело
обрет тщее, и не прилежное, входит в не, и творит мечты,
и прельщает человеки.
Подобает убо, егда обрящется таковыи бес
призвати священники, да сотворят молебен Богородице, и
освящение воде. таже да литургисают. и да поют трисвятое
в помощь всем, да сотворят и помин с коливы. Посем
запрещения две от крещения да прочтут. и святою водою да
кропят люди прилучившияся тамо, и излишнее излияти на
мощи, и благодатию Христовою, отбегнет бес оттуду.
Тако бо и святыи Макарии молитвою исцели
жену, претвореную в кобылу, волшебною хитростию.
О немилости старейших церковных
Святых апостол правило, 59. не подающа
епископа, или презвитера, от церковных имений причетнику
нищу, но презирающа убожеством дручима, отлучену быти
повелевает, пребывающа же в том, изметает яко брата
убивша елико по нему. аще отнуду он промыслом
божественнейшим, яже на пищу притяжа.
О мерилех сугубых. во предании
Последует обычай миролюбцем, и
сребролюбцем, скупо ценити пшеницу, и воду размешивати в
вино, да погибельное соберут богатьство. Мы же убо от
ветхаго и новаго писания соглядавше, завещаваем всякому
благочестно жити хотящему, внимати себе, о сицевом
безместии.
Аще бо имуще меры сугубыя, сиречь
великую и малую. великою убо купуют, малою же продают,
повелеваем отврещи таковых от среды християн, и
прокляти, по рекшему. Скупо ценяи пшеницу, от народа
проклят. Аще же престанут сицеваго недуга, и покаются да
запретятся лета 4, сухоядением с поклоны. такожде и на
лихву дающии сребро свое. понеже бо богатым сребро
дарует Бог, нищих ради. сего ради лишающии сих, и не
дающии нищим, яко убиицы осудятся.
Да будет же разумно, яко несть леть, не
точию иереом. но ниже архиепископом, и епископом противу
каноном что дерзати. творити же и разрешати. во уверение
же сего от блаженнаго Феодора Валсамона патриарха
Антиохийскаго, от толкования его.
На правило 32-е, Карфагенскаго собора полагаю сия
Пишет рече святыи Игнатии. иже глаголет
паче еже узаконена суть. аще бы был и верныи. аще бы и
постился. аще бы и девственик был. аще бы и знамения
творил. аще бы и пророчествовал, волк тебе да мнится
быти в кожи овчей, убийство овцам содеваяи.
И великий Федор Студит глаголет. Власть
предстателем ни в чим же дается, по преступлению
правила, разве токмо да прилежат тем яже узаконена суть,
и последуют яже преидоша, и да связуют и разрешают не
неразмыслено, но яко же мнится истинне, и канону и
правилу высочайшаго закона. слово бо Господне не имать
привязоватися. к сему приложити и вняти казнение оного
архиепископа иже воина чрез правила разреши.
О устроении пения вкратце главизны от
правил соборных, и некиих святых собора шестаго, еже в
Трулле правило, 75. ищи в Матфее
Еже пети в церковь приходящии хощем, да
ниже вискание безчинное творят, и естество на вопль
понуждают ниже что приглаголют, от иже неприличных
церкви и не своих. но со многим вниманием, и умилением
псалмопение приносят, сокровенных видцу Богу. ибо
благоговейны быти сыны Израилевы, священное научи слово.
От Валсамона, и от Зонарева. толкование
Божия церкви, домове молитвам
глаголются. тем же и молящиися, молити Бога должни суть
со слезами и смирением, но не бесчинным, и безстудным
образом.
Уставиша убо отцы, да не поются
священная пения и псалмы, вищанми безчинными, и
пиянственными, и естеству нужду приносящими. Ниже некими
доброгласии неприличными, церковному составлению и
последованию. якова же суть мусикийская пения. и
излишняя различия гласовом [италийских разносогласии
любителю внимай]. но со многим умилением, и нравы
благочестными и святыми приносити Богу молитвы, ведущему
тайная сердец наших.
Сия же повелеша, последованне
евангельскому речению заповедавшему.
Яко не подобает нам якоже язычником
молитися, с лишесловием и воплем, яко мнящимся нам
услышаном быти, за многоглаголание наше, но в тайне
приносити песнь Богу. творити же и прошения подобне, да
и Отец наш небесныи видя в тайне, воздаст нам яве. ельма
же рече, и Моисейскии закон глаголет, в Леввитице, яко
благоговейны быти имут сыны Израилевы.
Мы же такожде иже закона сего прияхом
кончину, должни есмы благоговейнейши быти, и по
узаконеному жительствовати.
Прочти еже в Маргарите слово, святаго
отца нашего Иоанна Златоустаго, написанное, на
истолкование речения пророческаго глаголющаго.
Видех Господа седяща на престоле высоце,
и превознесенне. ибо возбраняет скиническая песнопения,
и плясания руководящих, и презельныя возгласы. Ведомо ти
буди и сие правило, како возбраняет органы, и прегудныя
пения. и песни блудническия, во псалмопениих ухищряемыя.
Такожде и глаголемая, усугубления. и
безстудное сих бываемое пренебрежение. Поющии, висканми
безчинными, и подобная презревше. то со многим
вниманием, и умилением да поют. аще ли же ни да
запретятся. еже пети тропари, и каноны мирским
священником, и прочим миряном прилично. иноком же, особь
вне собора и на уединении, или в пустыни живущим,
неполезно есть се. многажды же и виновно и на вред им
бывает. Яко же рыбарь, удицею, и червием ловит рыбы.
сице и диявол сими тропарями, и песньми, на тщеславие, и
сластолюбие, и человекоугодие, воздвизает инока. Песни
многих в преисподняя земли низведоша, не точию мирян. но
и священников. иже умягчивше себе удобне в блуд, и во
иныя многия скверныя страсти низвергошася [святаго
Силуяна]. песнь, убо мирским есть, да людие собираются в
церковь. Да не убо согласом вопиения молитву творим, но
со усердием сердца, ниже в показание. но со всякою
кротостию, и вниманием ума. тако бо и Моисей с молчанием
моляся, услышан бысть. Веждь же о сем, яко зде песни
егда воспоминает, не самыя умны богодохновенныя
уничижает и отвергает, понеже в творцех. Песней, и
гласов церковных Дух Святыи сам действоваше. но нравы
петия, и поющих. зане петия убо от некоих бывают с
воплем, со движением всея плоти, помаванием главы,
плесканием рук, попиранием ног. не суть се пения, но
безчиния. поющии же глас или отончевают, и возносят или
одебелевают. или велии вопль испущают. се же да лучши
инех явятся, и человекоугодие и тщеславие исполнят,
сицевая пения от церкви суть далече. и сице поющии
правильно да запрещаються.
Дар всякому духовнику
Виждь всякии духовниче, яко егда
послушаеши исповеди кающагося. осмь облежащих грехов
истязовати должен еси.
1. Кто есть согрешивыи, си есть коего
жительства, коликих лет, коея мудрости, коего чина и
достоиньства. елико бо степень высочайшии, толико есть
падежь страшнейшии, и неблагодарство вящьшее. такожде
лета зрительна суть. абие егда человек отрок начинает
разумети, совесть его исправляти подобает.
2. Что согреши. Аще злое заповеданное.
или злое от рода своего. аще грех смертныи, аще
повседневныи: о смертных бо гресех наипаче исповедатися
подобает, о них же вышше.
3. Где согреши. Аще на месте святом, или
простом. и прочее.
4. Коими согреши. Си есть аще
исповедаяся иных привлече словом, или образом злаго
жития ко греху, или мздою приведе. сие бо есть дело
диявольское. иже бо соблазнит единаго от малейших. уне
ему было жернов камень. и прочее, яко же рече Христос.
Матф., 18.
5. Коль краты согреши. аще обыкл есть к
греху, или ни, обычай бо лукавыи не облегчает греха, но
паче обтягчавает. и сего ради кождо число грехов своих,
должен есть исповедати.
6. Почто согреши. Сие есть аще от
немощи, аще от страсти, аще от неведения. или паки от
избрания и совершеннаго произволения, нежели инако
исполнися.
7. Како согреши. аще по естеству, или
противу, уби кого кто, аще древом аще мечем, нравом коим
грех содеяся исповедати должен есть.
8. Когда согреши, си есть аще в пост,
или иногды. аще в день делательныи, или в
праздньственныи. аще во дни или в нощи; аще в той час
егда друзии в церкви бяху и прочее. сие бо облегчает, и
обтягчавает грех.
Сия вся со опасением испытай, да ни сам
преткнешися, ни исповедающагося соблазниши, или
погубиши.
От книги сведительныя ко архиерею, о
хотящем прияти священьства степень
Священная добре уставившии,
богопроповедницы апостоли, и с ними священное сословие
богоносных отец, повелеша и заповедаша, да никто же без
истязания, на степень священьства восходит. да не деются
божественная несвященне. сего ради и сей по духу сын
мой, имярек. пришедыи к моей худости. его же поставих
пред икону Владыки Христа, и Пресвятыя Богородицы. и
воспомянух ему страшное судище Христово, да чистым
исповеданием исповесться прежних своих согрешении, яже
яко человек согреши в животе сем. и испытав опасно
глубину сердца его, и обретох и достойна священьству. и
свидетельствую его, достойна сему быти, в славу Отца и
Сына и Святаго Духа, аминь.
Молитва, юже дают епископи духовным
отцем, да приемлют человеков на испытание
Смирение наше от благодати, и дара
даннаго ей, от Всесвятаго, животворящаго, и совершающаго
Духа, возлагает тебе, во священноиноцех честному отцу
духовному, имярек, духовнаго отечества служение. Должен
убо еси, веселым и тихим лицем приимати, к тебе
приходящих исповедатися, и ни един сетованныи, или
тяжестныи показовати образ, или удивлятися. аще и тяжкая
будут им согрешения. но наипаче сладким лицем призирати
на ня, и глаголы привлачительными, яко же годе есть к
ним беседовати, яко да и сущия во глубине сердца их
открыют ти грехи, канонисати же достоит их, и
законноиспытовати, яко же божественная и священная
правила вещают. комуждо даяти приличное по правилу
целение по мере лиц и силы. вязати убо, елико узам
достойна суть. разрешати же, елика разрешению достойна.
обаче кроме всякия приятия и дара, непродаемо бо есть
божественое отнюд.
Подобает же тебе и иноки постризати
малаго образа и великаго, со законным их назиранием.
сиречь, с приемником, и божественными молитвами.
Но и во священства сан возводимыя, тако
же истязовати должен еси. и яже от сих испытовати, вся
опасно, яко же апостольское, и правильное ищет слово. да
некако ради разленения, или с похищением некоего,
утаится нечто, чюжим и ты приобщишися грехом, по
божественному рещи апостолу. сего ради бысть и настоящая
заповедана книга нашего смирения, и дана ти есть во
утвержение.
А еже написаны в начале Номоканона сего
в предисловии святии отцы, преподобныи отец Иоанн Зонар,
и блаженныи Феодор Валсамон патриарх Антиохийскии. и
блаженныи Фотии патриарх Констянтинопольскии. и
преподобныи во иеромонасех Матфей, и иныя святыя, и сих
книг не вемы известно, еже в нашей Велицей Росии,
обретаются ли, или ни. но мы со испытанием по
божественным правилом святых апостол, и святых седми
вселенских соборов, и девятих. и инех многих святых
отец, яже обретаются у нас в книгах со всеми сими
сложивше тех разум, законнаго исправления. паче же всех
Василию Великому, во всей крепости последствованно
изобретохом. и того ради приемше тех правила зде
счинихом.
Азбука веры
|
