|
|
Разделы • Вопросы • На злобу • Библиотека • Поиск |
Православные акафисты / Акафист блаженному Варфоломею Чигиринскому |
Православные акафистыАкафист второй блаженному Варфоломею ЧигиринскомуКондак 1Избранный угодниче Христов и предстателю наш пред Богом, всеблаженне отче Варфоломее, восхваляем тя с любовию, милостиваго предстателя и заступника нашего. Ты же, яко имеяй дерзновение ко Господу, от всяких бед и скорбей свобождай нас, да зовем ти: Радуйся, блаженне Варфоломее, преславный чудотворче. Икос 1Ангел земный и человек небесный был еси, блаженне Варфоломее, от юности твоея юродство Христа ради себе усвоивый: да в жизни временней от всех поругаем и оскорбляем будеши, во блаженней же вечности мзду небесную обрящеши. Темже ублажаем тя: Радуйся, от благочестивых родителей рожденный. Радуйся, от юности на служение Богу предъизбранный. Радуйся, мудрый странниче, единаго Христа любовию усердно взыскавый. Радуйся, воине Христов, благодатию Его мир, плоть и диавола победивый. Радуйся, святость жития твоего буйством юрода мудре сокрывый. Радуйся, яко поругания и биения сладце, Христа ради, претерпевый. Радуйся, блаженне Варфоломее, преславный чудотворче. Кондак 2Видя суетою мира сего ослепленных, досаждающих и оскорбляющих тя неповинно, не гневался еси на гонителей и обидящих тя, отче Варфоломее, но молился еси о них, в сокрушении духа поя Богу: Аллилуиа. Икос 2Разумел еси добре, Варфоломее блаженне, вся козни врага диавола, имиже от злых человек поруганьми и биеньми доброе твое произволение сокрушити хотяще; темже тому крепце противостал еси, и за досадители твоя молился еси, нас же взывати тебе подвизаеши таковая: Радуйся, самопроизвольный мучениче, поношения от неразумных человек претерпевый. Радуйся, любовию злобу человеческую победивый. Радуйся, незлобия образ предивный собою явивый. Радуйся, страсти плоти твоея гладом и жаждею умертвивый. Радуйся, чистоты душевныя и телесныя хранителю. Радуйся, буйством о Христе премудрости небесныя стяжателю. Радуйся, блаженне Варфоломее, преславный чудотворче. Кондак 3Сила Божественныя благодати, еюже от юности исполнено бысть сердце твое, блаженне Варфоломее, тако укрепи тя в перенесении всякия тяготы земнаго жития, яко глад и жажду, хлад и зной, поругания и заушения, Христа ради, легце претерпевал еси и николиже вспять обратился еси, радостно воспевая Богу: Аллилуиа. Икос 3Имел еси огнь любве Божественныя в сердце твоем, богоблаженне Варфоломее, и яко некий пламеннообразный Серафим непрестанно в молитве пребывал еси, сердцем и душею твоею выну ко Господу Иисусу Христу возношаяся. Темже и Господь дивными дарами духовными тя обогати, да вси радостно вопиют тебе: Радуйся, воине Христов, необязавыяйся куплями житейскими. Радуйся, праведниче, сияяй яко солнце во Царствии Небеснем. Радуйся, смирением твоим Ангелов и человеков удививый. Радуйся, буйством твоим премудрыя посрамивый. Радуйся, смиренным и благочестивым тихое пристанище. Радуйся, подвизающимся добрый помощниче. Радуйся, блаженне Варфоломее, преславный чудотворче. Кондак 4Бурю помыслов и страстей безбедно претерпел еси, угодниче Божий, и пристанище тихое - Христа обрел еси, Емуже во мнозе долготерпении неленостно поработав, ныне на небесех вечнующия славы наслаждаешися, вопиющи: Аллилуиа. Икос 4Слышаще и видяще сестры обители Чигиринския чудныя словеса и деяния твоя, отче Варфоломее, яко человека Божия тя почитаху, и, умиляющеся сердцем, духом к небеси устремляшеся, вопиюще ти таковая: Радуйся, всего себе в жертву Господеви принесый. Радуйся, вся красная мира сего ни во чтоже вменивый. Радуйся, яко постом и бдением душу свою просветил еси. Радуйся, яко от юности твоея Господеви поработати вожделел еси. Радуйся, истинною любовию к Богу сердца наша наполняяй. Радуйся, стяжати благодать Святаго Духа нас научаяй. Радуйся, блаженне Варфоломее, преславный чудотворче. Кондак 5Боготечное светило быв, люди чигиринския благочестию христианскому поучал еси, блаженне Варфоломее, образ равноангельнаго жития тем показуя. Кто убо, о твоем великом терпении слыша и совершенное смирение твое воспоминая, како обидящим, по заповеди Христа Бога, вся прощал еси, не умилится? Сего ради Господеви, прославляющему святыя Своя, во умилении глубоцем воспеваем: Аллилуиа. Икос 5Видим был еси от человек, яко юрод и безумен, в раздранней одежде ходяй и от всех поругаем, обаче мудр о Христе пребыл еси, блаженне, и сие чудесы многими проявил еси. Темже от людей благочестивых, яко истинный угодник Божий почитаем, слышиши похвалы таковыя: Радуйся, града Чигирина крепкий заступниче. Радуйся, верою к тебе притекающих покровителю. Радуйся, хлад и зной любве ради Божия претерпевый. Радуйся, всякое упокоение плотское возненавидевый. Радуйся, образе смирения и послушания. Радуйся, учителю чистоты и целомудрия. Радуйся, блаженне Варфоломее, преславный чудотворче. Читайте также:
***Кондак 6Проповедание евангельское, еже не скрывати себе сокровища на земли, совершенно соблюдая, не стяжал еси ни злата, ни сребра, но точию едино рубище раздранное, в немже зиму и лето необувен пребывая, воспевал еси Христу Богу: Аллилуиа. Икос 6Возсиял еси, яко звезда пресветлая, во граде Чигирине, угодниче Божий, и чудес благодатию согражданы твоя просветил еси, и многия приходящия к тебе утешил еси. Сего ради воспеваем ти сице: Радуйся, Богу всею душею твоею прилепивыйся. Радуйся, кротость совершенную себе усвоивый. Радуйся, яко тайныя подвиги твоя от Бога явно чудесы прославишася. Радуйся, прозорливец воистину неложный явивыйся. Радуйся, сострадательный и милостивый страждущим помощниче. Радуйся, любвеобильный и благосердный скорбящих утешителю. Радуйся, блаженне Варфоломее, преславный чудотворче. Кондак 7Хотение присное имел еси, отче Варфоломее, да богоугодное и праведное житие твое от человек утаится. Темже всяко тщался еси от людей юродством сие сокрыти и радовался еси безчестиям, тебе наносимым, яко дарам великим, присно зовый во смирении песнь Богу: Аллилуиа. Икос 7Новаго по благочестии ревнителя зрим тя, блаженне Варфоломее, душевныя бо ради твоея чистоты дадеся ти свыше благодать чудотворения и прозорливства. Темже величаем тя: Радуйся, в молитве непрестанно пребывавый. Радуйся, житием твоим единому Богу послуживый. Радуйся, вечныя жизни причастниче. Радуйся, истины Христовы проповедниче. Радуйся, будущая яко настоящая созерцавый. Радуйся, помышления человеческая прозревавый. Радуйся, блаженне Варфоломее, преславный чудотворче. Кондак 8Странен мирови показался еси, блаженне Варфоломее, славу его, аки прах вменивый, Ангелом собеседник был еси и тако лику святых сочетаваешися, поющих: Аллилуиа. Икос 8Весь был еси в вышних, угодниче Христов, всякое житийское попечение далече от себе отринувый. Ныне же с горних высот богоподражательною любовию к нам низходиши, посещая ны во всех немощех и нуждах наших, возводя умы и сердца наша горе, и всех научая звати тебе сице: Радуйся, благодатными чудесы житие твое озаривый. Радуйся, славу небесную паче всего возлюбивый. Радуйся, вечныя блаженныя жизни наследниче. Радуйся, Ангелом и ликом святых собеседниче. Радуйся, недугов душевных и телесных целителю. Радуйся, стужаемых от злых духов свободителю. Радуйся, блаженне Варфоломее, преславный чудотворче. Кондак 9Всякое наслаждение плотское возненавидев, блаженне Варфоломее, единаго Бога всем сердцем возлюбил еси, яко источника всякия благости. Темже и Господь тя возлюби и обильно щедроты Своя на тя излия, да вси к мощем твоим припадающии и скорую помощь от тебе приемлющии благодарственно вопиют: Аллилуиа. Икос 9Витии многословесныя на возмогут по достоянию восхвалити чудеса, по молитве блаженнаго Варфоломея совершаемыя и разумение человеческое превосходящия. Мы же, радости и удивления исполняеми, от усердия нашего приносим ему малыя нехитростныя похвалы сия: Радуйся, добрый сеятелю благочестия. Радуйся, обличителю всякаго нечестия. Радуйся, бедствующих скоропредстательный помощниче. Радуйся, скорбящих благодатный утешителю. Радуйся, земли Чигиринския небесный покровителю. Радуйся, страны нашея всемощный заступниче. Радуйся, блаженне Варфоломее, преславный чудотворче. Кондак 10Спасти хотя душу, о плоти твоей нерадил еси, блаженне, но постом, бдением, молитвами себе смиряя, яко в тимпане, во умерщвлении телесе вопиял еси Богу: Аллилуиа. Икос 10Стена еси непоколебима, блаженне отче, всем с верою притекающим к твоему молитвенному предстательству. Темже припадающе, молим ти ся, яко имущему велие дерзновение пред Богом: ходатайствуй о нас, грешных, почитающих тя звании сими: Радуйся, узкими враты и тесным путем все житие шествовавый. Радуйся, Царствия Божия усердный взыскателю. Радуйся, Святыя Церкви благолепное украшение. Радуйся, православных христиан твердое ограждение. Радуйся, милость твою страждущим человеком являяй. Радуйся, верныя души благодатию посещаяй. Радуйся, блаженне Варфоломее, преславный чудотворче. Кондак 11Пение непрестанное во всем житии твоем Богови приносил еси, блаженне Варфоломее, ныне же от нас воспеваемый и по достоянию ублажаемый на земли, тамо - на небеси, купно со Ангелы, прославльшему тя Господеви зовеши: Аллилуиа. Икос 11Светлостию чудес твоих, угодниче Божий, помраченныя грехми души наша озаряеши и вся ны от сна лености возбуждаеши, да плоды покаяния принесем Христу, тебе в подвизех богоугождения подражающе, яко да возможем неосужденно благохвалити тя, предстателя нашего, сими песненными глаголы: Радуйся, яко в горний Сион Царя Небеснаго душею востекл еси. Радуйся, яко тамо, предстоя Ему, о всех нас тепле ходатайствуеши. Радуйся, лампадо, светом Христовым всех просвещаяй. Радуйся, елеем милости твоея сердца болезненная умащаяй. Радуйся, по Бозе и Пресвятей Богородице упование на тя возлагающих не посрамляяй. Радуйся, любящим тя и чтущим память твою предстательством небесным воздаваяй. Радуйся, блаженне Варфоломее, преславный чудотворче. Кондак 12Благодать данную ти от Бога ведуще, блаженне Варфоломее, благоговейно преклоняемся пред святыми мощами твоими, лобызаем святолепное изображение лика твоего и молимся: не остави нас твоим предстательством ко Христу Богу, Емуже благодарне поем: Аллилуиа. Икос 12Поюще подвиги твоя предивныя и чудеса твоя преславная, праведне Варфоломее, молим тя, заступника нашего: приклонися милостивно к нам, грешным, и вознеси о нас ко Господу твоя благоприятныя молитвы, прося нам от благости Его дары благопотребныя душевному спасению нашему, да возможем не токмо подвиги твоя прославляти, но и добродетелем твоим подражати, зовуще и глаголюще: Радуйся, яко в ризу чистоты и непорочности облеклся еси. Радуйся, яко светлый образ богоугождения явился еси. Радуйся, обители Чигиринския добрый и неусыпный блюстителю. Радуйся, пред Престолом Царя Славы теплый о нас ходатаю. Радуйся, евангельских обетований наследниче. Радуйся, христиан скорый помощниче. Радуйся, блаженне Варфоломее, преславный чудотворче. Кондак 13О всехвальный угодниче Христов, блаженне Варфоломее! Приими сие малое хвалебное пение наше, и избави нас от всякаго злаго обстояния, от напрасныя смерти и вечныя муки, да с тобою и всеми святыми во веки поем Богу: Аллилуиа. Сей Кондак читается трижды, затем Икос 1 и Кондак 1. Молитва блаженному Варфоломею ЧигиринскомуО преблаженный угодниче Божий
Варфоломее, града Чигирина звезда пресветлая и всея
Черкасския земли украшение! Ты Вышняго повелением
оставил еси вся земная, и ни во чтоже вменяя вся красная
мира сего, восприял еси юродство Христа ради: терпением
и мужеством перенося наветы вражия, в посте и бдении
пребывая день и нощь, тяготы зноя летняго понесл еси и
мразы зимния терпя, безмерно плоть твою изнуряя, стяжав
смирение велие, и силу Божию восприяв, явился еси
источником чудес неисчерпаемым, являя людем милости
Божия богатыя. И всем христианом испроси у Господа мирную кончину и добрый ответ на Страшнем Судище Христовом, да вкупе с тобою и со всеми святыми во Царствии Небеснем прославим милость Христа Бога нашего, Емуже подобает со Отцем и Святым Духом слава, честь и поклонение во веки веков. Аминь. Тропарь блаженному Варфоломею Чигиринскому, глас 4Явился еси во граде Чигирине яко в пустыни, в смиренномудрии, чистоте, трудех, подвизех и в терпении мнозе, преблаженне Варфоломее, вся красная мира сего возненавидев, взем бо Крест Христов последовал еси Ему, но яко имея дерзновение многое, моли Христа Бога о верою творящих память твою, да спасет души наша. Кондак блаженному Варфоломею Чигиринскому, глас 8От земли воззвавый тя к небесным селением Господь, соблюдает цельбоносно тело твое, блаженне Варфоломее, помогай всем с верою к тебе притекающим, да избавит ны Господь от варварскаго нашествия и междоусобныя брани и исцелит наша недуги душевныя и телесныя, яко Милосерд.
Читать другие акафисты раздела "Православные акафисты" |
Разделы проекта: |
|
© Миссионерско-апологетический проект "К Истине", 2004 - 2024 При использовании наших оригинальных материалов просим указывать ссылку: |
|
|