|
|
Разделы • Вопросы • На злобу • Библиотека • Поиск |
Православные акафисты / Акафист блаженному Варфоломею Чигиринскому |
Православные акафистыАкафист первый блаженному Варфоломею ЧигиринскомуКондак 1Избранный чудотворче и преславный угодниче Христов, блаженне отче наш Варфоломее, веры христианския светильниче и земли Чигиринския и всея Украинския страны неусыпный хранителю, Церкви Русския похвало и христоименитых людей радование. Ублажаем подвиги и труды твоя, ради наследия Царства Небеснаго тобою подъятыя и, прославльшаго тя Господа славы прославляюще, с любовию теплою вопием ти: Радуйся, блаженне отче наш Варфоломее, в вере и благочестии возрастати нам помогающий! Икос 1Ангели на небеси радовахуся, егда видевше, яко звезда утренняя, возсиял еси над пределами Чигиринския земли, путем Божиих заповедей шествовал еси, прогоняя тьму греховную светозарным твоим житием, блаженне отче Варфоломее, приводя к свету Христову многия люди, угодниче Христов. Темже и мы, верно чтущии твою священнейшую память, похвалами ублажаем тя сими: Радуйся, ангельскаго жития подражателю. Радуйся, древних отец жития последователю. Радуйся, невидимых врагов мужественный победителю. Радуйся, заповедей Божиих усердный исполнителю. Радуйся, в житии точию Бога взыскавый. Радуйся, невозвратно Христу последовавый. Радуйся, Всесвятаго Духа сосуде избранный. Радуйся, на земли в сонме святых прославленный. Радуйся, блаженне отче наш Варфоломее, в вере и благочестии возрастати нам помогающий! Кондак 2Видяще твое, паче злата блистающее смиренномудрие, святый Варфоломее, яко воистину Христов еси ученик и сонаследник Того Царствия явился еси, любовью ко Творцу всяческих пламенея, пути и веры истинной поискал еси, при преславней чигиринстей Свято- Троицстей обители усердно подвизался еси и в радости и ликовании Триединому Богу воспевал еси: Аллилуиа! Икос 2Разумом Богопросвещенным постигл еси суету мира сего и непостоянство, возжаждав подвига великаго и жития не от мира сего, отряс еси суету и вся тщетные мирския волнения и ко стопам Спасителя мира притекл еси: иго Христово на рамена своя возложив, подвигом юродства Тому последовал еси. Тобою, праведнее Варфоломее, земля Чигиринская вельми хвалится: в ней бо вся дни благочестно пожив, спасение соделав, Бога Всещедраго и Милостиваго чтити научил еси. Мы же радующийся таковому о тебе промышлению Отца Небеснаго со умилением зовем ти: Радуйся, яко своим подвигом родителей и сродников удививый. Радуйся, рай паче богатства и славы мира возлюбивый. Радуйся, Святыя Троицы слуго неукорный. Радуйся, доблестный воине Царя Небеснаго. Радуйся, святильниче веры и благочестия. Радуйся, образе кротости и воздержания. Радуйся, безстрастия благодатнаго высото. Радуйся, смиренномудрия пречудная глубинно. Радуйся, блаженне отче наш Варфоломее, в вере и благочестии возрастати нам помогающий! Кондак 3Силою благодати Божией движимый, потщался еси, богомудрый Варфоломее, подвигом юродства и совершенным самоотвержением Господеви угодити, непрестанные молитвы принося Ему и о всем мире моляся, с радостию бо ангельскою еще на земли пребывая воспевал еси Вседержителю: Аллилуйя! Икос 3Имеющи любовь Божественную в сердце твоем, прехвальне Варфоломее, бодренным оком ума твоего в зрении невидимаго Бога пребывал еси, блаженнее отче наш: Его же лицезрением ныне со ангелы купно наслаждающися. Сего ради просим убо тя: моли Иисуса Сладчайшего укрепити всех нас в соблюдении заповедей Его и приими похвалы сия: Радуйся, к свету истины прельщенных обращающий. Радуйся, страх Божий в сердца вселяющий. Радуйся, благоговети пред святыней научающий. Радуйся, ревностью ко спасению воодушевляющий. Радуйся, духовное нечувствие в нас подавляющий. Радуйся, храмы Божии почитать внушающий. Радуйся, в них отраду находить вдохновляющий. Радуйся, жажду Святого Причащения возбуждающий. Радуйся, блаженне отче наш Варфоломее, в вере и благочестии возрастати нам помогающий! Кондак 4Бури житейских бед и напастей не возмогоша поколебати крепости души твоея, блаженне Варфоломее, яко во граде многолюднем подвизи твоя совершая, душею надмирно пожил еси, пути пустынножителей древних ревностно следуя, советом богоносных старцев и инокинь богомудрых свято внимая, совершнства духовнаго достигл еси и дары Всесвятаго Утешителя Духа стяжал еси, ими же ближним твоим усердно послужил еси и Предвечнаго Бога прославил еси, ангельски воспевая Ему: Аллилуйя! Икос 4Слышавше и видевше богоугодное житие твое, премногую любовь твою к Богу и ревностное благочестивое житие, праведниче Господень, многия ближние и дальние прихождаху к тебе, поучахуся наставлениями твоима; сего ради же и мы, восхваляем тя, вопиюще ти сице: Радуйся, любовь нелицемерную в нас воспламеняющий. Радуйся, кротость и смирение в себе показующий. Радуйся, терпением и мужеством души наша украшающий. Радуйся, всех алчущих и жаждущих правды, насыщающий. Радуйся, сердца благодатью Божиею, ти данною, очищающий. Радуйся, очи наша духовные к зрению Бога изощряющий.. Радуйся, вражды и ссоры людския умиротворяющий. Радуйся, всякий мрак заблуждения и прельщения прогоняющий. Радуйся, блаженне отче наш Варфоломее, в вере и благочестии возрастати нам помогающий! Кондак 5Боточная звездо еси чтущим память твою, блаженне отче Варфоломее, яко на всех, прибегающих к заступлению, не оставляеши без помощи твоея. Сице молим тя: утверди сердца наши в любви и смиренномудрии, в кротости и послушании, терпении болезней и скорбей, непамятозлобии и всяком деле благом и спасительном, да тобою нам благодеющему Господу с надеждою поим: Аллилуйя! Икос 5Видяще очами веры тя, богоблаженне Варфоломее, во Царствии Небеснем с новомученики Христовыми сочетаемаго и с ликами преподобных вчиняемаго, со девственники ликующаго, со постники и пустынники ублажаемаго, с ним иже непрестанно песнь хвалебную Троице Всесвятой возсылаеши и молишися о нас, тя пениями сими прославляющих: Радуйся, усердный ревнителю веры и благочестия. Радуйся, показавый путь верного ко Христу восхождения. Радуйся, благодать Святого Духа во спасение стяжавый. Радуйся, радость молитвенного богообщения познавший. Радуйся, благия мысли и чувства в недоумении нам сущим внушающий. Радуйся, к терпению бед, лишений и скорбей нас воодушевляющий. Радуйся, святые желания и намерения ко спасению нашему в сердца нам влагающий. Радуйся, добрыми плодами веры, надежды и любви души наша исполняющий. Радуйся, блаженне отче наш Варфоломее, в вере и благочестии возрастати нам помогающий! Читайте также:
***Кондак 6Проповедниче заповедей евангельских был еси, на деле исполняя их, указуя спасительный путь во тьме греховней блуждающим, светом заповедей Христовых всех просвещая и вразумляя, добрых сердца в вере спасительной утверждая, ленивых и нерадивых присно обличая во гресех явных и сокровенных, да поют вси Господеви песнь покаяния и благодарения: Аллилуиа! Икос 6Возсиял еси, праведне отче Варфоломее, яко новый тайновидец, смирением и молитвою со слезами стяжавый благодать Святаго Духа, от нея же любви неизреченныя к людем страждущим исполнися сердце твое. Мы восхваляем ныне подвизи твоя: посты, молитвы, слезы, коленопреклонения, всенощныя бдения, плоти умерщвление, дyxа coкpyшeниe, смирение, кротость, молчание, терпение, нищету, нестяжание. Сего ради умиленно вопием ти сице: Радуйся, житием твоим суетность мира сего обличивый. Радуйся, плоть свою со страстьми и похотьми поправый. Радуйся, всякое пристрастие земное от себе отгнавый. Радуйся, мир Христов в душе своей стяжавый. Радуйся, нерадения и праздности известный прогонителю. Радуйся, трудолюбия, еже всякому благу утверждение, рачителю. Радуйся, чистаго и непорочнаго жития неусыпающий хранителю. Радуйся, всех ко спасению верный путеводителю. Радуйся, блаженне отче наш Варфоломее, в вере и благочестии возрастати нам помогающий! Кондак 7Хотяще воспети Подвигоположника Христа, славно венчавшаго тя, блаженне отче Варфоломее, и достойно прославить подвизи и труды, подъятыя тобою, святче Божий, любви ради Божественные, помози нам свыше данною ти благодатию сердца наша от греховной тьмы очистити. Мы же, Бога о тебе прославляюще, вопием Ему: Аллилуйя! Икос 7Новую показа милость чадом Своим Человеколюбец Господь, егда благоволи прославити тя и явити в тебе благодать Свою чудотворящую, святый наш заступниче и покровителю. Тем же всеусердно молим тя: помози нам, о святче Божий, предстоящий купно со святой преподобномученицею Рафаилою, пред престолом Христа Спасителя Нашего, твоима молитвами, да укрепит Господь волю нашу, дабы пребывати нам верными чадами в Церкви Его, в Нем же тобою утверждаеми зовем ти: Радуйся, яко выну и во всем о мале верен явился еси. Радуйся, яко обилие благодати Божией прияти сподобился еси. Радуйся, смиренномудрием и благоразумием воскриленный. Радуйся, смирением и любовию в Небесная вознесенный. Радуйся, яко тобою приемлем телесных болезней исцеление. Радуйся, яко тобою уповаем прияти грехов прощение. Радуйся, яко тобою тяжких и лютых искушений избегаем. Радуйся, яко тобою в различных бедах помощь обретаем. Радуйся, блаженне отче наш Варфоломее, в вере и благочестии возрастати нам помогающий! Кондак 8Странствия твоего течение завершая, о святый Варфоломее, пищи безсмертныя, Тела и Крови Христовы, сподобился еси причаститися, Богомудре, душу твою с надеждою Небесному Царю и Владыце предал еси. Сего ради просим тя: умоли Господа нашего благия христианския кончины и нас сподобити, да возможем и мы купно с тобою воспевати : Аллилуйя! Икос 8Всем естеством твоим, о богоносне Варфоломее, Христа Спасителя возлюбил еси, подвигом добрым подвизавшийся, веру бодро соблюдший и течение свое добре скончавший, обрел еси от Подвигоположника Нашего - Господа Иисуса Христа - венец правды. Тем же усердно, с любовию поминаем тя – наставника нашего, и желая подражати вере твоей, смиренно вопием ти: Радуйся, Божией благодатью силу устоять в истине обретый. Радуйся, во святых молитвах твоих Бога узревый. Радуйся, зло мира сего добром победивый. Радуйся, смертью твоею мир умудривый. Радуйся, жизнь земную свято и праведно скончавый. Радуйся, пришедый от скорбей многих на покой вечный. Радуйся, восприятый со славою во обитель святых. Радуйся, увенчанный от Христа венцем нетленныя славы. Радуйся, блаженне отче наш Варфоломее, в вере и благочестии возрастати нам помогающий! Кондак 9Все ангелы Божии, спасенных и святых Божиих собрания неисчетныя на небе торжествуют, избраниче Божий Варфоломее, ибо ты подвижническую жизнь вел еси, подвиги твоима труды мнозих превосходя, непрестанную молитву пищею для души твоей имея, лишения и оскорбления с небесной кротостью претерпел еси и востекл еси в чертози Царя Небеснаго. Мы же, прославляя Господа, дивнаго во святых Своих, со слезами благодарности о тебе вопием Ему: Аллилуиа! Икос 9Вития многовещанныя и пииты, талантами великима от Бога одаренныя, не возмогут достойно и справедливо воспети подвиг жития и служения твоего, блаженне отче Варфоломее, ибо ты возлюбил еси Христа, следовал еси за Ним, претерпевая всякие пренебрежения и надругательства, дабы выну свидетельствовати о Спасителе. Сего ради и мы взываем к тебе с надеждою на заступление твое пред воскресшим Господом и вопием ти сице: Радуйся, в вере Божественной нас укрепляющий. Радуйся, надежду спасения верным утверждающий. Радуйся, любовию Божиею нас согревающий. Радуйся, сомнения наша, яко прах, развевающий. Радуйся, во уныние падших нас ободряющий. Радуйся, доверие и любовь к Богу в нас воспламеняющий. Радуйся, сердца злых людей, враждующих против нас, смягчающий. Радуйся, советы лукавые и коварство их разоряющий. Радуйся, блаженне отче наш Варфоломее, в вере и благочестии возрастати нам помогающий! Кондак 10Спасительный подвиг твой, прехвальный Варфоломее, пением акафистным, ныне же с верою и любовью припадающе к раке святых и многоцелебных мощей, просим тя усердно: молися за ны ко Господу Богу, да дух благочестия, благости и милости не оскудевает и в нас, немощных и грешных: да будем чада твоя не по имени только, но делам и всем житием нашим, и сподобимся вкупе с тобою во блаженней вечности пети Богу: Аллилуиа! Икос 10Стеною непоколебимою богоприятных молитв и ходатайств твоих, огради ны от всякаго зла и печали, отче блаженне, ибо ты еси страждущим духовное утешение, верным о Христе радость и умиление. Ныне убо просим тя: озари наша души сиянием Божия благодати, ибо ведаем, яко зело много может молитва твоя пред благостию Его. Сего ради со упованием благим молитвенно к притекаем и взываем ти сице: Радуйся, веру нашу во спасение со Христом укрепляющий. Радуйся, светильниче, мрак душ наших благодатно озаряющий. Радуйся, пути наши заступничеством твоим исправляющий. Радуйся, братолюбием и милосердием ущедряющий. Радуйся, мир о Духе Святом в сердце вселяющий. Радуйся, зависть, клевету, ревность и злопамятство истребляющий. Радуйся, к долготерпению в скорбях и недугах приклоняющий. Радуйся, во всяких нам нуждах и обстояниех помогающий. Радуйся, блаженне отче наш Варфоломее, в вере и благочестии возрастати нам помогающий! Кондак 11Пение молебное приносим ти, богоносный отче наш Варфоломее, в пречуднем житии твоем образ смирения и благодатного богообщения нам даровавый. Сего ради с несомненною надеждою к тебе, аки к приснотекущему источнику благодати Божия, притекаем; почерпающе же от тебе воду живую, утоляющую жажду духовную, вся наша нечистоты омывающую и горести житейские утоляющую, Богу, нас спасающему твоима молитвами, с любовию вопием о тебе: Аллилуиа! Икос 11Светоподательный светильниче, святый отче наш Варфомолмее, яко во мраце страстей мира просиявый, не под спудом, но на свещнице небесном поставленный, и так присно пред престолом Божиим горящий, всему же миру и нам, грешным, на земли сущим, светящий, да видяще добрая дела твоя, прославляем прославившего тя Господа славы, и к тебе воззовем сице: Радуйся, с Пречистою Девою Богородицею у Престола Сына Божия предстоящий. Радуйся, о чтущих тя Святую Троицу всеусердно умоляющий. Радуйся, со всеми новомучениками Агнца Божия воспевающий. Радуйся, яко тебе призывающым милости небесныя источаеши. Радуйся, яко любящих тя от различных бед и напастей изымаеши. Радуйся, проповедников евангельской истины благодатное вдохновение. Радуйся, иерархов Церкви Христовы правило веры и от скорбей избавление. Радуйся, храмов Божиих усердных строителей и верных в них служителей любовию Христовою обогащение. Радуйся, блаженне отче наш Варфоломее, в вере и благочестии возрастати нам помогающий! Кондак 12Благодать свыше ти дарованную, святый отче, на притекающих к тебе в скорбях обильно с любовью источаеши и ниспосылаеши нам помощь благодатную, ибо ты и по успению своем не оставляеши всех притекающих к тебе, сего ради просим тя: не престани умоляти Христа Бога, да освободит державу нашу от тлетворных обычаев, от безбожия и нищеты, да спасение тем улучивше, воспоим тобою благодеющему нам Богу: Аллилуйя! Икос 12Поюще чудеса твоя, богоносне Варфоломее, всеусердно молим тя: не остави ны в скорбный час; вымоли пред Богом благодатный дар покаяния и отыми от нас грешных в Вере колебания. Тебе же от усердия нашего таковыя похвалы приносим: Радуйся, лучами благодати Божия осиянный. Радуйся, благоухания духовнаго преисполненный. Радуйся, Церкви небесной и земней украшение. Радуйся, непорочнаго девства честный покров и ограждение. Радуйся, упование на вас возлагающих дивные помощниче. Радуйся, о душах наших усердные ко Господу молитвенниче. Радуйся, отчаящихся и падающих умиротворение. Радуйся, о погибающих скорое попечение. Радуйся, блаженне отче наш Варфоломее, в вере и благочестии возрастати нам помогающий! Кондак 13О блаженне отче наш Варфоломее! Воспеваем ти пение похвальное и всеусердно молим тя: испроси у Сладчайшего Иисуса нам вся потребная к жизни земной и благочестию, избави нас от бедственных падений, бесовских искушений, болезненней печали и Царствия Небесного наследниками всех сотвори, да сподобимся купно с тобою во веки воспевати Всесвятой Единосущной и Нераздельной Троице: Аллилуиа! Этот Кондак читается трижды, затем читаются Икос 1 и Кондак 1. Молитва первая блаженному Варфоломею ЧигиринскомуО блаженне и богоносне Отче наш Варфоломее, ты угодниче Христов и крепкий молитвенниче призри на нас грешных ко святей иконе твоей припадающих и просящих твоего заступления, и помощи. К тебе, угодниче Божий, прибегаем мы, немощные, грешныя и недостойныя, от натисков духа мира сего в маловерие впавшия, и молим тя: испроси у Всемилостиваго Бога мир церкви, в отечестве твоем веры спасительныя укрепление и трудов миссионерских Божие благословение. Обитель Свято-Троицкую, иже во граде Чигирине, не остави, при ней же многая лета усердно подвизался, ея же в мирном благоустроении и благолепии сохрани и всех монашествующих и труждающихся добре во благих желаниех утверди и в подвизех иноческих укрепи, от всех видимых и не видимых враг и от всех напастей и бед невредимыми сохрани. Ей, заступниче наш святый, буди помощник благий всем благочестно живущим и всех попечителей и устроителей обители святыя Свято-Троицкия обители, иже во граде Чигирине. Всех нас избави от недугов телесных и душевных, от глада, потопления, огня, от внезапныя смерти и смертоносной язвы и от нашествия иноплеменников и междоусобной брани и от всякого зла и навета вражия. Молитвы твоима отжени волка от нас мысленнаго и льва рыкающао ищущего кого погубити, огради от соблазнов мира сего и от помыслов суетных и душевредных. Святой Отче наш Варфоломее, простри молитвенно руки твои к Господу и умоли Спасителя, да простит нам безчисленныя прегрешения наша и не отвратит милость свою от нас, да возможем прославити со всеми святыми и тобою Отца и Сына и Святого Духа ныне и присно и во веки веков. Аминь. Молитва вторая блаженному Варфоломею ЧигиринскомуО, святый угодниче Божий, блаженне Варфоломее! Ты подвигом Христа ради юродства в земли Чигиринстей подвизался еси. Ты восприял еси на Небесех венец правды, уготованный Господом любящим Его. Мы же, взирающе на образ твой святый, воспоминаем болезни и труды твоя, имиже трудился еси во благовестии Христове, себя же ни во что вменяя, служа людием молитвой и мудрым словом. Избегнув людския славы, духовным забралом юродства прикрываяся, обличителем пороков мира сего явился еси, ревнитель веры Христовой и чистоту ея был еси. Ты же, ныне предстоя Престолу Божию, приими моления наша и ко всемилостивому Богу принеси. Да вразумит нас Господь, жизнь нашу по заповедем Его созидати. Да простятся молитвами твоими, блаженный Варфоломее, всякия грехи наша вольная и невольная, и вразумит нас Господь приносити достойныя плоды покаяния и пошлет помощь в учении отрокам нашим. О святый блаженне отче Варфоломее, да избавимся молитвою твоею от скорбей и болезней, бед и напастей и всякаго зла, благочестно и праведно поживем в нынешнем веке и сподобимся предстательством твоим избежати глубин адских, но будем вечно славити во святых своих славимаго Бога, Отца и Сына и Святого Духа во веки веков. Аминь.
Читать другие акафисты раздела "Православные акафисты" |
Разделы проекта: |
|
© Миссионерско-апологетический проект "К Истине", 2004 - 2024 При использовании наших оригинальных материалов просим указывать ссылку: |
|
|