|
|
Разделы • Вопросы • На злобу • Библиотека • Поиск |
Православные акафисты / Акафист царю и пророку Соломону |
Православные акафистыАкафист царю и пророку СоломонуКондак 1Избранный от рода Иесеева, на престоле отца твоего Давида, аки солнце воссиявый, богодарованный светильниче веры и благочестия, всего мира христианскаго неусыпный хранителю и попечителю, благочестивых людей радование, богоблаженне Царю и пророче Соломоне, ублажаем подвиги и труды твоя, ради наследия Царства Небеснаго тобою подъятыя и, прославльшаго тя Господа Славы прославляюще, с любовию теплою вопием ти: Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Икос 1Ангелов Творец, Триипостасный Господь наш, человеческий род ко спасению вечному предуготовляя, благоволи явити в тебе, всехвальный пророче Соломоне, един от прообразов Божественнаго Искупителя Нашего, яко ты еси сыне Давидов, воссевый на престоле святаго отца твоего, царю мирный, покою тезоименитый, яко ты еси храма Божиего строитель, священнотаинник и провозвестник благодати, книг богодухновенных составитель. Сего ради мы с надеждою на милость Христа, Царя и Господа Нашего с надеждою воспеваем ти сице: Радуйся, яко фимиам, пред Престолом Творца, молитвою благоухающий. Радуйся, яко адамант, на порфире Царя Царей сияющий. Радуйся, правую веру, яко семена, в души людей обильно сеющий. Радуйся, молитвою твоею яко огненным столпом нас путеводящий. Радуйся, сердца охладевающие верою и любовию обогащающий. Радуйся, отчаявшимся и изнемогающим помощь скоро подающий. Радуйся, и безрассудные мудростию и трезвлением преображающий. Радуйся, благие помыслы на сердце всем нам полагающий. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 2Видя Премудрый и Милосердный Господь Наш велие покаяние царственных родителей твоих, прехвальный Соломоне, благослови я и утешение на радость тя им дарова. Ты же, угодниче Божий, наставлением богомудрого отца твоего Давида и благочестивой матери твоей Вирсавии внимая, от младых ногтей навыкл еси Господеви воспевати: Аллилуйя. Икос 2Разум твой в послушание веры пленив, ум к Богу вперил еси, святый Соломоне, сего ради, Господь дарова ти обильно благодать разумети писания духовныя, яко несомненно в Того веровал еси, и неизреченныя и спасительныя повеления Его соблюдал еси, святым пророком Нафаном наставляемый, в уповании и вере во Всемогущество и Милосердие Всемудраго Творца Нашего возрастал еси, добродетелем царственнаго отца твоего всячески следуя. Сего ради воспеваем ти сице: Радуйся, от чрева матере твоея Творцом избранный. Радуйся, благодатию Всевышняго нам данный. Радуйся, от младенчества богомудрием украшенный. Радуйся, в добродетели богоугодныя, яко в ризу, обличенный Радуйся, благому учению святых пророков прилежавый. Радуйся, разум Богопросвещенный от детства стяжавый. Радуйся, земле благая, семя Слова Божия восприявшая. Радуйся, маслино благоплодная, елеем милости сердца наша умащающая. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 3Силою благодати Божия движимый и озаряемый, токмо мудрости, а не славы, богатств и могущества просил еси во дни юности твоея у Всемудраго Отца Небеснаго, всехвальный Соломоне, с надеждою и упованием взоры твоя к Царю Царствующих обращший. сего ради молим тя: укрепи во благочестии юношей, ветрами суеты века сего колеблемых, и многомощным предстательством твоим испроси у Всесвятей Троицы вся благопотребная в житии сем временнем и ко спасению вечному нуждная, да сподобимся купно с Тобою Господеви во веки воспевати: Аллилуйя. Икос 3Имущее упование велие на Всемогущество Царя Небеснаго, помазавшего тя, светозарный Соломоне, в цари народу израильскому, вся пути твоя и державы твоея в воли Всевышняго полагал еси, и сего ради дарова ти Господь мудрость и велиий разум, и обширный ум, подобный песку на берегу моря, и бысть мудрость твоя паче мудрости всех сынов востока и всея мудрости египетския; имя твое бе в славе у всех окрестных народов. Сего ради молим тя: испроси нам во благо у Всесвятаго Утешителя Духа нам мудрости, да с надеждою приносим ти похалы сия: Радуйся, сердца наша от скверн греховных очищающий. Радуйся, суетою помраченный наш ум просвещающий. Радуйся, безвестная и тайная премудрости Божия нам открывающий. Радуйся, благия мысли и чувства в недоумении нам внушающий. Радуйся, святыя желания и намерения ко спасению нашему в сердца нам влагающий. Радуйся, добрыми плодами веры, надежды и любви души наша исполняющий. Радуйся, звездо пресветлая, к Солнцу Правды Христу Иисусу всех путеводящая. Радуйся, свеще неугасимая, у престола Господа славы присно горящая и нас огнем любве Божия воспламеняющая. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 4Буря недоумения смущает ны, преславне царю Соломоне, како достойно возглаголати и воспети величия твоя, но ты, яко благий и милосердный, воззри на усердие наше и любовь к тебе, добрый наш покровителю и заступниче, и научи нас грешных, како подобает всею душею и всем сердцем славословити Предвечнаго и Всемилосерднаго Господа Нашего и умиленно пети Ему: Аллилуиа. Икос 4Видяще труды Твоя, праведный царю Соломоне, яже подъял еси при воздвижении во граде Иерусалиме велиего храма во славу Всемогущего и Премилосерднаго Господа Нашего, Сотворшего Словом Своим небо и землю, возвеселиша зело поданныя правоверныя твоя и ангелов сонм воспе хвалу Создателю миров дольняго и горняго. Мы же, сия убо ныне поминаюше, просим тя, заступниче наш и покровителю, настави нас в усердии и любви к богослужением христианским и настави сотворяти в сердцех наших храмы Предвечному Богу Нашему, да зовем ти сице: Радуйся, истинному страху Божию нас научаяй. Радуйся, благость и кротость чтущим тя даруяй. Радуйся, омраченных заблуждениями благостный просветителю. Радуйся, духов лукавых прогонителю и полчищ бесовских победителю. Радуйся, немощных и малоискусных терпеливый учителю. Радуйся, немощей телесных и душевных немздоприемный исцелителю. Радуйся, вождю по источникам вечнаго спасения. Радуйся, желающим независтно преподавый воды нетления. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 5Бога Всевышнего в народе твоем и среди стран окрестных прославил еси, премудрый царю Соломоне, храм в честь всесвятаго имени Его возвигнув по обетованию твоему и отца святаго твоего, во граде Иерусалиме, и при освящении святилища Господня вознесл еси молитву твою Царю веков и Творцу Вселенныя, глаголя: «Аще и иноплеменник, приидет из земли дальней имени Твоего ради, услыши с неба, с места обитания Твоего, и соделай вся, дабы все народы земли знали имя Твое», и славословили Тя песнию : Аллилуйя. Икос 5Видевше богопросветленныма духовныма очима твоима, богомудрый Царю, несовершенство и слабости народа Божия возвигл еси руце твоя ко Вседержителю, глаголя: « прости народу Твоему, яко согреши пред Тобою». Сия же убо ныне поминающше, просим тя, царственный пророче, возбуди в сердцех наших молитвы покаянныя, настави ны сердца наши не прилепляти к благам мира сего, паче же о Бозе мыслити и заповеди Его во всем житии нашем присно хранити, и прими милостивно похвалы сия: Радуйся, с небесных высот на скорби наши призирающий. Радуйся, всех нас любовию твоею объемлющий. Радуйся, в крепости и твердости духа нас укрепляющий. Радуйся, дарами ведения и разумения нас обогащающий. Радуйся, сирым и убогим присное вспоможение посылающий. Радуйся, богатых в дусе милосердия и благотворения преображающий. Радуйся, во благочестии возрастати нам помогающий. Радуйся, семейным мир и благость ниспосылающий. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Читайте также:
***Кондак 6Проповедника тя благочестия яви Господь во граде Иерусалиме, святый царю Соломоне: кто бо не умилится, воспоминая великия твоя добродетели, мудрость и нищелюбие, кто не прославит твоя суды праведныя и милосердыя, имиже люди твоя облагодетельствовал еси; о сем и мы прославляем прославльшего тя Господа и зовем Ему: Аллилуиа. Икос 6Возсиял еси Божиею благодатию, всехвальне Царю, яко путие жития твоего и судьбы народа твоего в руце Всемилосерднаго Господа Нашего с упованием премудро предавал еси, яко пророческою благодатию обогатился еси, и писания твоя богомудрыя, и притчей всехвальных собрание всем нам в назидании оставил еси, всехвальне Соломоне. Тако бо вельми возлюби тя и прослави тя Господь дарами Святаго Духа, имиже во славу Господню потрудился еси. Таковому о тебе промышлению Божию радующеся, зовем ти: Радуйся, познания свои не в угождение миру, а во славу Божию употребивый. Радуйся, своими устами слова, внушаемые тебе Духом Святым, возвестивый. Радуйся, в благоговении пред Творцем вся дела духовныя полагати ны научаяй. Радуйся, в час сомнений мысль благую и мудрую на сердце нам полагаяй. Радуйся, яко тобою поучахуся непрелестным путем спасения ходити. Радуйся, яко твоим за ны ходатайством надеемся спасения получити. Радуйся, иноков в богомыслии и трезвлении пречудно утверждающий. Радуйся, благовестником Христовым в трудех их помощь небесную дарующий. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 7Хотяй Владыка всяческих показати, яко путие спасения сынов человеческих не самослучайнии суть, но в деснице Его выну содержатся, пророком своим святым благоволи сие возвестити в писаниех богдухновеных, сего же ради тобою, богомудре Соломоне, наставляемыя, начало благое в упование на всесовершенный промысел Бога Всевышняго положим, ведуще о велицем служении твоем, пророче святый, ко спасению нашему, благодарне о тебе воспоем Господеви: Аллилуиа. Икос 7Дивнаго и пречуднаго заступника дарова тя, всеблаженне Соломоне, христоименитым людем в помощь, покров и защиту, яко да, ученьми твоими назидаеми и благомощными молитвами твоими сохраняеми, просим тя, царственный пророче: моли о нас Всеблагаго Бога, да, яко Судия и Мздовоздаятель праведнейший, не отвратит лица Своего от нас недостойных, присно согрешающих и преогорчевающих благоуторобие Его, но, яко Отец чадолюбивый не накажет ны зде, во временном житии нашем, да, отвергше тленная и временная, обрящем нетленная и вечная, тебе наставнику и покровителю нашему с надеждою воспевая: Радуйся, Бога Отца Безначального благоговейный служителю. Радуйся, Ипостаснаго Бога Слова неумолчный провозвестителю. Радуйся, Бога Духа Всесвятаго избранное жилище. Радуйся, Живоначальныя и Единосущныя Троицы носило и похваление. Радуйся, провозвестниче Благодати, сумняшихся в вере словом Божиим утверждаяй. Радуйся, молитвою твоею по воздуху плавающих от внезапныя смерти сохраняяй. Радуйся, нерадения и праздности известный прогонителю. Радуйся, трудолюбия, еже всякому благу утверждение, рачителю. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 8Странствие из страны полуденной во град Иерусалим преславная царица Савская соверши, к мудрости твоей, велехвальный Соломоне, приобщитися желая, ты с радостию сретал еси ю и исполнил еси благия желания сердца ея. Царица же Савская рече, яко блаженны суть людие, иже внимают словесем мудрости твоея. Сего же ради просим тя, святый пророче, озари разум наш светом Премудрости Божия, стези наша на путь заповедей Божиих направи, и милости небесныя ниспошли всем о тебе Господеви воспевающих: Аллилуйя. Икос 8Всеми благами земными от Предвечнаго Господа преизобильно одаренный и дарами благодати Его преславно озаренный, всеславный Царю Соломоне, прославил еси Имя Бога Всевышняго, и ныне в пророческом лице предстоиши пред престолом Его и молитвами твоима даруеши в скорбех отраду, в напастех защиту, в болезнех цельбу, и помогаеши всем к тебе прибегающим покаянием очиститися от скверны греховныя, и преуспети в чистем и богоугоднем житии. Сего же ради славословим тя сице: Радуйся, о скоротечности времени и безумии жизни для мира сего нам возвещающий. Радуйся, стяжания Духа Святаго и безстрастия, яко цель жизни по Бозе нам поставляющий. Радуйся, трезвению духовному и молитве сердечней на всякое время нас научающий. Радуйся, очищение и исправление нрава нам подающий. Радуйся, на путь исправления заблуждающихся направляющий. Радуйся, раны греховныя благоутробно врачующий. Радуйся, яко предстательством Твоим спастися уповаем. Радуйся, яко молитвами Твоими наследие небесное получити чаем. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 9Всякое естество Ангельское и человеческое зело возрадовашася, яко ты, покаянием омыл еси греси твоя и временное отпадение от Бога, пророче царственный, и Христом, Победителем смерти вечныя, от власти тартара свобожденный купно со отцем святым твоим в сиянии благодати Божия возшел еси на Небеса, и ныне подаеши всем обильные милости, богославне Соломоне, яко во славе вечной на Небесах пребываеши и воспеваеши Господеви: Аллилуиа. Икос 9Ветия доброгласныя и риторы всеискусныя не возмогут достойнее и справедливее воспети вся подвизи и все служение твое Богу и людем, о богоносне Царю, яко не мирская мудрость, но Духа Святаго действо умудри тя. Мы же писании твоима богодухновенныма назидающеся, суету сует и мудрствование бесплодное отложивше, подлинное житие в Бозе и благодати Его обрящем и, предстательством твоим, в вере в Подателя жизни вечныя невозбранно укрепимся и тебе, заступнику нашему, сице ныне со умилением воззовем: Радуйся, в невечернем дни Царствия Божия почивающий. Радуйся, трисвятую песнь херувимски со Ангелы и всеми святыми воспевающий. Радуйся, источниче сострадания, к людем приснотекущий. Радуйся, любящих тя от различных бед и напастей изымающий. Радуйся, изнемогающым унынием утешение подаваяй. Радуйся, мрачныя облаки скорбей и тревог разгоняяй. Радуйся, яко твоими за ны молитвами от падений греховных избавляемся. Радуйся, яко твоим к Богу предстательством от вражиих искушений свобождаемся. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 10Спастися нам преискренне желая, молишися за нас, многогрешных, у престола святой Троицы выну в сонме монархов праведных предстояще, достославне царю Соломоне, и молитвы твоима пособствуеши нам в странствии многотруднаго жития земнаго нашего, о еже в покаянии и благочестии скончати е, яко да сподобимся купно с тобою купно воспевати во веки веков Отцу и Сыну и Святому Духу: Аллилуйя. Икос 10Стена еси и заступление всем помощи твоея просящим, богоблаженне царю Соломоне, яко и ныне чад Божиих не оставляеши без предстательства и покровительства твоего; яко на всех, к тебе верою притекающих, милостивне призираеши, болящим исцеление подавая, скорбящих утешая, от бед избавляя, искушаемых страстьми в стоянии в заповедех утверждая, сомневающихся в истине Христовой утверждая. Сего ради, благодарни суще, воспеваем ти сице: Радуйся, яко светило светозарное в небеснем Царстве Солнца Правды блистающий. Радуйся, светом благодати твоея всех чтущих память твою просвещающий. Радуйся, двери милосердия Божия нам отверзающий. Радуйся, уста наша благодарением Господу за все исполняющий. Радуйся, умерщвленныя грехами души благодатию Христовою оживляющий. Радуйся, злосмрадие страстей от приходящих к тебе прогоняющий. Радуйся, сердца наша спасительным учением напояющий. Радуйся, молящихся тебе дарами Духа Святаго обогащающий. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 11Пение молебное и похвалу сию смиренную не презри, пророче Господень, се бо верою и любовию к тебе подвизаемы (пред образом святым твоим предстояще) ублажаем тя, заступника и покровителя нашего, и усердно молим тя: вознеси молитву твою ко Творцу и Богу Нашему, имаши бо к Нему дерзновение великое и не престай умоляти Его благосердие, и испроси нам дар коемуждо потребен, да зовем всех благих виновнику и подателю Богу: Аллилуйя. Икос 11Светом трисолнечным, горе озаренный, святый царю Соломоне, озари наша мрачныя души сиянием Божия благодати и настави ны верно исполняти заповеди Христа Бога и житие наше ко благополучию и радости управи. Вемы бо, яко много может молитва твоя пред благостию Спасителя Нашего, яко велиего Его пророка и угодника прехвальнаго. Сего ради со упованием благим молитвенно к тебе притекаем и взываем сице: Радуйся, телесных недугов свободителю. Радуйся, душевных болезней исцелителю. Радуйся, младенцем добрый воспитателю. Радуйся, юношам и девам в целомудрии наставление. Радуйся, старцем и немощным твердое укрепление. Радуйся, болящих и страждущих скорое посещение. Радуйся, от враг видимых и невидимых нас охраняющий. Радуйся, от нападения злых человек спасающий. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 12Благодать и милость от Господа испроси нам, святый Соломоне, и в час кончины нашея предстани в помощь нам, заступления твоего ныне просящих, и насилия демонскаго нас избави святыми и благомощными молитвами твоима: да возможем трудный путь мытарств воздушных проити добропобедно и да сподобимся в селениех райстих Пети Создателю Нашему: Аллилуйя. Икос 12Поим Богу велию славу за велицыи неизреченная Его благодеяния любовь Его и обетования Его, чрез тебе, святый пророче, явленныя. Достоблаженное бо житие твое бысть приготовлением к горнему миру к прехождением к вечности, Христом Спасителем ти купно со всеми праведники ветхозаветныма открытей. Сего же присносущнего блажества в Бозе и ны сподоби молитвами твоима, царю Соломоне, да с умилением взываем ти сице: Радуйся, на милость Божию к нам приклоняющий. Радуйся, Твоею помощию уповающих на Тя не оставляющий. Радуйся, в небрежении спящих благий и скорый возбудителю. Радуйся, бодрости и трезвения предобрый и богомудрый учителю. Радуйся, добре подвизающихся пречудно и благодатно укрепляющий. Радуйся, от внезапныя смерти без покаяния молящихся Тебе избавляющий. Радуйся, в час кончины тя на помощь призывающим предстательствующий. Радуйся, по кончине нашей, с любовию души наша в свое общение пред Богом приемлющий. Радуйся, богоблаженне пророче и царю Соломоне, к вечному единению с Господем Нашим ны богомудро предуготовляющий! Кондак 13О преславный угодниче Господень, пречудный пророче и благоверный царю Соломоне, зерцало Премудрости Божией, милостиво приими сие малое моление наше, от сердец наших с верою и надеждою тебе приносимое и умоли Царя царствующих и Господа господствующих, Христа Бога Нашего, избавити нас от всякия скорби в жизни сей и мучений вечных по кончине нашей, да сподобимся в Царствии Небесном вкупе с тобою Господеви воспевати: Аллилуйя. Молитва царю и пророку СоломонуО, великий угодниче Божий и преславный пророче, святый благоверный царю Соломоне, небесный наш заступниче и покровителю, и всех нас усердный пред Богом предстателю и защитителю! Предстоя Престолу великаго Царя и Бога нашего, в Троице Святей славимаго и поклоняемого, велие дерзновение имаши к нему, яко верный раб помазанник, пророк и угодник. В тебе убо, яко многомощному пред Господем ходатаю, прибегаем мы грешнии и недостойнии и умиленно просим тя: моли Триединаго Бога, обратит нас на путь покаяния и спасения. Огради молитвами твоими в мире живот наш, и во всем благом благое поспешение, и вся, яже к животу и благочестию потребная, нам даровати испроси, избави ны ото всяких напастей и бед, и напрасныя смерти, предстательством твоим избави, и от всех врагов видимых и невидимых покровом твоим защити. Сохрани молитвами твоими в мире, здравии и долгоденствии люди российская и буди крепкое им ограждение, да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, и сподобимся Небеснаго Царствия, славяще Отца и Сына и Святаго Духа и Твое святое заступление, во веки веков. Аминь.
Читать другие акафисты раздела "Православные акафисты" |
Разделы проекта: |
|
© Миссионерско-апологетический проект "К Истине", 2004 - 2024 При использовании наших оригинальных материалов просим указывать ссылку: |
|
|