Православные акафисты
Акафист четвертый преподобному Серафиму Вырицкому
Кондак 1
Избранный в конце веков возвестити миру,
яко жив Господь, светильник во тьме сущим Богом
утвержденный, утешение скорбящим, исцеление недугующим,
приими сие похвальное пение чад твоих, отче: Радуйся, преподобне Серафиме, радосте
наша и утверждение.
Икос 1
Возрадуйтеся днесь и взыграйте людие
русския: се бо во святых водворяется старец кроткий и
смиренный, наслаждается Божественным светом, с лики
ангелов сликовствует, зря Господа Славы, Егоже измлада
возлюби. Таковое неизреченное таинство зряще, воспоим
преподобному, радуяся:
Радуйся, Царствия Небесного насельниче.
Радуйся, ангелом и святых собором
сожителю.
Радуйся, яко Троицы таинство зриши.
Радуйся, яко светом Христовым
наслаждаешися.
Радуйся, яко Богу присно предстоиши.
Радуйся, яко фимиам твоя молитвы к Нему
восходят.
Радуйся, об отечестве твоем не забывый.
Радуйся, яко твоими молитвами мы и
поныне спасаемся.
Радуйся, преподобне Серафиме, радосте
наша и утверждение.
Кондак 2
Чистый и нелестный страх Божий вселися
измлада в тебе, отче, яко отеческим и матерним
благочестием, паче же словесами Божественных писаний
воспитанный, издетска Бога возлюби. Темже удивляяся
таковому твоему усердию, воспоим Богу: Аллилуиа.
Икос 2
Якоже прежде, тако и ныне: не в изобилии
и славе, не в довольстве всячестем, но в бедности и
нужде угодник Божий раждается. Обаче богатство
благочестия и Божественной любви изобильно в сем явися.
Темже похвальная возопиим:
Радуйся, благочестия родительскаго
наследниче.
Радуйся, измлада любви Божией
причастниче.
Радуйся, страхом Божиим напитанный.
Радуйся, Божественным писаниям внимавый.
Радуйся, святых путь с детства
возлюбивый.
Радуйся, житию их поревновавый.
Радуйся, младенцев праведных и
благочестивых похвало.
Радуйся, отроков богобоязненных
украшение.
Радуйся, преподобне Серафиме, радосте
наша и утверждение.
Кондак 3
Послушания плод достославный от
отрочества возделывал еси, отче, старцем Варнавою
наставляемь. Словесам Божественным внимая, родителей
твоих о Господе послушая, тесным путем Христовым текл
еси. Темже Господу таковое тщание в душу твою вложившему
воспоим: Аллилуиа.
Икос 3
Сладости иноческаго пути измлада
возжелал еси, отче. Обаче терпение, смирение и
послушание твое искушая, Господь отлагает обетования
исполнение, наставляя тя на путь притруднаго в миру
подвига. Сего ради, видя таковое о тебе Божественное
промышление, воспоим радуяся:
Радуйся, материю на труды
благословенный.
Радуйся, даже до кончины ту не
оставивый.
Радуйся, мирских трудов не презревый.
Радуйся, потом хлеб твой стяжавый.
Радуйся, послушания усердный делателю.
Радуйся, сладких плодов того
причастниче.
Радуйся, сущих в мире похвало.
Радуйся, иноков боголюбивых наставниче.
Радуйся, преподобне Серафиме, радосте
наша и утверждение.
Кондак 4
Егда явися в душе твоей, отче, желание
твердое мира отрещися, востекл еси во обитель, в оной
водворитися желая. Обаче слово старческое услышав,
повелевающее до времени в миру жити, не отыде скорбя, но
яко глас Божий прияв то, воспел Всепремудрому: Аллилуиа.
Икос 4
Господь повеле, Господь и устрои, посла
тебе, отче, в жены голубицу чистую, помощницу в трудах и
молитвах. Сию же прияв, отче, радуяся, не разлучися с
нею ни в жизни, ни во гробе. Мы же, зря благодать
честнаго супружества, умильно возопиим:
Радуйся, благаго супружества образе.
Радуйся, единомыслия во Христе явление.
Радуйся, чад добре воспитавый.
Радуйся, души их Богу вверивый.
Радуйся, благочестивым купцем образе.
Радуйся, тружениче усердный, свое дело
добре правивый.
Радуйся, алчущих и страждущих кормителю.
Радуйся, сирот и всеми оставленных
попечителю.
Радуйся, преподобне Серафиме, радосте
наша и утверждение.
Кондак 5
Притруднаго подвига пустынножительства и
затвора благочестивое житие в миру не удобее есть.
Соблазнов мира сего избежати како возможно, живя с
дольними и ходя плотию? Обаче благодатию Божией
покрываемь, неврежден явился еси, отче, воспевая присно:
Аллилуиа.
Икос 5
Видев преподобный искушения, соблазны и
многомятежные попечения мира сего, не уклонися к
дольним, обаче восприяв ревность духовную, к чертогам
небесным устремляясь, горя любовию к сладчайшему
Владыке, имя Христово присно имея в сердце своем. Сего
ради и мы, того примером вдохновеннии, воспоим таковая:
Радуйся, молитвы делателю чудный.
Радуйся, имя Иисусово в сердце своем
присно носивый.
Радуйся, призыванием Сына Божия всяко
дело освящавый.
Радуйся, благодатию Того присно
покрываемый.
Радуйся, яко хранил тя Господь в мире
сем.
Радуйся, яко за молитвы твои и сущии с
тобою спаслися.
Радуйся, лика преподобных изрядное
украшение.
Радуйся, в миру живущих пречудное
утешение.
Радуйся, преподобне Серафиме, радосте
наша и утверждение.
Кондак 6
О, чудесе новаго! Егда прииде время
обетования Божия, не усумнеся, не охладе преподобный, не
убояся старости, но вся ни во что же вменив, с супругою
единомысленною раздаде вся имения своя, облекошася в
ангельстий образ и во святей обители вселишася. Сию
твердость преподобных видя, умильно Богу воспоим:
Аллилуиа.
Икос 6
Година лютая прииде на землю Русскую,
егда во ангельстем чине водворися преподобный. Престолов
попрание, льсти и обмана водворение, крови пролитие и
всякаго зла торжество. Обаче, к почести вышняго звания
устремляясь, возрасте преподобный в подвизе иночестем.
Сего ради воспоим таковая:
Радуйся, мир и вся яже в нем за вратами
обители оставивый.
Радуйся, о едином Христе в сердце твоем
радость имевый.
Радуйся, монашескаго послушания лествицу
скоро прошедый.
Радуйся, яко к жизни иночестей в мирстем
житии себя добре приготовивый.
Радуйся, иноков смиренных и терпеливых
украшение.
Радуйся, делателю сердечной молитвы
нарочитый.
Радуйся, яко фимиам к небу восходивый.
Радуйся, яко благоухание Господу Богу
бывый.
Радуйся, преподобне Серафиме, радосте
наша и утверждение.
Кондак 7
Восхоте Господь призвати тя, отче,
упасти овцы Своя расточенныя, смятенныя бурею злобы.
Сего ради до конца пройдя послушаний иноческих лествицу,
возведен был еси к благодати духовничества. Темже
Единому Пастырю душ человеческих воспел еси: Аллилуиа.
Икос 7
Воистину утешителем явился еси чадом
твоим, отче преподобне, злобой вражеской удручаемым,
отцем духовным, пастырем и попечителем душ овец
Христовых. Сего ради стекахуся к тебе людей множество,
взыскуя грехов оставления, в напастех укрепления, в
скорбех утешения. Темже исхищал еси их из уст вражиих, к
погибели влекомых. Сии же спасение свое видя, вопияше
сицевая:
Радуйся, пастырю добрый.
Радуйся, духовниче изрядный.
Радуйся, воистину глубину души зревый.
Радуйся, к покаянию ту возводивый.
Радуйся, всем приходящим к тебе
сострадавый.
Радуйся, яко о своих, о бедах их
скорбевый.
Радуйся, яко тобою тысящи оставление от
Христа грехов прияша.
Радуйся, яко бездну милости Того
познаша.
Радуйся, преподобне Серафиме, радосте
наша и утверждение.
Кондак 8
Како не дивимся Божиему промышлению о
тебе, отче? Старца болезненнаго и притруднаго изводит
Господь из обители накануне разорения, попрания и
убиения братии, обаче не подвига мученическаго лишити
преподобнаго хотяше, но к новому преславному деланию
возводяше. Сего ради, промышлению Божиему дивящеся,
воспоим, вернии: Аллилуиа.
Икос 8
Прииди, человече, и виждь, яко не своею
волею, своим умом и своими деяньми возводятся чада
Христовы к совершенству, но единым Господем,
исправляющим пути человеческия. Тако бо промышление
Божие о старце святем видяще, воспоим похвальная:
Радуйся, учениче Христов присный.
Радуйся, Того путей тощно взыскавый.
Радуйся, волю Божию законом себе
положивый.
Радуйся, даже до смерти тоя не
отступивый.
Радуйся, Божественному промышлению всего
себя вверивый.
Радуйся, тем к почести вышняго звания
возведенный.
Радуйся, хотящим Богу угодити образе.
Радуйся, в путях Того ходящим
наставниче.
Радуйся, преподобне Серафиме, радосте
наша и утверждение.
Кондак 9
Егда вселился еси, отче, в веси
Вырицкой, тогда паче просиял еси в подвизе молитвы.
Недуги, яко труды телесныя тебе быша, одр болезни яко
храм вменяшеся. Обаче дух твой ничем не стесняемь,
возносился присно к Богу, вопия Ему: Аллилуиа.
Икос 9
ВозРадуйся и возвеселися весь Вырицкая,
яко прияла еси молитвенника великаго за землю Русскую и
народ наш. Того молитвами и мы доныне покрываеми,
воспоим похвальная:
Радуйся, ангелов служения причастниче.
Радуйся, Небесного Царствия красот и
таин зрителю.
Радуйся, дальняя провидевый.
Радуйся, грядущая, яко настоящая
прозревавый.
Радуйся, яко за молитвы твоя грады и
веси в мире сохраняются.
Радуйся, яко и врази лютии твоею
молитвою укрощаются.
Радуйся, за землю Русскую, врагом
попираемую, моливыйся.
Радуйся, яко вторый преподобный Серафим
на камени подвизавыйся.
Радуйся, преподобне Серафиме, радосте
наша и утверждение.
Кондак 10
О, дивное чудо! В вышняя простираяся, не
оставил еси, отче, чад твоих, в мире сущих. Но яко
источник чудотворный был еси: исцеление недугующим,
погибающим спасение, скорбящим утешение. Вся был еси
всем, вопиющим Богу: Аллилуиа.
Икос 10
Обильный дар чудотворения явися в тебе,
отче, егда паки стекахуся к тебе от всех сторон людей
множество, яко и не чающим, безнадежным и оставленным
подавал избавление Господь молитвами твоими. Людие же,
видя благодать таковую в тебе, отче, воспевали радуяся
похвальная:
Радуйся, чудотворче новый
преизряднейший.
Радуйся, всемогущества и милости Божией
явление.
Радуйся, яко тобою неисцельные
исцеляются.
Радуйся, яко тобою безнадежные
воздвизаются.
Радуйся, яко обстояния житейстии твоими
молитвами пременяются.
Радуйся, яко беды и напасти
растворяются.
Радуйся, обретение благ нечаемых.
Радуйся, отгнание зол неведомых.
Радуйся, преподобне Серафиме, радосте
наша и утверждение.
Кондак 11
Егда приспе время разлучитися от телесе
старцу святому, Cама Владычица мира явилася ему, к
небесным обителям восход указуя. Возрадовася тогда
преподобный, обаче со страхом возопи ко Господу:
Аллилуиа.
Икос 11
Яко плод сладчайший принесл еси Богу
житие твое, отче, приими дух мой, Владыко, раба Твоего,
якоже Сам восхотел еси. Сию кончину праведную зряще,
воспоим со страхом:
Радуйся, вертограда Господня плод
краснейший.
Радуйся, Того спасительнаго сеяния
предоброе прозябение.
Радуйся, яко житие твое славно.
Радуйся, яко кончина твоя честна.
Радуйся, яко ко Господу восходиши.
Радуйся, яко среди небесных красот
Господа славы зриши.
Радуйся, яко ангели восхождение твое
зряще возрадовашася.
Радуйся, яко святии Божии купножителя
прием тя возвеселишася.
Радуйся, преподобне Серафиме, радосте
наша и утверждение.
Кондак 12
Не престаша по преставлении твоем, отче
преподобне, чудеса от гроба твоего источатися. Се бо
Бог, во святых Своих дивен сый, дарова тебе благодать
Свою, да всякий к тебе, яко к живому притекая,
благовременну помощь обрящет и благодарно воспоит Богу:
Аллилуиа.
Икос 12
Сбыстся воистину в тебе, отче,
проречение: праведник во веки живет. Се бо и мы николиже
тебе видевше, вемы, яко не точию жив еси, но и всякому
прошению внимаеши и скоро на помощь поспешаеши избавити
от бед чтущия святую память твою. Исцеляеши, заступаеши,
возставляеши и всем вся даруеши, вопиющим ти таковая:
Радуйся, угодниче Божий истинный.
Радуйся, ищущим спасения наставниче.
Радуйся, яко явил еси како в мире сем
Богу угодити.
Радуйся, яко научил еси Того любити.
Радуйся, живущих в мире утверждение.
Радуйся, иноков отрада и похваление.
Радуйся, всем вся был еси, отче
священнейший.
Радуйся, Духа Святаго храм одушевленный.
Радуйся, преподобне Серафиме, радосте
наша и утверждение.
Кондак 13
О предивный отче Серафиме, нынешнее наше
приими приношение, и не остави чад твоих, тобою Богу
молящихся. Яко да помилует нас Всещедрый, не помянет
беззаконий наших, и паки явит на нас милость
безпредельнаго благоутробия Своего, к покаянию нас
обратит, очистит грехи наша и поставит пред Собою
непорочных в превечном дне со всеми святыми, вопиющих
дивному Богу нашему: Аллилуиа.
Этот кондак читается трижды, затем 1-й
икос: «Возрадуйтеся днесь...» и 1-й кондак: «Избранный в
конце веков...»
Молитва преподобному Серафиму Вырицкому
О пречудный отче Серафиме, небесный
жителю, Святаго Духа храме, ангелом собеседниче, святым
сожителю! Призри от небесных обителей, идеже ты ныне
водворяешися, на нас, чтущих святую память твою. Се бо
мы, яко сущаго с нами, молим тя, отче, не забуди чад
твоих, имже обещался еси не оставити их. Виждь, отче
Серафиме, яко от дел несть нам спасения, жизнь наша
иждивается, и богатства инаго не имамы, разве скорбей,
болезней и обстояний многовидных. Обаче и мы, поне и
грешныя есмы, но Господа и Спаса нашего Иисуса Христа
любим, и прощения грехов наших чаем. Темже припадаем
тебе, и просим: молися за ны, отче Серафиме, яко
дерзновение имея к Небесному Царю. Помяни нас, помощи
твоея требующих, и умоли Господа Славы грехов прощение
нам даровати, в житии сем нас укрепити, делателей
заповедей Божиих сотворити, спасение улучити и внити,
аможе ничто нечистое не входит - в Царствие Небесное,
идеже ты со всеми святыми в незаходимей славе воспеваеши
Отца и Сына и Святаго Духа, Троицу единосущную и
нераздельную, царствующую во век века. Аминь.
|
