Православные акафисты
Акафист третий Преображению Господню
Вместо первого Кондака поется тропарь
праздника:
Преобразился еси на горе, Христе Боже,
показавый учеником Твоим славу Твою, якоже можаху, да
возсияет и нам, грешным, свет Твой присносущный
молитвами Богородицы, Светодавче, Слава Тебе.
Икос 1
Во всего человека облекшийся, Господи,
просветил еси на горе Фаворстей естество наше и
изменением вида Твоего Богосоделал его, тем же вопием:
Господи, очисти и наши души к
Божественному восхождению на гору Святую Твою.
Господи, просвети ум наш, да во свете
Твоего Лица узрим свет.
Господи, даждь быти и нам самовидцами
славы Твоея.
Господи, измени и нас изменением лучшим.
Господи, во свете лица Твоего пойдем и о
Имени Твоем возрадуемся во веки!
Кондак 2
О Господе Спасителе нашем радующеся в
день сей, поем песнь в веселии: Аллилуиа.
Икос 2
Слово Божие, нас ради воплотившееся,
просвещает земный состав наш, тем же чертог славы
будущия зряще, взыдем на гору Господню и к Нему
воззовем:
Господи, осияй нас Божественным
облистанием Твоим
Господи, яви нам единый путь лица
Твоего.
Господи, возвыси дух наш, да узрим славу
Преображения Твоего.
Господи, во свете лица Твоего пойдем и о
Имени Твоем возрадуемся во веки!
Кондак 3
Лицы ангельстии, сошедше на гору
Фаворскую, трепетно зряще славу Господа, воспевают
песнь: Аллилуиа.
Икос 3
Апостоли, горы достигша, яко обители
райския, радости исполнишася и возопиша: «Господи, добре
нам зде быти», и мы, подражающе им, вопием:
Господи, добре нам зде быти с Тобою.
Господи, добре нам с Тобою тамо быти.
Господи, добре нам с Тобою в скорби
быти.
Господи, добре нам с Тобою во славе быти
Господи, добре нам с Тобою в смерти
быти.
Господи, добре нам с Тобою и по смерти
быти.
Господи, во свете лица Твоего пойдем и о
Имени Твоем возрадуемся во веки!
Кондак 4
Высоту небесного жития и славы
присносущныя, Божественное сияние даруй рабом Твоим,
празднующим Твое Преображение и поющим песнь: Аллилуиа.
Икос 4
Уподобися гора Фаворская селению
райскому, светлостию солнечною сияющая и землю всю
озаряющая и всех вопити научающая:
Господи, сподоби со Апостолами ныне Тебе
поклонитися.
Господи, даждь нам молитвами
просветитися.
Господи, даждь Твое светлое Преображение
верою узрети.
Господи, даждь силу его дивно воспети.
Господи, во свете лица Твоего пойдем и о
Имени Твоем возрадуемся во веки!
Кондак 5
Твоей, Христе, славе непостижимей
Апостоли дивляхуся и радостно пояху песнь: Аллилуиа.
Икос 5
Видеша на Фаворе Моисей и Илия от Девы
Бога воплощеннаго человеком на избавление, с удивлением
и радостию взываша:
Господи, Ты еси камень в пустыни
разверзший.
Господи, Ты еси море Чермное посекший.
Господи, Ты еси враном в пустыни люди
питати велевший.
Господи, Ты еси Бог, к человеком
снизшедый.
Господи, во свете лица Твоего пойдем и о
Имени Твоем возрадуемся во веки!
Читайте также:
- Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
- Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.
***
Кондак 6
Отеческого существа сияние вечное, Сыне
Божий возлюбленный, доброты благолепие учеником Своим
милосердно явил еси, его же не можаху вмещати, воспеша
радостно: Аллилуиа!
Икос 6
Юже во двою существу, во Ипостаси
Единей, Бог-Слово всему Божеству соедини человечество,
наше спасение устрояя, обильно невещественный свет
показал, его же со страхом и радостию видевше, вернии
возопиша:
Господи, во свете Твоем наши пути
направи.
Господи, сиянием его на стезю правды и
истины настави.
Господи, светом Твоим души наши
просвети.
Господи, им же естество наше чудне
преобрази.
Господи, во свете лица Твоего пойдем и о
Имени Твоем возрадуемся во веки!
Кондак 7
Иже купину прикоснувшуюся огню
сохранивый неврежденно, Господи, ныне и Богосиянную
плоть Твою показал нам, поющим радостно: Аллилуиа!
Икос 7
Илию и Моисея неизреченно осиял еси,
стоя посреде Апостолов Твоих, Господи, да Твое покажеши
яве неизреченное Второе пришествие, тем же Ти взываем:
Господи, и нам Отеческий глас внуши.
Господи, и нашу волю в Твое послушание
приими.
Господи, и нам Божественное житие
приложи.
Господи, Твое милосердие покажи.
Господи, во свете лица Твоего пойдем и о
Имени Твоем возрадуемся во веки!
Кондак 8
Света от Света, Бога Истинна от Бога
Истинна, светом наставляющего тварь, величаем и поем:
Аллилуиа.
Икос 8
Узревше мысленно Божество Отца и Духа в
Сыне Единородном, блистающе станем вси во граде Бога
живаго и воззовем:
Господи, и нас любовию Своею привлецы.
Господи, Божественным желанием нас
премени.
Господи, облаком светлым нас осени.
Господи, ризы души убели.
Господи, во свете лица Твоего пойдем и о
Имени Твоем возрадуемся во веки!
Кондак 9
Сый прежде век, светом, яко ризою
одеяйся, паче солнца на Фаворе просиял еси, Ему же
велегласно поем: Аллилуиа.
Икос 9
Естество человеческое воспринял еси,
Господи, Божеством Своим просветил его, сего ради
благодарственне вопием:
Господи, светоносную благодать нам
вдохни.
Господи, помыслы мудрыми нас осени.
Господи, любовию Своею нас посети.
Господи, благодатию Твоею нас освяти.
Господи, во свете лица Твоего пойдем и о
Имени Твоем возрадуемся во веки!
Кондак 10
Хотя явити славу Твою, на горе
преобразился еси, Христе, да уразумеем страдания Твоя
вольная и воспоем Ти песнь: Аллилуиа.
Икос 10
Разумом Божественным наставляя, сиянием
просвещая, света жилище боголепно явил проповедником
Твоим, Господи, да егда Тя узрим распинаема, мужественно
воззовем:
Господи, от грехов освободи.
Господи, от клятвы искупи.
Господи, от вечныя смерти спаси.
Господи, во Царствии Твоем помяни.
Господи, во свете лица Твоего пойдем и о
Имени Твоем возрадуемся во веки!
Кондак 11
Исхода Твоего, Господи, ужасахуся
пророцы и Апостоли и в трепете воспеша: Аллилуиа.
Икос 11
Согласно славяще Преображение Твое,
Господи, от бури отчаяния спасаемся вси. Надежду славы
чад Божиих, яко основание души, тако взывающим сохрани:
Господи, во веки благословенный.
Господи, над всеми превознесенный.
Господи, Ангелы радостно певаемый.
Господи, на земли человеками благодарне
славимый.
Господи, во свете лица Твоего пойдем и о
Имени Твоем возрадуемся во веки!
Кондак 12
Троичное явление на Фаворстей горе
Апостоли видевше, радостно возопиша: Аллилуиа.
Икос 12
Единородного от Отца славу зряще, духом
совозвышающеся, благочестне радостно воспоим:
Господи, на высоту добродетелей вознеси.
Господи, просвещение Твое источи.
Господи, мое естество светлостью
Божества Твоего просвети.
Господи, во свете лица Твоего пойдем и о
Имени Твоем возрадуемся во веки!
Кондак 13
О, Иисусе Христе, на Фаворе ради нас
преобразивыйся, Божественныя Твоея славы причастники и
нас сотвори, да и мы во свете лица Твоего пойдем и
непрестанно верою воспоим: Аллилуиа, Аллилуиа, Аллилуиа!
|
