Акафист святителю Петру Цетиньскому

Кондак 1

Избранный и в чудесех дивный святителю, Церкве Святыя небоявленное украшение, и усердный молит-венниче за род православный, отче Петре! В песнех с любовию хвалим тя, святаго заступника нашего, ты же, яко имеяй дерзновение пред Богом, предстательством твоим небесным от всяких нас бед свободи, да теплым сердцем непрестанно зовем ти: Радуйся, Петре Цетиньский, великий чудотворче.

Икос 1

Ангелоподобно пожив от рождества своего, всеблаженне Петре, десятолетен сый смиренно вступил еси во узкия врата обители Цетиньския, прияв благословение от сродника своего, митрополита Саввы. Зряще твою огненную любовь ко Христу Господу, вкупе с лики ангел и святых велегласно вопием:

Радуйся, яко от младых ногтей на своя детская рамена велий крест монашескаго живота приемый.

Радуйся, яко избранием своим Небо и землю удививый.

Радуйся, яко пророку Самуилу подобяся, от младости себе Богу в дар принесл еси.

Радуйся, яко родительское благословение, яко великую святыню, издетска стяжавый.

Радуйся, яко надежда Черныя Горы и всего народа сербскаго явился еси.

Радуйся, яко преходящая земная суетствия презрев, под ногама попрал еси.

Радуйся, яко свое христоугодное житие во огни монашества распаливый.

Радуйся, яко к Царствию Небесному от пелен устремился еси.

Радуйся, яко Херувимам и Серафимам своим боголюбием подражавый.

Радуйся, яко Христа Бога и Его Пречистую Матерь зело обрадовавый.

Радуйся, яко измлада вервицу во оружие победы избравый.

Радуйся, яко на пост и молитву, яко на праздник стремивыйся.

Радуйся, Петре Цетиньский, великий чудотворче.

Кондак 2

Видящи преобильное благословение Господне, почивавшее на тебе, богознаменитый отче Петре, вся Черная Гора удивися твоей христоподобной жертве Бога ради и ближних. Показался бо еси подобен Спасу своему, мудрецы и старцы премудростию своею превозшедый, яко дванадесяти лет приял еси на ся ангельский образ, подвизая вся усердно славити Господа: Аллилуиа.

Икос 2

Разум небесный добродетельми стяжав, измлада созидал еси на Камени Живота душу твою. Сего ради промыслом Вышняго именование Петра Камене себе в монашестве стяжал еси. Мы же, зряще глубину Божия промысла о тебе, приносим ти сия благодарственныя гласы:

Радуйся, духовная веры твердыне, о нюже разбишася вся напасти демонския.

Радуйся, горо высокая, высотою подвигов своих небес достигий.

Радуйся, стено огненная, из неяже истекоша реки благодати Божия, вся нечистыя помыслы попаляющия.

Радуйся, столпе непоколебимый веры православныя, егоже вся еретики устрашишася.

Радуйся, земный ангеле и небесный человече, на земли живый, о Небесных помышлявый.

Радуйся, смиренный крестоносче, от младости на Христову Голгофу возшедый.

Радуйся, зерцало Церкве блистающее, в немже пречистый лик Христов ясно зрится.

Радуйся, свеще чистая, неугасимо любовию ко всему творению Божию пламенеющая.

Радуйся, златый сосуде Премудрости Вышняго, емуже никтоже противу рещи возможе.

Радуйся, благодатный светильниче, путь живота вечнаго нам освещаяй.

Радуйся, мироуханный фимиаме новозаветныя скинии, души наша облагоухаяй молитвами своими.

Радуйся, кроткий черноризче и неустрашимый боголюбче, на вся небесныма очесы взираяй.

Радуйся, Петре Цетиньский, великий чудотворче.

Кондак 3

Силою любве Божественныя, всемилостиве Петре, всякую земную радость от себе отринув, всем, яко свя-щенник Господень, в помощь был еси, скорбящия утешая, гладныя удовляя, отчаянныя укрепляя, болящия чу-десне исцеляя и вся подвизая едиными усты и единым сердцем вкупе славити Бога, зовуще Ему: Аллилуиа.

Икос 3

Имел еси любовь к молитве умней и уединению, святый отче Петре, обаче послушания ради Богу и любве к народу твоему предал еси себе несению креста сугубаго: духовнаго и мирскаго служения. Не возмогая же в Печи Патриаршей владычнее иго на ся прияти, отшел еси в сремскую землю, да рукою сербскаго митрополита Моисея во граде Карловцах во архиерея совершен будеши. Мы же, дивящеся твоим добродетелем, смиренно вопием:

Радуйся, новый святителю Савво, концы отечества твоего чудесне исходивый.

Радуйся, новый Иоанне-Владимире, крест Христов высоко воздвигий.

Радуйся, новый Симеоне Мироточивый, сербскую землю во единство призвавый.

Радуйся, новый Милутине, Черную Гору и Брду храмами украсивый.

Радуйся, новый Лазаре, в Мартиничех и Крусех, яко той на Косове просиявый.

Радуйся, новый Василие, Герцеговину, яко родную Петровичку в сердце носивый.

Радуйся, новый Константине, агарянския ополчения в бегство обративый.

Радуйся, новый Моисее, иже на умнем Хориве с Богом лицем к лицу глаголавый и законом землю свою ог-радивый.

Радуйся, новый Иисусе Навине, твоими бо молитвами стены Иерихонския падоша.

Радуйся, новый Давиде, твоею бо псалтирию молитвенныя песни Богу возношахуся.

Радуйся, новый Соломоне, восток и запад мудростию своею удививый.

Радуйся, новый Илие, громом анафем своих глубины сатанинския злобы потрясый.

Радуйся, Петре Цетиньский, великий чудотворче.

Кондак 4

Бурею безбожия от всех стран часто обстоимь, непоколебим светильник Новаго Израиля пребыл еси, процвет добродетельми, яко крин в пустыни черногорстей, христолюбче Петре, славя Бога, Иже тя постави на зла-тый свещник Церкве Своея и благодатию смирения избави от всех демонских козней: тем молитвами твоими осеняеми, радостно поем: Аллилуиа.

Икос 4

Слышав, яко злобный Махмуд паша грядет с сильным войском противу державы твоея, всечестный отче Петре, оградил еси отечество твое Крестом честным и мечем, неустрашимо встав во главе малаго своего и храбраго войска. Дивящеся храбрости и незлобию твоему, приносим ти хвалословия сия:

Радуйся, везира скадарскаго к миру призывавый, не хотяй кровь людскую на землю пролияти.

Радуйся, того баснотворных угрожений никакоже устрашивыйся.

Радуйся, на белом коне ездяй, витязи своя на брань за Крест Честный и златую свободу предводивый.

Радуйся, молитвами своими гордаго Голиафа сокрушивый и войско того в бегство обративый.

Радуйся, непобедимый орле, сердце имый голубине, любве ради ко отечеству кровь свою пролиявый.

Радуйся, потоками слез молитвенных новаго фараона в мори Чермнем потопивый.

Радуйся, никогоже, кроме Бога Живаго, убоявыйся.

Радуйся, нахождение безбожных от востока и запада в прах развеявый.

Радуйся, подвигами своими в народе сербстем Милошеву храбрость утвердивый.

Радуйся, победами славными Черную Гору и Брду соединивый.

Радуйся, воине правды и истины, церкви и монастыри от зависти демонския защитивый.

Радуйся, меж Скиллы и Харибды народ свой мудре проведый.

Радуйся, Петре Цетиньский, великий чудотворче.

Кондак 5

Боготечная звезда на небосклоне Балканстем явился еси, светозарный отче Петре, хотяй вверенное ти сло-весное стадо соблюсти в вере Христовой и паки обновити древнюю славу святородныя лозы Неманичей. На образ же жития твоего мнози взирающе, обратишася от злаго пути на путь истины, смирения и прощения, и единодушно вопияху Богу: Аллилуиа.

Икос 5

Видев, яко ни един народ может на земли сохранен быти без твердыя веры Божия, христианския любви и согласия, ты, богопросвещенный Петре, вся от рода своего призывал еси к послушанию Богу и Церкве Его, и Черней Горе Законник написал еси. Зряще таковую твою ревность к добродетели в народе твоем, велегласно вопием ти:

Радуйся, всенародный судие, истинный суд и правду о имени Иисусове творивый.

Радуйся, умирителю вражды в братии, сего ради сын Божий нареченный.

Радуйся, неотступный последователю святоотеческих преданий, николиже тех постыдивыйся.

Радуйся, единителю черногорский, вся племена простыми и премудрыми словесы братосотворивый.

Радуйся, учителю, не словесы токмо, но и делы, и всем животом своим злыя уста затворивый.

Радуйся, правдолюбче Христов, в дусе Закона Божия судивый.

Радуйся, бодрый хранителю каноничнаго устроения, от Церкви Христовы лжепастыри отгнавый.

Радуйся, враждующих умирителю, кровную месть ревностно искоренивый.

Радуйся, милосердный архипастырю, всякаго, на путь покаяния обратившагося, прощавый.

Радуйся, богогласная трубо Ноева ковчега, от потопа греховнаго многия спасый.

Радуйся, терпеливый крестоносче, словесное стадо ко пристанищу спасения тщанием приведый.

Радуйся, истинный воине Православныя веры, всяк плевел духовный Евангельскими словесы попаливый.

Радуйся, Петре Цетиньский, великий чудотворче.

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Кондак 6

Прият тя, яко своего, богоблаженне Петре, и вся царская Россия, защитница православнаго рода словенска-го. Возлюбив же свою мощную покровительницу и защитницу искреннею любовию, народу сербскому верность всероссийскому царю завещал еси, побуждая и вся православныя народы согласно Господу пети: Аллилуиа.

Икос 6

Просиял еси благодатию Духа и озарил еси зраками поучений своих вся окрестныя страны, духовно соеди-няя расточенныя чада православных словен, священный отче Петре. Тем, дивящеся любви к покровительнице твоей России и единству правоверных христиан, и мы со всеми концы зовем ти:

Радуйся, любовь к царстей России, яко богослов, во Александро-Невстей Лавре умноживый.

Радуйся, к народу русскому во век теплейшую любовь показавый.

Радуйся, о победе русскаго оружия коленнопреклонно Господу моливыйся.

Радуйся, яко и клевету от боляр царских нециих скоро забвению предавый.

Радуйся, власть свою и державу Словеносербскую царю Александру во управление предлагавый.

Радуйся, по званию царя словенскаго, на брань противу врагов христианских шедый.

Радуйся, яко поможением кораблей российских земли приморстей свободу давый.

Радуйся, любве ради к России противу Наполеона воевавый.

Радуйся, яко детскою радостию всякой победе русской радовавыйся.

Радуйся, падение стольнаго града Москвы морем слез оплакавый.

Радуйся, яко до последняго издыхания своего, верность христианскому царю сохранивый.

Радуйся, яко страшною анафемою вся изменники царския к покаянию побудивый.

Радуйся, Петре Цетиньский, великий чудотворче.

Кондак 7

Хотяй смутити покой души твоея, благочестиве Петре, древний змий подвиже на тя самозванца и клевет-ника дерзкаго, архимандрита Стефана, иже тя беззаконно оклевета пред двором и Синодом Русским. Обаче, егда правда твоя, яко полуденное солнце возблиста на Соборе Черногорстем, отступник злобный посрамися, имя же твое в матери России паче прославися, ты же со всею Черною Горою усерднее воспевал еси Господу: Аллилуа.

Икос 7

Новаго тайновидца Божественных откровений показа тя всемощная десница Божия, богоносне отче наш Петре. Непрестанными бо молитвенными воздыханьми, сердце свое исполнив именем Сладчайшаго Иисуса, очистил еси себе от страстных двизаний и соблазнов и нас научил еси звати тебе:

Радуйся, нелицемерною молитвою всяк гордый помысл смиривый.

Радуйся, на воплощеннем Слове Божии дом души твоея возградивый.

Радуйся, на струнех сердца своего краснейшия песни Господу приносивый.

Радуйся, Божественною Литургиею и подвигами добродетелей житие свое преобразивый.

Радуйся, душу и тело нетварным светом Господним тайно просветивый.

Радуйся, смирением своим дугу небесных добродетелей в сердцы своем возсиявый.

Радуйся, Иакову подобно часто с Богом молитвенно бравыйся.

Радуйся, от молитвы не отступавый, дондеже от Творца народу благо испросиши.

Радуйся, Телом и Кровию Богочеловека Христа раны паствы твоя целивый.

Радуйся, на исповедании апостола Петра Церковь Божию созидавый.

Радуйся, апостолу Павлу подобяся, послании своими Черную Гору поучавый.

Радуйся, на небопарныя богословия высоты крилами поста и молитвы возлетевый.

Радуйся, Петре Цетиньский, великий чудотворче.

Кондак 8

Чудное житие твое, Петре богославне, привлече ко скалам Черногорским люди от разных земель. Приемля же всякаго с христианскою широтою и мирностию духа, и враги твоя подвизал еси, блаженне, ко прославлению Бога, Емуже смиренно послужил еси, Тому убо купно с тобою возносим славословие: Аллилуа.

Икос 8

Весь погружен в богомыслие, духоносне отче Петре Цетинский, не попустил еси николиже, да искушения мира сего смутят покой сердца твоего. Обаче, промышляя о всем народе твоем, снизходил еси к немощем чело-веческим, внимая нуждам тех, побуждая нас приносити ти сия похвальныя гласы:

Радуйся, бодрый страже отечества твоего, от всяких обстояний тое избавляяй.

Радуйся, всеправославный молитвенниче, с радующимися радовавыйся и с плачущими плакавый.

Радуйся, человеколюбивый владыко, враги своя возлюбивый.

Радуйся, суеверий истребителю и всякаго неправаго мудрования мудрый отсекателю.

Радуйся, жертвенный пустыннолюбче, иным подаваяй, сам же лишавыйся.

Радуйся, правило веры и образе кротости, смирением своим волки во агнцы претворявый.

Радуйся, умирителю враждующих, вся несогласныя племена во едино собравый.

Радуйся, постниче, монашеский лик чудесы своими прославивый.

Радуйся, Цетиньский пустынниче, Духом Божиим деннонощно над паствою твоею бдевый.

Радуйся, любвеобильный певче, стихотворным искусством житие твое украсивый.

Радуйся, неутомимый трудниче, в поте лица своего хлеб свой снедавый.

Радуйся, непоколебимая котво веры, вдовичиею молитвою непрестанно во врата сердца Иисусова толцый.

Радуйся, Петре Цетиньский, великий чудотворче.

Кондак 9

Вси земли Сербстии, благословенне Петре, в тебе видеша отца и учителя своего, иже, яко друг Божий, имет дерзновение о них пред Богом молитвенно ходатайствовати. Помогая же всем, по мере сил своих, ты ко хри-стианскому согласию вся призывал еси, подвизая вся единым умом и единым сердцем звати Господу: Аллилуа.

Икос 9

Ветии человеческия не возмогают сказати тщание твое, всемудре отче Петре, с нимже народ твой право-славный от врагов от востока и запада Крестом честным и оружием освященным защищал еси. Идеже бо чада твоя брашася за свободу, ты всем был еси слуга во всем добром и честном. Зряще, како душу полагал еси за Бога и ближних, со умилением ти поем:

Радуйся, Карагеоргиевичей сотрудниче, тех на востание противу агарян всем сердцем благословивый.

Радуйся, истинный доброжелателю любимей ти Сербии, юже в песнех твоих материю нарицал еси.

Радуйся, Христов черногорче, всякую победу оружия сербскаго с велиим благодарением Богу ожидавый.

Радуйся, пламенный ревнителю, с Божиею помощию многократы велие вражие войско в бегство обращавый.

Радуйся, всех краев Сербских милостивый утешителю, победами своими порабощенныя ободривый.

Радуйся, громогласная трубо Христовы победы, свободу словенскую предвозвестивый.

Радуйся, славо и похвало Цетиньския митрополии, иже Печь Патриаршую в сердце хранивый.

Радуйся, твердейший адаманте, с велиею доблестию со безбожными бравыйся.

Радуйся, в добродетелех прекрасный, Приморие сербское от Наполеона свободивый.

Радуйся, добропобедный Господень ратниче, с воинами своими галлов у Дубровника низложивый.

Радуйся, светильниче ядранский, волки хищныя от древняго Котора изгнавый.

Радуйся, неусыпаемый молитвенниче, Босну и Герцеговину в молитвах своих присно поминавый.

Радуйся, Петре Цетиньский, великий чудотворче.

Кондак 10

Спаса Христа, и на смертнем одре не престал еси молити о пастве своей, угодниче Божий, богоизбранный отче наш Петре. И егда старейшины черногорстии, вкупе с сыновцем твоим, будущим владыкою Радивоем, тужаху, ты тех без утешения не оставил еси, именем Божиим подвизая храбры быти и верность православней России заповедуя, завещал еси тем мир и братское единство. Дивящеся твоей христианстей кончине, от всего сердца зовем Христу Богу: Аллилуиа.

Икос 10

Стеною смиренных молитв твоих, Петре равноапостольне, вся Черная Гора благодатию ограждается и светлостию украшается, имущи в себе благоуханное твое тело, яже по четырем летом, яко дивный плод Черно-горския земли, явися цело и нетленно. Просвещеннии же благодатию Божиею, изливающеюся на вся, достойно почитающия тя, с любовию приносим ти сия дары:

Радуйся, мироуханный крине духовный, всех христианских стран новоявленная похвало.

Радуйся, небесный вождю Черныя Горы и Брда надежная оградо молитвенная.

Радуйся, пустынный льве и царем земным смиренномудрое памятование.

Радуйся, черногорский княже и архипастырем духовным истиннаго пути указателю.

Радуйся, новопросиявший чудотворче и всех болящих и немощных целителю.

Радуйся, непобедимый боголюбче и православных народов собирателю.

Радуйся, телесных страстей умирителю и богопросвещенных монахов покровителю.

Радуйся, земный Херувиме и ревнителей благочестия истиннаго правило.

Радуйся, сокровищнице Духа Святаго и благочестивых сердец премудрый управителю.

Радуйся, многоплодная лозо винограда Христова и трудолюбивых христиан крепкий помощниче.

Радуйся, праведный лжеучений обличителю и словесных овец пастырю добрый.

Радуйся, неусыпаемый подвижниче и душ человеческих верный путеводителю.

Радуйся, Петре Цетиньский, великий чудотворче.

Кондак 11

Пение наше побеждается пред величием чудес твоих, преподобне отче Петре, равночисленныя бо звездам небесным песни аще приносим ти, ничтоже совершаем достойно, яже даруеши нам, обаче благодарственно во смирении духа поем Господеви: Аллилуиа.

Икос 11

Светило явился еси, святче Божий Петре, всем блуждающим во тьме греховней, заблудшия на путь правый возвращая и вся отпадшия от веры праотеческия и благочестия чудесы своими на покаяние наставляя, и вся ко славе Божией обращая. Сего ради приносим ти песни благодарения сицевыя:

Радуйся, молитвами твоими Небо к земли приклоняяй, землю же к Небесем возводяй.

Радуйся, егоже благословлял еси, благословен бываше, егоже проклятию предавал еси, проклят бываше.

Радуйся, яко райским мироуханием нетленное твое тело благоухает и вся радости велия исполняет.

Радуйся, яко от всех концев люди к кивоту твоих мощей на всяк день на поклонение притекают.

Радуйся, силою благодати Божией от всякия болезни души и телеса исцеляеши.

Радуйся, Господу Христу подобно рыбу из езера в рыбарския сети чудесно привлекл еси.

Радуйся, судьбу лозы Петровичей ясно предсказавый.

Радуйся, яко и по мнозех летех по преставлении твоем завещанием своим Черную Гору и Россию сбли-жаеши.

Радуйся, обилием любве Божия к собору Петроградских святителей причисленный.

Радуйся, высотам добродетелей христианских современника твоего Серафима Саровскаго подражавый.

Радуйся, пророческим даром исполнен, грядущая, яко по книзе часто читавый.

Радуйся, провидяй рабство, грехов ради народа грядущее, гнев Господень слезною молитвою умягчавый.

Радуйся, Петре Цетиньский, великий чудотворче.

Кондак 12

Благодать Господню стяжав и дары многия от благочестивых родителей твоих обильно наследовав, Богоосвященне Петре, умножил еси я смирением и труды и не в земли сокрыл еси суетных сластей плотских. Тем благовременную и благодатную помощь испроси и нам, святый заступниче наш, к тебе усердно с верою притекающим, да твоим заступлением осененнии, Богу принесем хвалу: Аллилуиа.

Икос 12

Поюще преславное житие твое, чудный святителю Петре, неотступно просим многомощнаго твоего ко Господу предстательства, буди нам в мире сем крепкий помощник, в скорбех и бедах скорый избавитель, и ус-лыши ны, от всея души на всяк день всерадостно зовущих:

Радуйся, Живаго Бога верный поклонниче и догматов правых истинный последователю.

Радуйся, Отца и Сына и Святаго Духа сладкозвучная цевнице и Божественныя силы освященное миро.

Радуйся, Царя Истиннаго доблий воине и достояния Его добрый защитниче.

Радуйся, по Бозе и Богородице вся наша надеждо и рода Сербскаго небесная наградо.

Радуйся, Пресвятыя Богородицы служителю усердный и ликов Ангельских ближний друже.

Радуйся, горних селений плодородная ветво и Тела Христова процветший кореню.

Радуйся, Безплотных Сил собеседниче и святых Божиих сопричастниче.

Радуйся, Иерусалима Горняго каменю чистый и душ земных восхождение скорое.

Радуйся, Церкве торжествующия певче премирный и Церкве воинствующия верное прибежище.

Радуйся, Едемскаго вертограда смиренный градарю и в мори житейстем мудрый кормчию.

Радуйся, Солнца Правды светлости светильниче и сердец людских пламенное утешение.

Радуйся, Небеснаго Царствия кроткий служителю и народа твоего тихий учителю.

Радуйся, Петре Цетиньский, великий чудотворче.

Кондак 13

О великий святителю и чудотворче преславный, архиерею наш Петре Цетиньский! Милостивно приими сие малое моление, еже в похвалу тебе принесохом, боголюбивому и человеколюбивому заступнику нашему пред Престолом Пресвятыя Троицы. Умоли Господа Бога, да нам недостойным и добродетельми убогим дарует здравие души и телесе, яко да возможем в Царствии Небеснем со всеми святыми Ему вечно пети: Аллилуиа.

Сей Кондак глаголи трижды, посем Икос 1 и Кондак 1.

Молитва святителю Петру Цетиньскому

О великий святителю и чудотворче Божий Петре, равноапостольный проповедниче Евангелия Христова, пастырю разумнаго стада Его и столпе Церкве Православныя, неложный народный вождю, учителю и просве-тителю, великий Божий угодниче, приими со свойственным ти милосердием нас грешных, молящихся ти и к твоему всемощному заступлению и предстательству прибегающих.

Молимся ти, испроси нам у Всемилосерд-наго Человеколюбца Христа, Единаго Бога и Спаса нашего, да не помянет беззакония и грехи наша, но да по-милует нас по велицей милости Своей, да нам дарует душевное и телесное здравие, любовь, мир и единение, и вся полезная к вечному животу и спасению, в сердцах наших обнови безсмртную светлость истиннаго богопознания, да вся творим во славу Творца, Спаса и Бога нашего. 
О великий святителю и угодниче Христов, Цетиньский чудотворче, пастырю и молитвенниче всего рода Сербскаго и Православнаго, молитвами твоими и небесною благодатию Святаго Духа сохраняй Богом дарованное ти стадо и вси грады, веси и земли христианския от глада, мора, труса, потопа, огня, меча, нашествия иноплеменных, братоубийственныя рати и злобы, избави нас от всякия неправды и лжи, от безбожия, неведения, ереси и раскола, испроси нам у Христа Бога покаяние, да будем вси род твой по телеси и духу.
О Великий и Небесный Боже, Альфа и Омего всяческих, Начальниче веры нашея и живота нашего, приими молитвы Своего угодника, владыки святаго, той бо Ти молится за нас грешных и недостойных раб Твоих. Аще бо и Ти много согрешихом, обаче не отступихом от Тебе, Еди-наго Живаго и Истиннаго Бога и Спаса нашего, Емуже подобает от всякия твари всякая слава, честь и поклоне-ние: Отцу и Сыну и Святому Духу, ныне и присно и во веки веков. Аминь.

Тропарь святителю Петру Цетиньскому, глас 8

Приидите днесь, о православные, торжественне да возвеселимся, и да увидим всечестныя и прехвальныя добродетели, труды и подвиги, Черногорския страны светильника пресветла, иже во архиереех великаго Петра, достохвальнаго пастыря и учителя: тем же убо в Черногорскую страну сошедшеся днесь песненно да восхвалим: яко бо дивно сотвори Господь его, во святых своих, суща в земли четверолетна, показа нам нетленна: того молитвами, Христе Боже наш, спаси и помилуй души наша.

Кондак святителю Петру Цетиньскому, глас 4:

Насладимся вси днесь, божественные о святолюбцы, яко в настоящее время показа нам небо, предивныя и нетленныя мощи чудотворного святителя и таин Божественных строителя Петра, иерарха Христова: тем убо черногорскую звезду пресветлую днесь нам из гроба возсиявшую в песнех возвеличим и яко великаго душ наших попечителя и тепломолитвенника умолим, к нему вопиюще и умильно глаголюще: новоявленне во святых Петре, святителю премудре, черногорская похвало, молим тя, ихже многими труды и подвиги твоими упасл еси и за вся православныя молися во еже спастися душам нашим.

Величание святителю Петру Цетиньскому

Величаем тя, святителю отче Петре, и чтем святую память твою, ты бо молиши за нас Христа Бога нашего.