Православные акафисты
Акафист преподобной Параскеве Старобельской
Кондак 1
Избраннице Христовой, все житие свое Ему
послужившей и в вечныя селения райския, с великой славою
приятой, молитвеннице и заступнице нашей, преподобной
матери Параскеве, похвальныя песни воспоим вернии,
скорую бо помощь и утешение от нея обретаем и якоже
прежде, тако и ныне к ней прибегая и вопием ей тако: Радуйся, мати Параскево, скорая
помощница и теплая молитвенница о нас, грешных.
Икос 1
Ангельскими убо языки подобает
восхвалити тя, преподобная мати наша, кто бо возможет по
достоянию воспети подвиги твоя, житии равноангельском
тобою содеянныя, кто бо возможет исчислити чудеса, по
молитвам твоим явленныя. В тебе бо Господь, в последнии
времена сии, явил есть нам яко едину от древних угодниц
Своих. Мы же воспоминающе чудныя дела твоя вопием ти
сице:
Радуйся, ангеле земный, безплотное житие
явившая.
Радуйся, человече небесный, умом в
горняя возлетевшая.
Радуйся, Господом в сосуд благодати Духа
Святаго избранная.
Радуйся, на подвиг юродства Христа ради,
свыше благословенная.
Радуйся, измлада чудное житие явившая.
Радуйся, в среду и пяток во младенчестве
млека матерняго не вкушавшая.
Радуйся, тобою бо обитель Скорбященская
украшается.
Радуйся, тобою бо град Лисичанск
прославляется.
Радуйся, покрове крепкий, от бед и
напастей нас защищающий.
Радуйся, столпе церковный, нас в правой
вере укрепляющий.
Радуйся, скрижаль богописанная,
глаголами жизни вечныя испещренная.
Радуйся, кадильнице златая, молитвами
своими, яко фимиамом, пред Господом благоухающая.
Радуйся, мати Параскево, скорая
помощница и теплая молитвенница о нас, грешных.
Кондак 2
Виде Господь усердную молитву родителей
твоих, о неучености своей скорбевших и мудрое чадо
хотевших имети, дарова им тя, мати Параскево, имущую ум
свыше от Господа просвещенный, да юродством своим тщету
мудрости века сего обличиши и на пусть спасения многия
наставиши, вопиюще кротце в сердце своем: Аллилуиа.
Икос 2
Разум, от младенчества Господом
просвещенный имуще, с ранних лет Жениха своего Христа
всем сердцем возлюбила еси. Ему же Единому поработати в
житии своем восхотевши, дом родительский во отрочестве
оставила еси. В обители же Скорбященской водворившись,
яко крин сельный процвела еси, житием своим преславным
сияюще. О сем восхваляюще тя, вопием ти таковая:
Радуйся, всем сердцем Господа
возлюбившая.
Радуйся, Единому Жениху Христу себе
уневестившая.
Радуйся, дом отеческий ради Него
оставившая.
Радуйся, стопы своя на многоскорбный
путь спасения направившая.
Радуйся, обители Скорбященския похвало и
веселие.
Радуйся, градо Старобельска предивное
заступление.
Радуйся, смирения и кротости образе.
Радуйся, монашескаго послушания
безропотная испольнительнице.
Радуйся, монашескаго жития
ревнительнице.
Радуйся, жития иноческаго
насадительнице.
Радуйся, посмеяния и поношения без обиды
терпевшая.
Радуйся, мнимым безумием благодатныя
дары сокрывавшая.
Радуйся, мати Параскево, скорая
помощница и теплая молитвенница о нас, грешных.
Кондак 3
Силою Божией, в немощи совершающейся,
победила еси немощь плоти человеческия, блаженная мати,
от деяния к богомыслию восшла еси. Разум же совершен
богомыслием стяжав, непрестанно ум вперяла в горняя,
восхваляя Господа песнию: Аллилуиа.
Икос 3
Имеюще на себе благодать Святаго Духа
изобильно почивающую, духоносной наставницей людей
православных явилася еси. Мнозии бо, слышавшии о
богопросвещенном разуме твоем, к тебе притекаху,
вразумления ища. Друзии же в тебе познавши велию
угодницу Христову, молитвы твоея о себе испросиша, таже
и мнозии в скорбех, нуждах и болезнех от тебе скорую
помощь получаху. За сие же от нас приими песни сицевыя:
Радуйся, старице духоносная.
Радуйся, прозорливице богопросвещенная.
Радуйся, целительнице милостивая, язвы
греховныя врачующая.
Радуйся, светильниче пресветлый,
духовное омрачение просвещающий.
Радуйся, в обители подвизавшихся, мудрая
наставнице.
Радуйся, в мире живущих ко спасению
направлявшая.
Радуйся, яко для ближних своих
милосердною материю была еси.
Радуйся, чад духовных яко крылами,
молитвами своими покрывала еси.
Радуйся, грядущая, яко настоящая
созерцавшая.
Радуйся, смиренная Христова подвижница.
Радуйся, любовию к ближним горевшая.
Радуйся, унижения безропотно терпевшая.
Радуйся, мати Параскево, скорая
помощница и теплая молитвенница о нас, грешных.
Кондак 4
Буря обновленческаго шатания не
поколебала души твоея, мати Параскево. Яко бо добрый
воин Христов, крепко ты ополчилася еси, противу волков
хищных, стадо овец Христовых расхитити хотящих. Подобна
бо была еси мечу обоюдоострому, лукавство обновленческое
посецала еси, отступничество строго обличая, верных на
истинный путь православия наставила еси, поюще Богу:
Аллилуиа.
Икос 4
Слыша и видя велие отступление многих к
обновленческой прелести, велией ревностию по Бозе
Вседержителе возгорелася еси, о блаженная мати.
Обновленчество строго обличила еси, отступивших иереев
христопродавцами именовала еси, тех из храмов Божиих
изгоняя. Верныя же люди вразумляла еси, от сетей
обновленческих сохраняюще. Мы же, восхваляюще ревность
твою, поем ти сице:
Радуйся, обновленчества обличительнице.
Радуйся, нарушителей канонов церковных
строго наказующая.
Радуйся, церковное общение с
обновленцами строго воспрещавшая.
Радуйся, народу православному путевождь
истинный.
Радуйся, обновленческих иереев страх и
трепет.
Радуйся, тайных беззаконий строгое
изобличение.
Радуйся, стадо Христово от врагов
ограждавшая.
Радуйся, волцы хищныя далече от него
отгнавшая.
Радуйся, Православия поборнице.
Радуйся, расколов искоренительнице.
Радуйся, ревнительница по Бозе
Вседержителе.
Радуйся, кимвале доброгласный, правду и
истину вещающий.
Радуйся, мати Параскево, скорая
помощница и теплая молитвенница о нас, грешных.
Кондак 5
Богопротивнии обновленцы, яко волцы
хищнии, стадо агниц Христовых к отступлению от истинныя
веры склонити не возмогоше, из обители Скорбященския тех
изгнаша. Ты же, о мати Параскево, купно с сестрами
духовными горце со слезами вопияли: "Прощай Мати;
обитель святая, прощай". Возложивше же все упование свое
на Господа и Пречистую, оставльше обитель святую,
смиренно вопияли: Аллилуиа.
Икос 5
Видеша преподобная мати Параскево,
славную обитель Ростабарову, иноческими подвиги сияющую,
купно с блаженною Фаиною притекла в ню. Да и сей обители
добре поработаеши Господеви и многия людие ко спасению
направиши. Иночествующие же в обители сей и приходящии
на молитву в ню, в тебе угодницу Христову узревше,
вопияли ти таковая:
Радуйся, обители Серафимо-Успенския
новое украшение.
Радуйся, пришествием своим многих в ней
подвизавшихся, обрадовавшая.
Радуйся, монашествующих похвало.
Радуйся, в подвизе сущих укрепление.
Радуйся, непрестанную молитву в сердце
Господу возносившая.
Радуйся, некоей жене небесныя воинства
показавшая.
Радуйся, дерзновение велие ко Христу
имущая.
Радуйся, нищая духом, мира прелести
отвергшая.
Радуйся, чистая сердцем.
Радуйся, сияющая небесною красотою.
Радуйся, из обители Ростабаровой
безбожными изгнанная.
Радуйся, купно с блаженною Фаиною
молитвенница о нас непрестанная.
Радуйся, мати Параскево, скорая
помощница и теплая молитвенница о нас, грешных.
***
Читайте также:
- Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
- Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.
***
Кондак 6
Проповедницею истины в страшныя времена
богоборческия явилася еси, мати Параскево, преподобная.
Не убоялася бо убивающих тело, душе же повредити не
могущих. Веру Христову безбоязненно проповедала еси,
многим знаменьми и чудесы людей в ней утверждая. За сие
же темничныя заключения и ссылки претерпела еси, поюще
Победителю смерти: Аллилуиа.
Икос 6
Возсия в тебе новая исповедница
Христова, о, мати наша Параскево. В темницах и ссылках
пребывая, твердо стояти на камени исповедания веры
Христовой утверждала многих еси. Глад и жажду многажды
претерпевая, избиения, хлад и зной Христа ради перенесла
еси. Господь же везде тя хранивший, обидящих тя, строго
наказывал еси. Сему дивящеся, верно вопием ти:
Радуйся, новая исповедница Христова.
Радуйся, яко от Господа хранима везде
была еси.
Радуйся, Господа ради темничныя
заключения претерпела еси.
Радуйся, яко безбожными гонима была еси.
Радуйся, велия унижения и побои
понесшая.
Радуйся, алкавшая и жаждавшая Христа
ради.
Радуйся, темничнаго стража пеним своим
умягчившая.
Радуйся, гонителей многажды посрамившая.
Радуйся, безбожных дерзость низложившая.
Радуйся, силою духовною гонителей своих
в страх и трепет приведшая.
Радуйся, рабо Христова богохранимая.
Радуйся, Господом прославленная.
Радуйся, мати Параскево, скорая
помощница и теплая молитвенница о нас, грешных.
Кондак 7
Новое и дивное чудо бысть, егда святый
великомученик Георгий Победоносец тебе в заключении
явися, в землю Донбасскую шествовати повелев, да тамо
многия от погибели вечныя спасеши и приведеши ко Христу,
Ему же с трепетом и любовию вопиют Силы небеснии:
Аллилуиа.
Икос 7
Хотя Господь спасения нашего, яви тя,
мати Параскево, в земли Донбасской, яко некий пречудный
источник благодати Своея, хладныя от грехов, души
согревающий, жажду духовную насыщающий, ослепление
душевное просвещающий. Многия бо от погибели спасла еси,
ко Христу заблудшия овцы привела еси, болящия и недужныя
исцелила еси. Таже и вси в скорбех и напастех к тебе
приходящии скорую помощь от тебе приимаху. Ныне же от
них и от нас приими похвалы таковыя:
Радуйся, нас сирых к себе под покров
свой приемшая.
Радуйся, хладныя души согревшая.
Радуйся, умерщвленных грехами оживившая.
Радуйся, язвы греховныя исцелившая.
Радуйся, помрачения умов просветившая.
Радуйся, болезни телесныя исцелившая.
Радуйся, к покаянию призывающая.
Радуйся, заблудшия во едино стадо
Христово собравшая.
Радуйся, из уст адовых нас исхитившая.
Радуйся, стопы наша на путь спасения
направившая.
Радуйся, от бед и напастей защищающая.
Радуйся, спастися помогающая.
Радуйся, мати Параскево, скорая
помощница и теплая молитвенница о нас, грешных.
Кондак 8
Странницею на земли была еси, мати наша
Параскево, не имея бо где главы приклонити, многия места
проходила еси, семена веры Христовой в сердцах
человеческих влагая. Многия же злострадания в
странствиях с чадами духовными ты, мати, терпеливно
переносила еси, вопиюще Творцу своему: Аллилуиа.
Икос 8
Все житие твое бысть подвиг
многотрудный. Многую бо любовь к ближним имея, день и
нощь молитвы о них в душе своей возносила еси. В нужде
сущим скорую помощь подавала еси. Сама же, яко ангел
безплотный никогда же попечения о плоти своей не имела
еси, ея многими лишениями утесняя, да покорна духови
будет. Сие похваляюще, сице тебе вопием:
Радуйся, ради ближних себе не щадившая.
Радуйся, для мира безумною бывшая.
Радуйся, святыни киевския многажды
посещавшая.
Радуйся, Иверскую землю стопами своими
освятившая.
Радуйся, татей немилостивых наказавшая.
Радуйся, стадо свое, духовное, от бед
ограждавшая.
Радуйся, чревоугодие обличающая.
Радуйся, оставляти молитву возбраняющая.
Радуйся, младенца, ходити не могущего,
чудесно исцелившая.
Радуйся, суетной славы избегати нас
научающая.
Радуйся, водный источник, шедшим с
тобою, пречудно явившая.
Радуйся, в нужде сущим скоро помогающая.
Радуйся, мати Параскево, скорая
помощница и теплая молитвенница о нас, грешных.
Кондак 9
Всяк притекаяй к тебе, мати Параскево,
обретает скорую помощницв в бедах и напастех защищающую,
в скорбех и нуждах помогающую, от очес горькия слезы
отирающую, здравие душам и телесем дарующую, и
воздвизающую всегда благодарити за вся Господа песнию:
Аллилуиа.
Икос 9
Ветия многовещаннии не возмогут
изглаголати всех чудес, от тебе, мати Параскево,
источаемых. Мощи бо твоя многоцелебныя источником
благодатныя помощи, всем притекающим к ним, являются.
Ими бо град Лисичанск ныне зело украшается. Людие же, в
нем и окрестных градех и весех живущия, крепкий покров в
тебе обретают, на твоя молитвы многомощнии упование свое
возлагают и вопиют ти таковая:
Радуйся, мати наша Параскево, без помощи
твоей не остави нас.
Радуйся, покровительнице наша, от бед и
напастей огради нас.
Радуйся, помощнице наша, в скорбех и
нуждах нам помози.
Радуйся, духовная мати наша, нас от
падений греховных огради.
Радуйся, целительнице наша, недугующих
уврачуй.
Радуйся, молитвеннице наша, спасение
молитвами твоими даруй.
Радуйся, агнице Христова, кротости и
смирению нас научи.
Радуйся, голубице чистая, жити
целомудренно нас укрепи.
Радуйся, щите крепкий, от враг видимых и
невидимых нас огради.
Радуйся, громе, супостаты устрашающий,
полчища бесовския от нас отжени.
Радуйся, древо многоплодное, любовию ко
Господу и ближним нас напитай.
Радуйся, удице златая, из челюстей
вражиих нас исхити.
Радуйся, мати Параскево, скорая
помощница и теплая молитвенница о нас, грешных.
Кондак 10
Спасение души паче мирския суеты
возлюбивши, все житие свое на ниве Христовой добре
поработала еси. Не точию бо сама спасение обрела еси, но
и велие стадо овец Христовых за собою ко вратом Царствия
Небеснаго привела еси. Мы же о сем радующеся поем
Христу: Аллилуиа.
Икос 10
Стене подобно стояше народ мног окрест
жилища твоего, о твоей кончине извещенный. Многие же
слезы проливающе, горце вопияли ти: "О, мати блаженная
Параскево, како тя зря бездыханну, сиротами нас
оставившую. Кто же на правый путь наставит нас, кто же
печальных утешит нас? Ныне бо ты душею ко Престолу
Господню воспарила еси, идеже ныне предстояще, поминай
чад своих, богомудрая, вопиющих ти":
Радуйся, на небеса душею возлетевшая.
Радуйся, ангелами радостно сретенная.
Радуйся, о разрешении от плоти Пречистую
молившая.
Радуйся, в день Ея иконы
"Избавительницы" в горняя возлетевшая.
Радуйся, день кончины своея
предузнавшая.
Радуйся, о ней предречение от блаженныя
Марии приявшая.
Радуйся, многими оплаканная.
Радуйся, мощи своя нам в утешение
оставившая.
Радуйся, на небеси с лики ангельскими
Творца славословящая.
Радуйся, нас, на земли сущих, не
забывающая.
Радуйся, Горняго Иерусалима достойная
жительница.
Радуйся, града Лисичанска многомощная
покровительница.
Радуйся, мати Параскево, скорая
помощница и теплая молитвенница о нас, грешных.
Кондак 11
Пение похвальное приими ныне нами тебе
возносимое, мати Параскево. К тебе бо притекающе,
поминая милости твоя, нам недостойным явленныя.
Восхваляюще же тя, великую угодницу Христову,
прославляем Господа, дивнаго во святых Своих, песнию:
Аллилуиа.
Икос 11
Светозарною звездою, путь правый
указующей, являешися ты, дивная рабо Господня, мати
Параскево. Живущих бо нас во мраце греховнем на путь
спасения направляеши, охладевшия сердца наша любовию ко
Христу возжигаеши, мрак греховный просвещаеши, от сетей
лукаваго нас спасаеши. За сие тебе приносим благодарныя
песни сия:
Радуйся, тьмы греховныя отгнание.
Радуйся, поспешения бесовскаго
избавление.
Радуйся, стрело, язвящая невидимыя
враги.
Радуйся, молние, повергающая в бегство
бесов полки.
Радуйся, коварства вражескаго обнажение.
Радуйся, замыслов злых поражение.
Радуйся, мерзкаго чародейства
разрушение.
Радуйся, лукавства и лжи обличение.
Радуйся, защитнице неправедно гонимых.
Радуйся, заступнице сирых и убогих.
Радуйся, иереев, недостойно живущих
строгая обличительница.
Радуйся, пастырей истинных всегдашняя
покровительница.
Радуйся, мати Параскево, скорая
помощница и теплая молитвенница о нас, грешных.
Кондак 12
Благодати источник явила еси, в святых
мощех твоих, о, блаженная мати Параскево. Никто же бо из
притекающих кним тощь и неуслышан отъиде. Всякому бо
чтущему память твою спасение вечное ходатайствуеши. О
сем радующеся в благодарности вопием Спасителю нашему:
Аллилуиа.
Икос 12
Поюще ти, мати Параскево, похвальные
песни сии, ублажаем кончину праведную и восхваляем
исповедничество твое, прославляем множество чудес, тобою
содеянных, молим привести ко спасению всех нас, любящих
тя и восхваляющих тя похвалами сими:
Радуйся, красото Церковная.
Радуйся, телесныя и душевныя чистоты
образе.
Радуйся, постников похвало.
Радуйся, притекающим к тебе крепкое
забрало.
Радуйся, девства чистоту сохранившая.
Радуйся, Духа Святаго жилище.
Радуйся, глад душевный утоляющая.
Радуйся, пиянства строгая
обличительнице.
Радуйся, трубо благозвучная, волю Божию
вещающая.
Радуйся, кадило благовонное, молитвы о
нас, яко фимиам возносящая.
Радуйся, скорбящих утешение.
Радуйся, унывающих ободрение.
Радуйся, мати Параскево, скорая
помощница и теплая молитвенница о нас, грешных.
Кондак 13
О, преподобная мати наша Параскево,
богоносная угоднице Христова, приими ныне возносимое ти
похвальное пение и, яко сердобольная мати, не лиши нас
твоея помощи и заступления, да сподобимся спасение
вечное улучити и наследовати Царствие Небесное, идеже
купно с тобою будем воспевати Святую Троицу ангельскою
песнию: Аллилуиа, Аллилуиа, Аллилуиа.
Сей Кондак читается трижды, затем
Икос 1 и Кондак 1.
Молитва преподобной Параскеве Старобельской
О, преподобная и богоносная мати наша
Параскево. Се ныне мы, чада твоя, усердно притекающе,
молим тя со слезами: буди нам теплой ходатаицей пред
Престолом Божиим о спасении душ наших. Вознеси свою
теплую молитву о нас, прибегающих к тебе, и просящих у
тебе помощи и заступления. Да в страшный день судный
помиловани будем и сподобимся стати одесную Творца
своего. Помози нам проити мытарства горькия и избегнути
вечнаго мучения. Скорая помощница наша, всегда
споспешествуй нам во благо. Исцели язвы наши душевныя и
телесныя, помажи их елеем милости твоея. В житейских
нуждах подаждь нам скорую помощь. Испроси у Создателя
нашего имети нам смирение, терпение и любовь ко Господу
и ближним своим. Огради нас от враг видимых иневидимых и
всякаго зла. Таже и всякаго призывающего тя в помощь и
притекающего ко святым мощем твоим не лиши своего
матерняго заступления. Молим же, о мати преблагая, не
даждь нам погибнути во гресех наших, да не предани будем
в час кончины на поругание злым духовом. Но да сподобися
улучити спасение душ и узрети тя в Царствии Небеснем,
идеже прославим Отца и Сына и Святаго Духа и твое о нас
пред Господем теплое заступление всегда, ныне и присно и
во веки веков. Аминь.
Тропарь преподобной Параскеве Старобельской, глас 5
Яко к целебному источнику, притекаем к
тебе, преподобная мати Параскево. Ты бо нас на путь
спасения наставляеши, смирению, терпению и любви
научаеши. Скорбныя сердца наша утешаеши, от враг видимых
и невидимых избавляеши. Моли Господа и Заступницу
Усердную да помиловани будем в день судный.
Кондак преподобной Параскеве Старобельской, глас 2
Любовию к Небесному Жениху Христу
уязвися, все житие Ему добре поработала еси. Многия
подвиги и труды подъяв, велие стадо овец заблудших к
Пастыреначальнику Христу привела еси. Юродством
благодатныя дары в себе сокрывающе, безумную мудрость
века сего обличила еси. Ныне же предстоя Престолу Божию,
моли спастися душам нашим.
|
