Православные акафисты / Акафист новомученикам Батакским

Православные акафисты

Акафист новомученикам Батакским

Кондак 1

Избрaннии рода болгарскаго мyченицы новии, яко избaвльшеся от злых злострадaньми, и вся грехи своя кровным крещeнием убелившии: молите Христа Бога нaшего многих прегрешeний и нaс свободити, вечных же мyк избaвити любовию вaм зовyщыя: Рaдуйтеся, слaвнии мyченицы Батaкaстии, скорбящих и стрaждущих утешителие!

Икос 1

Ангели предстателие вас Господь дарова верным, и заступницы теплыя безпомощным, безкровным, оставленным, вдовам и сирым, от человек озлобляемым, житейскими бедами обуреваемым и в лютых испытаниих впадшым: вы бо многими злыми и скорбьми яко испытанны, можете и нам искушаемым и скорбящым помощь даровати, всем сердцем вам поющым:

Радуйтеся, Родопских гор новоявленнии мученицы.

Радуйтеся, церкве Болгарския украшение.

Радуйтеся, бисер Царствия Христова страданьми купившии.

Радуйтеся, бисерие честнии, из глубины мук возсиявшии.

Радуйтеся, на камени веры истинныя утвердившиися.

Радуйтеся, каменопоклонник каменосердечие терпением вашим сокрушившии.

Радуйтеся, чистотою нравов ваших мучителей бесонравие посрамившии.

Радуйтеся, сиянием смирения темнонеистовство агарянское омрачившии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 2

Видяще себе отвсюду обстоими лютыми враги веры Христовы, прискорбни бысте до смерти, о многострадальнии новомученицы Батакстии, от Бога акибы оставлены себе помышляюще, и пристрашни зело бесте, немощь человеческую являюще: обаче сила Божия, всегда немощное верных укрепляющи, не предаде вас в руки христоненваистник, но душевная возмущения ваша в черте времене врачующи утихомири, и крепость победительную дарова, научающи вас до конца вся претерпети, поюще истинному Христу Богу нашему: Аллилуиа!

Икос 2

Разуму неудоборазумеваемь воистинну явися образ злострадания вашего: никтоже бо от человек вас утешаше, вменисте бо ся яко овцы заколения: умучены, терзаеми и закалаеми яко безсловесная, люте уничижаеми, всего лишаеми, и всех земных обнажаеми: от славы вашея паче ума! Христу бо приобщистеся во смирении крайнем, достойно приемлюще плод непостыдныя веры праотеческия нашея. Приимите убо и от нас недостойных убогое хваление сицевое:

Радуйтеся, православныя веры нашея крепость явившии.

Радуйтеся, имене Христова пред смертию неотрекшиися.

Радуйтеся, страдания страшная от враг христовых претерпевшии.

Радуйтеся, абие по смерти утешений несказанных сподобившиися.

Радуйтеся, благодати крещения кровьняго удостоившиися.

Радуйтеся, исцеление всех греховных язв уязвленьми плоти приобретшии.

Радуйтеся, благодатное укрепление в бедах нам подавающии.

Радуйтеся, небесных утешений верью призывающиым вас сподобляющии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 3

Сила Вышняго осеняше вас, егда крайняя немощь и изнеможение объяста вы, якоже матерь чадо закриляет, снисхождением крайним и любовию пребожественною: несравненно бо милосердие Божие тако попустившее вам, да с разбойником благоразумным рая во едином часе сподобитеся, и во вся веки вечныя спасени, многомилостивому Царю Небесному воспеваете песнь: Аллилуиа.

Икос 3

Имуще теплейшую к вере болгарстей любовь, не отвергостеся Христа, о досточуднии новомученицы Батакстии, но егда вся земная достояния пред очесы вашими стихиа огненная поядаше, и вся кости вашя злолютии мучители сокрушаху, упования Божия не отпадосте, образ нам оставивше смиреннаго терпения и побеждающаго всех враг благострадания, отонудуже поминающе ваше от земли отшествие, пение приносим вам от сердца сицевое:

Радуйтеся, мужие Батакстии, ладиею терпения море страданий преплывшии.

Радуйтеся, невесты, мужески мужей своих в смерти за Христа последовавшыя.

Радуйтеся, юноты, веру истинную паче жизни временныя возлюбившии.

Радуйтеся, девы, острием целомудрия вашего сластолюбное зловерие посекшыя.

Радуйтеся, старцы, ихже душевная крепость силу сокруши мучителей.

Радуйтеся, младенцы, в жизнь вечную от матерных пелен вошедшии.

Радуйтеся, соцветие мучеников вселичное.

Радуйтеся, созвездие страделец неразлучных.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 4

Бурю имуще помышлений о земных, яко овцы неимущыя пастыря смятостеся, и сами в руки волков иноверных себе предасте, щаждения чающе от враг христовых, о новомученицы дому Богданова! Уведевше же, яко наста уже последний час земнаго жития вашего, абие умы своя к Небесному Владыце устремисте, мир от Него приемлюще яко вернии Христу до смерти. Темже и венцы живота безсмертнаго от Него увязостеся, благодарственне воспевающе Спаса нашего пением: Аллилуиа.

Икос 4

Слышавше матери батакстии, яко прельщеннии хотят чада их в прелесть мохамедову силою обратити, абие сами ринушася к свечником с детьми, да младенцы и отроки своя первее Христу принесут в жертву благоугодну и да уверятся, яко не лишатся тии света невечерняго: о дивное мужество, и веры праотеческия любление! Киими же похвалами увенчаим дерзновение ваше, и совершенство духовныя любве к чадом? Но, о матери нашя, приимите и от нас, яже от любве сыновныя песноплетения сия:

Радуйтеся, досточуднии матери Батакския, чада своя смертию со Христом соединившыя.

Радуйтеся, в вечней жизни с ними неразлучне собравшыяся.

Радуйтеся, неотступное и о нас, грешных, попечение имущыя.

Радуйтеся, прибегающыя к вам покровом матерняго заступления осеняющыя.

Радуйтеся, образы истинныя матерния любве.

Радуйтеся, верныя дщери Церкве Болгарския.

Радуйтеся, предивнии отроцы батакстии, с родители своими в царстве Христове веселящиися.

Радуйтеся, младенцы за Христа закланнии, в небесных чертозех за нас Христа Бога молящии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 5

Богомудрие ваше воспеваем, дивныя девомученицы Батакския, яже во дворех богдановых за Христа закланныя: кротце бо на смерть идуще, абие львиною силою воспротивистеся, егда нечестивии вас обнаживше, хотяху сокровище девства вашего похитити. Темже и во главы посекаемы, и на уды разсекаемы, Жениху Небесному предстасте во одеждах солнцезрачных девства и мученичества, воспевающе Богу победную песнь: Аллилуиа.

Икос 5

Видеша христианы села Батака, яко наста уже время раздельное, да или со Христом пребудут и муки и смерть претерпят, или же мохамедову прелесть приявше, сохранят жизнь временную. Обаче множайшии их, православную веру болгарскую паче жизни своея любяще, якоже речныя струи весною, к мучителем потекоша, и потоки злобы их потопиша, верни до смерти Христу суще: темже и мы на подвиг благостояния их взирающе, поем им похвалы сицевыя:

Радуйтеся, язвы Господа нашего на телесех своих понесшии.

Радуйтеся, слезными реками зловерных соборище потопившии.

Радуйтеся, отсечением глав, рук, ног, и всяческими терзаими страстей Христовых причастницы бывшии.

Радуйтеся, абие по голгофстем искушении вашем в рай вселившиися.

Радуйтеся, девомученицы пречудныя, ревностию львиною веру и чистоту свою сохраншыя.

Радуйтеся, невесты Батакския, зверей сластолюбивых мечем целомудрия посекшыя.

Радуйтеся, образ противления греху до смерти нам явившыя.

Радуйтеся, в брани прескобней к миру, плоти и диаволу верныя нам споборительницы.

Рaдуйтеся, слaвнии мyченицы Батaкaстии, скорбящих и стрaждущих утешителие!

***

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедницы силы Господни в немощех действующыя зрим вас, преславнии мученицы Батакстии, егда страдания за имя Божие яко крест вземше, кротце Владыце последовасте в смиреннем терпении страшных мук: сам бо Христос Бог ваше от крестоненавистник страдание облегчаше, немощь укрепляше, и малодушие исцелеваше, да и в самой смерти вашей явит славу веры Божественныя православныя, солнечных лучей светлейшия, в нейже спасающеся, вопием Богу нашему: Аллилуиа!

Икос 6

Возсиявше яко искры в мраце рабства, по стеблию мучений выспрь возлетесте к пренебесному престолу Подвигоположника и Царя ангелов и человек, отонудуже озаряете несказанною любовию своею многострадальный болгарский род, предстательством неусыпным своим люди единоверныя к спасению направляете, и молитвы своя аки фимиам благоуханнейший Богу приносите, за возносящыя вам песнохваления сицевая:

Радуйтеся, агнцы Христовы долготерпеливейшии.

Радуйтеся, веру православную и в муках страшных не предавшии.

Радуйтеся, яко со креста вашего не снидосте, якоже врази Креста хотяху.

Радуйтеся, яко первородства своего за маловременныя сласти мохамедовы не продасте.

Радуйтеся, матери Батакския, млеком духовным нас младенцев в добродетелех питающыя.

Радуйтеся, младенцы Батакстии, вифлеемскому лику первомученическому сопричтеннии.

Радуйтеся, во училищи сожженнии две сте мученицы, Никомидийским мучеником подобне.

Радуйтеся, училище верности Христу до смерти нам устроившии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 7

Хотяй избавити человеки вечнаго за грехи осуждения, жизнодавец Христос волею на Кресте пригвоздися, да стастоносных последователей Своих страсти греховныя изгвоздит, и мечем зань посеченныя Себе спрославит, и нас почитающыя тех страдания муки вечныя избавит, с любовию поющыя Ему яко Творцу и Богу: Аллилуиа!

Икос 7

Новое селение в безсмертных полях Царствия Христова созиждше себе, древом, камением и железом мук, назираете оттуду чада ваша, яже на земли Болгарстей крепкою любовию почитают честная страдания ваша, новомученицы Батакстии! Манием бо преложися жития земнаго скорбь и кончина смертная во исцеление душам вашым, кровию крещенным вновь, слышащым от нас похвалы сицевыя:

Радуйтеся, смирением цельбоносным веру соблюдшии.

Радуйтеся, терпением крепким душетленный совет мучителей посрамившии.

Радуйтеся, истинному мужеству нас научающии.

Радуйтеся, терпети смиренно озлобления враг христовых нас укрепляющии.

Радуйтеся, силу Божию в немощи действующую яве показавшии.

Радуйтеся, в мори страданий кровавых вся грехи вашя потопльшии.

Радуйтеся, и нас в страданиих горьких не оставляющии.

Радуйтеся, веры православныя богатство хранити даже до смерти чадом своим завещавшии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 8

Странен человеческому уму промысл Бога, в бездну ввергаяй смирения и страданий, да за терпеливодушие, предавшыяся Ему верою, вечным блаженством упокоит в недрех Авраама: тамо бо вся братия нищаго Лазаря, в земли Болгарстей за пречестное имя Христа страдавшая, ныне молитвами теплыми Бога молит за верно воспевающыя Троице Святей песнь: Аллилуиа.

Икос 8

Всея Церкве Православныя златозарны есте светильницы, о прехвальнии мученицы Батакстии: всуе бо врази веры Христовы, отпадше от Бога, прельщением вас хотяху к своему безумству привлещи. Но не попрасте праотеческаго достояния, досточуднии, смерть предизбравше лютую, да не погубите душ ваших во веки. И нас укрепляйте всегда, память вашу чтущыя, да не отступим от закона Христова, но веру Божественную до конца сохраньше, воспевати сподобимся вас сице:

Радуйтеся, вкупе с нищим Лазарем небесным сокровищем обогатившиися.

Радуйтеся, и нашу нищету милостивно посещающии.

Радуйтеся, лучезарнейшая светила земли Болгарския.

Радуйтеся, любящии нас отцы и матери преблагия.

Радуйтеся, молитвенницы о призывающих вас в скорбех.

Радуйтеся, крепкое поможение в немощех сущым.

Радуйтеся, наши добрии на крестнем пути споспешницы.

Радуйтеся, нам в мраце греховнем влающымся звезды путеводственныя.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 9

Всякий возраст и пол Батака прославися в черте времене: не пощадиша бо зловернии ни старческия седины, ниже младенец нерожденных, ниже жен и невест христианских, в харемы внити душепагубных невосхотевших: темже светися и ликуй ныне, новый Батаче небесный, красуйся и ты, церкве Болгарская, ангелы новыя на небесех приобретши: Распятый бо древле от иудей, и в третий день Воскресший, в тридневнем распятии вашем паки крестоненавистных людей советование разори, вас же от смерти к жизни приведе, победную песнь поюще Спасителю Богу: Аллилуиа.

Икос 9

Ветии лжеименнаго разума никогдаже уразумеют страдания тайну, терпения славу и смирения многоценную пред Богом честность: кости бо нагия зряще вашя, в пагубу скончание ваше вмениша, вы же в мире несказаннем пребывающе, и в блаженстве вечныя жизни нас не забываете, чад своих, иже непрестанное стяжавше предстательство ваше ко Спасителю Богу, поем вам радостную песнь:

Радуйтеся, верою в воскресшаго Христа смерти страх победившии.

Радуйтеся, кровь свою излияшаго за ны, ваших кровей пролитием верно прославившии.

Радуйтеся, источницы пресладкии напоенным сланостию жития.

Радуйтеся, реки обильныя жаждущым верности Христу.

Радуйтеся, басни душетленныя суемудреннаго века сего растерзающии.

Радуйтеся, капища гордаго разума, вся веры равны глаголющаго, в прах сокрушающии.

Радуйтеся, светлое вам молящымся предстательство.

Радуйтеся, благоутишное к вам прибегающым пристанище.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 10

Спасти хотя душы вашя, Иже всех Спаситель и Бог, попусти вам в страдания ужасная впасти, да яко злато и сребро в горниле страстотерпчества от страстей очиститеся, пречуднии новомученицы Батакстии, и муками маловременными от вечных мук избавитеся: темже и просияли есте во огни мучений яко светлое множество искр, ихже имена Бог един точию весть, Емуже ныне предстоите в молитвах о роде Болгарстем и о всех память вашу чтущих православно пением: Аллилуиа!

Икос 10

Стена есте кротко крест свой в земнем житии яко ярем вземшым, и Христу верою правосланою последовавшым: ибо небесе и земли Творцу терпением и верностию до смерти благоугодисте. Темже и нас укрепляйте тихо претерпети вся скорби земныя, и кротко носити крест свой многоболезненнаго и многоскорбнаго в мире сем жития, малыми от вещественных довольствующеся, обаче ненасытимою к вам любовию притекающе и тепле поюще:

Радуйтеся, искрами веры Болгарския от огня страданий нас озаряющии.

Радуйтеся, чистотою нрав ваших нас ко исправлению призывающии.

Радуйтеся, крилома матерния любве нас осеняющии всегда.

Радуйтеся, щитом молитв неусыпных от нас неотступающии никогда.

Радуйтеся, в бедах помышления наша ко единому Душеспасу направляющии.

Радуйтеся, от падений греховных нас скоро возставляющии.

Радуйтеся, ибо свойственную родителем любовь к нам являете.

Радуйтеся, ибо ко истинным благам безсмертныя жизни стопы нашя направляете.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 11

Пение всякое побеждается, восхвалити тщащееся многую вашу к нам грешным любовь и попечение присное, о отцы и матери нашя чадолюбивыя! Вемы бо, яко не престаете от бед, скорбей и болезней нас избавляти, от уз греховных свобождати, в чистей вере Православней сохраняти, яко да тихое и безмолвное житие поживше, небурное достигнем пристанище отечества нашего небеснаго, вкупе с вами и со всеми святыми земли Болгарския Троице великоблагодарственное воспевающе хваление: Аллилуиа!

Икос 11

Светозарнии светильницы в густеющем мраце нынешняго века воистину нам есте, о достохвальнии Батакстии мученицы! Озаряете бо тесний путь возшествия нашего ко Христу, многими скорбьми благоволившему спасати правосланыя христианы последних времен. Сего ради аще и немощни, обаче любяще вас от всего сердца, песнь похвальную поем вам сице:

Радуйтеся, звезды церковныя, в муках просиявшыя.

Радуйтеся, лучи пресветлые веры нашея солнечныя.

Радуйтеся, житницы небесныя зерна, жерновом страданий изомленныя.

Радуйтеся, пшеницы златозерненныя хлебове, огнем мук испеченнии.

Радуйтеся, желчию и оцтом от враг Христовых напоеннии.

Радуйтеся, крестоносному Богу нашему верою спогребшиися.

Радуйтеся, воплями плачевными от плача вечнаго свободившиися.

Радуйтеся, терпением до смерти имя свое христианское совершенне оправдившии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 12

Благодать смиренным даяй Бог, не презре смирения вашего, и плоти вашея разсеканием житейския оковы разсече, сокрушением же костей ярем землеретности сломи и даде вам криле паче голубиных; и возлетесте, и почисте в села небесная, неизреченное благодарение поюще Спасителю многомилостивому в победе вашей: Аллилуиа.

Икос 12

оюще преставление ваше к истинному животу, о многострадальнии отцы и матери нашя, припадаем к вашему образу с трепетом и страхом: сердца бо наша еще в тине страстей валяются, душы нашя еще оковы диавольскаго рабства паче благаго ига преблагаго Спасителя нашего предпочитают; молим вы ся убо: не оставите нас погибнути во мраце грехолюбия нашего, но даруйте нам твердость, во еже возмощи и нам море житейское под кровом крил ваших преплыти, песнопоюще:

Радуйтеся, теплейшии озлобленных заступницы.

Радуйтеся, огненнии на диавола сопротивоборцы.

Радуйтеся, облак злых ветром молитв ваших развевающии.

Радуйтеся, дождем умиления изсохшая наша сердца умягчающии.

Радуйтеся, голубие, в гнезда небесная на криле страданий воспарившии.

Радуйтеся, голубицы, белотою чистоты сады небесныя украшающыя.

Радуйтеся, цветы духовнаго луга многострадальныя земли Болгарския.

Радуйтеся, немолчно веры православныя светлость являющии.

Рaдуйтеся, слaвнии мyченицы Батaкaстии, скорбящих и стрaждущих утешителие!

Кондак 13

О всехвальнии новомученицы Батакстии! Приимите от нас, убогих чад ваших, пение сие, со слезами приносимое от сердец любящих вас! Не отступите от нас, но от всяких бед, грехов и скорбей избавите почитающыя честная страдания ваша и к Богу о вас зовущыя: Аллилуиа!

Сей Кондак читается трижды, затем Икос 1 и Кондак 1.

Молитва новомученикам Батакским

О всехвальнии новомученицы Батакстии, ихже страданьми стогны батакския освятишася, ихже кровьми земля Болгарская напоившися, златостебленныя класы произрасте пшеницы небесныя, в напитание верных имущих родитися! Се собрахомся днесь почтити песньми святыми пресветлое торжество ваше: в сей бо день море сланое земнаго жития преплывше, сподобистеся во отечествие истинное наше возвратитися, и пред престолом истиннаго родителя душ наших, Триипостаснаго Бога, поклонитися, приносяще кровь и раны своя Ему во свидетельство верности вашея закону Божественному, и богоданней нам вере праотец наших: вере православней, пречистей, непостыдней, вселенную утвердившей!

Преклоньше колена сердец наших, величаем смиренное терпение ваше и благостояние в добрейшей сей вере, и лучезарнейшем законе сем даже до смерти. Темже и мы сердца наша к вам возносяще верою, просим, о отцы и матери нашя: молите многомилосердаго Спасителя нашего да простит нам многия грехи нашя, да укрепит и нас всемогущественною десницею Своею претерпети вся искушения и страдания маловременныя сея жизни, веру православную и закон Христов даже до смерти храняще. Умолите Спаса Христа да не погубит рода нашего, от веры праотеческия отступившаго, закон священнейший Бога своего осмеявшаго, и нравы благия вас, отец и матерей наших, поправшаго и поплевавшаго!

Молите, о многострадальнии страстотерпцы, всеблагосердаго Бога нашего, да обратит сердца чад ко отцем их, к прадедовстей вере и нравом, яко да и немощни суще, возревнуем о прежнем боголюбии и благонравии христианстем, ихже богатства безумно, блудствовавше, расточихом и в сокрушение и казни Божия ныне облекохомся. Се бо умильно просим: да возвратимся в покаянии к истинней вере, к истинному животу, к истинному свету, к истинному разуму, к истинному спасению, к истинному богатству, к истинному достоянию рода нашего: ко единому утешителю и Спасителю, и Богу отец наших, Господу сладчайшему Иисусу Христу, творящему присно с нами по велицей милости Своей: молите убо Его да не презрит нас многогрешных мольбы, но да избавит из узилищ греховных душы славящих Его и почитающих вас, и да даруем нам драгоценнейший жизни вечныя дар: благодать Всесвятаго Божия Духа, яко да вечных мук избавльшеся, вкупе со всеми святыми рода нашего во веки вечныя воспеваем Спасителя и Господа нашего Иисуса Христа, со безначальным Его Отцем, и Всесвятым и Всеблагим, и Животворящим Его Духом, ныне и присно, и во веки веков. Аминь.

Читать другие акафисты раздела "Православные акафисты"