Православные акафисты
Акафист преподобному Неофиту затворнику Кипрскому
Кондак 1
Избранный угодниче Христов, мудрый
монахов наставниче и храмов Божиих устроителю,
преподобне отче Неофите, множество словесных овец себе
собравый, пищею слова Божия их напитавый и ко Христу
приведый, яко имеяй дерзновение ко Святей Троице, молися
избавити нас от всяких бед и скорбей, да со умилением
зовем ти: Радуйся, преподобне отче Неофите, теплый
о нас молитвенниче и преславный чудотворче.
Икос 1
Ангел во плоти воистину явился еси на
земли, всехвальне отче Неофите, от младенческих бо лет
возжелавый узрети Царя небесе и земли, и вся дни живота
своего Тому с любовию верно послуживый. Сего ради
прослави тя в лице предобных Своих Христос Господь,
Емуже ныне со всеми небожители славу возсылаеши; от нас
же, чтущих тя, приими пение таковое:
Радуйся, Единаго Господа измлада
возлюбивый.
Радуйся, чистоту душевную от юности
сохранивый.
Радуйся, любве ради ко Господу всякое
наслаждение земное оставивый.
Радуйся, от Господа дар чудотворения
получивый.
Радуйся, яко Царю Небесному предстояй, о
всех нас тепле к Нему ходатайствуеши.
Радуйся, яко благоутробие Его о всех
чтущих память твою умилостивляеши.
Радуйся, преподобне отче Неофите, теплый
о нас молитвенниче и преславный чудотворче.
Кондак 2
Видяще преходящаго и тленнаго мира сего
суету, причаститися вечных благ возжелал еси, богомудре
Неофите, темже вся блага земныя оставивши, во обитель
святаго Иоанна Златоуста притекл еси, да в ней
благодеющему тебе Богу вопиеши: Аллилуиа.
Икос 2
Разумом небесным просвещаемь, прехвальне
Неофите, паче всех возлюбил еси Всемилостиваго Бога и
всею душею своею к Нему прилепился еси: иноческое житие
свое в непрестанных молитвах и псалмопении провождая.
Сего ради и мы в похвалу тебе глаголем сице:
Радуйся, светильниче любве, от Пресвятыя
Троицы возсиявый.
Радуйся, в незлобии Христу последовавый.
Радуйся, милостивое заступничество
Пречистыя Девы стяжавый.
Радуйся, иго Христово, легкое и благое,
с любовию понесый.
Радуйся, в подвизех своих преподобным
отцем подражавый.
Радуйся, непобедимою силою Креста
Христова на врага вооруживыйся.
Радуйся, в броню веры Христовы
облеченный.
Радуйся, благодатию яко щитом
защищенный.
Радуйся, преподобне отче Неофите, теплый
о нас молитвенниче и преславный чудотворче.
Кондак 3
Силою Божиею укрепляемь, всеблаженне
Неофите, душу свою храмину Духу Святому устроил еси,
токмо в Боге Триипостаснем источник радостей твоих
почерпая. Из сего источника приснотекущего и нам испити,
молитвами твоими, помози, да сподобимся купно с тобою во
веки Всесвятей Троице воспевати: Аллилуиа.
Икос 3
Имеяй богатство благодати, преизобильно
на тя свыше ниспосылаемыя, радости неизреченныя
сподобился еси, отче Неофите, егда созерцати Лице
безмерно любящаго тя Христа Бога сподобился еси, Егоже
моли спастися нам, в горении любве тебе подражающим и с
надеждою взывающим:
Радуйся, в Бозе упование свое полагати
нас научающий.
Радуйся, волю Божию безропотно приимати
нам повелевающий.
Радуйся, благочестивых христиан
премудрый наставниче.
Радуйся, боголюбивых иноков пред Богом
попечителю.
Радуйся, ведущих брань противу мира,
плоти и диавола добрый споспешниче.
Радуйся, ревнующим о целомудрии и
чистоте изрядный пособниче.
Радуйся, грешников на путь правый
наставляяй.
Радуйся, немощи душевныя врачуяй.
Радуйся, преподобне отче Неофите, теплый
о нас молитвенниче и преславный чудотворче.
Кондак 4
Бури сомнений и искушений вражиих
неустрашимо побеждал еси, всехвальне отче, упование твое
на Премудрость Божию возлагая. Мы же просим тя: буди нам
помощник и заступник, в пучине житейскаго моря
обуреваемым, тебе бо вемы, яко дивнаго чудотворца и
крепкаго молитвенника пред Богом, Емуже воспеваеши ныне
на небесех: Аллилуиа.
Икос 4
Слышавше о Святей Земле, в нейже Господь
наш Иисусу Христос пречудно родися, на проповедь
покаяния и на страдания крестныя во спасение рода
человеческаго изыде, всехвальне Неофите, и любовию ко
Иисусу Сладчайшему пламенея, возгорелся еси желанием
поклонитися местам сим святым. Ныне же, в Иерусалиме
Горнем пребывая и Пресвятей Троице покланяяся, помяни и
нас во Царствии Христовем, вопиющим тебе сице:
Радуйся, милосердие Отца Небеснаго к нам
приклоняяй.
Радуйся, истинною любовию к Сыну Божию
сердца наша наполняяй.
Радуйся, стяжати благодать Духа
Всесвятаго ны научаяй.
Радуйся, Всенепорочной Девы милость нам
испрошаяяй.
Радуйся, на путь правый нас наставляяй.
Радуйся, от соблазнов душетленных нас
отвращаяй.
Радуйся, в богомыслиии возрастати ны
сподобляяй.
Радуйся, путешествующим путь благий
пречудно устрояяй.
Радуйся, преподобне отче Неофите, теплый
о нас молитвенниче и преславный чудотворче.
Кондак 5
Боголюбиваго отца нашего Неофита
восхвалим днесь, яко в подвизех покаяния и смирения Богу
угодившаго и благодать от Него стяжавшаго. Сего ради
просим тя, отче святый, испроси нам у Бога дух кротости
и милосердия, да в любви и единомыслии исповедуем веру
истинную, воспевающе Спасителю нашему песнь: Аллилуиа.
Икос 5
Видя Господь наш Иисус Христос веру твою
и усердие преизрядное, сотвори множество чудес молитв
твоих ради, святе Неофите, имиже доныне прославляется
отчизна твоя во всем мире христианстем. Мы же, с
надеждою на предстательство всеблагомощное твое, вопием
ти сице:
Радуйся, очи наша душевныя просвещающий.
Радуйся, заблуждшим и ослепленным путь
правый показущий.
Радуйся, от пагубных ересей отвращающий.
Радуйся, ко истинней вере приводящий.
Радуйся, во брани нашей со духи злобы
нам помогающий.
Радуйся, от наветов вражиих нас
спасающий.
Радуйся, от клеветы и досаждения ны
охраняющий.
Радуйся, в домах благочестивых мир и
благоденствие устрояющий.
Радуйся, предстательством своим нас от
бед защищающий.
Радуйся, преподобне отче Неофите, теплый
о нас молитвенниче и преславный чудотворче.
***
Читайте также:
- Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
- Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.
***
Кондак 6
Проповедует днесь Церковь Христова славу
твою, богоносне отче Неофите, ты бо в
христоподражательнем житии своем стяжал еси плоды
духовныя: веру, любовь, долготерпение, милосердие,
кротость, воздержание, в горнюю славу возводящия, в ней
же ты ныне со Ангелы у престола Святыя Троицы
воспеваеши: Аллилуиа.
Икос 6
Возсиял еси, яко светило лучезарное,
чудесы многими, святе Неофите, просвещая сердца верных,
неверных же к приятию истины учения Христова подвигая,
нас же подвизая умиленно хвалити тя сими:
Радуйся, Христа, Царя Славы,
добродетельми своими прославляющий.
Радуйся, князя тьмы подвиги своими
посрамляющий.
Радуйся, яко похвальными венцы
Христианская Церковь тя венчает.
Радуйся, яко богоугодное житие твое
правовернии воспевают.
Радуйся, яко старии и младии к покрову
твоему прибегают.
Радуйся, яко немощнии и убозии тя
прославляют.
Радуйся, яко тобою различных искушений
избегаем.
Радуйся, яко тобою в различных
обстояниих помощь обретаем.
Радуйся, преподобне отче Неофите, теплый
о нас молитвенниче и преславный чудотворче.
Кондак 7
Хотящему ти подвиги своя от мира утаити,
в затворе пещернем скрылся еси, смиренномудре отче, но
Всеблагий и Премудрый Творец яве прослави тя пред Ангелы
и человеки. Сего же ради и мы надежду и упование на
предстательство твое возлагая, Господеви, венчающему
преподобных своих, радостно вопием: Аллилуиа.
Икос 7
Дивный воистину носитель даров Святаго
Духа на земли был еси, богоносне отче Неофите, ими же
горнюю высоту достигл еси и богатство небесное приял
еси. Наследники сего покажи и нас молитвами твоими, со
умилением вопиющих ти сице:
Радуйся, мглу греховную озаряющий.
Радуйся, мрак неверия разгоняющий.
Радуйся, из глубины неверия извлекающий.
Радуйся, ум наш к Богу приводящий.
Радуйся, злыя наша помыслы искореняющий.
Радуйся, козни духов злобы разрушающий.
Радуйся, от нападения вражия нас
охраняющий.
Радуйся, во искушениих плоти и духа
крепость нам даруюший.
Радуйся, преподобне отче Неофите, теплый
о нас молитвенниче и преславный чудотворче.
Кондак 8
Странствий суетных и треволнений
житейских удалился еси, богомудре Неофите, и в месте
безмолвнем уединяяся, непрестанно в молитве с Богом
беседовал еси и поучением Божественных писаний, яко
дождем благодатным, ниву сердца твоего богатно напоял
еси. Темже и Духа Святаго вместилище показался еси и
плод сторичествующ принесл еси, преподобне,
благодарственно Богу поя: Аллилуиа.
Икос 8
Все мирское пристрастие отложив и крест
твой на рамо взем, преподобне Неофите, чистым и
немятежным умом Христу последовал еси: в затворе, яко в
раи, живый, и яко безплотен на земли жительствуя, постом
и молитвою, безмолвием же и трудом многим святым
уподоблялся еси. Мы же молим тя: утверди нас во уповании
на Милосерднаго Творца нашего и в богомыслии укрепи
всех, взывающих ти таковая:
Радуйся, ангельскаго жития подражателю.
Радуйся, древних великих подвижников
жития приемниче.
Радуйся, невидимых врагов мужественный
победителю.
Радуйся, заповедей Божиих усердный
хранителю.
Радуйся, отеческих Богодухновеных
преданий ревнителю.
Радуйся, иноческаго постническаго
жительства законоположителю.
Радуйся, добродетелей чистейшее зерцало.
Радуйся, Духа Святаго сладкогласный
органе.
Радуйся, преподобне отче Неофите, теплый
о нас молитвенниче и преславный чудотворче.
Кондак 9
Всяческое утешение подавал еси печальми
и болезньми обремененным, богомудре Неофите, до
скончания твоего пасомым своим помагая. Мы же, ведяще
дивную благодать, от Бога ти данную, прилежно молимтися:
помози нам молитвою твоею теплою ко Господу, да воззовем
Ему с благодарностию: Аллилуиа.
Икос 9
Вития многовещанныя не возмогут по
достянию воспети тя, преподобне отче Неофите: яко бо
лоза плодовита посреде терния процвел еси на острове
Кипре добродетельми твоими, всех удивляя пречудным
житием твоим; ныне же в радости и веселии пребываеши с
лики преподобных и богоносных отец, наслаждаяйся райския
красоты. Сего же ради со умилением таковыя похвалы
приносим ти:
Радуйся, яко тобою научихомся
непреткновенно путем истинным ходити.
Радуйся, яко твоим за ны ходатайством
спасение чаем получити.
Радуйся, от обстояний и бед нас
сохраняющий.
Радуйся, от погибели нас изымающий.
Радуйся, искушения душевредныя далече
отгоняющий.
Радуйся, вражды единокровных на
благосердие прелагающий.
Радуйся, на милосердие нас подвизающий.
Радуйся, любити друг друга нас
наставляющий.
Радуйся, преподобне отче Неофите, теплый
о нас молитвенниче и преславный чудотворче.
Кондак 10
Спасительнаго твоего подвига скончания
достигши, святе Неофите, душу твою святую в руце Божии
предал еси, юже Ангели святии вознесоша горе ко Престолу
Вседержителя. Ныне же со всеми святыми предстоя во славе
невечерней, воспеваеши песнь хвалебную святых Святейшему
Слову: Аллилуиа.
Икос 10
Стена еси заступления, чудотворче
святый, всем с верою к тебе притекающим, чистоты бо ради
твоея сердечныя сила духовная от Бога тебе даровася:
болящих исцеляти, бедствующим помогати и иныя
благодеяния нам творити. Сего ради, славя величие Божие,
чрез тебе нам явленное, зовем ти сице:
Радуйся, во младости нашей нас питающий.
Радуйся, в старости нашей нас
укрепляющий.
Радуйся, молитвы родителей о чадех своих
во благо исполняющий.
Радуйся, благое попечение чад о
родителех своих освящающий.
Радуйся, юношей благонравных в
доброделании утверждение.
Радуйся, трудолюбивых земледельцев
изобилие неистощимое.
Радуйся, иноков образе воздержания.
Радуйся, архиереев православных крепкое
упование.
Радуйся, преподобне отче Неофите, теплый
о нас молитвенниче и преславный чудотворче.
Кондак 11
Пение похвальное приносим тебе, пречудне
отче Неофите, Господом бо прославленный еще в житии
твоем и по блаженней кончине твоей пресветел светильник
отечеству твоему явился еси, осиявая всех светлостию
твоею и чудес сияньми. Темже, твою светоносную память
чтуще, Христа славим и вопием Ему: Аллилуиа.
Икос 11
Светом Божественным осиянный, апостолом
святым на Фаворе уподобился еси, преподобне Неофите,
Христа ныне созерцая — Ипостасную Премудрость и Силу. От
славы к славе восходящий, приклони и к нам на милосердие
Пресвятую Троицу, да зовем ти сице:
Радуйся, очи духовныя нам отверзающий.
Радуйся, любити всех любовию Христовою
научающий.
Радуйся, от бед и напастей нас
ограждающий.
Радуйся, Имя Господне непрестанно
славословити нас побуждающий.
Радуйся, от празднословия и
многоглаголания нас удержавающий.
Радуйся, греховный сон лености нашея
отрясающий.
Радуйся, яко душевное умиление и
сердечное сокрушение в нас раждаеши.
Радуйся, яко к покаянию и исправлению
нас возбуждаеши.
Радуйся, преподобне отче Неофите, теплый
о нас молитвенниче и преславный чудотворче.
Кондак 12
Благодатныя дары от Господа испроси нам,
любовию чтущим тя, чудотворче святый Неофите, да
молитвами твоими причастницы жизни вечныя будем, купно
со ангелы воспевая у престола славы Триединаго Божества:
Аллилуиа.
Икос 12
Поюще дивное житие и подвиги твоя,
прехвальне Неофите, имиже Церковь Христову прославил еси,
величаем тя, яко кротости рачителя, смирения учителя и
благочестиваго жития насадителя похвалами сими:
Радуйся, в добродетелех нас
наставляющий.
Радуйся, ложный страх в душах наших
побеждающий.
Радуйся, благодатную силу исцеления
просящим подающий.
Радуйся, сердца наша любовию к Богу
воспламеняющий.
Радуйся, хотения наша ко благу
направляющий.
Радуйся, благим намерениям
пособствующий.
Радуйся, злыя начинания разрушающий.
Радуйся, умы наша о небеснем
мудрствовати направляющий.
Радуйся, преподобне отче Неофите, теплый
о нас молитвенниче и преславный чудотворче.
Кондак 13
О преподобне отче наш Неофите, предивный
чудотворче и целителю, благостный утешителю и скорый
заступниче! Приими сия похвалы и воздыхания сердечныя,
тебе нами приносимыя, и, предстоя Престолу Царя Славы,
молися о всех нас, чтущих любовию память твою, да
милосердие Божие, спасающее верныя от погибели вечныя, и
на нас явится, поющих о тебе со упованием и верою:
Аллилуиа.
Этот Кондак читается трижды, затем 1-й
Икос и 1-й Кондак
Молитва преподобному Неофиту затворнику Кипрскому
О великий угодниче Божий, преподобне
отче наш Неофите, славим твое во Христе смиренное житие,
имже Бог превознесе имя твое, еще на земли тебе сущу,
наипаче же увенча тя небесною честию по отшествии твоем
в чертог славы вечныя. Приими ныне моление от нас,
недостойных чад твоих, чтущих тя и призывающих имя твое
святое, избави нас твоим предстательством пред Престолом
Божиим от всех скорбных обстояний, душевных и телесных
недугов, злых напастей, тлетворных и лукавых искушений.
Низпосли Отечеству нашему от великодаровитаго Бога мир,
тишину и благоденствие. Всеблагомощным предстательством
твоим укрепи старцев немощных, уврачуй стариц болящих,
насыти алчущих, напой жаждущих, воодушеви юношей к
светлым подвигом стремящихся, вразуми родителей в
воспитании детей своих, сохрани младенцев от всяких бед
и утверди в духовной правде мужей и воинов. К тебе убо
припадаем и тебе просим: молися, преблаженне Неофите,
Всемилостивому Богу нашему о спасении душ наших, да в
покаянии невозбранно прейдем от земли на небо, мытарств
горьких и вечныя муки избавльшеся, и Небеснаго Царствия
наследники стати возможем со всеми преподобными от века
угодившими Господу нашему Иисусу Христу, Емуже слава, со
Безначальным Его Отцем, и с Пресвятым и Животворящим
Духом, ныне и присно и во веки веков. Аминь.
Тропарь преподобному Неофиту затворнику Кипрскому, гл. 1
Земли Кипрския затворниче и чудотворче
явился еси, Богоносне Неофите, постом, бдением, молитвою
Небесная дарования приим, исцеляеши недужныя и души
верою приходящих ти. Слава Давшему тебе крепость, слава
Венчавшему тя, слава Действующему тобою всем исцеления.
Кондак преподобному Неофиту затворнику Кипрскому, гл. 3
Земных и тленных наслаждений презревше
яве, преблаженне отче Неофите, пустыни Кипрския явился
еси ангел непорочен, молитвою, постом и покаянием
Небесныя обители достиг, и с лики преподобных веселишися,
темже чтуще память твою, вопием ти прилежно: от бед нас
избави, отче преподобне.
|
