|
|
Разделы • Вопросы • На злобу • Библиотека • Поиск |
Православные акафисты / Акафист второй священномученику Ираклидию Кипрскому |
Православные акафистыАкафист второй священномученику Ираклидию КипрскомуКондак 1Возбраннаго крепкостоятеля и Апостолом равночестнаго адаманта, весь Кипр обышедшаго и научившаго Христову Евангелию богомудро, яко любящаго отца да воспоим Тамассийския же обители предстателя, и да воззовем к нему: Радуйся, отче священномучениче Ираклидие. Икос 1Ангельскаго твоего жития, вся дивесы пети тщуся, тем и слово ми, преподобне, даждь, яко да от души песньми достойно тя возмогу почтити, божественнаго заступника моего, глаголя: Радуйся, упование верных святое. Радуйся, теплое ко Христу моление. Радуйся, печальных отрадо сладчайшая. Радуйся, душ сокрушенных божественное врачевание. Радуйся, всем призывающим тя истинное прибежище. Радуйся, всех предваряющая в напастех помоще. Радуйся, в нуждах отечески согреваяй. Радуйся, немощи любовию покрываяй. Радуйся, страстных язв исцелителю. Радуйся, ко свету обожения влекий. Радуйся, души ко Христу управляяй. Радуйся, от прелести вражия изводяй. Радуйся, отче священномучениче Ираклидие. Кондак 2Видя Жизнодавец, яко ты возжада познати едину истину, святе, Варнаву и Павла абие, ко Евангелию путевожди посылает ти, с нима же тя, Ираклидие чтуще, благочестно зовем: Аллилуия. Икос 2Разумети хотящим честным Апостолом пути к горе Снежней, сим сошествовал еси ты, стезю указуя. И божественными быв уловлен глаголы сих, вспять не у возвратися. Тем и мы тебе вопием таковая: Радуйся, житейская брашна возненавидевый. Радуйся, житие во Христе возлюбивый. Радуйся, Апостольскими ученьми возвеселенный. Радуйся, к совершенству теми управленный. Радуйся, о воплощении Слова Благовестие радостно восприявый. Радуйся, высото, к небесным таинственно превознесенная. Радуйся, идольское злочестие отрясый. Радуйся, иго Христово почтивый. Радуйся, к вершине путь указати потщавыйся. Радуйся, закону богодухновенному себе подклонивый. Радуйся, Павла ревности подражавый. Радуйся, Варнавы кротости поревновавый. Радуйся, отче священномучениче Ираклидие. Кондак 3Силою свыше облекийся, возжадал еси Крещения Божественнаго, богомудре; грядый в Солею, в потоце крещен бе, радуяся, во имя Отца, и Сына, и Духа Святаго, и весь обновлен, возопи: Аллилуия. Икос 3В пещере пребывая Тамасстей, во граде с таинникома Варнавою и Павлом и в подвизе всяце, яко светило, преподобне, блещаше, лучи пущая и согревая любовию теплою ти вопиющия: Радуйся, свещниче разумения зареносный. Радуйся, пламеню, души греяй. Радуйся, подвигом, яко солнце, сиявый. Радуйся, облистание Божия Духа приявый. Радуйся, яко Христу, ничесоже имущему, во след иде. Радуйся, яко веселяся поживе аки нищ. Радуйся, яко в пещере Тамасстей вселился еси. Радуйся, яко человекоубийце врагу посмеялся еси. Радуйся, слезами душу омывый Радуйся, мольбами ум препитавый. Радуйся, предвкусивый радования небеснаго. Радуйся, тли свобожденный земныя. Радуйся, отче священномучениче Ираклидие. Кондак 4Ревностию Евангельскою в сердце воспламененный, с божественными Апостолы Христовыми вкупе, блистательным и богодухновенным гласом, Ираклидие отче, мудро всех Безначальней и Пресвятей научаше пети Троице: Аллилуия. Икос 4Слышан и виден бысть, отче, яко нравы богоугодныя сохраняяй, тем и Христа самовидцы возложением на тя рук во епископа Тамасийскаго града тя совершиша, верных же сонм радостию велиею тебе возопи: Радуйся, пастырю Тамассийский и страже. Радуйся, двере словесных овец. Радуйся, Спасовых ученик подобноревнителю. Радуйся, благодатию тем равночестне. Радуйся, Богонареченный иерарше Христов. Радуйся, аки камение драгоценное почтенный Апостолы же и люди. Радуйся, словом и деянием возблиставый. Радуйся, прелесть разсеявый вражию. Радуйся, во образ Христа себе совершивый. Радуйся, народа вождю богодухновенный. Радуйся, в немже Избавителя познаваем. Радуйся, имже ко Господу очи возводим. Радуйся, отче священномучениче Ираклидие. Кондак 5Боготечно безбожия море во острове Кипрстем, якоже конь Божия Духа, отче, преплы Христа лодиею, и глаголов твоих трубою ко стезе спасения премудро люди наставил еси, зовущия: Аллилуия. Икос 5Видевше тя стопы богодвижныма пешешествующа, богомудре, яко всякую область отчизны твоея напечатле, проповедуя тепле Христово божественное и священное имя, тако народи, уверовавше, Ираклидие, ти вопияху: Радуйся, пределы отечествия освятивый. Радуйся, западному краю острова светоносче. Радуйся, усладивый безбожия горькое море. Радуйся, разоривый идольское высокомерие. Радуйся, проповедавый священное Евангелие Христово. Радуйся, закону духовному научивый языки. Радуйся, яко изыде во всю землю отока вещание твое. Радуйся, яко обышел еси Кипр, благовестием его орошая. Радуйся, Спасово уяснивый пришествие. Радуйся, вражие низвергий возношение. Радуйся, рыбы словесныя уловивый. Радуйся, богом языческим посмеявыйся. Радуйся, отче священномучениче Ираклидие. ***Читайте также:
***Кондак 6Рог на демоны возвысил еси преславно: слово Господне. Духов нечистых, блаженне, связав, свобождаше вся держимыя теми люте; сии же людие, уцеломудрени бывше, Христу Избавителю вопияху: Аллилуия. Икос 6Возсиявшу живоносному Воскресения свету в души твоей, отче, слезоточных молитв теплотою возставил еси умершия, Ираклидие преподобне и богоносе. Тии же радостию вопияху: Радуйся, смерти уз избавляяй. Радуйся, заклепы ея сокрушаяй. Радуйся, света Христова исполненный. Радуйся, от ада многия свободивый. Радуйся, блистание небесное, всю землю осияваяй. Радуйся, верным славу Воскресения указуяй. Радуйся, по себе приведый Божию благодать независтно. Радуйся, прилежно добродетели совершивый. Радуйся, скиние, Духа Святаго исполненная. Радуйся, клете благодати одушевленная. Радуйся, души от мертвых возставляяй. Радуйся, множество дивных показуяй. Радуйся, отче священномучениче Ираклидие. Кондак 7Мнасону единодушно, Ираклидие отче, соводворися в подвизе крайнем, вкупе же уязвляюща себе постом разумно, мудрование плоти поработиста, яко лучшему, духу, Христа совоспевающа: Аллилуия. Икос 7Манием всяким душевное око твое бысть пригвождено Христу всежеланно, и кождо твое, отче, дыхание таинственно дародаяше Божие благоухание верою к тебе притекающим и тепле вопиющим ти таковая: Радуйся, душу ко Христу управивый. Радуйся, ум на Нем утвердивый. Радуйся, пламенне прилепивыйся Жениху твоему. Радуйся, Сего положив Источник крепости своея. Радуйся, красото, прекраснаго возлюбивый Христа. Радуйся, глубино, Имже Духа узревый. Радуйся, сердце свое Божий престол сотворивый. Радуйся, вся внутренняя к Нему управивый. Радуйся, дождю, души наша орошаяй. Радуйся, лучу, ум наш просвещающая. Радуйся, дохновение благодати всем раздаяй. Радуйся, прохладо в житейстей бури. Радуйся, отче священномучениче Ираклидие. Кондак 8Странное к разумению сотворил еси чудо, мертвей сестре твоей возгласив, яже во гробе лежащи, гласом ти отвеща аки бы жива сущи. Темже и прежде неверовавший сие диво узрев, возопи: Аллилуия. Икос 8Очи отверзый слепому прикосновением, о божественный Ираклидие отче, зеницы ты того душевнеи открыл еси, во еже зрети Христа, единаго Бога. Сего ради к тебе взываше, стеная и вопия таковая: Радуйся, воочение слепым сотворивыйся. Радуйся, зари умныя преисполненный. Радуйся, вежди прикосновением отверзаяй. Радуйся, ведати невидимая творяй. Радуйся, свете, к невечернему свету Христову путеводяй. Радуйся, тьму лукаваго молитвою отгоняяй. Радуйся, яко просвещаеши очи сердечная. Радуйся, яко помрачаеши безумие вражие. Радуйся, являяй ведение богодухновенное. Радуйся, испущаяй блистание веры. Радуйся, Христовым сиянием очищаяй. Радуйся, велиара молитвою попаляяй. Радуйся, отче священномучениче Ираклидие. Кондак 9Всякую степень добродетелей ты богосиянно прошел еси непорочным сердцем, прияв яко скрижаль смирение, егоже указа Христос святительства хотящим стезею тещи, взывающим: Аллилуия. Икос 9Глаголы твоя божественныя утешения росу стяжахом, богоугодне отче; Господу молящеся бо, рече, ниже погибнем когда. Темже, тебе, Ираклидие, чада твоя тепле взываем: Радуйся, источниче животворных советов. Радуйся, поточе божественных словес. Радуйся, утешения росо неоскудная. Радуйся, совершенства горо превосходнейшая. Радуйся, стремнино боготечная реки вразумлений. Радуйся, водо сладчайшая дерзновенных учений. Радуйся, яко безстрастия воду точиши. Радуйся, яко к ревности спасительней вдушевляеши. Радуйся, возгласе, укрепляяй труждающияся. Радуйся, кличе, возставляяй падающия. Радуйся, из негоже себе почерпаем веру. Радуйся, имже преходим печали. Радуйся, отче священномучениче Ираклидие. Кондак 10Уста отрыгающаго хулы тяжкия, треблаженне мудре, суровым велением твоим, ускорив, абие затворил еси. Плачущаго же позде исцели, милость явив вопиющему: Аллилуия. Икос 10Образ Креста Честнаго, якоже Моисей, жезлом начертав в водах, отче, и моляся теплотою души, потока неудержное стремление укроти и множество ко Крещению воумил еси, вопиющих сице: Радуйся, речную быстрину уставивый. Радуйся, воду в сушу претворивый. Радуйся, якоже Моисей, показавый дивная. Радуйся, жезлом струи отсекаяй. Радуйся, мнози ко Крещению управивый чудно. Радуйся, к познанию Божественных путь указавый разумно. Радуйся, яко притяжал еси чудес благодать. Радуйся, яко обратил еси в бегство всякую лесть. Радуйся, одождивый лияния исцелений. Радуйся, раздаятелю дарований духовных. Радуйся, к Богу многия привлекий. Радуйся, души по Нем усовершивый. Радуйся, отче священномучениче Ираклидие. Кондак 11Высоту святости постигий в конец, наедине сый, мученически к небесем призван быв, и хотящу ти отыти от земли, вернейшаго ученика твоего Мнасона оставил еси яко учителя, руки возложь на него, вопиющаго: Аллилуия. Икос 11Несуще тело твое с печалию об истинно горестнем разлучении ученицы твои, Ираклидие отче, благочестно в пещере твоей в Тамассе мощи святыя твоя положиша, стенающе жалостне и вопиюще: Радуйся, к Сиону вышнему угонзаяй. Радуйся, в страну нетленную восходяй. Радуйся, заповедей хранению ны научивый. Радуйся, нам оставивый к подражанию образ. Радуйся, течение святейшее совершив непреклонно. Радуйся, высоте совершенства приблизився твердо. Радуйся, ныне со Ангелы божественную песнь воспеваяй. Радуйся, ныне Апостолом равнопрестольне соседяй. Радуйся, споручниче наш пред Богом. Радуйся, наше спасительное моление. Радуйся, истиннаго живота причащаяйся. Радуйся и не забуди чада твоя. Радуйся, отче священномучениче Ираклидие. Кондак 12Веселящися обитель твоя, Ираклидие святе, песни ти, поющи, приносит: небесным бо сокровищем, божественнейшими и честными мощми твоими богатящися, взывает ти умилением многим сие: Аллилуия. Икос 12Поем ти, богомудре Ираклидие отче, песнь благодарственную любовию: обитель твою, убо могущую многащи завоевану быти, отнюд не оставил еси, отче, врагом когда. В последних же ныне храниши тепле ти вопиющия: Радуйся, обители Тамассийския славо. Радуйся, жизни единонравныя укрепление. Радуйся, подвизающихся крепосте и сило. Радуйся, зде водворяющихся твердыне. Радуйся, яко покров и основание святыя обители твоея еси. Радуйся, яко тоя отец любвеобильный еси. Радуйся, яко чада твоя неусыпно храниши. Радйся, яко о них неустанно предстательствуеши. Радуйся, напастей избавителю бодреннейший. Радуйся, врагов отгнателю скорейший. Радуйся, заступление мое превысокое. Радуйся, радование мое сладчайшее. Радуйся, отче священномучениче Ираклидие. Кондак 13О богоносе отче, кипрскаго отока славо, обители же Тамассийския заступление, ныне убогая приими приношения, во гласех псаломских поющих ти, и благодати сподоби, тебе ради немолчно взывати сие: Аллилуия. Сей Кондак читается трижды, затем Икос 1 и Кондак 1. Молитва священномученику Ираклидию КипрскомуО пречестная и священная главо и благодати Духа Святаго исполненная, Спасово со Отцем обиталище, великий архиерею, теплый наш заступниче, священномучениче Ираклидие! Предстоя у Престола всех Царя и наслаждаяся света Единосущныя Троицы, херувимски со Ангелы возглашая песнь трисвятую, великое же и неизследованное дерзновение имея ко Всемилостивому Владыце, моли спастися паствы Христовы людем, благостояние святых Церквей утверди, архиереи благолепием святительства украси, монашествующия к подвигом добраго течения укрепи, Кипрский оток и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, немощствующия исцели, и везде тепле призывающия тя и с верою притекающия к тебе и усердно припадающия и молящияся тебе от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуияго стояния избавит нас, и радости святых причастники сотворит со всеми святыми во веки веков. Аминь. Тропарь священномученику Ираклидию Кипрскому, глас 3Велика обрете тя Тамассийский град проповедателя и пастыреначальника, Церкве Христовы учителя, идольскую бо лесть низложив истины свет проповедал еси языком. Темже, святе священноначальниче Ираклидие, Христу Богу молися дароватися на велией милости. Кондак священномученику Ираклидию Кипрскому, глас 2Ираклидие, обители твоея сокровищнице, и Кипра всего воеводо, приими чад смиренных молебный глас и даждь молитв совершение, к ближним удобопреклонный слух, ко Христу благоугождение, совести чистоту, поставляя пред Господем их, яко престол честный и молитвы вселение.
Читать другие акафисты раздела "Православные акафисты" |
Разделы проекта: |
|
© Миссионерско-апологетический проект "К Истине", 2004 - 2024 При использовании наших оригинальных материалов просим указывать ссылку: |
|
|