Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

Разделы • Вопросы • На злобу • Библиотека • Поиск

Православные акафисты / Акафист страстотерпцу Иоанну Путивльскому

Православные акафисты

Акафист страстотерпцу Иоанну Путивльскому

Кондак 1

Избранный угодниче Христов, града Путивля и Отечества нашего православнаго благий заступниче, святый благоверный княже Иоанне! Приими ныне от нас сия похвальная пения, и яко имеяй дерзновение ко Господу, не престай Тому молитися за ны, да любовию зовем ти:

Радуйся святый Иоанне, страстотерпче Путивльский.

Икос 1

Ангельски на земли поживше, путь свой земный мученически скончал еси Иоанне, Царствия же Небеснаго достигше, град свой и люди своя не оставил еси; темже иконе твоей верою и любовию припадающе, вопием ти сице:

Радуйся, града Путивля похвало преизрядная.

Радуйся, Михаила князя отрасле предивная.

Радуйся, путь тернистый волею избравый.

Радуйся, тем неуклонно шествовавый.

Радуйся, душу свою за други своя положивый.

Радуйся, словеса Христовы исполнивый.

Радуйся, во благочестии воспитанный.

Радуйся, за правоверие убиенный.

Радуйся, благоверных князей украшение.

Радуйся, страстотерпческаго лика исполнение.

Радуйся, от корене благочестиваго произрастший.

Радуйся, венец нетленный от Христа Спаса приемший.

Радуйся святый Иоанне, страстотерпче Путивльский.

Кондак 2

Видящи отечествие свое, страну Русскую, от иноплеменник поганых люто разоряемую, агарян злочестивых не устрашился еси, и яко правитель добрый душею о людех православных болезновал еси, Иоанне, скорби тех умалити тщася, сердцем же и усты в молитве Господеви взывал еси: Аллилуиа.

Икос 2

Разум имуще Богом просветленный, Иоанне, ведал еси, яко нахождение язык варварских за грехи людския Господь попустил есть, и со смирением воле Божественней покоряся, на смерть небоязненно шествовал еси, сего ради восхваляем тя словесы таковыми:

Радуйся, в Путивле граде во князи поставленный.

Радуйся, от чрева матерня на подвиг избранный.

Радуйся, Божий рабе верный и кроткий.

Радуйся, людем правителю добрый.

Радуйся, Духом Святым осененный.

Радуйся, Богом на мученичество благословенный.

Радуйся, правоверия преславный защитителю.

Радуйся, бесовския прелести искоренителю.

Радуйся, жизнь временную ради вечныя презревый.

Радуйся, тую по кончине своей абие наследивый.

Радуйся, во бранех ратоборче изрядный.

Радуйся, в молитвах услышателю скорый.

Радуйся святый Иоанне, страстотерпче Путивльский.

Кондак 3

Сила Вышняго осени тя, княже Иоанне, егда пред лицем страданий Христа небоязненно исповедал еси. Агаряны же, зря свою веру от тебе мудро ниспроверженную, злобы сатанинския исполнишася, смерти тя предаша. Ты же, благоверне, укреплявшему тя Богови взывал еси: Аллилуиа.

Икос 3

Имущи в лице твоем правителя мудраго и милосерднаго путивлечи радовахуся, и тебе яко князя земнаго величаху. Ты же, Иоанне, ведый яко токмо Богови честь и слава подобает, к похвалам сердце не прилагал еси, живот свой во смирении и воздержании провождая. Сего ради вопием ти тако:

Радуйся, граждан путивльских заступниче.

Радуйся, православныя веры проповедниче.

Радуйся, любве Христовы сосуде честнейший.

Радуйся, страстей победителю искуснейший.

Радуйся, благолепие дома Божия возлюбивый.

Радуйся, храмы многия воздвигнувый.

Радуйся, злобы бесовския погубителю.

Радуйся, любве Божия насадителю.

Радуйся, идольскую прелесть поправый.

Радуйся, демонския сети растерзавый.

Радуйся, древним мучеником поревновавый.

Радуйся, даром чудотворений просиявый.

Радуйся святый Иоанне, страстотерпче Путивльский.

Кондак 4

Бури и треволнения моря житейскаго веру твою не ослабиша, благоверне, обаче во времена тяжкия усобиц княжеских пребыл еси столп непоколебимый благочестия, образ любве Христовы ближним и дальним являя, темже и Господь тя николиже оставил есть, Ему же благодарне вопием: Аллилуиа.

Икос 4

Слышаша путивлечи весть о лютой смерти твоей, Иоанне, юже от неверных приял еси за народ свой, пристрашни быша, сиры себе помышляюще. Ты же при жизни своей всем к тебе притекающим помогавый и по кончине землю Путивльскую не оставил есть, моляся за ню во Царствии Небеснем. Сего ради восхваляем тя сице:

Радуйся, града Путивля славо непреходящая.

Радуйся, отечества нашего похвало вящая.

Радуйся, суеты житейския презрителю.

Радуйся, благочестия верный учителю.

Радуйся, ангелов небесных собеседниче.

Радуйся, правителей земных наставниче.

Радуйся, веры истинныя ревнителю.

Радуйся, благодати Божия рачителю.

Радуйся, сирых и вдов безмездный питателю.

Радуйся, в искушениях пребывающим скорый предстателю.

Радуйся, целомудрия крепкая оградо.

Радуйся, во бранех духовных славная отрадо.

Радуйся святый Иоанне, страстотерпче Путивльский.

Кондак 5

Богооткровенную тайну воплощения Христова и умаления нас ради помышляя, премудрости домостроительства Божия удивлялся еси, Иоанне. Страдания же Спасителевы во уме держаще, к подвигу мученическому сам уготовлялся еси, благоверне. Мы же прославльшему тя Богу вопием: Аллилуиа.

Икос 5

Видеша татарове погании незлобие и смирение твое, обаче не устыдишася, и на смерть лютую тело твое вдаша. Ты же, страстотерпче предивный, непостыдную кончину прадеда твоего Михаила (князя Черниговскаго) помышляя, небоязненно на мучение шествовал еси. Тем же мы память твою днесь совершающе, ублажаем тя словесы таковыми:

Радуйся, град отечествия своего крепце возлюбивый.

Радуйся, за живущих в нем смерть от неверных приявый.

Радуйся, временная на вечная пременивый.

Радуйся, единаго на потребу взыскавый.

Радуйся, православия звучная цевнице.

Радуйся, молитвы благоухающая кадильнице.

Радуйся, верным во бранех поможение:

Радуйся, иноплеменных устрашение.

Радуйся, благодати Господней призвание.

Радуйся, тьмы греховной прогнание.

Радуйся, в мучениих очищенный.

Радуйся, Царем царей освященный.

Радуйся святый Иоанне, страстотерпче Путивльский.

***

Кондак 6

Проповедник Слова Христова во Орде был еси, Иоанне, небоязненно христианином себе пред лицем поганых именуя, иже во зловерии своем закосневше, глагол твоих не прияша, обаче яко звери дивии обыдоша тя и лютой смерти предаша. Ты же очи к Богови возведше, взывал еси Ему: Аллилуиа.

Икос 6

Возсиявый древле добродетельми своими во граде Путивле, княже Иоанне, всех за помощию к тебе притекающих светом благодати Господней, обильно на тебе почивающей, просвещал еси; и ныне молитв наших не возгнушайся, зовущих ти сице:

Радуйся, земли Путивльския дивное прозябение.

Радуйся, молений наших скорое услышание.

Радуйся, в житии своем благочестием просиявый.

Радуйся, и по смерти своей за чудесы возвеличенный.

Радуйся, сосуде избранный благодати Божия.

Радуйся, щите крепкий отражаяй нападения вражия.

Радуйся, православныя веры пресветлый светильниче.

Радуйся, идолослужения непримиримый воинственниче.

Радуйся, телесам нашим исцеление у Бога испрошаяй.

Радуйся, душам нашим спастися помогаяй.

Радуйся, кимвале хвалы Господней неумолкающий.

Радуйся, молитвенниче наш неусыпающий.

Радуйся святый Иоанне, страстотерпче Путивльский.

Кондак 7

Хотяху иноплеменницы поганыя да веры отеческия отречешися и богом их пожреши, во еже живу ти остатися, Иоанне. Обаче ничтоже успеша, ты бо, благоверне, новым Иудою стати не восхотев, кровию своею землю обагрил еси, виссом же многоценным и нетленным в Царствии Небеснем от Христа украсився, Ему же выну взываеши: Аллилуиа.

Икос 7

Новаго страстотерпца и чудотворца прослави Господь за страдания и мучения твоя, благоверне Иоанне: тесными бо враты вшел еси в Царствие Небесное, и яко пахарь добрый, на рало руце своя возложивый, николиже вспять зрел еси. Мы же, чада твоя, княже преславный, любовию почитающе память твою, восхваляем тя, сице глаголюще:

Радуйся, граду Путивлю Божие благословение.

Радуйся, благочестию в нем крепкое основание.

Радуйся, прошений наших еже ко спасению исполнение.

Радуйся, греховных страстей упразднение.

Радуйся, за Христа смерть вкусивый.

Радуйся, и агаряны верою своею удививый.

Радуйся, сонма неверных не устрашивыйся.

Радуйся, поганых богов возгнушавыйся.

Радуйся, иго Христово на ся приявый.

Радуйся, сатанинское служение отринувый.

Радуйся, воине земный и небесный, грехи побеждаяй.

Радуйся, знамя Христово добродетельми возвышаяй.

Радуйся святый Иоанне, страстотерпче Путивльский.

Кондак 8

Странником себе в житии сем помышляя, к земному богатству и славе сердце не прилагал еси, Иоанне, обаче тщался Богови угождати и ближнему служити. Темже в годину испытаний на страдания ничтоже сумняся устремился еси, хвалу Господеви возсылающе, пением Ему: Аллилуиа.

Икос 8

Вся земля Русская удивися слышанием подвигов твоих, Иоанне блаженне: евангельским бо словам последуя, сам себе отверглся и живота временнаго, спасения ради душ христианских, не пощадел еси. Темже ныне и нам, тебе тепле молящимся у Господа спасения испроси, да вопием ти:

Радуйся, княже добрый, путивлечи благочестию научивый.

Радуйся, в душе своей храм Богови устроивый.

Радуйся, Христова смирения подражателю.

Радуйся, духа мирна стяжателю.

Радуйся, Богови жертва благоприятная.

Радуйся, демоном язва неисцельная.

Радуйся, яко крин верою и чистотою процветший.

Радуйся, яко кедр иже в Ливане умноженный.

Радуйся, веры адаманте твердый.

Радуйся, правителю милосердый.

Радуйся, Христа от юности возлюбивый.

Радуйся, заповедем Его последовавый.

Радуйся святый Иоанне, страстотерпче Путивльский.

Кондак 9

Всяких бед и скорбей избави, Иоанне, град Путивльский и вся грады и веси, идеже имя Христово славословится. Господь бо и Содетель мира избра тя от начала и на подвиг славный благослови. Ты же, благодатию и милостию Его укрепляемый, выну взывал еси: Аллилуиа.

Икос 9

Ветия велеречивыя недоумеют, како возможно благодать и милость Божии, на тебе, Иоанне, почивающия, языком человеческим изъяснити? Мы же, во тьме греховней сущия, обаче и скудость ума своего разумеюще, дерзаем хвалити тя словесы сими:

Радуйся, земли Путивльския сокровище многоценное.

Радуйся, Бога к нам снисхождение неизреченное.

Радуйся, яко подвиг твой во многих веру обновляет.

Радуйся, яко молитва к тебе радости души наша исполняет.

Радуйся, мира мирови у Творца просителю.

Радуйся, милости Господней присный носителю.

Радуйся, веру Христову возвысивый.

Радуйся, язычество богомерзкое посрамивый.

Радуйся, тайныя грехи обличаяй.

Радуйся, еретическия ветры укрощаяй.

Радуйся, правды Божия проповедание.

Радуйся, лести бесовския разрушение.

Радуйся святый Иоанне, страстотерпче Путивльский.

Кондак 10

Спасти хотяще люди правоверныя, твоему попечению Самим Господем вверенныя, убивающих тело не устрашился еси, Христа пред иноплеменники небоязненно исповедав, душу свою в руце Божии предал еси, Иоанне благоверне. Темже и Бог прослави тя, и рая жителя содела, идеже ныне со всеми святыми веселящеся, с теми престолу Царя Славы предстоя, Богови вопиеши: Аллилуиа.

Икос 10

Стеною твердою и нерушимою молитв твоих, страстотерпче, град сродствия твоего, Иоанне, выну сохраняй, от ересей пагубных и безбожия окаяннаго, да твоими пред Богом теплыми ходатайствы спасение душам нашим улучим. Темже ныне ти любовию воспеваем:

Радуйся, град Путивльский духовне украсивый.

Радуйся, храмы и обители зде мудро устроивый.

Радуйся, благодати Божией соименный.

Радуйся, молитв наших услышателю неизменный.

Радуйся, масличино, рукою Божией насажденная.

Радуйся, смоковнице, благодатию Того возращенная.

Радуйся, венцем нетления от Христа увенчанный.

Радуйся, одесную Себе Тем поставленный.

Радуйся, граде Божий, верху горы стоящий.

Радуйся, ко спасению многия наставляющий.

Радуйся, горняя крепце возлюбивый.

Радуйся, дольняя конечне оставивый.

Радуйся святый Иоанне, страстотерпче Путивльский.

Кондак 11

Пения похвальная приносим ти днесь, Иоанне страстотерпче: воспоминающе бо страдания твоя за веру Христову и народ Божий, удивляемся Божественному смотрению о тебе, и Господа прославляем, даровавшего нам таковаго заступника и ходатая, Ему же вопием: Аллилуиа.

Икос 11

Светоприемную свещу, под спудом долгое время промыслом Божиим утаенную, ныне же на свещнице высоце водруженную разумеем тя, Иоанне досточудне. Темже молимся тебе: просвети тьму грехов наших, да молитвами твоими страстей свободимся, и похвалы таковыя тебе принесем:

Радуйся, града Путивля страже неусыпный.

Радуйся, Царства Божия жителю блаженный.

Радуйся, славы Божией ревнителю присный.

Радуйся, противу велиара воителю неутомимый.

Радуйся, звездо светом Солнца Правды сияющая.

Радуйся, молние добродетельми блистающая.

Радуйся, на земли подвиг сотворивый.

Радуйся, на небеси от Бога прославленный.

Радуйся, страдальче за Христа предивный.

Радуйся, чудотворче Божий изрядный.

Радуйся, в броню правды одеянный.

Радуйся, всеоружием добродетелей вооруженный.

Радуйся святый Иоанне, страстотерпче Путивльский.

Кондак 12

Благодати Божия издетска преисполнен был еси, Иоанне, и чрез все время живота своего Богови угождая, сию не расточил еси, обаче преумножил зело. Темже и ныне, аще бо и честных мощей твоих не имамы, иконе твоей святей припадающе, просимая получаем, прославльшему тя Господеви вопия: Аллилуиа.

Икос 12

Поюще твоя страдания и подвиги, во умилении душевнем славим тя, страстотерпца добляго и чудотворца предивнаго, мучения и смерти не убоявшагося, и веру Христову пред агаряны безстрашно проповедавшаго. Темже не отрини ны, заблуждшия чада и сродники твоя, обаче бо и во гресех погибающия, но словеса таковая тебе любовию приносящия:

Радуйся, земли Путивльския присный хранителю.

Радуйся, душ наших ко спасению путеводителю.

Радуйся, образе кротости и смирения.

Радуйся, помощниче взыскующим спасения.

Радуйся, со безплотными Богови песнь поющий.

Радуйся, с земнородными Тому работавший.

Радуйся, страдания на земли прошедый.

Радуйся, в радость Господа твоего вшедый.

Радуйся, заблуждших скорое вразумление.

Радуйся, грешником на пути покаяния вспоможение.

Радуйся, в скорбех сущим утешение.

Радуйся, от бездны страстей возведение.

Радуйся святый Иоанне, страстотерпче Путивльский.

Кондак 13

О, святый благоверный княже Иоанне, земли Путивльския скорый заступниче и молитвенниче! Приими нынешнее сие малое моление усты нашима недостойныма тебе приносимое, и помози нам да твоему житию наследующе достигнем Иерусалима Горняго, идеже вкупе с тобою и со всеми святыми сподобимся пети Господеви и Богу нашему: Аллилуиа, Аллилуиа, Аллилуиа.

Сей Кондак читается трижды, затем Икос 1 и Кондак 1.

Молитва страстотерпцу Иоанну Путивльскому

О, святый страстотeрпче и чудотворче, благоверный княже Иоанне. Ублажаем ныне мученическую кончину твою, юже за народ Божий и отечество твое от поганых агарян приял еси. Ты, возжелав вышних, славу земную нивочтоже вменил еси, доблественне противу супостатов подвизався, смертию своею Царствие Небесное восприял еси, кровию же за хриcтианы излиянною, яко камением драгим украсив венец нетленный на главе своей, предстоиши ныне на небесех престолу прославльшаго тя Господа, вкупе со всеми святыми Его. Сего ради днесь притекающе к чеcтней иконе твоей и лобызающе ю, взываем ти сице: не престай молити Всещедраго Бога за град твой и живущих в нем, и за вся православныя хриcтианы. Буди помощник нам во бранех духовных противу хулителей веры Хриcтовы, способствуй нам улучити вся, яже ко спасению благопотребная, сохрани нас от козней лукаваго, погибели нашея хотящаго, да молитвами твоими достигнем Царствия Небеcнаго идеже с тобою прославим Подателя всяческих благ, Отца и Сына и Святаго Духа, и твое святое заступление во веки веков. Аминь.

Читать другие акафисты раздела "Православные акафисты"

Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции