Православные акафисты / Акафист святителю Иннокентию Пензенскому

Православные акафисты

Акафист святителю Иннокентию Пензенскому

Кондак 1

Избранный угодниче Христов и дивный благочестия подвижниче, святителю отче Иннокентие, восхваляем тя яко Православия поборника и пагубных обычаев искоренителя. Ты же, имеяй дерзновение ко прославльшему тя Господу, даровавшему нам в тебе новаго великаго молитвенника и скораго в бедах помощника, моли о пастве твоей, зовущей:

Радуйся, святителю отче Иннокентие, теплый молитвенниче о душах наших.

Икос 1

Ангельским смирением украсив житие свое, человеков богомудренный наставник был еси, святителю отче Иннокентие, от юности возлюбил еси Божественную Премудрость, Ей же храм преукрашенный явился еси. Духом Святым освящен, всех учения лучами просвещая, сего ради тебе, на небеси и на земли прославленному, благодарне во умилении вопием сице:

Радуйся, смирением на гору добродетелей возведенный.

Радуйся, оным ко Ангельским ликом на Небеси причтенный.

Радуйся, Церкви Православныя пастырю предобрый.

Радуйся, пастве своей от волков губительных защитниче неустрашимый.

Радуйся, целомудрия ревнителю изящный.

Радуйся, образе кротости драгоценный.

Радуйся, проповедниче велеречивый.

Радуйся, Архиерею Божий незлобивый.

Радуйся, пензенския паствы удобрение.

Радуйся, града Саратова утверждение.

Радуйся, святителю отче Иннокентие, теплый молитвенниче о душах наших.

Кондак 2

Видев, святителю отче Иннокентие, яко Вера Православная во Отечестве нашем попирается от лжеучителей инославных, потщался еси вседушно Христу послужити и веру истинную от ересей оградити, паству же от волков, расхищающих ю, защитити. Мы же, дивящеся таковому твоему дерзновению, вопием укрепльшему тя Господу: Аллилуиа.

Икос 2

Разум Божественный имея, весь измлада Христу послужил еси, временныя сласти во уметы вменяя, того ради благодатию Архиерейства увенча тя Господь. Таковое убо изволение твое воспевающе, вопием ти сице:

Радуйся, путь правый избравший.

Радуйся, им же неотступно шествовал еси.

Радуйся, вся красная мира презревший.

Радуйся, душу свою добродетельми просветивший.

Радуйся, сердце твое Христу отверсто имевый.

Радуйся, страстем входы его затворивый.

Радуйся, иноче, послушания вся неленостно прошедый.

Радуйся, священниче, со страхом Божиим Жертву Безкровную приносивый.

Радуйся, монахом правило изящнейшее.

Радуйся, священником образе благоговейнейший.

Радуйся, всем подвизающимся добрый наставниче.

Радуйся, всех нас ко спасению направляяй.

Радуйся, святителю отче Иннокентие, теплый молитвенниче о душах наших.

Кондак 3

Силою свыше облече тя Господь, ты же, святителю отче Иннокентие, взем крест свой, невозвратно Ему последовал еси, и уведев, яко иго Христово благо и бремя Его легко есть, воспел Милосердному Богу: Аллилуиа.

Икос 3

Гласу Апостола Павла внимая, истинным служителем Алтаря Господня явился еси, егоже слова на скрижалех сердца твоего начертал еси, и нас послушанию научи, вопиющих ти таковая:

Радуйся, учениче истинный Христов.

Радуйся, яко чистотою Ангелом уподобился еси.

Радуйся, в благовестии Апостолом подобный.

Радуйся, яко во учении древлим отцем подражал еси.

Радуйся, даром прозрения почтенный.

Радуйся, исповедниче неустрашимый.

Радуйся, подвижниче, великим преподобным равный.

Радуйся, яко непрестанно Господу в молитвах воздыхал еси.

Радуйся, яко милостыню творити николиже преставал еси.

Радуйся, яко на каждый час жития своего память смертную имел еси.

Радуйся, благолепия храмов Божиих ревнителю.

Радуйся, яко сам храм Господу явился еси.

Радуйся, святителю отче Иннокентие, теплый молитвенниче о душах наших.

Кондак 4

Великому святителю Ростовскому Димитрию не токмо ликом подобен был еси, но и делами равен сему явился еси: просвещая маловерных, верных же укрепляя, нас же всех поучая вопити Милосердному Богу: Аллилуиа.

Икос 4

"Се Жених грядет в полунощи", тако воспел еси, благодать Архиерейства прияв, блаженне не рабе, но друже Христов Иннокентие, и Господа сретил душею, любовию горящею, и нас в любви Божественней укрепи, зовущих ти таковая:

Радуйся, яко Сила Божия совершися в немощнем телеси твоем.

Радуйся, яко вси недузи со смирением переносил еси.

Радуйся, клеветы и осуждения яко младенец незлобивый принимавший.

Радуйся, яко во обличении нечестия на лица не взиравший.

Радуйся, нищих и сирых питателю изобильный.

Радуйся, обиженных защитниче любвеобильный.

Радуйся, обидящих многомудренное обличение.

Радуйся, учителю, паству ти вверенную, ко спасению наставляяй.

Радуйся, уныние силою упования на Милосердие Божие победивый.

Радуйся, с кротостью и смирением и от простых поучения принимавый.

Радуйся, вся козни вражия силою Божиею поправый.

Радуйся, Богу славно угодивый.

Радуйся, святителю отче Иннокентие, теплый молитвенниче о душах наших.

Кондак 5

"Возвеличим Господа со мною и вознесем Имя Его вкупе", тако паству Саратовскую в проповеди призывал еси, ныне же мы с тобою вкупе вопием Живодавцу Богу: Аллилуиа.

Икос 5

Непрестанно в келлии колена преклоняя, "Боже, милостив буди мне грешному", взывал еси, и нам милостива сотвори Владыку Небеси и земли, тебе вопиющим таковая:

Радуйся, Имя Господа нашего яко пламенное оружие противу козней диавольских имевый.

Радуйся, Онаго силу, яко драгоценный бисер, вся земная оставив, купивый.

Радуйся, силою молитв твоих вся наветы вражия разрушивый.

Радуйся, благочестия столпе, на камене спасительныя веры возведенный.

Радуйся, подвигом своим терпеливо научивый чад своих.

Радуйся, всего себе в руки Божии предавый.

Радуйся, все желание ко Христу имевый.

Радуйся, в Бозе нашем намерение свое полагавый.

Радуйся, яко Христу сораспялся еси.

Радуйся, яко сладость, лицем к лицу зрети Его, ныне вкушаеши.

Радуйся, молитвенниче наш неусыпный.

Радуйся, светильниче веры неугасимый.

Радуйся, святителю отче Иннокентие, теплый молитвенниче о душах наших.

***

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Дивным видением укрепи тя Господь при кончине суща земнаго жития твоего: Ангели Божии прияша тя с собою и в небесныя обители вознесоша, идеже ты поеши ныне: Аллилуиа.

Икос 6

Дух свой Богу предал еси при словах Псалмопевца: "Аз же, Господи, уповаю на Тя", и нас во уповании сем светлем укрепи, поющих ти таковая:

Радуйся, Ангелы на Небо вознесенный.

Радуйся, небесныя радости еще на земли вкусивший.

Радуйся, яко пред тобою Небеса отверзошася.

Радуйся, яко Господь в Небесныя обители всели тя.

Радуйся, до кончины жития твоего о пастве твоей попечение имевый.

Радуйся, яко и немощи телесныя твоему чадолюбию не возбраниша.

Радуйся, яко Духом Святым, возходя от силы в силу, Небеснаго Царствия достигл еси.

Радуйся, яко тамо ныне со святыми ликовствуеши.

Радуйся, яко и нас грешных на земли не оставляеши.

Радуйся, яко духом нам соприсутствуеши.

Радуйся, молитвами нам помогающий.

Радуйся, яко любы твоя никакоже оскуде на нас.

Радуйся, святителю отче Иннокентие, теплый молитвенниче о душах наших.

Кондак 7

Хотя просветити всех ведением неизреченных Судеб Божиих, дивный списатель дел минувших был еси, в них же премудрый Промысел Создателя, вся племена и языки ко спасению ведущий, всем указал еси. Тем же и мы Щедрому Богу покланяемся и вопием: Аллилуиа.

Икос 7

Новаго тя чудотворца и молитвенника во времена последняя дарова нам Человеколюбец Господь, егда за умножение беззакония оскуде во многих любовь. Твоего предстательства, аще и недостойни, но на всепокрывающую любовь твою надеющеся, о нас просим: не остави нас в годину лютых испытаний, укрепляя молитвами твоими вопиющих ти таковая:

Радуйся, яко молитвами твоими землю нашу облагоухал еси.

Радуйся, яко подвиги твоими край наш освятил еси.

Радуйся, о пастве твоей предстателю неусыпный.

Радуйся, помощниче наш во всяких бедах и напастех.

Радуйся, списателю Судеб Божиих пречудный.

Радуйся, ими вся ны наставивый.

Радуйся, проповедниче велегласный.

Радуйся, делателю вертограда Христова премудрый.

Радуйся, верный и благий воине Царя Небеснаго.

Радуйся, цевнице духовная, Славу Божию бряцающая.

Радуйся, Архиереев Богодохновенное украшение.

Радуйся, благочестия твердое ограждение.

Радуйся, святителю отче Иннокентие, теплый молитвенниче о душах наших.

Кондак 8

Странное и преславное чудо является всем, егда честныя и многоцелебныя мощи твоя, аще и от безбожников поругани беша, обретеся паки, к сим припадаем и Богу вопием: Аллилуиа.

Икос 8

Весь еси в вышних, но и нас, долу поверженных, не оставляеши, святителю отче Иннокентие, моления наша слышиши и скоро исполняеши и всегда неотступен пребуди нам, вопиющих ти таковая:

Радуйся, яко всех прибегающих к тебе заступаеши.

Радуйся, яко мощи твоя врачевания источают.

Радуйся, яко моления наша слышиши.

Радуйся, яко во благо их исполняеши.

Радуйся, яко нетлением мощей твоих Ангелов возвеселил еси.

Радуйся, яко мощей твоих беси трепещут.

Радуйся, яко нас, грехми омраченных, просветил еси.

Радуйся, яко смрад страстей наших отгнал еси.

Радуйся, яко талант, данный тебе Богом, умножил еси.

Радуйся, яко в радость Господа твоего вшел еси.

Радуйся, яко нас пред Престолом Божиим непрестанно поминаеши.

Радуйся, яко в благодатных сониях и видениях нас посещаеши.

Радуйся, святителю отче Иннокентие, теплый молитвенниче о душах наших.

Кондак 9

Вси православнии возрадовахуся, егда на Соборе святительстем в лето двухтысящное от Рождества Христова в лице святых Церковь Православная прослави тя. Мы же, имуще таковаго молитвенника, вопием возвеличившему тя Богу: Аллилуиа.

Икос 9

Витии суемудренные, тобою посрамленные, недоумеют что глаголати. Ты же, силою Божиею укрепляемь, всех дерзновенно обличил еси. Мы же, взирающе на праведное житие твое и на твердое Веры Православныя исповедание, вопием ти таковая:

Радуйся, Христом Богом возлюбленный.

Радуйся, силою свыше облеченный.

Радуйся, научение книжное возлюбивый.

Радуйся, тому усердно прилежавый.

Радуйся, разум Божественный стяжавый.

Радуйся, яко Слово Божие умудри тя.

Радуйся, преданий Апостольских верный блюстителю.

Радуйся, Правды Божией ревностный хранителю.

Радуйся, просвещенный благодатию.

Радуйся, учителю златословесный.

Радуйся, изгнанный правды Христовой ради.

Радуйся, яко твое есть Царствие Небесное.

Радуйся, святителю отче Иннокентие, теплый молитвенниче о душах наших.

Кондак 10

Спасти хотя паству твою от ересей и соблазнов, скверная учения беззаконных обличил еси, преславне отче Иннокентие, Православие кротостию премудрых словес твоих утвердил еси и научил еси стадо твое Богоугодно воспевати: Аллилуиа.

Икос 10

Стена твердая и ограда необоримая бысть сила молитв твоих, Богоносе отче Иннокентие, сего ради и мы, паства твоя, к тебе с верою прибегаем и усердно молим: буди нам ограждение крепкое и оружие враги прогоняющее, да не возрадуются хотящии нам злая. Мы же, имея таковаго Богодарованнаго помощника и заступника, в веселии вопием ти таковая:

Радуйся, добрый паствы твоея первосвятителю.

Радуйся, сомневающихся крепкое в вере утверждение.

Радуйся, злобу власть придержащих кротко претерпевый.

Радуйся, истину небоязненно им вещавый.

Радуйся, гонения и притеснения правды ради смиренно приявый.

Радуйся, у благочестивых чад своих пристанище имевый.

Радуйся, яко тобою от всех зол избавляемся.

Радуйся, яко твоими молитвами ревности в Православней Вере исполняемся.

Радуйся, яко тобою истина утверждается.

Радуйся, яко тобою лицеприятие и человекоугодничество посрамляется.

Радуйся, яко пресекл еси злочестивых волнение.

Радуйся, людем пензенским и саратовским похваление.

Радуйся, святителю отче Иннокентие, теплый молитвенниче о душах наших.

Кондак 11

Пение похвальное приносим тебе, святителю отче Иннокентие, и смиренно тя молим: моли о нас Человеколюбца Бога, да не отвратит Лица Своего от нас, присно согрешающих и благость Его на всяк час преогорчевающих, но да твоим заступлением избавит нас от грехов и прегрешений наших, наипаче же сподобит в час кончины нашея покаяния и Божественных Таин причастия, да таковых приобщившеся, сподобимся с тобою в Небесных обителех воспети Богу: Аллилуиа.

Икос 11

Светильник, во тме неверия седящих просвещающий, был еси в земнем житии твоем, отче наш Иннокентие. Просвети убо молитвами твоими и нас, в пучине греха погибающих, да благодарне вопием тебе сице:

Радуйся, смирения и терпения нам наставниче премудрый.

Радуйся, в молитвах и бдениях наш учителю предобрый.

Радуйся, яко ты от суесловия и суемудрия нас отвращаеши.

Радуйся, яко ты в добродетели нас наставляеши.

Радуйся, яко ты в суете мирстей и попечениях житейских погрязшим путь к Горним указуеши.

Радуйся, яко ты нас, обремененных грехми и скорбьми многими, никогдаже оставляеши.

Радуйся, истинный учениче Христов, нас сирых возлюбивший.

Радуйся, гордых и жестоковыйных смиривший.

Радуйся, яко всех почитающих тя от напастей и зол сохраняеши.

Радуйся, яко ты всех скорбящих и болезнующих, к заступлению твоему притекающих, утешаеши.

Радуйся, светильниче, нас потемненных грехми с любовию освещающий.

Радуйся, миро, нас оскверненных беззакониями смрадными облагоухающее.

Радуйся, святителю отче Иннокентие, теплый молитвенниче о душах наших.

Кондак 12

Благодати сосуд избранный был еси, святителю отче Иннокентие, возхваляюще тя усердно, молим: пролей теплую молитву ко Всевышнему за Православное Отечество наше, да избавимся от нашествия иноплеменных и междоусобных браней и да изриновены будут лжеучителие и еретицы инославнии, по грехам нашим умножившияся ныне и ищущие како православных уловити. Мы же в мире и тишине воспоем Христу Богу: Аллилуиа.

Икос 12

Поюще славное твое к Небесным обителем возхождение, святителю отче Иннокентие, прославляем равноангельное житие твое и во умилении сердца славим, хвалим и величаем возвеличившаго тя Господа, даровавшаго нам новаго молитвенника и предстателя, Егоже умоли спастися всех, поющих ти таковая:

Радуйся, житием своим Ангелов удививый.

Радуйся, подвигами своими человеков наставивый.

Радуйся, нищетою духовною сокровище Царствия Божия обретый.

Радуйся, плачем и скорбьми временными утешения вечнаго сподобивыйся.

Радуйся, кротостию своею землю правых наследивший.

Радуйся, правды на земли алкавший, на Небесах же Правдою Божиею насыщенный.

Радуйся, милостию и нищелюбием милость велию от Господа стяжавший.

Радуйся, очистивший очи сердца своего от скверны греха и Бога узревший.

Радуйся, миротворения ради сыном Божиим нареченный.

Радуйся, изгнанный правды ради и в Небесныя обители со славою приятый.

Радуйся, поношения и неправедныя гонения Христа ради претерпевый и многу мзду на Небесех получивый.

Радуйся, яко мощей твоих рака бывает нам источник исцелений и утешений, обильно преизливающийся.

Радуйся, святителю отче Иннокентие, теплый молитвенниче о душах наших.

Кондак 13

О преславный святителю Христов Иннокентие! Приими от нас сие малое моление, в похвалу тебе приносимое, и избави нас предстательством твоим от многих бед и скорбей, да в житии сем временнем сетей вражиих и прелести бесовския избавльшеся, воздушныя мытарства непреткновенно минуя, в Небесный Иерусалим вселитися сподобимся, и тамо с тобою Всеблагому Богу нашему воспоем: Аллилуиа, аллилуиа, аллилуиа.

Сей Кондак читается трижды, затем Икос 1 и Кондак 1.

Молитва чудотворцу Иннокентию, епископу Пензенскому и Саратовскому

Боже великий и сильный, Боже Святый и во святых почиваяй! Се ныне мы раби недостойнии, колена сердец наших в страсе и умилении приклоньше подножию величествия Твоего, припадаем и не дерзая воззрети на высоту Небесную, смиренно милости Твоея безмерныя чаем. Веси, Господи, яко недостойни есмы, но на молитву к Тебе ныне воздвизаем дивнаго угодника Твоего Иннокентия, чудотворца новоявленнаго, иже воистину бе муж по сердцу Твоему. Ты рекл еси, Господи, пречистыми устне Твоими, яко ради и десятих праведных не погубиши града нечестивых. Умилосердися, Владыко Святый, и ниневитяном, согрешшим Тебе, спасения иский, и ныне на нас, непотребных и премного согрешших рабех Твоих, и приими в умилостивление молитвы сего пречуднаго святителя Твоего, с ним же и всех святых Твоих, прославленных в двухтысящное лето преславнаго Воплощения Твоего, ходатайствуют бо сии пред Тобою о нас, чадех и сродницех их, многа бо любовь их, многое и дерзновение пред Лицем Твоим. Многими грехми помрачися естество наше, осквернихом души и телеса своя по действу исконнаго человекоубийцы и противника Твоего, но тем паче припадаем благости Твоей, на милосердие Твое токмо надеющися. Усердно же просим и великаго ходатая нашего и теплаго в бедах нам предстателя Иннокентия, неповиннаго воистину в очах Твоих, да пролиет и свою многомощную молитву пред Тобою, Отцем Светов. Не взирай убо на грехи наша, Боже Превечный, но призри на веру и надеяние наши и предстательство угодника Твоего Иннокентия, и очисти ны от скверн наших. Яко да слезами покаяния и действом благодати Твоея очищени, возможем внити в светлый оный и прекрасный чертог, егоже уготовал еси любящим Тя, и тамо купно со святителем Иннокентием возможем воспевати Пречестное и Великолепое Имя Твое, Отца и Сына и Святаго Духа, в безконечныя веки веков. Аминь.

Читать другие акафисты раздела "Православные акафисты"