Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист священномученику Филарету Срезневскому


Православные акафисты

Акафист священномученику Филарету Срезневскому

Кондак 1

Избранный подвижниче земли Рязанския и преизрядный заступниче к тебе прибегающих, священномучениче отче наш Филарете, от юности твоея Господа возлюбил еси, темже крест страданий за Христа доблестне подъяв, мученическою ризою, яко светом, облеклся еси; ныне со святыми у Престола Вседержителся предстоя, от всяких бед и скорбей свободи любовию зовущих ти:

Радуйся, священномучениче Филарете, дивный молитвенниче и преславный чудотворче.

Икос 1

Ангел во плоти воистину явился еси, блаженне Филарете, подвиги твоими разум земных превозшед, темже Господь издетска тя избра, да явишися проповедник прославления чудесы многими честнаго образа Царицы Небесныя. Мы же, видяще честное житие твое, хвалебное пение сие приносим ти:

Радуйся, родителей благочестивых сыне богоизбранный.

Радуйся, послушанием прилежным сердца тех радовавый.

Радуйся, образ кротости и смирения нам являяй.

Радуйся, исполнение Закона Божия показуяй.

Радуйся, житием твоим в земли Рязанстей просиявый.

Радуйся, пение умиленное к Пречистей возносивый.

Радуйся, за Христа от безбожных зле пострадавый.

Радуйся, с новомученики Российскими соувенчавыйся.

Радуйся, священномучениче Филарете, дивный молитвенниче и преславный чудотворче.

Кондак 2

Видев Господь велие усердие твое в поучении Слову Божию и любовь неложную ко храму святому, небесными видении тя утешаше, в подвизех твоих тем укрепляя; ты же, богоблаженне, ум свой в горняя возносяй и вердцем к Богу пламенеяй, вопиял еси: Аллилуия.

Икос 2

Разумея суетность мира сего и ничтоже временныя жизни предпочет вечныя ради, вся красная мира дольняго отвергл еси, да приобрящеши богатство нетленное, темже еще от юности твоея подвигу преподобных поревновал еси, постом и бдением плоть свою смиряя. Сего ради, отче богоприятне, в умилении поем ти сице:

Радуйся, издетска всего себе Христу предавый.

Радуйся, словом Евангельским душу твою непрестанно питавый.

Радуйся, яко радости мира и плоти далече от себе отгнал еси.

Радуйся, яко супротив тех постничеством вооружился еси.

Радуйся, чистотою души твоея младенцем уподобивыйся.

Радуйся, незлобием и кротостию сердца людей умягчавый.

Радуйся, в горний Иерусалим сердцем твоим устремивыйся.

Радуйся, Ангелов зрети еще на земли сподобивыйся.

Радуйся, священномучениче Филарете, дивный молитвенниче и преславный чудотворче.

Кондак 3

Сила Божия укрепляше тя, егда всею душею твоею иноческаго жития возжелев, родители благословленный, стопы своя во обитель Спасову направил еси, в нейже прилежно в послушании подвизаяся, любовь честныя братии снискал еси, Богу же, на всяцем месте неустанно молитвы вознося, вопиял еси: Аллилуия.

Икос 3

Имеяй велию любовь ко Господу, иночества путем тесным непреткновенно шел еси, труды к трудом прилагая, темже от Бога чин монашеский прияти сподобився, именем Филарет за нестяжание твое нареклся еси, в животе твоем ничесоже когда имевый. Мы же, зряще смирение твое, с любовию взываем ти:

Радуйся, иноче, от юности Богом избранный.

Радуйся, от лет ранних постниче преизрядный.

Радуйся, в послушании усердно повизавыйся.

Радуйся, к службе церковней прилежавый.

Радуйся, молитву Иисусову в сердце твоем творивый.

Радуйся, тою от прилог вражиих себе ограждавый.

Радуйся, Божией добродетели тезоименитый.

Радуйся, Филарету Милостивому уподобленный.

Радуйся, священномучениче Филарете, дивный молитвенниче и преславный чудотворче.

Кондак 4

Бурю страстей мирских воздержанием препобедив, священномучениче Филарете, о единем на потребу прилежал еси, неленостно в трудех духовных дни своя препровождая, сего ради благодать священства достойне восприим, воистину пастырь добрый явился еси, темже смиренномудрием оболченный, в дусе кротости вся приходящия к тебе поучал еси, к покаянию тех обращаяй и призываяй Богу пети: Аллилуия.

Икос 4

Слышавше людие, яко милость велия Матере Божия посети обитель Пронскую, ибо от иконы Ея, Споручница грешных именуемыя, чудеса многая произлияхуся, зело возрадовашася. тебе же, отче Филарете, за теплую любовь к Пречистей, сугубая благодать дадеся, сиречь со образом святым молебно обходити окрест лежащия веси. Мы же, почитающе тя неусыпнаго молитвенника за ны к Царице Небесней, радостно взываем ти:

Радуйся, Бога Живаго усердный служителю.

Радуйся, любви Христовой верный подражателю.

Радуйся, маловерныя с кротостию наставляяй.

Радуйся, Словом Божиим веру в сердцах наших сеяй.

Радуйся, к Матери Божией сыновнюю любовь имевый.

Радуйся, Еюже Матерски зело возлюбленный.

Радуйся, пред пречистым образом Ея тепле моливыйся.

Радуйся, море чудес от того зрети сподобивыйся.

Радуйся, священномучениче Филарете, дивный молитвенниче и преславный чудотворче.

Кондак 5

Богоблагодатнаго пастыря тя зряще, нескончаемым потоком потекоша к тебе людие, духовных наставлений жаждущии и помощи в нуждах просящии, ты же, любвеобильный отче, чада твоя окормляя, ко Пречистей, яко верней о нас Ходатаице пред Сыном Ея, во смирении неложнем молитвы теплыя возносил еси, да людие, по прошением своим приемлюще, не тебе, но Богу благодарне воспоют: Аллилуия.

Икос 5

Видевши Мати Божия велию любовь твою и веру теплую, в молитвах твоих за люди страждущия пред святою иконою Ея изливаемыя, не посрами тя в уповании твоем, обаче, благодать Свою обильно источающи, от бед многих верныя рабы Своя спасе. Тебе же, угодниче святый, яко скорому предстателю за ны во всяцей скорби, сицевое пение приносим:

Радуйся, лучу, светом веры паству твою осветивый.

Радуйся, огню, непрестанною молитвою к Богу пламеневый.

Радуйся, звездо, на пути ко спасению духовноводящая.

Радуйся, лампадо, пред иконою Владычицы любовию горящая.

Радуйся, огнь лютый молитвою к Пречистей абие угасивый.

Радуйся, мужа некоего от беснаго стужения свободивый.

Радуйся, помощниче в напастех нам непреложный.

Радуйся, питателю щедрый духовно жаждущих.

Радуйся, священномучениче Филарете, дивный молитвенниче и преславный чудотворче.

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедник любве христианския воистину показался еси, словесы твоими верных на подвиг воодушевляяй, наипаче образ воздержания тем показуя, отрадную надежду ко исправлению подавал еси, темже от Бога благодатным миром исполненный, отче Филарете, всех призывал еси вопияти Ему: Аллилуия.

Икос 6

Возсияша добрая дела твоя, благодатне Филарете, яко свет, верою просвещаяй души, грехми помраченныя, согреваяй надеждою сердца, в ожесточении оледелая, и озаряяй вся к тебе притекающия, тихим радованием любве Христовы. Мы же, прославляюще Бога за толикую милость, яко мудра пастыря тя познахом, в радости сердец наших взываем ти:

Радуйся, проповедниче, воздержанием украшенный.

Радуйся, пастырю, смиренномудрием удобренный.

Радуйся, дар молитвы непрестанныя стяжавый.

Радуйся, отраду и утешение в печалех подававый.

Радуйся, на ниве Божией доброделателю преизрядный.

Радуйся, мира душам нашим подателю благосклонный.

Радуйся, печальниче о нас непреложный.

Радуйся, заступниче в бедах скорый и пречудный.

Радуйся, священномучениче Филарете, дивный молитвенниче и преславный чудотворче.

Кондак 7

Хотяй по разорении Пронския обители волю Пресвятыя Богородицы исполнити, дивный образ Споручницы грешных во храм, зримо явленный в видении некоей рабе Божией, со благоговением принесл еси. егда же со святынею, отче богоносне, внутрь храма вшел еси, вся убо свещи и лампады чудно возгорешася, темже вернии, милостию Заступницы утешеннии, в радости воспеша Богу: Аллилуия.

Икос 7

Новый молитвенник и помощник верным людем веси тоя показался еси, те бо, отче Филарете, старца прозорлива тя почитающе, во всяких тяжких обстояниих мысленне с верою к тебе припадаху и скоро неврежденни бываху. Сего ради и мы, в заступление твое несумненно верующе, приносим ти таковая:

Радуйся, иконы Пречистыя верный хранителю.

Радуйся, судеб Божиих предивный тайнозрителю.

Радуйся, в душах грехи людския, яко в книзе, читавый.

Радуйся, с любовию неложною тех исправлявый.

Радуйся, от потопления воднаго чада твоя спасаяй.

Радуйся, от мраза гибельнаго тех свобождаяй.

Радуйся, болезни неисцельныя врачуяй.

Радуйся, от мертвых силою Божиею чада возставивый.

Радуйся, священномучениче Филарете, дивный молитвенниче и преславный чудотворче.

Кондак 8

Странное и дивное чудо виде жена некая, яко тя, отче Филарете, благоговейно службу в храме творяща, Ангел Божий, явився над тобою, крылома своима покры, и сие в простоте сердца тебе поведа; ты же смиренно запрети сей коему либо виденное глаголати, но паче, поминающи любовь и милосердие Божие, всегда взывати Тому: Аллилуия.

Икос 8

Всем был еси пастырь богоданный, усердно стадо твое по Бозе пасый и о судьбах России молитвенно печалуяся, и яко светильник во мраце беззакония горя, под спудом не возмогл еси укрытися, вся собою освещаяй, темже, ищуще пути богоугодныя, со всея земли Рязанския люд православный и монаси от разоренных обителей во храм к тебе схождахуся. Мы же, светом жития твоего просвещаеми, в умилении приносим ти сицевая:

Радуйся, Ангелов Божиих достойный сослужителю.

Радуйся, веры Православныя твердый хранителю.

Радуйся, земли Российския теплый печальниче.

Радуйся, в скорбех ея кроткий сострадальниче.

Радуйся, пристанище и утешение гонимым за веру подавый.

Радуйся, светильниче веры Христовы, правый путь осветивый.

Радуйся, темже ко иноческому житию многия приведый.

Радуйся, чин игумена за труды твоя достойне приявый.

Радуйся, священномучениче Филарете, дивный молитвенниче и преславный чудотворче.

Кондак 9

Всего себе воли Божией предал еси, пастырю богодухновенный, егда по лжесвидетельству в темницу всажден быв и отселе на путь крестный безстрашне став, никакоже о себе пекийся, на Голгофу необинуяся возшел еси, во еже со Христом умрети, с Нимже и воскрестнути; сего ради в части сей Бога прославляя, вопиял еси: Аллилуия.

Икос 9

Витии человечестии не возмогут изрещи все мужество твое, воине Христов Филарете, ты бо в тяжких испытаниих, биения и мраз претерпевая, непреоборимь в вере пред мучители твоими явился еси, темже силою духа тех прещения препобедив, чист пред Богом и верными Ему пребыл еси, темже со разбойники вменился еси, в заточение сослан быв. Мы же со слезами таковая приносим ти:

Радуйся, венец терновый себе предвидевый.

Радуйся, той от руку Божию смиренно приявый.

Радуйся, первых христиан страданий причастниче.

Радуйся, Христа Бога верный исповедниче.

Радуйся, яко вся претерпев, от Бога не отрешился еси.

Радуйся, яко волею своею Тому до конца покорился еси.

Радуйся, воине Христов, силою духа врагов поразивый.

Радуйся, любовь ко Господу в терпении показавый.

Радуйся, священномучениче Филарете, дивный молитвенниче и преславный чудотворче.

Кондак 10

Стена несокрушимая, отче Филарете, пастве твоей быв, образ веры непреклонныя в страданиих показал еси, егда по возвращении твоем, безбожными гонимый и пастырскаго служения лишенный, отай нощию с иконою Владычицы трищи храм обышел еси, да покровом Ея сохранен пребудет. Темже, зряще храм сей и доныне заступничеством Честныя Матере неврежденный, Сыну Ея благодарне воспоим: Аллилуия.

Икос 10

Пение всеумиленное на всяцем месте от сердца любящаго Господу и Богородице возносил еси, и Церкве Православныя, не взирая на возбранения безбожных, пастырь истинный до конца пребыл еси, темже тя, отче боголюбне, власть предержащий, не могуще терпети, на тяжкий труд в заточение сослаша, тамже скудостию и гладом изнуряемый, схиму приим, Богови дух твой предал еси. Мы же, подвиг твой поминающе, тепле вопием ти:

Радуйся, крестный путь твой до конца претекий.

Радуйся, веру несумненну и тверду соблюдый.

Радуйся, мученичества венцем терновым уязвенный.

Радуйся, ныне славы венцем нетленным украшенный.

Радуйся, Христа паче жизни твоея волюбивый.

Радуйся, от Негоже зело возлюблен бывый.

Радуйся, вся страдания мужественне претерпевый.

Радуйся, велие дерзновение пред Богом стяжавый.

Радуйся, священномучениче Филарете, дивный молитвенниче и преславный чудотворче.

Кондак 11

Песнь хвалебную приносим ти, угодниче Христов Филарете, ибо мощнаго молитвенника земли Русския пред Престолом Божиим ныне обретохом, се и святая икона твоя, миро точащая, свидетельствует о несумненном ходатайстве твоем за нас, любовию тя ублажающих и благодарным сердцем поющих Богу: Аллилуия.

Икос 11

Свет Христов в житии твоем, егоже сатана восхоте погубити, в прославлении твоем вящше возсия, отче богохвальне Филарете, ибо чудесы многими, и доныне тобою творимыми, имя Божие зело прославляется; темже, Бога и Его велию милость славяще, тебе, яко скорому нам помощнику, сице воспоем:

Радуйся, яко многоценный бисер, Христа обрел еси.

Радуйся, яко вся верныя тем богатно ущедрил еси.

Радуйся, дел духовных верный споспешниче.

Радуйся, и нужд житейских скорый помощниче.

Радуйся, неправедно обидимыя заступаяй.

Радуйся, от навет рабы Божия свобождаяй.

Радуйся, сосуде чудес неиждиваемый.

Радуйся, источниче щедрот неисчерпаемый.

Радуйся, священномучениче Филарете, дивный молитвенниче и преславный чудотворче.

Кондак 12

Благодати неизследную силу, юже стяжал еси, блаженне Филарете, за всецелое себе отречение, любве ради ко Господу, юже до смерти пронесл еси, имамы ныне в предстательстве твоем, да взирающе на святый твой образ и со умилением к нему припадающе, воспоим Человеколюбцу Богу: Аллилуия.

Икос 12

Поюще славное по Бозе житие твое, пастырю Христов, Филарете, величаем подвиги твоя, Христа ради подъятыя, восхваляем чудеса твоя, теми бо по всей земли Рязанстей просветился еси, чтим и мученичество твое, имже от тленных в нетленная преселился еси, и, почитающе тя, велия заступника за ны пред Господем, славословим песньми таковыми:

Радуйся, храмину души твоея на камени веры утвердивый.

Радуйся, Господа ради и Евангелия душу твою положивый.

Радуйся, Христа в роде сем исповедати не постыдивыйся.

Радуйся, Страстем Христовым с радостию приобщивыйся.

Радуйся, паствы твоея чудный пред Богом ходатаю.

Радуйся, слезных молитв наших скорый услышателю.

Радуйся, никогоже, тебе просяща, помощию оставляяй.

Радуйся, благодатию, ти данное, и доныне чудодействуяй.

Радуйся, священномучениче Филарете, дивный молитвенниче и преславный чудотворче.

Кондак 13

О досточудный и славный священномучениче Христов Филарете! Ты бо, подвиги твоими велие дерзновение пред Господем стяжав, венцем славы нетленныя увенчался еси, темже приими сие малое моление наше и твоим теплым предстательством умоли всещедраго Бога, да утвердит ны в заповедех Своих, во еже путь земнаго жития в вере скончати и вечныя радости небесныя достигнути, идеже с тобою Всеблагому Богу воспоим: Аллилуия

Сей Кондак чтется трижды, затем Икос 1 и Кондак 1

Молитва священномученику Филарету Срезневскому

О дивный пастырю, священномучениче Филарете!

Сердце чисто от юности твоея Господеви сохранив, крест страданий, яко знамя победы, до смерти непреткновенно пронесл еси, сего ради вкупе с сонмом новомучеников Церковь Русскую украшаяй, не забуди ны, блаженную память твою совершающия и любовию тя чтущия, буди нам заступник на врага спасения нашего, да верою твердою противоставше тому, убежим всякаго лукавствия мира сего, во еже нам нескверным и непорочным жительства Небеснаго града достигнути; еще молим тя, всечестный отче, помогай нам в немощех наших: души убо в истине Христовой укрепи, телеса многоболезненная уврачуй; буди нам помощник во всяцей скорби и печали, наставник же непреложный, путеводяй ны во мраце страстей наших к вечному Солнцу Правды, Христу Богу нашему, да имуще таковаго теплаго предстателя за ны, прославим Отца и Сына и Святаго Духа, ныне и присно и во веки веков. Аминь.

Тропарь священномученику Филарету Срезневскому, глас 5

Учителю благочестия, истинныя веры Христовы ревнителю, священномучениче Филарете, Пронския и Срезневския земли украшение, стяжал еси в сердце твоем Духа Святаго благодать, Христа мужественно исповедал еси, к новомучеником Российским быв сопричтен, славу на небесех наследовал еси. Молися прилежно владыце Христу, да сохранит Отечество наше в мире и благоденствии, и спасет души наша.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru