Православные акафисты
Акафист второй равноапостольной
первомученице Фекле
Кондак 1
Избранная чудотворице, угоднице
Христова, равноапостольная мати Фекло, благодарно
исповедующе, яко всем притекающым к тебе с верою и
творящим всечестную память твою, подаеши от Всещедраго
Бога великия и богатыя милости, восхваляем тя любовию.
Ты же, яко имущая дерзновение ко Господу, молися присно
о спасении нас грешных, да радостно зовем ти:
Радуйся, святая мати наша Фекло, невесто
Христова премудрая и покровительница наша
многомилостливая!
Икос 1
Ангелам небесным в любви к Сладчайшему
Иисусу поревновавшая, апостольским учениям
последовавшая, суету мира языческую преславно обличившая
и образ жития богоугодного в любве ко ближнему и делами
молитвенником явившая, мати наша святая, первомученице
Фекло достохвальная, в дерзновенных молитвах твоих
помяни ны, зовущих ти сице:
Радуйся, от мрака суеты к свету Христову
пришедшая.
Радуйся, наставлениям апостола Павла
внимавшая.
Радуйся, путем девства Христа ради
последовшая.
Радуйся, притеснения и гонения многия
претерпевшая.
Радуйся, плод сторочный Владице Христу
принесшая.
Радуйся, лампадо присносияющая, путь
спасения нам озаряющая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 2
Видя Христос Господь душу твою, ко
приятию семени слова Божия чистотою предуготованную,
светом познания Своего просвети тя, послав в град твой
первоверховнаго Павла апостола, его же словесем внимая,
пречестная Фекло, оставила еси зловерие языческое и вере
спасительней приобщила еси, воспевая просветившему тя
Господу: Аллилуйя!
Икос 2
Разум богопросвещенный даровася тебе,
святая Фекло, имже ясно проразумела еси тщету
душепагубную жития привременнаго и онаго уклонитися,
Христа же взыскати потщалася еси. Вседушно тем же
взываем ти:
Радуйся, богатство земное ни во чтоже
вменившая.
Радуйся, веры Христовы бисер многоценен
стяжавшая.
Радуйся, Христовым учением душу твою
просветившая.
Радуйся, лилие прекрасная вертограда
Иисусова.
Радуйся, прибежище наше и защищение.
Радуйся, скорое и безмездное недугов
врачевание.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 3
Сила Вышняго укрепи тя на подвиг
исповеднический, мученице святая Фекло; не терпя бо
видети пагубу душ человеческих, ревностию разжеглася еси
по Бозе живе, небоязненно обличила еси еллинскую
прелесть, поучая собратий твоих благочестно веровати во
Христа, за Него же и страдати не уклонилася еси, зовуще:
Аллилуиа!
Икос 3
Имущее ревность по Бозе Спасе Твоем,
Фекла преславная, жениха земнаго знати не восхотела еси,
словам же апостала Павла внимая, всецело отдала еси Себе
Иисусу Сладчайщему, Его же ради осуждение на сожжение
кротце прияла еси. Господь же явися ти в годину
страдания твоего, с небес благослови тя, и пламень
вещественный потуши. Мы же сия славословим, просим тя.
Обнови в слабую веру нашу, укрепи любовь и лучами
надежды озари ны, зовущия ти сице:
Радуйся, добродетелей жилище,
преукрашенное чистотою.
Радуйся, пречудное мужество во страдании
явившаая.
Радуйся, яко просвещена была еси зарею
Пресвятаго Духа.
Радуйся, яко страх малодушный от себе
отрясла еси.
Радуйся, яко щитом веры оградилася еси.
Радуйся, удостоившаяся благодатнаго
осенения свыше.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 4
Бурю малодушия и боязни от сердца твоего
отгоняющи, святая Фекло, и на предлежащий мученический
подвиг предуготовляла еси ся, да не убоятися мук и не
отвергнутися Жениха твоего Небеснаго, небоязненно
исповедывала еси Христа быти Бога истиннаго,
сотворившаго небо и землю, идольскую же прелесть
обличила еси, и за сие исповедание и обличение муки и
страдания многообразные претерпела еси, к
Подвигоположнику твоему вопия: Аллилуиа!
Икос 4
Слышавше тя непреклонную и непобедимую
проповедницу спасительного учения Христова, наместник
града Антиохии, повеле тя зверем лютым на убиение
предати. Ты же, силою Господнею укрепляемая, невредима
пребыла еси. Зряще сие житилие града того возопиша
«Воистину велик Бог христианский!» Мы же таковые похвалы
тебе возносим:
Радуйся, неумолкающая благовестнице силы
Божия.
Радуйся, неутомимая исповеднице
евангельския истины.
Радуйся, за прелюбезнаго ти Иисуса вся
вражыя ухищрения разрушившая.
Радуйся, поношение за пресладкаго ти
Иисуса веселяся претерпевшая.
Радуйся, поругание и досаждение за Него
благодушно со смирением восприявшая.
Радуйся, яко во исповедании Христове
непоколебима пребыла еси.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 5
Богомудрому наставнику твоему, апостолу
первоверховному Павлу подражала еси, святая дево Фекло,
вопия: Христа чту, Единаго же Его люблю и проповедати
Евангелие Его людем преискренне желаю, сердцем и усты
воспевая Ему: Аллилуиа!
Икос 5
Видим тя, мати святая Фекло, взором
духовным в лице дев и мучениц славословящу непрестанно
Агнца Божия, радуемся и веселимся, яко великия милости
от Христа прияла еси, яко чтит убо тя весь мир
христианский, яко Восток и Запад почитают тя и молитвы
благоговейно возносят ти, яко с умилением и упованием
христиане имя твое призывают. Сего ради мы молим тя:
прими воздыхания сердечные наши, да зовем ти сице:
Радуйся, яко любовью Твоею мы, мертвые
духом, оживотворяемся.
Радуйся, яко Тобою от сна греховнаго
просыпаемся.
Радуйся, яко Тобою совесть наша
очищается.
Радуйся, яко Тобою бодрость духовная в
нас появляется.
Радуйся, яко Тобою ум наш просвещается.
Радуйся, яко Тобою ожесточенным и
озлобленным сердцем смягчаются.
Радуйся, святая мати наша Фекло, невесто
Христова премудрая и покровительница наша
многомилостливая!
***
Читайте также:
- Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
- Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.
***
Кондак 6
Проведника богоноснаго апостола Павла
имела еси учителем твоим, Фекло преблагословенная, его
же советом внимая, удалилася еси в пределы Исварийския,
идеже пророком древним Моисею и Илии подражая в посте и
молитве, преусердно подвизалася еси, образ жития
преподобническаго преславно являя и за весь мир
Господеви молитвы вознося и поя Ему: Аллилуйя!
Икос 6
Возсияла еси в стране Сирийстей, яко
лампада, Господом Иисусом возжженная, темже множество
людей стекахуся в место уединения твоего, дабы тя видети
и слышати наставления твоя. Ты же, святая мати, всех к
тебе грядущих наставляла веровати в Сладчайшего
Спасителя Нашего и токмо в Его благодати обретати
радость и утешение. Мы же, память твою творяще, вопием
сице:
Радуйся, розо духовная, благодатию
привлекающая взоры душевныя к тебе приходящих.
Радуйся, горлице пустыннолюбивая,
исаврийския дебри огласившая пением славы Божия.
Радуйся, пчело трудолюбивая, соты
добродетелей в насыщение ближних с собою носящая.
Радуйся, на подвиг самоотвержения Христа
ради нас воодушевляющая.
Радуйся, вся красная мира сего
преходящаго презирати нас научающая.
Радуйся, дольняя оставляти и духом
взлетати к горним увещевающая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 7
Хотя душу твою спасти, мир Божий стяжала
еси внутрь себе, богоносная мати наша Фекло, темже и
спасахуся окрест тебе множество душ, благодарственно
поющих Богу: Аллилуйя.
Икос 7
Новые и чудные подвиги подъяла еси,
досточудная мати Фекло, в пустынных Селевкии Исаврийской
жительствующе, непрестанно проповедуя Слово Божие,
многих язычников ко Христу обратила еси, больных
исцеляла еси молитвами твоими, грешников на путь
покаяния и исправления наставляла еси. Мы же веруя, яко
и ныне не оскудела еси милосердием твоим к нам, с
надеждою взываем ти сице:
Радуйся, яко Тобою ненавистницы любовию
обогащаются.
Радуйся, яко Тобою нетерпеливые терпеть
научаются.
Радуйся, яко Тобою завистливые
доброжелательными бывают.
Радуйся, яко Тобою сребролюбцы
нестяжательными и щедродательными становятся.
Радуйся, яко тобою пияницы и табакокуры
от гнусных страстей избавляются.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 8
Странницу и пришелицу себе на земли быти
помышляя, час кончины твоея пред очима твоима присно
имела еси, богомудрая Фекло, и сего ради к вечному
животу стремилася еси, поя Богу: Аллилуйя.
Икос 8
Вся в Бозе была еси, яко Им токмо жила
еси на земли, Ему молитвы непрестанно возносила,
богомудрая мати, Его силою страждущих безмездно исцеляла
еси от недуг лютых. Сего ради ополчишася волсви
языческие на тя, помышляя тебе жрицею богов их суетных
быти, не ведая, яко ты вся творила еси благодатию
Небеснаго Жениха твоего и Спасителя. Мы же с верю и
любовию славословим тя ныне сице:
Радуйся, Божия благодати смиренная
таиннице.
Радуйся, судеб Божиих пречудная
тайновидице.
Радуйся, ветве, благоухания Небеснаго
исполненная.
Радуйся, заре, верою твоею души наша
пробуждающая.
Радуйся, звездо, любовию Христовою нас
озаряющая
Радуйся, благодать душам нашим
возвращающая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 9
Всякое естество удивися, богоблаженная
мати наша Фекло, великому свыше тебе дарованию, ты бо на
земли, яко ангел, пожила еси и во плоти, аки безплотна,
явилася еси, темже и дар чудотворения от Господа прияла
еси. Ныне же, к лику святых сопричтенная, ангельски
воспеваеши песнь: Аллилуйя!
Икос 9
Ветии многовещании недоумеют достойно
восхвалите подвизи твоя, богоносная мати наша Фекло, яже
подъяла еси на земли, имиже Христа досточудно прославила
еси; ныне же во Царствии Его в лице мучениц и исповедниц пребываеши и нас на путь спасения наставляеши. Сего ради
и мы величаем тя сице:
Радуйся, благонравием и любовию наши
души наполняющая.
Радуйся, от самообольщения и тщеславия
сердца исцеляющая.
Радуйся, путь живота честнаго нам
указующая.
Радуйся, взоры духовные на небеса
обращающая.
Радуйся, милосердие Божие к нам
приклоняющая.
Радуйся, моления наши без ответа не
оставляющая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 10
Спасения вечнаго искала еси, богомудрая
мати Фекло, и сего ради подвигами многообразными и
многотрудными просияла еси, достославная невесто
Христова, и старицею маститою в час гонений удалилися
еси в уединение горное и тамо скалою сокрытая предала
еси душу твоему Христу Богу, поя Ему: Аллилуйя!
Икос 10
Стена еси была всем во дни жития твоего,
богоносная мати Фекло; сего ради и место погребения
твоего во обители преславней бысть прибежищем духовным,
чающим отрады и исцеления, многие бо христиане во всем
мире тя призывая помощь и утешения обреташа. Сего ради и
мы, предстояше пред святым образом твоим, таковыя
славословия тебе возносим:
Радуйся, язвы и раны кожныя преславно
врачующая.
Радуйся, болезни рук и ног исцеляющая.
Радуйся, длани наши щедрыми быти
сотворяющая.
Радуйся, души от пристрастей греховных
избавляющая.
Радуйся, даром сострадания сердечнаго ны
обогащающая.
Радуйся, милосердные дела творити
научающая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 11
Пение всехвальне со ангелы купно
воспеваеши ныне Агнцу Божию, всеблаженная мати наша
Фекло, ты бо прославила еси Христа на земле жизнию паче
же смертию твоею, первомученице всехвальная, яко по
кончине твоей славою небесною осиянная, чудеса
мноогобразныя источаеши, не преставая ими прославляти
Творца, ты бо во обстояниех скорбным отраду
ниспосылаеши, земные дела наши во славу Божию
управляеши, супружества благия устрояеши, христиан в
подвизех молитвы и богопознания утверждаеши. Мы же,
прославляя Бога, Дивнаго во Святых Своих, воззовем Ему о
тебе: Аллилуйя!
Икос 11
Света небеснаго присносияющего дщерь
благословенная, досточудная мати наша Фекло, воистину
явилася еси, яко вся просвещаеши святыми молитвами
твоими и предстательством всеблагомощным покрываеши, и
ко Иисусу Сладчайшему присно направляеши ны, и Его
милосердие приклоняеши к нам, с надеждою и любовию
вопиющим ти сице:
Радуйся, нечаянной отрадою сердца наши
возвеселяющая.
Радуйся, скорби и тревоги скоро
утоляющая.
Радуйся, мудростью небесною земные умы
преобращающая.
Радуйся, слабости наши в силу
претворяющая.
Радуйся, доверием к Богу души наши
наполняющая.
Радуйся, дар дерзновенной молитвы нам
посылающая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 12
Благодати Божия сосудом избраным была
еси, благоухая богоугодным житием твоим, вселюбимая мати
наша Фекло, дара сия благодати и мы получити от Господа
молитвами твоими чаем, да еюже спасаеми, умиленно с
тобою поем Богу: Аллилуйя.
Икос 12
Воспеваем тя, прехвльная чудотворнице и
заступниче досточудная, благовестнических и апостольских
трудов твоих ради, за Христа страданиями твоими в
чертози Отца Небеснаго вошла еси и тамо обитель себе
сотворила еси, мати всехвальная Фекло, ныне бо
лицезрения Всесвятыя Троицы, наслаждаешися, со ангелы и
апостолы ликуя у Престола Божия, идеже и нас,
многогрешных поминаеши, вопиющих ти таковая:
Радуйся, яко изгоняеши зиму нечестия.
Радуйся, яко источаеши свет благочестия.
Радуйся, страждущих от неисцельных ран
исцеляющая.
Радуйся, отчаявшимся надежду подающая.
Радуйся, силу немощным дарующая.
Радуйся, мрак сомнений тягостных
разгоняющая.
Радуйся, святая мати наша Фекло, невесто
Христова премудрая и покровительница наша
многомилостливая!
Кондак 13
О, преславная первомученице Христова и
чудотворице Фекло! Приими сие похвальное пение от нас
недостойных тебе приносимое, и твоими богоприятными
молитвами у престола Божия испроси нам утверждения в
вере христианской, и в будущей жизни сподобитися внити
во славу небесную, купно с тобою поюще выну: Аллилуйя.
Сей Кондак чтется трижды посем Икос 1 и
Кондак 1
|
