Православные акафисты / Акафист княгине Анастасии Киевской

Православные акафисты

Акафист преподобной Великой княгине Анастасии Киевской

Кондак 1

Избранней от рода царскаго послужити во иночестем чине Небесному Царю и дивными подвиги милосердия Бога прославити, Анастасии, матери нашей преподобней, благодарственное восписуем пение. Ты же, яко имущая дерзновение ко Господу, от всяких нас бед свободи и сердца наша ко Христу обрати, взывающих ти:

Радуйся, Анастасие, царственная княгине, венцем преподобия увенчанная.

Икос 1

ангельскому жительству поревновавши, Великая Княгине, вся блага мирския во уметы вменила еси, да Христа приобрящеши. Темже по кончине твоей радости небесныя причастилася еси, мати всехвальная. Призри ныне милостивно с горних высот на нас, тако величати тя дерзающих:

Радуйся, отрасле царская благословенная.

Радуйся, благоверных княгинь прославление.

Радуйся, от млада мрежею Христа уловленная.

Радуйся, избраннице Царицы Небесныя.

Радуйся, добрыми родители благотворению наученная.

Радуйся, на стезю добродетелей теми наставленная.

Радуйся, заповедей Господних исполнительнице.

Радуйся, благочестия ревнительнице.

Радуйся, нищих услышательнице.

Радуйся, скорбящих попечительнице.

Радуйся, образе милосердия.

Радуйся, источниче сострадания.

Радуйся, Анастасие, царственная княгине, венцем преподобия увенчанная.

Кондак 2

Видела еси, княгине блаженная, превосходящую всякия лжемудрования Православия красоту, и егда обещалася еси быти супругою сыну цареву, тогда обручилася еси и Жениху Небесному в вере истинней, воспевающи ему чистым сердцем: Аллилуия.

Икос 2

Разумом богопросвещенным, еще в мире живущи, ко Христу устремилася еси и в граде святаго Петра Покровскую общину милосердия устроила еси, мати благосердая. Слуг же своих яко сподвижниц имела еси, глумления и укорения от гордаго мира претерпевающи. Темже и нас смирению научи, сице тебе зовущих:

Радуйся, Православие всем сердцем возлюбившая.

Радуйся, всею душею веру чисту восприявшая.

Радуйся, веру истинную в дела милосердия претворившая.

Радуйся, труды своими Христа прославившая.

Радуйся, цвете Православия благоуханный.

Радуйся, сосуде Господень избранный.

Радуйся, Церкве Российския украшение.

Радуйся, Горняго Иерусалима прозябение.

Радуйся, путем непорочным шедшая.

Радуйся, благую совесть во всем стяжавшая.

Радуйся, любве Христовой подражательнице.

Радуйся, простому люду добрая служительнице.

Радуйся, Анастасие, царственная княгине, венцем преподобия увенчанная.

Кондак 3

Силою свыше постиже тя искушение тяжкое, коньми бо из колесницы на землю низвержена, чудом дивным и Промыслом Божиим жива осталася еси. Обаче и в сем уведевши крепкую руку Господню, помышляла еси, преподобная: "аще приях благая от Бога, злых ли не стерплю?", и благодарне возопила еси Христу: Аллилуия.

Икос 3

Имущи велию веру Промыслу Божию, чужда бе ропоту душа твоя, мати всечестная, и, яко злато в горниле, испыта тя Господь скорбьми и болезнию многолетнею. Ты же, не чающи себе исцеления, молитву сердечную творила еси, Всесильнаго Бога, спасшаго тя, непрестанно восхваляющи. Сего ради приими от нас пение сие:

Радуйся, агнице, козни лукаваго мужественно претерпевшая.

Радуйся, крест болезней с кротостию вземшая.

Радуйся, от мира суетнаго недугом избавленная.

Радуйся, врачми земными оставленная.

Радуйся, Христа утешением имевшая.

Радуйся, во псалмех его воспевавшая.

Радуйся, Псалтирь источником радования именовавшая.

Радуйся, молитве Иисусовой со тщанием прилежавшая.

Радуйся, страждущим сострадательнице благосердая.

Радуйся, об унывающих молитвеннице усердная.

Радуйся, недужных телес врачевание.

Радуйся, отчаянных душ упование.

Радуйся, Анастасие, царственная княгине, венцем преподобия увенчанная.

Кондак 4

Бурею недоумения движима, мати многострадальная, во южныя страны отправилася еси, лечения ради недуга твоего, обаче ничтоже возможе исцелити тя. На пути же паки в землю Русскую восхотела еси поклонитися Горе Афонстей, взывающи к Пречистей Владычице удела сего: Аллилуия.

Икос 4

Слышавше старцы афонстии Пантелеимоновы Русския обители, яко приближися корабль с великою княгинею, снидошася во сретение и узревше тя, яко смиренную рабу Христову, зело удивишася благонравию твоему. С ними же и мы, убогие, приносим ти таковыя похвалы:

Радуйся, к вертограду Богоматери притекшая.

Радуйся, веру крепкую к ея ногам принесшая.

Радуйся, пчело, нектар богомудрия собравшая.

Радуйся, в сердце своем его слагавшая.

Радуйся, сладкий мед боголюбия источившая.

Радуйся, дивную красоту души явившая.

Радуйся, лань, у святынь афонских жажду утолившая.

Радуйся, благоговейныя моления пред ними возносившая.

Радуйся, во Ильинстем скиту величавый храм заложившая.

Радуйся, пророка Илию усердно почтившая.

Радуйся, Игумении Небесныя послушнице верная.

Радуйся, Первоинокини ученице теплая.

Радуйся, Анастасие, царственная княгине, венцем преподобия увенчанная.

Кондак 5

Боготечную звезду граду Киеву дарованную зрим тя, мати пречудная, яко по прибытии твоем во страну родную в нем поселилася еси. И зде, телом болезнующи, в тиши же молитвенней с присными сестрами правило иноческаго жития соблюдающи, научала еси их воспевати Царю всяческих: Аллилуия.

Икос 5

Видевши тленность мира сего, княгине боголюбезная, восхотела еси во ангельстем образе Богу послужити. Обретши же место пустынное и уразумевши о нем преподобнаго Феофила глагол пророческий, начало обители Покровския положила еси. Мы же, дивяся чудесем Христовым, вопием ти:

Радуйся, в святый град Киев во спасение пришедшая.

Радуйся, скорби с благодарением понесшая.

Радуйся, в недузе сущи, не унывавшая.

Радуйся, служити Богу присно желавшая.

Радуйся, сетей мира страстнаго избегшая.

Радуйся, прилоги врага льстиваго отвергшая.

Радуйся, обители монашеския создательнице предреченная.

Радуйся, во время благопотребно Киеву явленная.

Радуйся, место пусто и убого яко рай сотворившая.

Радуйся, древо иноческое тамо насадившая.

Радуйся, слезами своими сие древо напоившая.

Радуйся, труды многими его возрастившая.

Радуйся, Анастасие, царственная княгине, венцем преподобия увенчанная.

***

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедницею благодеяний Господних по вселении твоем в обитель явилася еси, мати святая, тамо бо изливала еси скорбь о немощи, томящей тя, пред Почаевскою иконою Богородицы, и чудесно исцеленною от одра болезни восстала еси, возопивши Целительнице душ и телес наших: Аллилуия.

Икос 6

Возсия благодать Божия, яко заря пресветлая, в душе твоей, преподобная мати, благослови бо Пречистая Владычица благое желание сердца твоего и сподоби тя пострижение тайное от руки старца афонскаго прияти, имже Анастасиею во инокинех нареклася еси. Сего ради сладкопесненно восхваляем тя:

Радуйся, Царицею Небесною исцеленная.

Радуйся, ко иноческим ликом сопричтенная.

Радуйся, оттоле со Христом обрученная.

Радуйся, Анастасиею, сиречь воскресением, нареченная.

Радуйся, тайну пострига зело соблюдавшая.

Радуйся, послуш¬ницею смиренно себе называвшая.

Радуйся, устава церковнаго рачительнице.

Радуйся, за вся людие печальнице.

Радуйся, подвигов иноческих возжадавшая.

Радуйся, житию равноангельному ревновавшая.

Радуйся, монахинем присная наставнице.

Радуйся, за свою обитель перед Господом ходатаице.

Радуйся, Анастасие, царственная княгине, венцем преподобия увенчанная.

Кондак 7

Хотящи иноческий подвиг с любовию ко страждущим сочетати, мати милосердная, во обители своей лечебницы и приюты для убогих и сирот устроила еси, на сие все богатство твое употребивши. Христа же, яко сокровище некрадомое, стяжала еси, воспевающи ему: Аллилуия.

Икос 7

Новая благодать осени град Киев, егда от всея Руси притекаху людие во Княгинин монастырь, нецыи спасения души ради, инии в недузех и скорбех прибегаху к тебе, богомудрая мати. И никтоже тощь и неутешен от тебе отъиде. Не забуди же ныне и нас, радостно взывающих ти:

Радуйся, чаше, токи милосердия Божия изливающая.

Радуйся, всяку слезу от лица недужных отирающая.

Радуйся, послушание во врачебнице избравшая.

Радуйся, Врача Небеснаго о болящих умолявшая.

Радуйся, за ближних душу положившая.

Радуйся, якоже Самому Христу, им послужившая.

Радуйся, сиротам воспитание доброе.

Радуйся, убогим вспоможение скорое.

Радуйся, слепых благая утешительнице.

Радуйся, заблудших вразумительнице.

Радуйся, всем руку помощи подати искавшая.

Радуйся, скорби людския в своем сердце вмещавшая.

Радуйся, Анастасие, царственная княгине, венцем преподобия увенчанная.

Кондак 8

Странно бе миру видение сие: Великая Княгиня яко простая инокиня во обители своей с последними труждается и уставы церковныя строго соблюдает, непрестанною молитвою к Богу устремляющися. Молим тя, угоднице Христова, научи и нас в простоте и смирении подвизатися, да вопием нелицемерно Господеви: Аллилуия.

Икос 8

Вси ближнии и дальнии Матушкою Великою нарицаху тя, Анастасие, Княгине достохвальная. Святии же сродницы твоя Царь Николай с Царицею Александрою посетивша тя, дивный храм во обители Покровстей заложиша. С ними же и мы, смиренному величию души твоея умиляющеся, тако ублажаем тя:

Радуйся, Царственных страстотерпцев сроднице святая.

Радуйся, всеми оставленным мати родная.

Радуйся, любовию весь мир объяти готовая.

Радуйся, никогдаже изнемогавшая труженице бодрая.

Радуйся, яко лечебницы твоя красою России быша.

Радуйся, яко тии добрым устроением своим Государя удивиша.

Радуйся, яко врачебницы твоя Царевым именем нарицахуся.

Радуйся, яко тии царскими щедротами присно умножахуся.

Радуйся, благолепный храм святителю Николаю воздвигшая.

Радуйся, в непрестанных трудех себе не щадившая.

Радуйся, нищеты иноческия любительнице.

Радуйся, всея страны благотворительнице.

Радуйся, Анастасие, царственная княгине, венцем преподобия увенчанная.

Кондак 9

Всякий день о кончине своей помышляющи, преподобная, гроб убогий, аки чертог красный, лета долгая сохраняла еси. Душу же свою покаянием сердечным и причащением Святых Таин приуготовляющи, сочетатися со Христом в жизни вечней паче всего желала еси, взывающи ему: Аллилуия.

Икос 9

Ветии суемудренныя не возмогут изрещи, како Господь Воскресший призва тя к празднованию Пасхи вечныя от обители земныя во обитель небесную, идеже ныне лицезрением Сладчайшаго Христа наслаждаешися. Помяни же тамо и нас, мати праведная, приносящих тебе таковая:

Радуйся, благочестно течение жизни твоея скончавшая.

Радуйся, любовию к Богу страх смерти изгнавшая.

Радуйся, в житии твоем Кресту Христову поклонившаяся.

Радуйся, Человеколюбцу Христу сораспеншаяся.

Радуйся, нетленную ризу преподобия житием своим исткавшая.

Радуйся, дух твой в руце Господа предавшая.

Радуйся, плотию уснувшая, обаче душею воскресшая.

Радуйся, голубице чистая, к небу возлетевшая.

Радуйся, фимиаме благовонный, от обители твоея Богу прине-сенный.

Радуйся, прекрасный крине, в раи насажденный.

Радуйся, во дни Пасхи пред престолом Божиим представшая.

Радуйся, "Христос воскресе!" в горних селениих воззвавшая.

Радуйся, Анастасие, царственная княгине, венцем преподобия увенчанная.

Кондак 10

Спасти словесныя овцы желающи, Анастасие блаженная, до конца жития своего не преставала еси пасти стадо твое, Христу обрученное, от волков лютых его ограждающи. И ныне, по отшествии твоем, дерзновение к Богу имущая, выну ходатайствуй о душах наших, зовущих ему: Аллилуия.

Икос 10

Стеною крепкою в годину лютых гонений на Церковь Христову явися заступление твое обители Покровстей, мати всечестная. Прилежно бо на небесех молила еси Бога, на милость его приклоняющи, да сохранит от поругания обитель святую сию. Ныне же мы, благоговейно чтуще тя, благодарно возглашаем:

Радуйся, обители Покровския на земли основательнице.

Радуйся, на небеси о ней немолчная предстательнице.

Радуйся, по отшествии своем нас не оставляющая.

Радуйся, всякую душу спасти желающая.

Радуйся, врагов наших невидимо отгоняющая.

Радуйся, просящих твоея помощи заступающая.

Радуйся, согрешающих кроткая обличительнице.

Радуйся, святыни крепкая хранительнице.

Радуйся, с небесе милостиво на нас призирающая.

Радуйся, заповеди Христовы исполняти нас научающая.

Радуйся, вся терпети ради Небеснаго Царствия убеждающая.

Радуйся, у гроба своего прошения наша исполняющая.

Радуйся, Анастасие, царственная княгине, венцем преподобия увенчанная.

Кондак 11

Пение благодарственное Царице Небесней непрестанно возно¬сится во обители твоей, мати святая, прославляющи неоскудевающия щедроты Господни и присное попечение твое о нас, недостойных. Обаче недоумеюще достойно восхвалити тя, преподобная, умиленною душею вопием о тебе Христу: Аллилуия.

Икос 11

Светоприемною свещею от Источника чудес Христа Бога нашего явилася еси, мати дивная, тьму неверия отгоняющи. Покровский бо храм от наветов нечестивых сохраняющи, яко инокиня грозная в нем предстала еси, заблудшия люди вразумляющи. Мы же, вся чудеса твоя величающе, восписуем ти таковая:

Радуйся, святых храмов строгая назирательнице.

Радуйся, обители своея на веки блюстительнице.

Радуйся, инокиню, в болезни сущую, явлением своим утешившая.

Радуйся, милосердие к болящим имети чрез ню повелевшая.

Радуйся, убогой старице исцеление подавшая.

Радуйся, отчаянным родителем дщерь к жизни возвратившая.

Радуйся, алчущаго отрока чудесно напитавшая.

Радуйся, проповедником твоея благости его избравшая.

Радуйся, правыя веры и единения церковнаго поборнице.

Радуйся, кротких всеблагая заступнице.

Радуйся, усердно призывающим тя помогающая.

Радуйся, упование наше не посрамляющая.

Радуйся, Анастасие, царственная княгине, венцем преподобия увенчанная.

Кондак 12

Благодать Божия обильно излияся на обители твоей, Анастасие преподобная, внегда твоя мощи, яко бисер многоценный, обретени быша, и ты, мати вселюбимая, к чадом своим паки возвратилася еси. Возрадуемся же и возвеселимся о таковей милости Господней и, благодаряще его, воскликнем вси: Аллилуия.

Икос 12

Поюще честных и многоцелебных мощей твоих обретение, мати наша, инокини вси и благовернии людие сретоша тя свещами светлыми и сердцы, любовию горящими. Темже ныне ублажаем тя и многими слезами просим: умоли Спасителя Христа, да имиже весть судьбами спасет души наша. Сего желающе, на сие уповающе, едиными усты и единым сердцем тебе взываем:

Радуйся, преподобных лику сопричтенная.

Радуйся, свеще, пред Господом возжженная.

Радуйся, луче невечерняго Света.

Радуйся, благовестнице нескончаемаго лета.

Радуйся, скорби, яко милость, вменившая.

Радуйся, крестным путем прошедшая.

Радуйся, крест, яко знамение победное, держащая.

Радуйся, и нас ко Христу возносящая.

Радуйся, благ нетленных наследнице.

Радуйся, ангельских чинов собеседнице.

Радуйся, пред Богом неусыпная наша молитвеннице.

Радуйся, к вечней жизни путеводительнице.

Радуйся, Анастасие, царственная княгине, венцем преподобия увенчанная.

Кондак 13

О предивная и всехвальная мати наша Анастасие! К тебе усердно припадающе, с верою и любовию молимся: пролий нам, грешным, милосердие твое, уврачуй немощи душ и телес наших и сподоби чистым сердцем Христа Бога на земли славити, и в вечней жизни купно с тобою воспевати ему: Аллилуия.

Сей Кондак чтется трижды, затем Икос 1 и Кондак 1.

Молитва преподобной великой княгине Анастасии Киевской

О преподобная и много¬милостивая мати наша Анастасие, благоуханный крине царский в земли Киевстей процветший! Во дни земнаго жития твоего никогоже из притекающих к тебе не отринула еси, но теплою любовию твоею всем послужити готова была еси. И ныне, приклоньше колена и смиренно припадающе к раце мощей твоих [или: смиренно лобзающе честную икону твою], умиленно вопием и молим тя: приникни к нам, недостойным, благосердием твоим, нищия и убогая заступи, немощныя и болящия уврачуй, и всем коемуждо благопотребная в жизни сей подаждь, и вся, яже к душевному спасению нашему.

Помози инокиням, тобою под Покровом Царицы Небесныя собранным, понести иго Христово во благодушии, подвигом добрым подвизатися и в чертог Спасов с мудрыми девами внити. Обитель святую твою присно осени своим заступлением, сохраняющи ю от стрел лукаваго и от всякаго злаго обстояния.

О блаженная наша мати Анастасие! якоже имела еси сердце твое преисполнено милосердия и любве Христовой, сице и нас научи Бога всем сердцем любити и к ближним нашим милостивыми быти. Умоли Спасителя нашего, да сохранит нас от падений греховных и в заповедех Своих преуспеяние дарует, да с истинным покаянием устремившеся к вечней жизни, купно с тобою наследим Небесное Царствие и прославим всесвятое имя Отца, и Сына, и Святаго Духа во веки веков. Аминь.

Тропарь преподобной великой княгине Анастасии Киевской, глас 4

иноческое житие возлюбивши,  тленная блага оставила еси,  преподобная мати наша Анастасие,  рода царскаго всечестное украшение,  милосердному самарянину уподобилася еси,  страждущим во обители своей послуживши,  и ныне Престолу Господню предстоя,  моли спастися душам нашим.

Кондак преподобной великой княгине Анастасии Киевской, глас 4

Веселися днесь, обитель Покровская,  царственною инокинею Анастасиею созданная,  яже все житие свое  в сокровищницу Христову положи,  сего ради мзду трудов своих восприя на небесех.  Той и мы во умилении воззовем:  милосердная наша мати,  Милостиваго Владыку умоли  спасти души наша.

Величание

Величаем тя,  преподобная мати наша Великая Княгине Анастасие,  и чтим святую память твою,  ты бо молиши о нас  Христа Бога нашего.

Читать другие акафисты раздела "Православные акафисты"