Православные акафисты / Акафист первый преподобному Симеону Столпнику

Православные акафисты

Акафист первый преподобному Симеону Столпнику

Кондак 1

Избранный угодниче Христов, светильниче мира и целителю недугов душевных и телесных, преподобне отче наш Симеоне, возсиявый мирови, яко звезда богосветлая, жития твоего добротою и множеством чудотворений, ублажаем подвиги и труды твоя, ради наследия Царства Небеснаго тобою подъятыя и, прославльшаго тя Господа славы прославляюще, с любовию теплою вопием ти: Радуйся, Симеоне, предивный столпниче и великий чудотворче!

Икос 1

Ангельский нрав имел еси, богоносне отче наш Симеоне, и яко бесплотный, непорочно житие совершил еси на земли, дивный образ совершенства духовнаго нам оставив, да подражаем добродетелем твоим, и ведяще тя чуднаго избранника Божия быти, сия похвалы тебе, яко должныя, с любовию приносим:

Радуйся, Святыя спасительныя веры, непоколебимый столпе и крепкое утверждение.

Радуйся, многотекущая реко, сердца наша спасительным учением напояющая.

Радуйся, в море многоразличных напастей погибающим надежное пристанище.

Радуйся, злосмрадие страстей от приходящих к тебе прогоняющий.

Радуйся, воздвизаемых от мира, плоти и диавола искушений ходатайством твоим свобождающий.

Радуйся, нераскаянных грешников к совершенному покаянию побуждающий.

Радуйся, духов лукавых прогонителю и полчищ бесовских победителю.

Радуйся, ран греховных и недуг душевных всеблагий целителю.

Радуйся, Симеоне, предивный столпниче и великий чудотворче!

Кондак 2

Видя взором духовным во дни юности твоей, святый Симеоне, суету сует и гордость житейскую, отвергнув греховные путие мира, и Христа за ны Распятаго всею душею и всем помышлением твоим возлюбил еси, Мудростью вечною озаряемый, неустанно возглашал сердцем твоим Просветившему и призвавшему тя Господу Иисусу: Аллилуйа!

Икос 2

Разумом светлым и чистым сердцем изволению Божию повиновался еси, пречудный Симеоне, яко превзошел еси сверстник твоих в любве ко Господу Нашему, яко не усомнился еси вопросити честнаго старца о словесех святаго Евангелия. Следуя же его боговдохновенным глаголом, в том же часе твердо возжелал еси оставити вся красная мира сего и тесным путем, ведущим в живот вечный, поити. Сего ради вопием ти:

Радуйся, благое иго Христово с любовию восприявый.

Радуйся, житию равноангельному поревновавый.

Радуйся, жития постническаго пламенне возжелевый.

Радуйся, воздержанием на страсти вооруживыйся.

Радуйся во смирении на послушание себе покоривый.

Радуйся, тщание великое на учение монастырское явивый.

Радуйся, заблудших и сомневающихся наставляяй.

Радуйся, добре жительствующих в благочестии утверждаяй.

Радуйся, Симеоне, предивный столпниче и великий чудотворче!

Кондак 3

Силою и благословением Духа Всесвятаго движимый, блаженный Симеоне, ты оставил отца земного, дабы служить только Отцу небесному, и быть не наследником праведных богатств земных, но нетленных сокровищ небесных; помышляя же об этом, ты воззвал Премудрому и Милосердному Творцу Нашему: Аллилуйа!

Икос 3

Имея желание от юности крепкое жития иноческаго, к исканию единаго на потребу, направил еси помыслы твоя, угодниче Христов Симеоне, темже любве ради Христовы, всякаго пристрастия суетнаго свободився, притекл еси ко единей обители. Блаженный же игумен тоя обители, провидя тя Божия избранника быти, минувшими деньми испыта тя, яко хощеши Господеви работати, и лику братии своея сопричте. И мы вси почитаем тя:

Радуйся, истинный послушателю велений Христовых.

Радуйся, тесный путь спасения от юности возлюбивый.

Радуйся, ярем Господень на выю свою возложивый.

Радуйся, отсечением страстей угодивый Богу и спасыйся.

Радуйся, священными обеты волю свою связавый.

Радуйся, себе и весь живот свой Господеви предавый.

Радуйся, коемуждо во благо усердный служителю.

Радуйся, болящих и немощных успокоителю.

Радуйся, Симеоне, предивный столпниче и великий чудотворче!

Кондак 4

Бурю страстей утишая, яко ягнец кроток отцев духовных выну послушал еси и, за смирение твое, еще юн сый, образа ангельскаго сподобился еси, в немже воздержание и труды усугубляя, все плотское мудрование отложил еси, преподобне отче, и яко воин благоискусный, одежду иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго диавола, смирением глубоким побеждая его вознесенную гордыню, и выну вопия ко Господу: Аллилуйя.

Икос 4

Слышавши глагол Господень: «На кого воззрю, токмо на кроткаго и смиреннаго, трепещущаго словес Моих», потщался еси, святее Симеоне, оными добродетельми себе украсити. Того ради ублажаем тя сице:

Радуйся, добродетели высокия в сердце твоем вкоренивый.

Радуйся, юность твою непорочностью жития украсивый.

Радуйся, в заповедех Господних вся дни живота твоего ходивый.

Радуйся, от юности мудрость старца стяжавый.

Радуйся, терпением Иовлем братию удививый.

Радуйся, чистотою сердца твоего Господа созерцавый.

Радуйся, Святаго Духа жилище освященное.

Радуйся образ Божий не помрачивый в себе.

Радуйся, Симеоне, предивный столпниче и великий чудотворче!

Кондак 5

Боготечней пресветлей звезде, во мраце суеты и треволенний мира сего сияющей, воистину подобен явился еси, преподобне отче наш Симеоне, ты бо благодатною силою укрепляем, новыя и велия подвизи во имя любве ко Господу подъял еси. Страха же ради, яко и братия, подражающе тебе, подвиги не по разуму восприимет, повеле ти игумен отыти от них. Ты же, незлобив, волю его исполняя, в пустыни в кладези безводнем вселился еси, паки и тамо воносил еси Христу Богу ангельское пение: Аллилуйа!

Икос 5

Видя блаженный игумен Тимофей видение во сне, яко множество народа во обитель его приходят и о преподобном Симеоне вопрошают, воспрянув ото сна, братии поведал сие. Абие же купно с ними иде в пустыню и призва тя паки возвратися и людем не токмо молитвою, но словом мудрым послужити. Почитающе подвиги твоя, и мы по долгу величаем тя:

Радуйся, лампадо елеа благовоннаго.

Радуйся, ветхия храмы душ наших обновляй.

Радуйся, юныя в добре и целомудрии наставляяй.

Радуйся, старыя не словом точию, паче житием укрепляяй.

Радуйся, семейным мир и согласие преславно даруяй.

Радуйся, обычаи злыя и суемудрия языческия искореняй.

Радуйся, кумиры мудрования нашего низлагаяй.

Радуйся, Христу токмо угождати ны научаяй.

Радуйся, Симеоне, предивный столпниче и великий чудотворче!

Читайте также:

• Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
• Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедниче истиннаго жития во Христе Иисусе явился, преславний отче Симоне, в Церковь на земли теплохладный люд собирая. В ней бо древо Жизни святый Жертвенник примирения, жизнь верным источает. Церковь бо суть духовная лечебница, радость радующихся, утешение унывающих. Темже многих обратил еси ко Христу Жизнодавцу, поя благодарственно Ему: Аллилуиа.

Икос 6

Возсиял еси дарами Божия благодати всем приходившим к тебе во дни земного жития твоего, преподобне отче наш Симеоне, и был еси враждующих – примиритель, страждущих – целитель, скорбящих – утешитель, стихий природных – богодарованный победитель и во всем мире ко Творцу непреложный молитвенник. Мы же, веруя, что ты, святый наш покровитель, по смерти с нами пребываешь, смиренно приносим тебе сия похвалы:

Радуйся, в земнем пути твоем по стопам Христовым шествовавый.

Радуйся, постом Моисею и Илии подражавый.

Радуйся, на Господа упование твое возложивый.

Радуйся, воздержанием безплотным уподобился еси.

Радуйся, тако светом божественным озарялся еси.

Радуйся, тако и нас верных молитвами твоими укрепляеши.

Радуйся, тверду веру в Промысл Божий в нас питающий.

Радуйся, благодеющу руку Божию во всем зрети научаяй.

Радуйся, Симеоне, предивный столпниче и великий чудотворче!

Кондак 7

Хотя подвиги твоя паче усугубити, яко на лествицу возводящую к небеси, на верх горы возшел еси: да не сойдеши оттуду, оковами себе на ней утверди, глаголов же святителя Мелетия послушав, не плоть, но разум в Христово послушание пленив, до конца живота своего взывал: Аллилуйа!

Икос 7

Новаго видевше тя избранника Божия, благодатныя дары изобильно стяжавшаго во еже души и телеса изцеляти, дуси нечистии изгоняти и коемуждо благая ко спасению подавати, издалече притекаху к тебе людие. Ты бо приходящим к тебе исцеления источал еси, и всем в бедах, болезнях и скорбех сущим и с надеждою к тебе притекающим благую помощь твою даровал еси. Такожде и мы любовию восхваляем тя, отче, и вопием ти сице:

Радуйся, орле, в молитве небопарний.

Радуйся, голубе, мир душевный стяжавый.

Радуйся, угодниче Божий, на земли для неба поживый.

Радуйся, лозо Христова, добрые плоды Ему приносяй.

Радуйся, милостию твоею к нам не оскудеваяй.

Радуйся, питателю алчущих правды.

Радуйся, молитвенниче о душах наших.

Радуйся, ходатаю нам благ небесных и земных.

Радуйся, Симеоне, предивный столпниче и великий чудотворче!

Кондак 8

Странно житие свое сотворил еси, блаженне, егда видя, яко народ мног, грядущ к тебе, уразуме, како чтут и прославляют тя. Славы убегая, смирение же возлюбив, на столпе высоцем пребывати благоволил еси и, яко по степенем лествицы к небеней высоте восхода, и мраз, и дождь, и зной палящий претерпевая, Господеви непрестанно пел еси: Аллилуйа!

Икос 8

Весь исполнися послушания, егда истытаваху тя святии пустыннии отцы. Повинуяся воле их, яко воле Божией, потщался еси снизойти со столпа твоего на землю, еже и видяще тии, уразумеша, яко от Бога дела твое и глаголаша ти пребывати на столпе твоем невозбранно. Тогда враг рода человеча умысли искусити тя: во образе ангела светла предста ти, ты же на мгновение не уразумел еси, блаженне, лести вражия и знамением честнаго креста победил еси того коварство. Послежде покаяние велие Господу принесл еси, сему же и мы поучившеся хвалим тя сице:

Радуйся, шлемом спасения венчанный.

Радуйся, сугубое покаяние Богу принесый.

Радуйся, на Божие милосердие надежду возложивый.

Радуйся, стрелы лукаваго разжженныя отразивый.

Радуйся, молитвою, яко мечем вооруженный.

Радуйся, коварство врага победивый.

Радуйся, силою крестною вооруживыйся.

Радуйся, ложь огнем истины попаливый.

Радуйся, Симеоне, предивный столпниче и великий чудотворче!

Кондак 9

Всякое естество Ангельское удивися великому свыше тебе дарованию, яко на земли невещественное житие показал еси, и во плоти, аки безплотен, явился еси. Сего ради дар чудес творения от Господа приял еси и людем страждущим милости Божия молитвами твоима источил еси, мнозих в вере спасительней утвердил еси, за вся научая ны Предвечнаго Господа благодарити , воспевая Ему: Аллилуия.

Икос 9

Ветии суемудреннии не возмогут изъясняти силу чудотворений твоих, ихже во славу Божию и чудным именем Господним совершал еси. Ты бо чудодейственну силу благодатию дивнаго во святых Своих Бога стяжав, преподобне отче наш Симеоне, высоким житием по заповедем Господним. Источник бо и основание дара чудодействия благодать и любы Божия, изливающаяся на тя чрез молитву, непорочность и чистоту сердца твоего, преблаженне. И людие мнозия исцелеваху у столба твоего святыми твоими молитвами. Мы же воспоминая велия чудеса Божии, имиже и до ныне не оскудел еси, с радостью таковы похвалы приносим ти:

Радуйся, ко Господу вся помышления твоя обративый.

Радуйся, ближних якоже себя возлюбивый.

Радуйся, житием твоим небеса возвеселивый.

Радуйся, чудесы вселенную удививый.

Радуйся, помощниче наш и молитвенниче.

Радуйся, от искушений вражиих защитниче.

Радуйся, яко тобою страсти наша утоляются.

Радуйся, яко тобою благие желания наша исполняются.

Радуйся, Симеоне, предивный столпниче и великий чудотворче!

Кондак 10

Спасти хотя грешныя и к покаянию призвати, последовал еси стопам Господа Нашего Иисуса Христа и, прибегшаго под кров твой разбойника Ионафана, хотящим убити его не предал еси, но видя велие его покаяние, с Господем примирил еси его, дабы и он блаженство райское улучивше, в вечности восхвалил Всещедраго Человеколюбца Бога благодарственною песнию: Аллилуйа!

Икос 10

Царя Небеснаго и Господа верный служитель был еси, чадам же твоим духовным отец и наставник многомилостивый. Множество народа, и верных, и неверных, к тебе прихождаху, и всем помощник благий и многомилостивый явился еси, всякия болезни душевныя и телесныя врачуя, наипаче же неверующых светом Христова Евангелия просвещал еси. Сице просим убо тя: и нашу веру слабую укрепи, теплохладных и маловерных ко Христу и Церкви Его приобщи, и милостиво прими величания сия:

Радуйся, Бога Отца Безначальнаго служителю предызбранный.

Радуйся, Агнца Божия мужественный исповедниче.

Радуйся, Бога Духа Всесвятаго церковь нерукотворная.

Радуйся, честное Пресвятыя Троицы носило и похваление.

Радуйся, в невечернем дни Царствия Божия почивающий.

Радуйся, трисвятую песнь херувимски со Ангелы и всеми святыми воспевающий.

Радуйся, яко светило светозарное в небеснем Царстве Солнца Правды блистающий.

Радуйся, светом благодати твоея всех чтущих память твою просвещающий.

Радуйся, Симеоне, предивный столпниче и великий чудотворче!

Кондак 11

Пение умиленное с надеждою возносим ти, святый отче наш Симеоне, и просим убо тя: нас и ближних наших, блуждающих по морю страстнаго жития сего данною тебе от Солнца Правды Христа Иисуса, истиннаго Бога, благодатию озари и преобрази помраченное грехми естество наше, мрак печалей и мглу всяких недуг и скорбей прогони, настави всех к тебе с верою притекающих на путь спасенный, к вечному Небесному Отечествию ведущий, да купно с тобою сподобимся во веки Господеви воспевати: Аллилуйя.

Икос 11

Света Небеснаго сосуде избранный воистину явился еси, егда приспе час твой от мира сего в селения возлюбленная и желаемая прейти. Ты бо надежою неизменною и верою горячею окрыляемь, предал еси святую душу твою в руце Живаго Бога, Егоже от юности возлюбил еси, и Емуже до старости маститыя работал еси нелицемерно, темже со упованием благим радостно прешел еси к обителем небесным, идеже сам Творец Вселенныя увенча тя венцем нетленныя славы своея. Сего ради мы просим тя: и нас грешных не оставляй твоими благоприятными ко Господу молитвами, из глубины души зовущих ти:

Радуйся, богодарованною ти силою коварство духов злобы поднебесных истребляющий.

Радуйся, дома, поля и скот наш от губительства их свобождающий.

Радуйся, труд землевладельцев с небес благословляющий.

Радуйся, вредоносное естество от растительного мира отгоняющий.

Радуйся, посевы и леса и все растущее от гибели спасающий.

Радуйся, в странствиях земных от преткновений нас оберегающий.

Радуйся, от недуга винопития и иных суетных пристрастий исцеление.

Радуйся, от бремени скорбей и треволнений благодатное свобождение.

Радуйся, Симеоне, предивный столпниче и великий чудотворче!

Кондак 12

Благодать и милость испроси у Троицы Всесвятыя, преподобне отче наш Симеоне, всем с любовию и благоговением чтущим тя; вонми воздыханием нашим, и слез умиленных наших не презри, не остави нас, якоже обещался еси не оставляти ни столпа твоего, ни горы, тобою избранныя, и буди во благодеяние прибегающим к тебе человеком, под кровом твоим сохраняемым, Господеви же о тебе поющим: Аллилуйа!

Икос 12

Воспевая житие твое богоблаженне отче, прославляем Всемилосерднаго Творца и Господа Нашего, яко дарова тя всем ищущим спасения изрядна помощника и тверда заступника. Тем же и нам, святую память твою, преподобне Симеоне, почитающим, твердую руку помощи твоея подаждь и грехми присно погружаемых от смертоносных глубин изведи и прочее жития время в покаянии истеннем скончати нам помози, с надежою и любовию вопиющим ти ныне:

Радуйся, лицезрением Божественнаго света наслаждающийся.

Радуйся, яко присно Пресвятей Троице предстоиши.

Радуйся, яко непрестанно молитвы о нас возсылаеши.

Радуйся, ищущим Царствия Небеснаго спасительнаго пути проповедниче.

Радуйся, взыскующим горняго Иерусалима богомудрый вождю.

Радуйся, обуреваемым страстьми греховными добрый кормчий.

Радуйся, немощных и малоискусных терпеливый учителю.

Радуйся, изнемогающим от уныния и печали благоприятный утешителю.

Радуйся, Симеоне, предивный столпниче и великий чудотворче!

Кондак 13

О великий и предивный угодниче Божий, преподобне отче наш Симеоне! Ныне престолу Божию во славе неизреченней предстоиши и прошения наша Господу приносиши, и сия малая моления о нас грешных приими, во временней жизни сей помози нам и благодатно укрепи ны, и в будущей жизни небесных обителей молитвами твоими достигнути сподоби, яко да с тобою купно Христу, Спасителю Нашему, воззовем: Алиилуйа!

Сей Кондак глаголи трижды. И паки Икос 1-й; и Кондак 1-й.

Молитва преподобному Симеону Столпнику

О святый и великий угодниче Божий Симеоне! Подвигом добрым подвизався на земли, восприял еси на небесех венец правды, егоже уготовил есть Господь всем любящим Его. Темже, взирающе на святый твой образ, радуемся о преславном жительстве твоем и чтем светлую память твою. Ты же, предстоя престолу Божию, приими моления наша и ко всемолитвенному Богу принеси.

Подаждь же пастырем святыню, иноком благоговение, всем же нам разумения дар, да во истине и смирении укрепится обуреваемая Церковь наша. Наипаче же подаждь нам от елея милосердия и сострадания твоего, да научимся тяготы друг друга носити и не себе угождати, но Богу и ближнему во благое. Дондеже время купли и делания есть, к тебе прибегаем в милости богатому: подаждь нам от елея твоего, светильницы бо наша угасают, да не с юродивыми девами вменимся в час страшный, но купно с тобою прославим Пострадавшего по нас и Сострадавшего нам Господа Иисуса Христа со Отцем и Святым Духом во веки, аминь.

Читать другие акафисты раздела "Православные акафисты"