Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист второй преподобному Серафиму Саровскому


Православные акафисты

Акафист второй преподобному Серафиму Саровскому

Кондак 1

Избранный Чудотворче и предивный Угодниче Христов, скорый помощниче и молитвенниче о душах наших, Преподобне отче Серафиме, величающе прославльшаго Тя Господа, похвальное воспеваем Ти пение; Ты же имеяй велие дерзновение ко Господу, Владыце небесе и земли, от всяких нас бед свободи зовущих: Радуйся, радосте наша, Преподобне Серафиме, отче наш.

Икос 1

Ангелов Творец избра тя изначала, да прославиши житием Твоим пречудное имя Святыя Троицы. Явился бо еси воистинну во плоти Серафим и Ангел на земли. Яко лучь пресветлый вечнаго Солнца правды, просветися житие Твое. И мы, трепетом и радостию одержимии, зряще на прехвальныя труды твоя, глаголем ти сицевая:

Радуйся, пречудное Ангелов удивление

Радуйся, грозное бесов поражение.

Радуйся, преславное верным величание.

Радуйся, претихое скорбным утешение.

Радуйся, прелюбимое иноков похваление.

Радуйся, живущим в мире предивное поможение.

Радуйся, Русския Державы славо и ограждение.

Радуйся, Тамбовския страны священное украшение.

Радуйся, радосте наша, Преподобне Серафиме, отче наш.

Кондак 2

Видящи мати твоя, преподобне отче наш Серафиме, теплую любовь твою ко иноческому житию, позна святую волю Господню о тебе, и Богу, яко дар совершен принося, благослови тя отче, на тесный путь иноческий святым своим крестом, его же до конца дний твоих на персех носил еси, знаменуя тем велию любовь твою к распешнемуся за ны Христу Богу нашему, Ему же вси со умилением зовем: Аллилуиа.

Икос 2

Разум небесный тебе даровася, Святче Божий от юности твоея; чудесно исцеленный в недузе, от чудотворныя иконы Богоматери, не престая помышляти о небесном, оставил еси дом свой, ища царствия Божия и правды Его. Сего ради, приими от нас похвалы сия:

Радуйся, на подвиги от матери, крестом благословенный.

Радуйся, благословение сие, яко святыню соблюл еси.

Радуйся, добродетели Матери своея унаследивый.

Радуйся, благочестию и молитве ею наученный.

Радуйся, от юных лет по Бозе возревновавый.

Радуйся, родителей благочестивых отрасле пречестная.

Радуйся, любве ради Господа, дом отечский оставивый.

Радуйся, от юности твоея возлюбленный Господом.

Радуйся, радосте наша, Преподобне Серафиме, отче наш.

Кондак 3

Силою Вышняго видим тя воистинну от юности хранима. С высоты бо превелией спадша сохрани тя Господь неврежденна, и страждущу люте Сама ти Владычица мира явися, с небес исцеление принесши, зане измлада верно служил еси Богу, выну взывая Ему: Аллилуиа.

Икос 3

Имея тщание о подвизе иноческаго, равноангельскаго жития, к матери Русских градов, во святый Киев притекл еси вопросити Богомудраго старца Досифея о путех своих. И прияв от него благословение в пустыни Саровстей вселитися, верою издалеча облобызал еси место святое сие. Тамо бо, рекл оный старец обрящеши спасение и скончаеши земное странствование свое, еже и совершися о тебе Божественным промышлением. Мы же,

Радуйся, глаголем, яко благое иго Христово на себе восприял еси.

Радуйся, миру навсегда умерый.

Радуйся, яко небеснаго отечества пламенне возжелел еси.

Радуйся, ум свой и сердце в Бозе молитвенно утвердивый.

Радуйся, в подвизех служения БОгу неутомимый.

Радуйся, яко смиренне преклонил еси волю свою в послушание Христово.

Радуйся, во благочестии неохладимый.

Радуйся, Христа всем сердцем возлюбивый.

Радуйся, радосте наша, Преподобне Серафиме, отче наш.

Кондак 4

Бурю злых помыслов в душе твоей утишая, прошел еси весь путь тесный и прискорбный подвига иноческаго, несый ярем пустыннаго жития, многонощнаго бдения, молчания и затвора, и тако благодатию Божиею восходя от силы в силу, от деяния к боговидению, преселился еси в обители горния, идеже со Ангелы поеши Богу: Аллилуиа.

Икос 4

Слышаще и видяще святое житие твое, преподобне отче наш Серафиме, вся братия твоя удивляхуся тебе и, приходяще к тебе, поучахуся о словесех твоих и подвизех, славяще Господа, дивнаго во святых Своих, и мы вси, с верою и любовию сошедшеся днесь у многоцелебных мощей твоих, восхваляем тя, преподобне отче, и вопием ти сице:

Радуйся, воине Христов, мужественный и добропобедный.

Радуйся, рабе благий и верный Небеснаго Домовладыки.

Радуйся, яко всего себе принесл еси в жертву живу, святу и богоугодну Господеви.

Радуйся, яко сподобился еси посещения Богоматере со Апостолы.

Радуйся, на высоту безстрастия возшедый.

Радуйся, пречуднаго благоухания крине пустынный.

Радуйся, молитвенниче неусыпный.

Радуйся, горлице пустыннолюбивая.

Радуйся, радосте наша, Преподобне Серафиме, отче наш.

Кондак 5

Божественный свет осия келию твою, егда болящу ти и на одре смертнем лежащу, сама Пречистая Дева посети тя со Святыми Апостолы Иоанном и Петром, и нарече тя сущим от Ея рода и коснуся главе твоей. И абие исцелев, воспел еси благодарне Господу: Аллилуиа.

Икос 5

Видя враг рода человеча чистое и святое житие твое, преподобне Серафиме, восхоте погубити тя, наведе на тя людие оные, злые, иже беззаконно истязаху тя и еле жива суща оставиху. Ты же, святый отче, яко агнец кроток, вся претерпел еси и от всего сердца твоего молился за обидящих тя. Темже мы все, таковому твоему незлобию дивящеся, вопием ти:

Радуйся, незлобием твоим духа злобы победивый.

Радуйся, в кротости и смирении твоем Христу Богу подражавый.

Радуйся, образе истиннаго смирения.

Радуйся, правило христианскаго терпения.

Радуйся, добрый подвижниче благочестия.

Радуйся, чистоты душевныя и телесныя усердный хранителю.

Радуйся, наставниче монахов предивный.

Радуйся, обители Саровския удобрение и славо.

Радуйся, радосте наша, Преподобне Серафиме, отче наш.

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедует пустыня подвиги и труды твоя, богоносне угодниче Христов, дебри бо и леса ея молитвою облагоухал еси, пророку Божию Илии и Крестителю Господню Иоанну подражая, и явился еси пустыни прозябение многоплодное дарами Духа Святаго, Его же действием многая и преславная совершил еси, подвизая верных славословити благих подателя Бога: Аллилуиа.

Икос 6

Возсия новый Боговидец, Моисею подобный в тебе, Серафиме блаженне, яко служение алтарю Господню совершая, сподобился еси зрети Христа, во храме со безплотными силы грядуща. Сему Божию благоволению о тебе дивящеся, воспеваем ти сице:

Радуйся, Боговидче преславный.

Радуйся, Пресвятыя Троицы верный служителю.

Радуйся, Духа Святаго жилище украшенное.

Радуйся, избранниче Божий.

Радуйся, в бренном телеси райскую сладость предвкусивый.

Радуйся, светом трисиянным озаренный.

Радуйся, яко Христос телесному оку твоему явися.

Радуйся, яко на мног час умолкл еси, неизглаголанному видению дивяся.

Радуйся, яко на вящшие подвиги разгореся тогда сердце твое.

Радуйся, радосте наша, Преподобне Серафиме, отче наш.

Кондак 7

Боготечней звезде, древле волхвы к родшемуся солнцу правды Христу путеводившей, уподобити тя дерзаем, преподобне отче, ибо светило богосветлое воистину был еси, делы и словесы твоими всех приводя ко благочестию и любве Божией. Темже сиянием подвигов твоих просвещеннии и хлебом учения твоего насыщеннии, тебе усердно величаем и прославльшему тя Христу вопием: Аллилуиа.

Икос 7

Новаго видяще тя избранника Божия, издалеча притекаху к тебе вернии в скорбех и болезнех. И сих беды отягченных не отринул еси, источая целения, даруя утешение, предстательствуя молитвы. Темже исхождаше во всю землю русскую вещание чудес твоих, и сице тя славяху духовныя твоя чада:

Радуйся, добрый наш пастырю.

Радуйся, отче милостивый и кроткий.

Радуйся, немощи наша любовию покрываяй.

Радуйся, в бедах и обстояниих скорый помощниче.

Радуйся, душ смятенных умирителю.

Радуйся, яко грядущая обнаженна тебе.

Радуйся, яко зриши сокровенная и тайная сердец наших.

Радуйся, врачу скорый и благодатный.

Радуйся, благий покровителю вдовиц и сирых.

Радуйся, радосте наша, Преподобне Серафиме, отче наш.

Кондак 8

Странное чудо: како старец немощный и притрудный тысящу дний и тысящу нощей, на камени неусыпая в молитве пребывает. Кто доволен изрещи болезни и борения твоя, блаженне отче, яже претерпел еси, воздея преподобныя руце твоя к Богу, Амалика мысленнаго побеждая и Господеви поя: Аллилуиа.

Икос 8

Весь еси желание, весь - сладость, сладчайший Иисусе, и что ми есть не небеси или что восхощу на земли, точию Тебе возжада душа моя, - сице взывал еси отче в пустынном безмолвии твоем. Мы же суетою помраченнии и во гресех все житие иждившии, что принесем тебе, преподобне, восхвалити тя хотяще:

Радуйся, пустынный жителю и в телеси ангеле.

Радуйся, совершенный в добродетелех человече.

Радуйся, предивный затворниче и умный молчальниче.

Радуйся, огнем молитвы стрелы вражия попаливый.

Радуйся, свеще неугасимая, молитвою в пустыни пламенеющая.

Радуйся, пресладкий любимиче Божия Матере.

Радуйся, светильниче, выну светяй даровании духовными.

Радуйся, радосте наша, Преподобне Серафиме, отче наш.

Кондак 9

Все естество Ангельское удивися странному зрению: старцу бо сущу в затворе, небеси и земли Царица явися повелевающи, да открыет затвор свой и да не возбранит людем православным внити к себе, но да всех пети научит Христу Богу: Аллилуиа.

Икос 9

Всею крепостию твоею повеление Прествятыя Богородицы исполняя, предал еси себе на служение всем приходящим к тебе, и был еси недоумевающим советник благий, унывающих утешитель, заблуждающихся кроткое вразумление, болящих врачь и целитель. Бысть любовь твоя к ближним о Христе, яко пламень огня всякое ожесточение сердец умягчаяй. Сего ради вопием ти:

Радуйся, яко от мира в пустыню утекл еси, да добродетели приобрящеши.

Радуйся, яко из пустыни во обитель изшел еси, во еже семена добродетели сеяти.

Радуйся, яко чадолюбивый отец коемуждо пришедшу к тебе явился еси.

Радуйся, яко вси в радость вменяху единый лик твой точию видети, Духа Святаго благодатию осиянный.

Радуйся, яко послушая смирения своего вся притекющия к тебе поклонением даже до земли предварял еси.

Радуйся, яко словесами кроткими радость моя, сокровище мое души пришедших утешал еси.

Радуйся, всех верных радосте и похвало.

Радуйся, Божественными словесы велие утешение всем подающий.

Радуйся, радосте наша, Преподобне Серафиме, отче наш.

Кондак 10

Пение Пресвятей Троице деннонощно принося, преподобне отче, на молитве коленнопреклоненно, поя победныя песни Воскресшему Господу, предал еси святую душу твою в руце Божии, юже Ангели святии вознесоша горе ко престолу Вседержителя, да со всеми святыми предстоиши во славе невечерней, воспевая песнь хвалебную святых Святейшему Слову: Аллилуиа.

Икос 10

Стена всем святым и иноком отрада Пресвятая Дева, пред концем твоим посети тя, показующе, яко благоугодил еси Господеви, и милостиво прорече: не по мнозех днех, любимиче мой, с нами будеши: темже дивяся таковому посещению Богоматери, вопием ти:

Радуйся, явлением Божией Матери обрадованный.

Радуйся, лицезревый Царицу небесе и земли.

Радуйся, от Нея весть к преселению небесному приемый.

Радуйся, в час кончины твоея сиянием небесным облистанный.

Радуйся, в молитве пред иконою Богоматери умиленный дух твой Богу предавый.

Радуйся, в молитвенном бдении, яко воин Христов, час кончины встретивый.

Радуйся, мирным и благочестным успением твоим Бога прославивый.

Радуйся, яко вшел еси в радость Господа Твоего.

Радуйся, радосте наша, Преподобне Серафиме, отче наш.

Кондак 11

Спастися всем и в познание истины приити хотяй, Господь яви тя подвижника велика в позднейшая наша лета, заблуждающим на вразумление, болящим душею и телом на исцеление весть бо Господь, по слову премудраго, воздвизати праведника во время свое. Мы же, благодарни суще за таковую милость Его к нам, выну зовем Ему: Аллилуиа.

Икос 11

Яко светозарное светило в православней Русстей земли возсиявша зрим тя, Богомудре отче, от честных бо мощей твоих источаеши неисчерпаемые токи чудес: хромии ходят, слепии видят, немии глаголют, глусии слышат, бесы изгоняются, руце разслабленныя укрепляются, маломощныя и страждущия здрави бывают. И ныне предстоя престолу Пресвятыя Троицы, видиши вся наша нужды и прошения, и нам помощь подаеши обильно, вопиющим ти таковая:

Радуйся, Преславное Святыя Троицы похваление.

Радуйся, духом любви твоея николиже от нас отступивый.

Радуйся, яко жив сый, утешение всем требующим помощи подаеши.

Радуйся, яко и ныне присно чудесное пришествие твое от небесных к земным являеши.

Радуйся, болящих и недужных исцелителю.

Радуйся, источниче чудес неоскудевающий.

Радуйся, кладязю неисчерпаемый воды многоцелебныя всем с верою к тебе притекающим.

Радуйся, яко вси концы земли нашея любовию твоею объял еси.

Радуйся, радосте наша, Преподобне Серафиме, отче наш.

Кондак 12

Благодать и велие твое дерзновение пред Богом ведуще, тебе чадолюбиваго отца прилежно просим: пролей ныне теплую молитву твою о нас грешных ко Господу, да дарует Императору нашему победы на враги, да хранит и прославит православное отечество наше, Церковь Свою Святую от неверия и раскола да соблюдет, и нас всех православных христиан да помилует, и по заповедем святым Своим жити научит, вопиющих: Аллиллуиа.

Икос 12

Поюще твое прославление, что тя наречем, Святче Божий. Многая твоя имена, но большая дарования; ублажаем тя яко преподобна, молим тя, яко многомощна молитвенника пред Господем: не забуди нас чад твоих и сохрани страну нашу от врагов видимых и невидимых, да зовем ти:

Радуйся, защитниче наш, и покровителю, и присный заступниче.

Радуйся, молитвенниче о нас теплейший, праведный гнев Божий на нас утоляющий.

Радуйся, отечеству нашему щит и ограждение.

Радуйся, крепкий наш пред Богом предстателю.

Радуйся, силою Божиею многая чудеса содеявый.

Радуйся, ризою твоею многия недужныя исцеливый.

Радуйся, путеводителю всех, к небеси направляяй.

Радуйся, в грозный час смерти всем нам прибежище и заступление.

Радуйся, радосте наша, Преподобне Серафиме, отче наш.

Кондак 13

О, предивный угодниче и великий чудотворче, преподобне отче Серафиме, приими ныне малое сие приносимое тебе моление, хвалим милосердие твое, не таим благодеяний, яже обильно излил еси на нас. И ныне, предстоя престолу Царя Царствующих, Господа нашего Иисуса Христа, не забуди нас, сирых и убогих, в молитве своей, помяни нас, да обрящем милосердие Его в день судный, поя Ему: Аллилуиа.

Трижды, Таже чтется Икос 1 и паки Кондак 1

Молитва преподобному Серафиму Саровскому

О, пречудный отче Серафиме, велий Саровский чудотворче, всем прибегающим к тебе скоропослушный помощниче.

Во дни земнаго жития твоего никто же от тебе тощ и неутешен отъиде. В сладость бысть всем видение лика твоего и глас благоуветливых словес твоих. Бысть дар исцеления недугов в тебе действуяй, дар прозрения, дар немощных душ врачевания.

Егдаже призва тя Бог от земных трудов к небесному упокоению, николиже любовь твоя преста от нас, и яко звезды небесныя не леть есть исчислити чудеса твоя. По всем концем земли нашея людем Божиим являешися и действуеши исцеления. И ныне имя твое славим, тя ублажаем, помощи от тебе требуем.

О, тихий и кроткий старче, дерзновенный ко Господу молитвенниче, николиже отринувый сердцем на тя надеющихся. Помолися о нас многомощною твоею молитвою ко Господу сил, да вознесет Державу благочестивейшаго Императора нашего, да дарует нам вся благопотребная в жизни сей и вся к душевному спасению полезная, да оградит нас от падений греховных и истинному покаянию научит, да введет безпреткновенно в вечное Небесное Царство, идеже ты ныне в незаходимей сияеши славе. И тамо тебе, яко чада отца обстоя, да не престанем вкупе с тобою славити тя прославльшаго Бога. Аминь.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru