Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист Господу Иисусу Христу, читаемый в напастях


Православные акафисты

Акафист Господу Иисусу Христу, читаемый в напастях

(о ненавидящих, обидящих и творящих нам напасти)

Кондак 1

Пламенем любве распали к тебе сердца наша, Христе Боже, да тою разжигаеми сердцем, мыслею и душею, и всею крепостию нашею возлюбим Тя и искренняго своего, яко сами себе, и повеления Твоя храняще, славим Тя, всех благ Дателя, поюще:

Иисусе, Радосте наша, даруй нам дар Любви к Тебе и к чадом Твоим погибающим.

Икос 1

Рече возлюбленный ученик Твой, Спасе, возлежавый некогда на персех Твоих, яко Ты еси Любы и зело любиши падший род человеческий, яко и пострадати за ны изволивый. Мы же киими похвалами возможем ублажити Тя, Источника всех благ, но с трепетом и сокрушением сердечным взываем Ти сице:

Иисусе, Сладосте сердечная.

Иисусе, Любы неизреченная.

Иисусе, Радосте недомыслимая.

Иисусе, Помощь наша в скорбех велиих.

Иисусе, Солнце правды, осиявающее праведных.

Иисусе, Прохлада Духа, угашающая пламень страстей наших.

Иисусе, Роса, ниспадающая на души наша.

Иисусе, Умиление неизглаголанное.

Иисусе, Сыне Божий, возлюбивый ны даже до смерти крестныя.

Иисусе, положивый душу за враги своя.

Иисусе, умолявый Отца с Креста о гонителях.

Иисусе, отпустивый страшный грех Своим хулителям.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 2

Егда Адам и Ева согрешили есте, воззва к ним, Любы наша, - "Где ты есть, Адаме?", влагая чувство покаяния в сердца их и ища повод возлити любовь Свою на непослушныя чада своя. Темже и мы ныне, слыша зов Твой в сердцах наших, открываем их с радостию для принятия любви Твоей, воспевая Ти велегласно: Аллилуия.

Икос 2

Не хотяще да уподобятся прародители наша князю тьмы своим развращением, гордостию и нераскаянием, изгна их из Эдема, промышляя о спасении их. Мы же, чудяхуся Твоему попечению, долготерпению и милосердию о падших, вопием Ти сице:

Иисусе, долготерпение неизреченное.

Иисусе, милосердие к падшим неистощимое.

Иисусе, Любы, побеждающая наветы вражии.

Иисусе, чающий обращения заблудших.

Иисусе, послушанию обучающий.

Иисусе, смирению нас вручающий.

Иисусе, всепрощению научающий.

Иисусе, целомудрию обручающий.

Иисусе, живот вечный всем дарующий.

Иисусе, из глубины зол ны извлачающий.

Иисусе, к покаянию всех призывающий.

Иисусе, слезы умиления нам низпосылающий.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 3

Являя любовь Свою к роду падшему, глаголал еси устнами Ноя праведнаго, да покается род развращенный и обратится к Создателю своему. Егда же за словеса сии хотяще грешники убити Ноя, обличающаго их пороки, и устремишася на него, тогда Ты, Господи, навел еси на сей род потоп и пресекнулось возрастание зла на земли. И сим являя попечение велие о людиях праведных, спасшихся в ковчезе от потопления воднаго. Сему радующеся и мы, купно с праведным Ноем, взываем Ти: Аллилуия.

Икос 3

Ища погибшее овча, изшел еси, Многострадальный, на взыскание его. Нашед же, взем на рама Своя, понесл еси к Стаду Своему. В сей притче Твоей, Спасе, душа моя трепещуще познает себя. И, не могуще наити словеса подобающии, в них же излиет любовь свою к Тебе, взывает Ти сими словесами скудными:

Иисусе, щитом веры нас ограждающий.

Иисусе, в ризу правды верных облачающий.

Иисусе, за спасение наше невинно страдавый.

Иисусе, вся греси наша Кровию Своею омывый.

Иисусе, мир душам подающий.

Иисусе, души мертвыя воскрешающий.

Иисусе, Благодатию Своею согревающий.

Иисусе, во тьме греховной погибающих наставляющий.

Иисусе, помыслами благими души умудряющий.

Иисусе, на путь неправды ходити возбраняющий.

Иисусе, духов злобы от сердец прогоняющий.

Иисусе, греси ближних покрывати научающий.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 4

Слыша стенания Лота праведнаго о погибели человеков в стране содомской, Сам исшел еси, Господи, к ним, - не покаются ли? Но они, не познаша времени посещения Твоего, устремилися еси на Тя, Праведный, ища зло Ти содеяти. И за сие поглотиша их тьма кромешная. Лота же с присными Любовь Твоя покрыша от зла и погибели, изведши из земли той, оскверненной смертными грехами, в Покой Твой, да воспоют Ти, Спасителю своему и нашему, победную песнь: Аллилуия.

Икос 4

Познавая Твое милосердие к раскаявшимся грешником и гнев Твой праведный на нераскаянных, всеумиленно от души воспеваем Ти тако:

Иисусе, милуяй и питаяй нас присно.

Иисусе, заступаяй нас от наветов вражиих.

Иисусе, защищаяй нас от козней диавольских.

Иисусе, покрываяй нас от злобы человеческой.

Иисусе, прибежище в скорбех.

Иисусе, утешение в бедах.

Иисусе, радоватися присно научающий.

Иисусе, благодатию Духа Святаго утешающий.

Иисусе, от падений греховных возставляющий.

Иисусе, падших с Богом примиряющий.

Иисусе, беса уныния от нас прогоняющий.

Иисусе, гордость житейскую в нас посрамляющий.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 5

Покаяние ниневитян раскаявшихся приявый, Любы небесная, явивый на них милосердие Свое неизреченное, применив гнев Свой на милость; да и мы, уразумевая глубину всепрощения Твоего, в падениях греховных не преткнемся о камень отчаяния, но возопиим Спасителю Богу: Аллилуия.

Икос 5

Вопрошаше Тя, Господи, Апостол Петр: колико раз подобаше нам прощати ближняго, согрешающаго супротив нас и покаявшагося в сем, отвещав ему: седьмижды раз по седмь, - показуя сим, како должно любити ближняго - яко и Христос возлюби нас, да со благодарением зовем Ему:

Иисусе, от Отца посланный на спасение человеков.

Иисусе, Духа Святаго пославый во утешение верным.

Иисусе, разбойника раскаявшегося с креста приявый.

Иисусе, слез блудницы не презревый.

Иисусе, Симона - фарисея вразумивый.

Иисусе, старца Никодима Боговедению научивый.

Иисусе, рыбарей ловцами человеков сотворивый.

Иисусе, гонителя Церкви Савла во Апостола Павла претворивый.

Иисусе, Церкви Православной Себе обручивый.

Иисусе, Матери Своей нас усыновивый.

Иисусе, никогдаже не оставляющий.

Иисусе, в Церкви Своей присно пребывающий.

Иисусе, Радосте наша, даруй нам дар Любви к Тебе и к чадом Твоим погибающим!

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

"Возлюблю Тя, Господи, Крепосте моя Господь утверждение мое и прибежище, Бог мой и уповаю на Него", - вопиял еси Святый Царь и Пророк Давид. И мы, зря Тя, Помощника нашего, на всех путиях жития своего, купно со Ангельскими ликами вопием Ему: Аллилуия.

Икос 6

"Заповедь новую даю вам, - рече Господь на Тайной Вечери, - да любите друг друга. Яко Аз волюбил вас, тако и вы любите друг друга... И по сем узнают вси, что вы - Мои ученики, если будете иметь любовь между собой". Сего ради просим сию боголюбезную добродетель даровати нам, вопиющим Ти тако:

Иисусе, Спасение наше.

Иисусе, Утверждение в вере; Иисусе, Любы всепобеждающая, Иисусе, злыя сердца умягчающий.

Иисусе, Заступничество наше.

Иисусе, Прибежище надежное.

Иисусе, Милость безконечная.

Иисусе, Радосте сердечная.

Иисусе, Ангелов Начальниче.

Иисусе, верных Наставниче.

Иисусе, Сладость молящих Ти ся.

Иисусе, Покое труждающихся.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 7

"Приидите ко Мне вси труждающиися и обремененнии и Аз упокою Вас", - расспрострев на Кресте руцы Свои пречистии, зовеши ко всему роду человеческому, Иисусе, Спасе наш, научаеши ны кротости и смирению, да обрящем покой душам нашим. Темже мы с радостию сердечною благодарно вопием Ти: Аллилуия.

Икос 7

"Иго Мое благо и бремя Мое легко", - утешает ны Сердцевидец Господь, зря скорбь нашу в несении жизненнаго креста сущую. Мы же, скорбью одержимии, зря Источника Любви распята Матерь Его Пречистую, Апостола Иоанна и Жен Мироносиц при Кресте страдающих, купно с ними восплачем тако:

Иисусе, нас ради страдавый.

Иисусе, греси человеков искупивый.

Иисусе, Кровь Свою за ны излиявый.

Иисусе, за ны быв биенный.

Иисусе, издевательства от творения приявый.

Иисусе, за нас претерпел заушения.

Иисусе, желчью напоенный.

Иисусе, от мира сего презренный.

Иисусе, одиночество (по человечеству) познавый.

Иисусе, в скорби сердца ко Отцу воззвавый; Иисусе, в Гефсимании до кровавого пота моливыйся.

Иисусе, оставленный всеми, от нас не отвративыйся.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 8

"Приимите, ядите, сие есть Тело Мое, за вы ломимое во оставление грехов, - и паки рече Божественный Учитель, - Пийте от нея вси, сия есть Кровь Моя Новаго Завета, за вы изливаемая во оставление грехов". Сему радующеся и приобщашеся Пречистых Таин Христовых, благодарственно зовем Ему: Аллилуия.

Икос 8

"Аще любите Мя, заповеди Мои соблюдете", - увещавает ны Господь. "Кто любит Мя, тот соблюдет слово Мое и Отец Мой возлюбит его, и Мы приидем к нему и обитель в нем сотворим". Сего ради мы грешнии и недостойнии просим:

Иисусе, даждь нам плачь за греси наша.

Иисусе, покаяния отверзи нам двери.

Иисусе, уцеломудри сердца наша.

Иисусе, укрепи немощи наша.

Иисусе, теплотой молитвы согрей наша сердца.

Иисусе, постом и болезнями смири плоть нашу.

Иисусе, даждь нам Плоть Твою ясти.

Иисусе, даждь нам Кровь Твою пити.

Иисусе, смирением окрыли нас.

Иисусе, кротостию покрый нас.

Иисусе, не даждь нам любити мира сего.

Иисусе, даждь нам силы служити ближним.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 9

"Слава в вышних Богу и на земли мир, в человецех благоволение", - Ангельскии лики прославляху тако Твое Рождество, Спасе. Паки Ангел же Твой в Гефсиманском верте укрепляше Тя в скорби сердечной сущаго. Мы же, видяще Ангелов служащих Ти со благоговением, припадающе пред Тобою, вопием с ними купно: Аллилуия.

Икос 9

Ветии суемудреннии не могуще познати тайну любви Твоей к роду человеческому и искупления его от власти смерти и диавола, пытахуся оквернити имя Твое и слово, и ругахуся над ними и твоими служителями. Мы же славословием закрывая устна нечестивыя, зовем Ти:

Иисусе, славо небесных и земных.

Иисусе, имя Твое сладше паче всех имен.

Иисусе, словеса Твоя услаждают души слушающих.

Иисусе, Благодать Твоя веселит сердца внимающих Ти.

Иисусе, даждь нам крепость крест свой до конца донести.

Иисусе, свободи нас от ропота и уныния.

Иисусе, ослаби путы страстей наших.

Иисусе, не даждь нам погибнути во веки.

Иисусе, приими ны во объятия Своя.

Иисусе, не отвержи ны погибающих.

Иисусе, и по смерти не остави ны сирых.

Ииссусе, прииди и соедини ны с Тобою навеки.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 10

 Господи неба и земли, всю тварь единым словом сотворивый; приемый поношения от человеков и на Крест волею восшедый, руце распростер, обнимая всех и вся, зовеши: "Отныне вси вы чада возлюбленныя Моя, ко Мне грядите и Аз соделаю вас сонаследниками Моими в Царствии Отца Моего!" Сей зов Твой, Учителю наш Божественный, слыша выну в сердцах присно страдающих, зовем Ти всеумиленно: Аллилуия.

Икос 10

Милосердный и преблагий, всепрощающий и умиротворяющий, приемлющий в покаяние приходящих и ко спасению заблуждающих приводящий! Тебе молимся и Тебе просим: даждь познати Тя Духом Твоим Святым не познавшим любовь Твою, да и мы купно с ними возопиим Ти:

Иисусе, Радосте наша.

Иисусе, Покрове в напастех.

Иисусе, Надеждо ненадежных.

Иисусе, Пристанище обуреваемых.

Иисусе, в скорбех ны не оставляяй.

Иисусе, в болезнех утешаяй.

Иисусе, в погибели помощь простираяй.

Иисусе, заблудших вразумление.

Иисусе, Солнце праведное.

Иисусе, Луче златозарный.

Иисусе, небесная Сладость.

Иисусе, сердечная Радость.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 11

Милосердствуя Господь и о тех, иже во аде страждет, егда Телом Своим умре, духом же снизойдя в преисподняя, изведе оттуду души праведных, чающих Его пришествия. Сего ради и мы, зде живы сущи, молитвенно просим у Него прощения грехов всем усопшим, паче же тем иже во аде страждет к достойным милосердия Его и всепрощения, да и они, прощеннии, воззовут умильно Источнику Любви: Аллилуия.

Икос 11

"Мир во зле лежит, - рече Господь, - но не убойтесь - Аз победих мир". И сия победа есть Его Воскресение. Умирая со Христом каждодневно, чаем и мы воскресения в Царствии Божием, и сей милости просим у Христа и для обижающих нас и творящим нам злая, речем и о них:

Иисусе, Любы неизреченная, вразуми заблуждающих.

Иисусе, Солнце праведное, не остави их погибнути во гресех.

Иисусе, Боже преблагий, осияй их Светом Твоим Святым.

Иисусе, Отрадо неземная, утеши и нас сирых.

Иисусе, даждь им познати Тя Духом Твоим Святым.

Иисусе, смягчи окаменелыя их сердца.

Иисусе, смири гордыню хулящих Тя,

Иисусе, не посрами надеяния нашего.

Иисусе, не осуди их по делам их.

Иисусе, обрати их к вере истинной.

Иисусе, даждь им видение грехов своих.

Иисусе, возжги сердца их огнем Благодати Твоей.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 12

Ты и ныне ищеши ны, утружденных житейскими скорбями, Иисусе Христе; вземше, яко овчата заблудшия, на рама Своя, Прохладою Любве Своея утешаеши на жизненном пути и подаеши нам образ прощения и любви ко врагом нашим. Сию добродетель искренно просим у Тебе, Иисусе Сладчайший, и умиленно зовем: Аллилуия.

Икос 12

"Радосте Моя, присно радуйся!", - увещаваеши нас, Господи, чрез Апостола Павла. Сей радости ищем и мы ныне не токмо себе, но и гонителям нашим. Просим, Сладчайший, да их сердца растают в море любви Твоея, и ненависть и злоба яко дым да исчезнут, да во умилении сердец воззовут Ти: Иисусе, Солнце светозарное,

Иисусе, Радосте нескончаемая.

Иисусе, Милость неизреченная.

Иисусе, Любы недомыслимая.

Иисусе, Богатство нетленное.

Иисусе, Блаженство неисписанное.

Иисусе, Всепрощение безграничное.

Иисусе, Хлебе Небесный.

Иисусе, умудряяй слепцы.

Иисусе, возставляяй низверженныя.

Иисусе, смиряяй гордых.

Иисусе, возносяяй смиренных.

Иисусе, Радосте наша, даруй нам дар Любви к Тебе и к чадом Твоим погибающим!

Кондак 13

О Сладчайшая Любы наша, Иисусе Христе! Се ныне, взирая на страдания Твоя крестныя, приступаем и мы к Голгофе нашей, зря образ всепрощения гонящих Тя, купно с Тобою речем: "Господи, прости им, не ведают бо что творят!" Да будет для нас молитва сия хладом тонким на изнуренныя болью сердца наша, а для хулителей и гонителей наших - огнем прощения, попаляющим ненависть и злобу, да соединеннии Любовию Твоею в союзе любви и мира купно возопиим Тебе, Спасителю нашему: Аллилуия, Аллилуия, Аллилуия.

Сей Кондак читается трижды, затем Икос 1 и Кондак 1.

Молитва Источнику Любви Господу нашему Иисусу Христу в напастех чтомый

О Сладчайший Иисусе, Радосте наша! Ты выну покрываеши ны от бед и напастей, скорбей и болезней. Ты врачуеши ими закоренелыя во гресех сердца наша. Попущением Твоим врази зело устремишася на нас, водимые злобою, ненавистию и злохулением, хотяще погибели нашей. Но молим Тя, Любы Небесная, укрепи сердца наша и очисти от всякия скверны; даруй нам любовь ко врагом, заповеданную Тобою; помози благословляти, а не проклинати хулящих нас; добром воздавати за зло, молитвой и благодарением - за ненависть. Господи, вразуми сих заблудших и во гресех погибающих чад Твоих, да не погибнут в конец души их во ослеплении своем, но да искренно покаются и обратят сердца свои к Тебе, Спасителю нашему, да вси мы купно прославим имя Твое Святое: со Отцем и Святым Духом во веки веков. Аминь.

Тропарь Источнику Любви Господу нашему Иисусу Христу в напастех чтомый, глас 4

О распенших Тя моливыйся, любодушне Господи, и рабом Твоим о вразех молитися повелевый, ненавидящих и обидящих нас прости, и от всякаго зла и лукавства к братолюбному и добродетельному настави жительству, смиренно мольбу Тебе приносим; да в согласном единомыслии славим Тя, Единаго Человеколюбца.

Кондак Источнику Любви Господу нашему Иисусу Христу в напастех чтомый, глас 5

Якоже первомученик Твой Стефан о убивающих его моляше Тя, Господи, и мы припадающе молим, ненавидящих и обидящих нас прости, во еже ни единому от них нас ради погибнути, но всем спастися благодатию Твоею, Боже всещедрый.

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru