Миссионерско-апологетический проект "К Истине": "Иисус сказал… Я есмь путь и истина и жизнь; никто не приходит к Отцу, как только через Меня" (Ин.14:6)

РазделыВопросыНа злобуБиблиотекаПоиск


Православные акафисты / Акафист преподобному Аввакуму Черкасскому


Православные акафисты

Акафист преподобному Аввакуму Черкасскому

Память: 13 / 26 мая (Собор Черкасских новомучеников), неделя о мытаре и фарисее (воскресенье) (Собор новомучеников и исповедников Церкви Русской)

Преподобный Аввакум Старов был один из столпов Православия, храмов Духа Святого, молитвенников, чудотворцев, пророков, учителей и утешителей христиан в период советского безбожия и гонений на Церковь на Черкасской земле, являя верующим силу Божию. Имел дары прозорливости, целительства и рассуждения. Преподобного Аввакума просят укрепить веру, принять промысел Божий, помочь в болезнях, семейных, житейских искушениях, в заключении.

Преподобный Аввакум Черкасский. Икона

Преподобный Аввакум Черкасский. Икона

Кондак 1

Избранному воину небеснаго воинства и пастырю доброму Христова стада, за веру Православную зело пострадавшему, гонения и заключения претерпевшему, любвеобильному старцу и наставнику духоносному похвальныя приносим пения, ты же имеяй дерзновения ко Господу, даруй нам ревность к делам благочестия, веру православную в чистоте соблюсти и по вере жительствовати, да с любовию зовем ти:

Радуйся, святый исповедниче Аввакуме, присный о нас к Богу молитвенниче.

Икос 1

Ангельстей чистоте ревнуя, измлада возлюбив монашеское житие, отче Аввакуме, во благочестии подвизался еси, преподобным отцем продражанием, снискав любовь Божия Матери сугубую, и под сению Ея хранимому со умилением зовем ти:

Радуйся, благочестивый родителей отрасль честная.

Радуйся, достойный плод их воспитания.

Радуйся, пустынным отцем подражателю.

Радуйся, измлада иночества желателю.

Радуйся, неутомимый Богу работателю.

Радуйся, послушание христианское стяжавый.

Радуйся, от утробы матерни Богом избранный.

Радуйся, отче, к подвигу иночества призванный.

Радуйся, святый исповедниче Аввакуме, рисный о нас к Богу молитвенниче.

Кондак 2

Провидя Господь твою любовь к подвигам, восхоте да нарекут тя при крещении именем великомученика Димитрия Солунскаго, сим предрекая не токмо твою ревность, но и велия страдания, в них же непрестанно взывал еси: Аллилуия.

Икос 2

Разум выну имея бодрствующ, а сердце в любви горящее, плоть свою смиряюще постом и бдениями всехвальне отче Аввакуме, от меры в меру восходил еси в духовном делании, сим научая нас не охладевати к подвигом, да приобрящем богохвальное смирение, тебе же воззовем сице:

Радуйся, ангелу твоему хранителю тихая радость.

Радуйся, издетска познавый смирения сладость.

Радуйся, Великомученику Димитрию от крещения тезоименитый.

Радуйся, старче Божий, премудрый.

Радуйся, послушания рачителю.

Радуйся, чистоты блюстителю.

Радуйся, страстей победителю.

Радуйся, бесовских наваждений прогонителю.

Радуйся, святый исповедниче Аввакуме, присный о нас к Богу молитвенниче.

Кондак 3

Силою Всевышняго укрепляемый и его благодатию осеняемый, ангельский образ прием с именем Досифей и сим явно показуя, отче, яко ты в миру воистину Богом данный есть, просвещения, утешения и вразумления ради, а иноком честным для отеческаго о них попечения. В сем образе до смерти пребыл еси, преподобне, выну поя сице: Аллилуия.

Икос 3

Имея послушание, смирением растворенное, отче, восприял еси благодать чрез рукоположение во священство дарумемую, в нем же всеусердно послужил еси пастыреначальнику Христу, а после сего во игуменстве получил еси во управление обитель Медведовскую. Ты же отрекшись мира и вземше крест свой последовал еси Христу, научая чад своих житию праведному, сего ради вопием ти:

Радуйся, отче чадолюбивый.

Радуйся, пастырю усердный.

Радуйся, органе Духа Святаго.

Радуйся, ангелом подобный.

Радуйся, делателю винограда Христова.

Радуйся, указателю пути истиннаго.

Радуйся, покаяния учителю.

Радуйся, Христу верный служителю.

Радуйся, святый исповедниче Аввакуме, присный о нас к Богу молитвенниче.

Кондак 4

Бурею богоборчества одержима бысть Русь Святая некогда, егда богоборцы восставше на Русь избили многия верныя сыны и дщери Православныя Церкви и отечества; бысть же и брань междоусобная велия, от коей присно избавляй люди отечества твоего земнаго, досточудный отче, взывающих Богу: Аллилуия.

Икос 4

Слышаша вернии людие о твоем богоугоднем житии, отче Аввакуме, притекаху к тебе утешения и совета требуя, ты же подражая преподобному Серафиму Саровскому, с любовию принимал еси тех, скорбя со скорбящими и радуясь с радующимися, согревая страждущия сердца любовию и скорбь их теплотою молитв растворяя, прими же от нас похвалы сия:

Радуйся, страждущих утешителю.

Радуйся, враждующих умиротворителю.

Радуйся, неистовствующих вразумителю.

Радуйся, расколов обличителю.

Радуйся, Церкви Православныя верный сыне.

Радуйся, от мира возненавиденный.

Радуйся, Богом и паствою возлюбленный.

Радуйся, житием твоим послушанию нас научаяй.

Радуйся, святый исповедниче Аввакуме, присный о нас к Богу молитвенниче.

Рака с мощами преподобного Аввакума Черкасского

Рака с мощами преподобного Аввакума Черкасского

Кондак 5

Боготечною звездою явился еси, отче, братии Мошногорстей обители древней егда во архимандритстве восприял послушание настоятеля и благочиннаго всех монастырей в пределах града Киева сущих, и служил еси в ней до самого ея закрытия. Видев же запустения сея древния обители, не оставил ея убо, но смиренно подвизался еси в ней, Богом хранимей в послушании смотрителя, тайно совершая к Богу службы и выну Ему вопия: Аллиллуия.

Икос 5

Видевше в тебе, отче, люди вернии, столпа молитвы огненныя, от земли к небеси восходящия и ярко горяща среди обители Свято-Вознесенския, запустению преданныя, притекаху к тебе и тайно тобою окормление получающе, в мир тихую радость умиротворения и утешения несоша, сего ради взываем ти:

Радуйся, в вере Православней утвердителю.

Радуйся, надеждою на Бога укрепителю.

Радуйся, любовию к Нему возгревателю.

Радуйся, молитвами своими от бед защитителю.

Радуйся, похотей мира отвратителю.

Радуйся, козней диавола посрамителю.

Радуйся, Царства Небеснаго удостоивыйся.

Радуйся, в благодати Божии возрастателю.

Радуйся, святый исповедниче Аввакуме, присный о нас к Богу молитвенниче.

***

Читайте также:

  • Православные акафисты и каноны - постоянно пополняемый сборник канонических православных акафистов и канонов с древними и чудотворными иконами: Господу Иисусу Христу, Богородице, святым...
  • Православный молитвослов - постоянно пополняемый сборник православных молитв, канонов, псалтырь, толкования на молитвы и многое другое.

***

Кондак 6

Проповедниче усердный покаяния и богоугоднаго жития быв, отче, снискал еси сим любовь у паствы велию, у власть же имущих - ненависть лютую, ибо своею святостию, аки светом всепроникновенным обличал еси богоборцев и богохульников неистовство, сего ради зело страдал еси от них, не ведавших пети Богу: Аллилуия.

Икос 6

Возсиял еси, преподобне, светом благодатным во тьме нечестия сущим, гоним же быв от властей во град Черкассы, идеже купно с преподобномучеником Виталием жительствовал еси на поселении, терпя без ропота гонения и зде обрел еси чад страждущих, утешения ищущих, сих исповедовал, причащал и иныя требы совершал еси, сего ради тебе, исповеднику Христову, ныне воспеваем сице:

Радуйся, непоколебимым в вере пребываяй.

Радуйся, во страданиях Бога познаваяй.

Радуйся, Святых Тайн совершителю.

Радуйся, за паству свою Бога умилостивителю.

Радуйся, о гресех народа нашего плакателю.

Радуйся, молитв о всем мире возносителю.

Радуйся, в гонениех Бога благословителю.

Радуйся, врагов Церкви вразумителю.

Радуйся, святый исповедниче Аввакуме, присный о нас к Богу молитвенниче.

Кондак 7

Хотяй Человеколюбец Господь очистити в велиих страданиих сердце твое, преподобне, даде чашу горькую испити, слуги бо антихристовы влекоша тя в темницу, а оттуду на десять лет во ино узилище затвориша, идеже во гладе и хладе трудишася многолик исповедник земли русския. Ты же тамо превывающи, не токмо сам веру соблюл еси, но и собратий твоих во Христе укреплял еси, в милосердии подвизаяся, сего ради укрепился еси от десницы Господни и невредим сохранился еси, ради блага Церкви от безбожник гонимыя, непрестанно поя: Аллилуия.

Икос 7

Новую чашу страдания испив, отче, не возроптал еси, паче же во смирении пребываяй, кротостию врагов своих удивил еси, из них же неции познавши Бога, покаяшася убо во жестосердии своем, твоя бо любовь нелицемерная, яко огнь возжигала в сердцах людей, иже Бога не до конца отрекшихся, искреннюю веру и раскаяние, мы же за сия похвалу вопием ти:

Радуйся, молитвами своими херувимам подобный.

Радуйся, любовию огненною серафимов удивляяй.

Радуйся, образом страданий имеяй самого Христа.

Радуйся, Им же во страданиях укрепленный.

Радуйся, печальниче Святыя Руси.

Радуйся, о всем мире молитвенниче.

Радуйся, о нераскаянных слезы проливаяй.

Радуйся, имя Божие непрестанно призываяй.

Радуйся, святый исповедниче Аввакуме, присный о нас к Богу молитвенниче.

Кондак 8

Странник во юдоли земней быв, отче, поучал еси не искати благоденствия в житии сем, искати же токмо единаго на потребу: Царствия Божия. Плотию страждуще, духом пребывал еси пред престолом Всевышняго, сего ради, воспевая ангельское твое житие, укрепившему тя поем: Аллилуия.

Икос 8

Весь исполнен был кротости и смирения, отче Аввакуме, восприял еси узилище, яко некий монастырь, а труды тяжкие в нем, яко послушание Божие, сим снискал еси лбовь от страждущих соузников, им же во святем братстве соловецтем, служил еси, яко самому Христу, мы же ублажающе велию любовь твою ко страждущим зовем ти:

Радуйся, воине Христов непобедимый.

Радуйся, ангеле земный.

Радуйся, человече небесный.

Радуйся, крине соловецкия обители.

Радуйся, ваие древа Православия.

Радуйся, послушниче присный.

Радуйся, молитвенниче огневидный.

Радуйся, трудниче на ниве Христовой.

Радуйся, святый исповедниче Аввакуме, присный о нас к Богу молитвенниче.

Кондак 9

Вся паства твоя и духовнии чада возвеселишася зряще тя, исповедниче Христов, из узилища соловецкого возвратившагося, возблагодариша Отца Небеснаго за тя, духовнаго их отца, ты же от мирския суеты бегая и от духа безбожия, вземши яко оружие твердое, упование на Бога и рекши: "Иду в дом свой", возложил стопи своя во обитель Онуфриевскую, идеже подвизались сестри обители матронинския, имже стал еси отцем чадолюбивым, научая их всех в скорбех и гонениих воспевати Богу: Аллилуия.

Икос 9

Ветиею богомудрым и старцем духоносным был еси, преподобне отче, всех приходящих к тебе увещевал, поучал, вразумлял, исповедал и утешал еси, сего ради людие православнии притекаху к тебе, аки к источнику воды живыя, враг же спасения человеческаго, не терпя богоугодаго жития твоего, посла слуги своя да паки в узилище ввергнут тя. Господь же разруши совет сей, сотвори тя яко расслабленна, да мы зрящее вольное страдание твое, умильно воззовем ти:

Радуйся, велиим страданием душу свою очистивый.

Радуйся, велия терпения от Христа научивыйся.

Радуйся, расслаблением телесным диаволя совет расслабивый.

Радуйся, непрестанным бдением победивый того козни.

Радуйся, любити не мир, а токмо единаго Бога люди научивый.

Радуйся, и в скорбех своих, по слову апостола, радость имевый.

Радуйся, исповедниче Христов непобедимый.

Радуйся, подвигами отцем печерским древним уподобивыйся.

Радуйся, святый исповедниче Аввакуме, присный о нас к Богу молитвенниче.

Кондак 10

Спасению не токмо инокиням святыя обители послужившаго, но и всему миру ярче солнца просиявшаго, возлюбиша тя, отче, чада духовнии зело и бывша тебе утешением истинным, во всем последуя твоему смирению и образ тя истиннаго иночества имуще пред очесами своими выну; егда же власть безбожная хотяще отъяти тя от сестер обители, тии воспротившеся сему, показуя како подобает служити духовным отцам до самоотречения, сего ради вопием милосердному Богу: Аллилуия.

Икос 10

Стеною и ограждением молитвенным бысть старец Аввакум и Лебединской обители, в кую изгнани быша сестры пяти обителей близ града Черкассы сущих и тамо милостию Божиею получил есть преподобный старец исцеление, служаще Божественную Литургию, неопустительно исповедь приемля от всех приходящих с покаянием и быв всем вся, по слову апостола, сего ради радостно вопием ти:

Радуйся, Православия ревнителю.

Радуйся, безбожныя власти обличителю.

Радуйся, бесов посрамителю.

Радуйся, ангельская похвало.

Радуйся, от озлобления хранителю.

Радуйся, враждующих умиротворителю.

Радуйся, Черкасския земли достойное прозябение.

Радуйся, Руси Святыя радосте и увеселение.

Радуйся, святый исповедниче Аввакуме, присный о нас к Богу молитвенниче.

Кондак 11

Пение похвальное приносим ти, старче Аввакуме, обаче по достоянию не могуще восхвалити тя, предстателя нашего пред престолом Всевышняго, скорби велия терпящу от власти безбожной и во обители Лебединской, не плени тя злоба, духом бо выну предстоял еси пред Богом яко свеща. Тем же Господь дарова ти дар прозорливости, им же зрел еси дальняя яко близ сущая, и о закрытии святыя сея обители и о новых гонениих на Церковь от новоявленных слуг диавола ведуще, увещевал еси сестер во всем едино на Небеснаго Жениха Христа уповати и пети выну Ему: Аллилуия.

Икос 11

Свет Христов познавше из детства, отче, чрез все житие твое пронесл еси сей, преумножая в себе дары Духа Святаго, и сим светом просвещающе путь человеком, спасения желающим. Тебе же тьму неверия и еретическаго зловерия разгоняющему поем:

Радуйся, евангельская трубо велегласная.

Радуйся, свиреле Духа Святаго.

Радуйся, ангелов собеседниче.

Радуйся, Царства Небеснаго жителю.

Радуйся, Церкви Христови похвало.

Радуйся, земли Черкасския славо.

Радуйся, душ наших осияние.

Радуйся, собору страстотерпцев соловецких сопричастниче.

Радуйся, святый исповедниче Аввакуме, присный о нас к Богу молитвенниче.

Кондак 12

Благодать сугубую в тебе познающе, отче Аввакуме, Православнии людие не токмо в земнем житии искаху у тебе утешения, но паче же и по преставлении твоем молитвенника о себе неусыпнаго обретоша, ибо сама Царица Небесная, во святем образе своем Казанстем чествуемая, приемши душу твою от телеси, вознесла сию во обители праведных, идеже ты ныне выну воспеваеши Богу: Аллилуия.

Икос 12

Воспеваем преподобное житие твое, отче, и хвалим исповеднический подвиг твой, и страдания за Христа претерпенныя, наипаче же ублажаем честную кончину твою, ею бо ясно познали вси, яко был еси истинным служителем Божиим и Матери Господни чтителем, услыши же нас зовущих ти:

Радуйся, слуго верный Божия Матери.

Радуйся, Ей же в чистоте подражаяй.

Радуйся, сострадание ко всем имеяй.

Радуйся, никого же от притекавших к тебе презреваяй.

Радуйся, кротость и смирение стяжавый.

Радуйся, Царицею Небесною благословенный.

Радуйся, Ею же утешенный.

Радуйся, яко от Сыня Ея венец приял еси.

Радуйся, святый исповедниче Аввакуме, присный о нас к Богу молитвенниче.

Кондак 13

О великий старче преподобный отче Аввакуме, приими от чад твоих, зде собравшихся, малыя похвалы сия от любящих сердец возносимыя, и предстательством твоим пред престолом Всевышняго всех нас в вере истинней утверди, в доброделании укрепи и избави от враг видимых же и невидимых, от их козней соблюди и испроси нам у Господа Бога мирную кончину, от мытарств бесовских свобождение и причастие Царствия Небеснаго, да купно с тобою и со всеми святыми в вечней радости воспоем славу Творцу нашему: Аллилуия.

Сей кондак глаголи трижды.

Кондак 1

Избранному воину небеснаго воинства и пастырю доброму Христова стада, за веру Православную зело пострадавшему, гонения и заключения претерпевшему, любвеобильному старцу и наставнику духоносному похвальныя приносим пения, ты же имеяй дерзновения ко Господу, даруй нам ревность к делам благочестия, веру православную в чистоте соблюсти и по вере жительствовати, да с любовию зовем ти:

Радуйся, святый исповедниче Аввакуме, присный о нас к Богу молитвенниче.

Икос 1

Ангельстей чистоте ревнуя, измлада возлюбив монашеское житие, отче Аввакуме, во благочестии подвизался еси, преподобным отцем продражанием, снискав любовь Божия Матери сугубую, и под сению Ея хранимому со умилением зовем ти:

Радуйся, благочестивый родителей отрасль честная.

Радуйся, достойный плод их воспитания.

Радуйся, пустынным отцем подражателю.

Радуйся, измлада иночества желателю.

Радуйся, неутомимый Богу работателю.

Радуйся, послушание христианское стяжавый.

Радуйся, от утробы матерни Богом избранный.

Радуйся, отче, к подвигу иночества призванный.

Радуйся, святый исповедниче Аввакуме, рисный о нас к Богу молитвенниче.

***

Молитва преподобному Аввакуму Черкасскому:

  • Молитва преподобному Аввакуму Черкасскому. Преподобный Аввакум Старов был один из столпов Православия, храмов Духа Святого, молитвенников, чудотворцев, пророков, учителей и утешителей христиан в период советского безбожия и гонений на Церковь на Черкасской земле, являя верующим силу Божию. Имел дары прозорливости, целительства и рассуждения. Преподобного Аввакума просят укрепить веру, принять промысел Божий, помочь в болезнях, семейных, житейских искушениях, в заключении.

Акафист преподобному Аввакуму Черкасскому:

Житийная и научно-историческая литература о преподобном Аввакуме Черкасском:

 

 
Читать другие акафисты раздела "Православные акафисты"
 



Разделы проекта:

• Поиск
• Соцсети
• Карта сайта

• RSS-рассылка
• Subscribe
• Новые статьи

• О проекте
• Помощь
• О центре
• Контакты

• Библиотека
• Авторы
• Фильмы
• 3D-экскурсия

• Наша вера
• Догматика
• Таинства
• Каноны
• Литургика

• Церковь
• Благочестие
• О посте

• Буддизм
• Индуизм
• Карма
• Йога

• Иудаизм
• Католичество
• Протестанты
• Лжеверие

• Атеизм
• Язычество
• Секты
• Психокульты

Читайте нас в социальных сетях

• Ваши вопросы
• На злобу дня
• Книга

• Апологетика
• Наши святые
• Миссия

• Молитвослов
• Акафисты
• Календарь
• Праздники

• Мы - русские!
• ОПК в школе
• Чтения
• Храмы

• Нравы
• Психология
• Добрая семья
• Педагогика
• Демография

• Патриотизм
• Безопасность
• Вакцинация

• Оккультизм
• Веганство
• Гомеопатия
• Астрология

• Аборты
• Ювенальщина
• Содом ныне
• Наркомания

• Лженаука
• MLM

• Самоубийство



© Миссионерско-апологетический проект "К Истине", 2004 - 2024

При использовании наших оригинальных материалов просим указывать ссылку:
Миссионерско-апологетический "К Истине" - www.k-istine.ru

Контакты редакции

Top.Mail.Ru